1-2. ?Wanem tri risen blong soemaot long ol brata sista se yumi lavem olgeta oltaem?

YUMI gat gudfala risen blong soemaot long ol brata sista se yumi lavem olgeta oltaem. ?Wanem sam long ol risen ya? Baebol i ansa long kwestin ya, i se: “Yu no mas letem fasin blong yu blong lavem man oltaem, mo blong holem promes, i gowe long yu. . . . Olsem nao, God mo ol man bambae oli glad long yu, mo oli luksave se yu yu gat hed.” “Man we i gat lav, hem i stap mekem i gud long hem wan.” “Man we i stap folem stret fasin mo i stap lavem man oltaem bambae i kasem laef.”—Prov. 3:3, 4; 11:17, fut.; 21:21.

² Ol tok blong ol vas ya oli soemaot tri risen from wanem yumi mas lavem man oltaem. Faswan, taem yumi soemaot se yumi lavem man oltaem, yumi sas long ae blong God. Nambatu, taem yumi soemaot se yumi lavem man oltaem, hemia i mekem i gud long yumi wan. Eksampol, yumi save frengud wetem narafala longtaem. Nambatri, taem yumi soemaot se yumi lavem man oltaem, bambae yumi kasem ol blesing long fiuja, inkludum laef we i no save finis. Yes, yumi gat gudfala risen blong folem ol tok blong Jehova we i se: “fasin we yufala i mekem long ol narafala i mas soemaot se yufala i lavem man oltaem mo yufala i gat sore.”—Sek. 7:9.

3. ?Wanem ol kwestin we bambae yumi ansarem long stadi ya?

³ Long stadi ya bambae yumi faenem ansa blong fo kwestin. ?Yumi mas soemaot long hu se yumi lavem man oltaem? ?Yumi save lanem wanem long buk blong Rut long saed blong fasin blong lavem man oltaem? ?Olsem wanem yumi save soemaot fasin ya tede? ?Olgeta we oli soemaot fasin ya oli kasem wanem blesing?

4. ?Olsem wanem yumi save folem fasin blong Jehova blong lavem man oltaem? (Mak 10:29, 30)

⁴ Olsem we yumi lanem long las stadi, Jehova i soemaot nomo fasin blong lavem man oltaem long ol man we oli lavem hem mo oli wosipim hem. (Dan. 9:4) Yumi wantem “folem fasin blong God, olsem ol pikinini we hem i lavem olgeta tumas.” (Efes. 5:1) Taswe, yumi wantem soemaot long ol brata sista blong yumi long kongregesen se yumi lavem olgeta oltaem.—Ridim Mak 10:29, 30.

5-6. ?Tok ya “holemstrong” i minim wanem?

⁵ Taem yu kasemsave se fasin blong lavem man oltaem i minim wanem, bambae i isi blong yu soemaot fasin ya long ol brata sista. Blong kasemsave gud moa long fasin ya, bambae yumi skelem fasin ya wetem fasin blong holemstrong long narafala. Traem tingbaot wan eksampol.

⁶ Tede, wan wokman we i wok long wan kampani blong plante yia, yumi save talem se hem i holemstrong long wok blong hem. Nating se i olsem, maet long olgeta yia we hem i wok, hem i neva mitim ol bos blong kampani ya. Maet hem i no agri long sam desisen we kampani ya i mekem. Mo maet hem i no laekem kampani ya tu, be hem i glad se hem i gat wan wok we i save givim mane long hem. Bambae hem i gohed nomo blong wok long ples ya kasem we hem i ritae, o i fanem wan narafala wok we i gud moa.

7-8. (1) ?Wanem i pulum man blong soemaot fasin ya blong lavem man oltaem? (2) ?Bambae yumi tokbaot wanem long buk blong Rut?

⁷ Samting we i pulum man blong soemaot fasin blong holemstrong, i defren long samting we i pulum man blong soem fasin ya blong lavem man oltaem. Long Baebol, ?from wanem ol man blong God oli soem fasin ya blong lavem man oltaem? Olgeta we oli soem lav ya oli no jes mekem from we oli mas mekem, be from we hat blong olgeta nao i pulum olgeta blong soemaot fasin ya. Tingbaot eksampol blong Deved. Hem i lavem Jonatan tumas from we hat blong hem nao i pulum hem blong mekem olsem, nating se papa blong Jonatan i wantem kilim Deved i ded. Plante yia afta we Jonatan i ded, Deved i gohed blong soemaot lav ya long Mefiboset we i pikinini blong Jonatan.—1 Saml. 20:9, 14, 15; 2 Saml. 4:4; 8:15; 9:1, 6, 7.

