1-2. ?From wanem ol Kristin tede oli intres long buk blong Levitikas?

APOSOL POL i talem long yangfala fren blong hem Timoti se: “Olgeta tok blong Baebol oli kamaot long God fastaem . . . Ol tok ya i stret gud.” (2 Tim. 3:16) Hemia i minim buk blong Levitikas tu. ?Wanem tingting blong yu long buk ya? Maet samfala oli ting se buk ya i fulap long ol rul we oli no save givhan long yumi tede, be ol trufala Kristin oli gat defren tingting.

² Nating se oli raetem buk blong Levitikas samwe long 3,500 yia finis, be Jehova i lukaotgud long hem ‘blong i tijim yumi.’ (Rom 15:4) From we buk blong Levitikas i soemaot tingting mo filing blong Jehova, yumi wantem lanem sam samting long hem. I gat plante samting we yumi save lanem long buk ya we i kamaot long God. Bambae yumi tokbaot fo samting.

3. ?From wanem ol man Isrel oli mekem sakrefaes evri yia long Dei Blong Stretem Sin?

³ Fas samting we yumi lanem: Jehova i mas glad long yumi blong i save glad long sakrefaes blong yumi. Evri yia, long Dei Blong Stretem Sin, ol man Isrel oli kam wanples mo oli mekem sakrefaes long ol animol. !Ol sakrefaes ya oli mekem ol man Isrel oli tingbaot se oli sinman mo oli mas mekem olgeta oli klin! Be bifo we hae pris i tekem blad blong animol i go long Rum we i Tabu we i Tabu, hem i mas mekem wan narafala wok.  Wok ya i moa impoten long sakrefaes blong tekemaot sin blong ful nesen blong Isrel.

4. Folem Levitikas 16:12, 13, ?hae pris i mekem wanem long faswan taem we hem i go insaed long rum ya we i Tabu we i Tabu long Dei Blong Stretem Sin? (Yu luk pija long fran pej.)

⁴ Ridim Levitikas 16:12, 13. Traem tingbaot ol samting we i hapen long Dei Blong Stretem Sin: Hae pris i go insaed long haos tapolen blong God. I gat tri taem we hae pris i mas go insaed long Rum ya we i Tabu we i Tabu, mo hemia faswan taem. Long wan han, hem i holem insens we i gat gudfala smel, mo long nara han hem i holem wan sensa we oli wokem long gol. Sensa ya i fulap long sakol faea. Nao hem i go stanap long fored blong kaliko we i blokem Rum we i Tabu we i Tabu. Wetem bigfala respek, hem i go insaed mo i stanap long fored blong bokis ya we i Saen blong Promes blong God. !Long taem ya i olsem we hem i stanap long fored blong Jehova God! Ale hem i kafsaedem insens sloslo i go long sakol faea, mo rum ya i fulap long gudfala smel. * Biaen hem i go insaed bakegen mo i karem blad blong animol blong tekemaot sin. Makem se hem i bonem insens bifo we hem i givim blad blong animol i go long God.

5. ?Insens we hae pris i bonem long Dei Blong Stretem Sin i tijim yumi long wanem?

⁵ ?Insens we hae pris i bonem long Dei Blong Stretem Sin i tijim yumi long wanem? Baebol i soemaot se ol prea we ol gudfala man blong Jehova oli mekem i olsem insens. (Sam. 141:2; Rev. 5:8) Tingbaot se hae pris i gat bigfala respek taem hem i karem insens i kam long fored blong Jehova. Long sem fasin, taem yumi prea i go long Jehova, i gud blong prea wetem bigfala respek. Yumi glad tumas se God ya we i wokem heven mo wol i letem yumi i kam klosap long hem, olsem wan pikinini we i kam klosap long papa blong hem. (Jem. 4:8) !Hem i wantem se yumi fren wetem hem! (Sam. 25:14) Yumi glad tumas long blesing ya, taswe yumi no wantem mekem hem i harem nogud.

6. ?Yumi lanem wanem long fasin blong hae pris blong bonem insens bifo we hem i mekem sakrefaes mo long eksampol blong Jisas?

⁶ Tingbaot se hae pris i mas bonem insens bifo we hem i mekem sakrefaes. Long rod ya, hem i mekem Jehova i glad long hem, bifo we hem i mekem sakrefaes. ?Yumi lanem wanem? Taem Jisas i stap long wol, bifo we hem i ded blong sevem ol man, hem i mas mekem wan samting we i impoten moa. ?Wanem samting? Long ful laef blong hem long wol ya, hem i holemstrong long Jehova, blong mekem se Jehova i save glad long sakrefaes blong hem. Long rod ya, hem i stap pruvum se i impoten blong mekem laef blong yumi i laenap wetem samting we Jehova i wantem. Mo tu, hem i pruvum se rul blong Papa blong hem i stret.

7. ?From wanem evri samting we Jisas i mekem taem hem i stap long wol i mekem Papa blong hem i glad?

