Mi mi bon long 1983. Long ol faswan yia blong laef blong mi, mi mi wan pikinini we i helti gud, be taem mi gat ten yia, bodi blong mi i soa olbaot. Samwe tu yia biaen, mi wekap long wan moning mo mi no moa save muv. Nomata se mi traem blong muvum ol leg blong mi, be oli no save muv. Stat long dei ya, mi no moa save wokbaot. Mo tu, sik ya i mekem se mi no moa gru. Tede mi smol yet olsem wan pikinini nomo.

Sam manis afta we mi sik mo mi stap nomo long haos, tu Witnes Blong Jehova i kam visitim mi. Taem ol visita oli stap kam, plante taem mi traem blong haed, be long dei ya, mi letem tufala woman ya i toktok long mi. Taem tufala i stap tokbaot Paradaes, mi tingbaot samting we mi harem taem mi gat samwe faef yia. Long taem ya, Jetro, wan misinari we i stap long Surinam, hem i bin stap visitim vilej blong mifala wan taem long wan manis, mo hem i stadi Baebol wetem papa blong mi. Hem i kaen oltaem long mi, mo mi mi laekem hem. Mo tu, tufala abu blong mi oli stap tekem mi mi go long sam miting blong ol Witnes long vilej blong mifala. Taswe, taem wan long tufala woman ya we nem blong hem Florens, i askem sipos mi wantem lanem moa, mi se yes.

Florens i kambak wetem hasban blong hem Justus, mo tufala i stat blong stadi Baebol wetem mi. Taem tufala i luk se mi no save rid, tufala i halpem mi blong rid. Smoltaem afta, mi save rid mi wan. Be wan dei, kapol ya i talem long mi se asaenmen blong tufala i jenis, oli mas go prij long Surinam. Sore tumas, i no gat wan narafala long Orealla we i save gohed blong stadi Baebol wetem mi. Be mi glad se Jehova i no fogetem mi.

I no longtaem afta, Floyd we i wan paenia, i kamtru long Orealla, nao taem hem i stap prij long ol haos wanwan, hem i faenem mi. Taem hem i tokbaot Baebol stadi long mi, mi smael. Ale hem i askem se: “?From wanem yu smael?” Mi talem se mi mi stadi finis long buklet ya ?Wanem Samting We God i Wantem Yumi Blong Mekem?, mo mi statem buk ya Save Blong Lidim Yu Long Laef We i No Save Finis. * Biaen mi eksplenem from wanem mi no moa stadi. Ale mi finisim Save buk wetem Floyd, be afta hem tu, oli jenisim asaenmen blong hem. Mo hemia i mekem se mi no gat wan Baebol tija bakegen.

Be long 2004, tufala spesel paenia ya Granville mo Josua, tufala i kasem asaenmen blong kam prij long Orealla. Tufala i stap prij long ol haos  wanwan nao tufala i faenem mi. Taem tufala i askem sipos mi wantem stadi, mi smael. Mi askem blong tufala i stadi wetem mi long Save buk, stat long stat blong hem. Mi wantem luk sipos bae tufala i tijim sem samting we ol narafala tija oli bin tijim long mi. Biaen Granville i talem se i gat ol miting long vilej. Klosap ten yia nao we mi no lego hom blong mi, be nating se i olsem, mi mi wantem tumas blong joen long ol miting ya. Ale Granville i kam tekem mi mo i putum mi long wan wiljea, mo i pusum mi mi go long Haos Kingdom.

Sam taem i pas, ale Granville i enkarejem mi blong joen long Tiokratik Skul. Hem i talem se: “Yu yu handikap, be yu save toktok. Wan dei, bambae yu givim wan pablik tok. Samting ya bambae i hapen.” Gudfala toktok blong hem i mekem se mi gat strong tingting.

Mi stat blong joen long wok blong prij wetem Granville. Be ol rod blong vilej oli nogud blong wiljea i pas long olgeta. Ale mi askem sipos Granville i save putum mi long wan wilbara mo i pusum mi. Plan ya i wok gud. Long Eprel 2005, mi baptaes. I no longtaem afta, ol brata oli trenem mi blong lukaot long ol buk blong kongregesen, mo long saon blong Haos Kingdom.

Sore tumas, be long 2007, papa blong mi i ded long wan aksiden blong bot. Famle blong mi i harem nogud tumas. Granville i prea wetem mifala, mo i serem sam vas blong Baebol blong leftemap tingting blong mifala. Tu yia biaen, mifala i sek nogud long wan narafala trabol: Granville i ded long wan aksiden blong bot.

Long smol kongregesen blong mifala we i stap sore from brata ya, i gat wan man blong givhan nomo, be i no moa gat elda. Mi mi harem nogud tumas from ded blong Granville, hem i wan gudfala fren blong mi. Hem i givhan long mi oltaem blong kasem samting we mi nidim long spirit mo long bodi. Long nekis miting afta long ded blong hem, oli askem mi blong ridim ol haf blong Wajtaoa Stadi. Mi ridim tufala faswan haf nomo, be biaen mi stat blong krae mo mi no moa save stop. Ale mi mas aot long platfom.

Mi stat blong harem gud bakegen taem ol brata blong wan narafala kongregesen oli kam blong halpem mifala long Orealla. Mo tu, branj ofis i sanem Kojo we i wan spesel paenia, i kam. Mi mi glad tumas taem mi luk mama blong mi mo smol brata blong mi oli stadi mo biaen oli baptaes. Biaen, long Maj 2015, oli putumap mi mi kam wan man blong givhan. Sam taem i pas, ale mi givim faswan pablik tok blong mi. Long dei ya, mi smael mo mi krae taem mi tingtingbak long tok we Granville i bin talem long mi plante yia bifo se: “Wan dei, bambae yu givim wan pablik tok. Samting ya bambae i hapen.”

Tru long ol program blong JW Brodkasting^®, mi lanem long saed blong ol narafala Witnes we oli stap long sem situesen olsem mi. Nating se oli handikap, be oli naf blong mekem plante samting mo oli gat wan hapi laef. Long saed blong mi, mi tu mi save mekem sam samting. Mi mi wantem tumas blong givim paoa we mi gat yet i go long Jehova, mo hemia i pulum mi blong kam wan fultaem paenia. !Mo long Septemba 2019, mi sek bigwan long wan nius we mi no ekspektem nating! Long manis ya, oli putumap mi mi kam wan elda long kongregesen blong mifala we i gat samwe 40 pablisa long hem.

Mi mi talem bigfala tangkiu from ol gudfala brata mo sista, we oli stadi wetem mi mo oli halpem mi blong mi save mekem minista wok blong mi. Antap moa, mi mi glad tumas se Jehova i no fogetem mi.