⁸ Yumi save lanem plante samting long buk blong Rut, long saed blong fasin blong lavem man oltaem. ?Wanem ol lesen long fasin blong lavem man oltaem, we ol man long buk ya oli soemaot? ?Olsem wanem yumi save folem ol lesen ya insaed long kongregesen blong yumi? *

9. ?From wanem Naomi i ting se Jehova nao i mekem trabol i kasem hem?

⁹ Buk blong Rut i tokbaot stori blong Naomi, Rut we i waef blong boe blong hem, mo Boas, wan man we i lavem God mo i wan famle blong hasban blong Naomi. From we i gat hadtaem blong kasem kakae long Isrel, Naomi, hasban blong hem, wetem tufala boe blong hem oli muv i go long Moab. Long ples ya, hasban blong Naomi i ded. Mo tufala boe blong hem i mared, be sori tumas, tufala tu i ded. (Rut 1:3-5; 2:1) Ol trabol ya oli mekem Naomi i harem nogud tumas. Tingting blong hem i foldaon bigwan mo hem i ting se Jehova nao i mekem ol trabol ya i kasem hem. Makem samting we hem i talem long  saed blong God, i se: “Han blong Jehova i agensem mi finis.” “God Ya We i Gat Olgeta Paoa, i letem laef blong mi i kam nogud.” Mo hem i talem tu se: “Jehova i agensem mi mo hem i mekem trabol i kasem mi.”—Rut 1:13, 20, 21.

10. ?Wanem tingting blong Jehova long ol tok we Naomi i talem?

¹⁰ ?Wanem tingting blong Jehova long ol toktok ya we Naomi i talem? Hem i no lego Nomi, be hem i gohed blong soem sore long hem. Jehova i kasemsave se fasin blong mekem i strong tumas long narafala “i save mekem wan waes man i kam krangke.” (Pri. 7:7) Naomi i nidim help blong luksave se Jehova i stap yet wetem hem. ?God i mekem wanem blong halpem hem? (1 Saml. 2:8) Hem i pulum Rut blong i soemaot fasin ya blong lavem man oltaem long Naomi. Rut i wantem soem lav long Naomi mo givhan long hem blong i no harem nogud tumas mo luksave se Jehova i stil lavem hem. ?Yumi lanem wanem long eksampol blong Rut?

11. ?From wanem plante brata sista oli givhan long olgeta we oli harem nogud mo tingting i foldaon?

¹¹ Fasin blong lavem man oltaem bambae i pulum yumi blong halpem olgeta we oli harem nogud. Olsem Rut we i neva lego Naomi, tede plante brata sista oli glad nomo blong halpem olgeta long kongregesen we tingting blong olgeta i foldaon mo oli harem nogud. Oli lavem ol brata sista blong olgeta mo oli wantem mekem eni samting we oli save mekem blong givhan. (Prov. 12:25, fut.; 24:10) Hemia i laenap wetem tok blong aposol Pol we i se: “Yufala i mas toktok blong leftemap tingting blong olgeta we oli harem nogud, mo yufala i mas givhan long olgeta we oli no strong, mo yufala i mas gat longfala tingting long evriwan.”—1 Tes. 5:14.

12. ?Wanem beswan rod blong givhan long ol brata sista we tingting blong olgeta i foldaon?

¹² Plante taem, beswan rod blong givhan long ol brata sista we tingting blong olgeta i foldaon, hemia taem yu lesin gud mo yu talem long olgeta se yu lavem olgeta. Jehova i glad tumas taem yu mekem samting blong givhan long wan man blong hem. (Sam 41:1) Ol Proveb 19:17 i talem se: “Man we i stap mekem i gud long olgeta we narafala i luklukdaon long olgeta, i olsem we hem i givim samting long Jehova blong i yusum fastaem, mo bambae Hem i pembak hem from samting we hem i mekem.”

13. ?Olsem wanem Rut i defren long Opa? ?Olsem wanem Rut i soem se hem i lavem man oltaem? (Yu luk pija long fran pej.)