⁷ Long ful laef blong Jisas long wol ya, hem i gohed nomo blong obei long Jehova. Mo hem i gat strong tingting blong pruvum se rul blong Papa blong hem i stret, nating se hem i fesem hadtaem, mo hem i save se bambae hem i harem nogud tumas taem hem i ded. (Fil. 2:8) Taem Jisas i fesem sam hadtaem, hem i prea strong long God “long bigfala voes, mo i krae i go long hem.” (Hib. 5:7) Prea blong hem we i kamaot long hat i soemaot se hem i holemstrong long Jehova mo i rere blong obei oltaem long God. Long tingting blong Jehova, ol prea we Jisas i mekem oli olsem gudfala smel blong insens.  Evri samting we Jisas i mekem taem hem i stap long wol ya i mekem Papa blong hem i glad, mo i leftemap hae rul blong hem.

8. ?Olsem wanem yumi mekem sem mak olsem Jisas?

⁸ Yumi save mekem sem mak olsem Jisas, taem yumi mekem bes blong yumi blong obei long Jehova mo holemstrong long hem. Taem wan samting i traem yumi, yumi prea wetem fulhat mo askem help blong Jehova, from we yumi wantem mekem hem i glad. Taem yumi mekem olsem, yumi soemaot se yumi wantem we Jehova i rulum yumi. Jehova bambae i no lesin long prea blong yumi sipos yumi stap mekem samting we hem i no laekem. Be sipos yumi mekem laef blong yumi i laenap wetem samting we Jehova i wantem, ol prea we oli kamaot long hat blong yumi bambae oli olsem insens we Jehova i harem gud long smel blong hem. Mo yumi save sua se taem yumi obei mo holemstrong long Papa blong yumi long heven, hem i glad tumas.—Prov. 27:11.

9. ?From wanem ol man Isrel oli mekem sakrefaes ya we oli bonem haf mo oli kakae haf?

⁹ Seken samting we yumi lanem: Yumi mekem wok blong Jehova blong talem tangkiu long hem. Blong kasem save samting ya, bambae yumi tokbaot wan narafala impoten samting long wosip blong ol man Isrel, hemia sakrefaes ya we oli bonem haf mo oli kakae haf. * Buk blong Levitikas i talem se wan man Isrel i save mekem sakrefaes ya “blong talem tangkiu” long Jehova. (Lev. 7:11-13, 16-18) Hem i mekem sakrefaes ya from we hem nomo i wantem, i no from we hem i mas mekem. Mo  tu, from we hem i lavem God blong hem Jehova. Man ya, famle blong hem, mo ol pris, oli kakae mit blong animol ya, be oli givim sam haf i go long Jehova. ?Weswan haf?

10. ?Olsem wanem ol sakrefaes we Levitikas 3:6, 12, 14-16 i tokbaot, oli sem mak long wok we Jisas i mekem blong Jehova?

¹⁰ Namba tri samting we yumi lanem: From we yumi lavem Jehova, yumi givim sakrefaes we i beswan. Long tingting blong Jehova, ol haf blong animol we i beswan, hemia ol gris. Hem i talem tu se sam haf insaed, olsem tufala kidni, oli spesel. (Ridim Levitikas 3:6, 12, 14-16.) Taswe, taem wan man Isrel i givim ol kidni mo gris i go long Jehova, Jehova i glad tumas. Man we i mekem sakrefaes olsem, i soemaot se hem i wantem givim bes blong hem long God. Long sem fasin, Jisas i glad blong givim bes blong hem long Jehova, taem hem i mekem wok blong Jehova long ful laef blong hem from we i lavem Hem. (Jon 14:31) Jisas i harem gud tumas blong mekem samting we God i wantem, mo hem i lavem loa blong God. (Sam 40:8) !Jehova i mas harem gud tumas blong luk we Jisas i glad blong mekem wok blong hem!

11. ?Olsem wanem wok we yumi mekem i sem mak long sakrefaes ya we oli bonem haf mo oli kakae haf? ?Mo from wanem hemia i leftemap tingting blong yumi?

¹¹ Ol sakrefaes ya we oli bonem haf mo oli kakae haf, oli sem mak long wok we yumi mekem blong Jehova, from we oli soemaot tingting we yumi gat long hem. Yumi givim bes blong yumi long Jehova, from we yumi lavem hem long olgeta hat blong yumi. !Jehova i mas harem gud tumas blong luk plante milian man we oli mekem wok blong hem from we oli lavem hem! Hem i tinghae long wok we yumi mekem, mo tingting we i pusum yumi blong mekem wok. !Samting ya i leftemap tingting blong yumi! Yu traem tingbaot, sipos yu yu wan olfala we yu no moa save mekem plante wok, yu save sua se Jehova i kasemsave long yu. Maet yu ting se sakrefaes blong yu i smol tumas, be Jehova i luk bigfala lav we i pusum yu blong mekem samting we yu naf blong mekem. Hem i glad taem yu mekem bes blong yu.

12. ?Sakrefaes ya we oli bonem haf mo oli kakae haf i mekem yu sua long wanem?