¹³ Yumi kasemsave moa long fasin blong lavem man oltaem, taem yumi luk samting we i hapen long Naomi, afta we hasban mo tufala boe blong hem i ded. Taem Nomi i harem se “Jehova i tingbaot ol man blong hem bakegen, i stap givim kakae long olgeta,” hem i disaed blong gobak long ples blong hem. (Rut 1:6) Long stat, tufala waef blong tufala boe  blong hem oli folem hem. Be taem oli stap wokbaot i go, Naomi i talem tri taem long tufala woman ya blong gobak long Moab. ?Wanem i hapen? Yumi ridim se: “Opa i kis long mama blong hasban blong hem, nao i gobak. Be Rut i no lego hem nating.” (Rut 1:7-14) Opa i mekem samting we Naomi i talem, hem i gobak long Moab. Be Rut i mekem moa long wanem we Naomi i talem long hem. Hem tu i fri blong gobak, be hem i jusum blong no lego Naomi. (Rut 1:16, 17) Hem i mekem olsem i no from we hem i mas mekem, be from we hem i wantem blong mekem. Desisen blong Rut i soem se hem i gat fasin ya blong lavem man oltaem. ?Yumi lanem wanem long stori ya?

14. (1) ?Olsem wanem ol brata sista tede oli save folem fasin blong Rut? (2) Folem Hibru 13:16, ?olsem wanem yumi save mekem God i glad?

¹⁴ Fasin blong lavem man oltaem bambae pulum yumi blong traehad moa blong givhan long narafala. Tede tu plante brata sista oli soemaot lav ya long ol narafala Kristin, nating se oli neva mitim olgeta. Eksampol, taem wan disasta i hapen, kwiktaem nomo oli wantem givhan. Taem wan long kongregesen i gat problem long saed blong mane, oli traehad kwiktaem blong faenem rod blong halpem hem. Olsem ol fas Kristin long Masedonia, ol brata sista tede tu oli mekem spesel traehad blong givhan. “Samtaem oli givim samting we i bitim wanem we oli gat” blong givhan long olgeta we oli nidim help. (2 Kor. 8:3) !Jehova i glad tumas taem oli soemaot fasin blong lavem man oltaem!—Ridim Hibru 13:16.

15-16. ?Rut i soemaot olsem wanem se hem i no givap?

¹⁵ Yumi save lanem sam gudfala lesen long stori blong Rut mo Naomi long Baebol. Naoia bambae yumi tokbaot sam long olgeta.

¹⁶ No givap. Taem Rut i talem se bambae hem i folem Naomi i go long Juda, fastaem Naomi i traem blong stopem hem. Be Rut i no givap. ?Wanem i kamaot from? “Taem Naomi i luk se Rut i wantem tumas blong go wetem hem, hem i no moa blokem hem.”—Rut 1:15-18.

17. ?Wanem bambae i givhan long yumi blong no givap kwiktaem?

¹⁷ Lesen: I nidim longfala tingting blong halpem olgeta we oli harem nogud, so yumi no mas givap. Wan sista we i nidim help, maet long stat bambae i no wantem we yumi halpem hem. * Be yet, from we yumi lavem man oltaem, bambae yumi mekem bes blong yumi blong no lego hem. (Gal. 6:2) Yumi hop se bambae hem i jenisim tingting blong hem mo i letem yumi blong halpem hem mo leftemap tingting blong hem.

18. ?Rut i harem nogud long wanem?

¹⁸ No kwik blong harem nogud. Taem Naomi mo Rut i kamtru long Betlehem, Naomi i mitim ol neba blong hem blong bifo. Hem i talem long olgeta se: “Mi mi gat fulap samting taem mi aot long ples ya, be Jehova i mekem we mi no gat samting taem mi kamhom.” (Rut 1:21) !Traem tingbaot filing blong Rut taem i harem ol tok ya! Rut i mekem bes blong hem blong halpem Nomi. Rut i krae wetem Naomi, i leftemap tingting blong hem, mo i wokbaot wetem hem blong plante dei. Be yet, Naomi i talem se: “Jehova i mekem we mi no gat samting taem mi kamhom.” Ol tok ya oli soemaot se Naomi i no tinghae long samting we Rut i mekem blong sapotem hem, nating se long taem ya Rut i stanap klosap nomo long hem. !Ating hemia i mas mekem Rut i harem nogud! Be hem i no lego Naomi.

19. ?Wanem i save halpem yumi blong no lego wan we tingting blong hem i foldaon?