¹² ?Ol sakrefaes ya we oli bonem haf mo oli kakae haf, oli tijim yumi long wanem? Taem faea i kakae ol haf blong animol we oli beswan, smok i go antap mo i mekem Jehova i glad. Taswe yu save sua se Jehova tu i glad, taem yu mekem bes blong yu long wok blong hem. (Kol. 3:23) Traem tingbaot bigfala smael we i soemaot glad blong hem. Nating se yu mekem plante wok o smol nomo, be hem i luk wok ya olsem wan samting we i gud tumas we bambae hem i no save fogetem.—Mat. 6:20; Hib. 6:10.

13. Folem Levitikas 9:23, 24, ?olsem wanem Jehova i soemaot se hem i glad long ol niufala pris ya?

¹³ Namba fo samting we yumi lanem: Jehova i stap blesem oganaesesen blong hem long wol. Tingbaot samting we i hapen long 1512 bifo Kraes, taem oli stanemap haos tapolen blong God long stamba blong Hil ya Sinae. (Eks. 40:17) Moses i mekem wan seremoni blong putumap Eron mo ol boe blong hem oli kam pris. Ol man Isrel oli kam wanples blong luk ol niufala pris ya taem oli mekem fas sakrefaes blong olgeta. (Lev. 9:1-5) ?Olsem wanem Jehova i soemaot se hem i glad long olgeta? Taem Eron mo Moses i blesem ol man, Jehova i mekem faea i kamdaon mo i bonem sakrefaes we i stap long olta.—Ridim Levitikas 9:23, 24.

14. ?Ol pris ya blong Isrel oli sado blong hu?

 ¹⁴ ?Faea ya we i kamdaon i soemaot wanem? Faea ya i soemaot se Jehova i sapotem fulwan Eron mo ol boe blong hem, olsem ol pris we hem i jusumaot. Taem ol man Isrel oli luk we Jehova i glad long ol pris ya, oli kasem save se olgeta tu oli mas sapotem ol pris ya. ?Samting ya i impoten long yumi tede? !Yes! Ol pris long Isrel oli sado blong ol pris we oli hae moa, hemia Kraes, we hem i Hae pris, mo ol 144,000 pris we oli wok wetem hem long heven.—Hib. 4:14; 8:3-5; 10:1.

15-16. ?Olsem wanem Jehova i soemaot se hem i glad long “gudfala slef we i waes”?

¹⁵ Long 1919, Jisas i putumap wan smol grup blong ol tabu brata blong oli kam “gudfala slef we i waes.” Slef ya i lidim wok blong prij mo i ‘givim kakae long stret taem,’ long ol man blong Kraes. (Mat. 24:45) ?Olsem wanem? ?Yumi luk se God i glad long gudfala slef ya we i waes?

¹⁶ Setan mo ol man blong hem oli traem blong stopem wok blong gudfala slef ya. Be Jehova i mekem se wok ya i gohed. Nating se i gat tu bigfala faet long wol, i gat trabol long saed blong mane long fulwol, mo ol man oli ronem mo kilim ol man blong Jehova, be gudfala slef ya i gohed nomo blong givim kakae long ol man blong Kraes. Traem tingbaot: !Tede yumi kasem fulap save long ol buk we oli wokem long bitim 900 lanwis mo oli fri nomo! Hemia i soemaot klia se Jehova i stap sapotem slef ya. I gat wan narafala samting tu we i soemaot se Jehova i stap blesem ol man blong hem: hemia wok blong prij. Tede, ol man blong hem oli stap talemaot gud nius ya “long olgeta ples long wol.” (Mat. 24:14) I klia nomo se Jehova i stap lidim mo blesem bigwan oganaesesen blong hem tede.

17. ?Olsem wanem yumi save sapotem oganaesesen blong Jehova?

 ¹⁷ I gud yu tingbaot se: ‘?Mi mi glad blong joen wetem oganaesesen blong Jehova long wol?’ Long taem blong Moses mo Eron, Jehova i sanem faea i kamdaon blong soemaot se hem i glad long olgeta we hem i putumap. Tede tu hem i soemaot klia se hem i glad long oganaesesen blong hem. I gat plante samting we yumi save talem tangkiu from. (1 Tes. 5:18, 19) ?Olsem wanem yumi save sapotem oganaesesen blong Jehova? Yumi mas folem ol advaes blong Baebol we yumi kasem long ol buk mo ol video, ol miting, mo ol asembli. Mo tu, yumi mas mekem evri samting we yumi naf blong mekem long wok blong prij mo tij.—1 Kor. 15:58.

18. ?Yumi gat strong tingting blong mekem wanem?

¹⁸ Yumi mas gat strong tingting blong folem ol samting we yumi lanem long buk blong Levitikas. Taswe, yumi wantem mekem se Jehova i glad long ol sakrefaes blong yumi, mo yumi wantem mekem wok blong Jehova blong talem tangkiu long hem. Yumi gohed blong givim sakrefaes we i beswan long Jehova from we yumi lavem hem long olgeta hat blong yumi. Mo yumi mekem bes blong yumi blong sapotem oganaesesen we Jehova i stap blesem tede. !Sipos yumi mekem olsem, bambae yumi soemaot se yumi glad long bigfala blesing ya blong mekem wok blong Jehova olsem wan Witnes blong hem!