 ¹⁹ Lesen: Tede, wan sista we tingting blong hem i foldaon, maet i save talem sam tok we i mekem yumi harem nogud, nating se yumi traehad blong halpem hem. Be yumi no mas kwik blong harem nogud. Yumi no mas lego sista ya we i nidim help, mo yumi mas askem Jehova blong i halpem yumi blong faenem rod blong leftemap tingting blong hem.—Prov. 17:17.

20. ?Wanem i givim paoa long Rut blong i gohed blong givhan long Naomi?

²⁰ Leftemap tingting. Rut i soemaot long Naomi se hem i lavem hem oltaem, be naoia Rut i nidim blong narafala i leftemap tingting blong hem. Mo Jehova i yusum Boas blong leftemap tingting blong hem. Boas i talem long Rut se: “I gud Jehova i blesem yu from samting we yu mekem, mo i gud yu kasem stret pei blong yu long Jehova God blong Isrel, we yu kam haed aninit long wing blong hem.” Ol gudfala tok ya oli leftemap tingting blong Rut bigwan. Nao Rut i talem long Boas se: “Yu toktok gud long mi blong mekem mi harem gud.” (Rut 2:12, 13) Boas i leftemap tingting blong Rut long stret taem we hem i nidim mo hemia i givim paoa long Rut blong i no givap.

21. Folem Aesea 32:1, 2, ?ol elda oli save mekem wanem?

²¹ Lesen: Olgeta we oli soemaot se oli lavem man oltaem, samtaem oli nidim tu we narafala i leftemap tingting blong olgeta. Boas i leftemap tingting blong Rut taem hem i luksave se Rut i kaen long Naomi. Tede tu, ol elda oli save talem gudfala toktok long ol brata sista long kongregesen, taem oli luk we oli givhan long ol narafala. Ol gudfala tok olsem oli save givim paoa long ol brata sista blong oli save gohed blong holemstrong.—Ridim Aesea 32:1, 2.

22-23. ?Wanem i jenisim tingting blong Naomi, mo from wanem? (Ol Sam 136:23, 26)

²² Afta sam taem i pas, Boas i glad nomo blong givim sam kakae long Rut mo Naomi.  (Rut 2:14-18) ?Naomi i mekem wanem afta we Boas i givim ol kakae ya? Hem i talem se: “Prea blong mi se Jehova bambae i blesem hem. Oltaem God ya i stap lavem ol man we oli laef, wetem olgeta we oli ded.” (Rut 2:20a) !Tingting blong Naomi i jenis bigwan! Bifo, Naomi i stap krae se: “Jehova i agensem mi.” Be naoia hem i talem wetem glad se: “Oltaem God . . . i stap lavem ol man.” ?Wanem i jenisim tingting blong Naomi?

²³ Naomi i stat blong luksave se Jehova i neva lego hem. Jehova i yusum Rut blong sapotem Naomi gogo tufala i kasem Juda. (Rut 1:16) Mo tu, Naomi i kasemsave se Jehova i yusum Boas blong halpem hem mo Rut. (Rut 2:19, 20b) Ating Naomi i stap tingting se: ‘Naoia mi kasemsave se Jehova i neva lego mi. !Hem i bin stap wetem mi long olgeta taem ya!’ (Ridim Ol Sam 136:23, 26.) !I sua se Naomi i mas glad tumas from Rut mo Boas i neva lego hem! Yes, olgeta evriwan oli glad from gudfala samting we i kamaot.

24. ?From wanem yumi wantem gohed blong soemaot long ol brata sista se yumi lavem olgeta oltaem?

²⁴ ?Yumi lanem wanem long buk blong Rut long saed blong fasin blong lavem man oltaem? Fasin blong lavem man oltaem i halpem yumi blong no givap kwiktaem long ol brata sista we oli harem nogud. I halpem yumi tu blong mekem spesel traehad blong halpem olgeta. Ol elda oli nidim blong talem ol gudfala tok blong leftemap tingting blong olgeta we oli soem fasin ya blong lavem man oltaem. Taem yumi luk olgeta we oli harem nogud oli glad bakegen blong mekem wok blong Jehova, yumi tu yumi glad tumas. (Wok 20:35) ?Wanem impoten risen we i pulum yumi blong gohed blong soemaot se yumi lavem man oltaem? Hemia se yumi wantem mekem Jehova i glad mo folem “fasin blong hem blong lavem man oltaem [we] i bigwan tumas.”—Eks. 34:6; Sam 33:22.