1. ?Jehova i leftemap tingting blong yumi blong mekem wanem?

JEHOVA i tinghae long fasin ya blong lavem man oltaem. (Hos. 6:6) Hem i leftemap tingting blong yumi blong mekem sem mak. God i yusum profet Maeka blong talem se yumi mas “laekem fasin ya blong lavem man oltaem.” (Maeka 6:8, fut.) Be fastaem yumi mas save se fasin ya blong lavem man oltaem i minim wanem.

2. ?Tok ya lavem man oltaem i minim wanem?

² ?Tok ya lavem man oltaem i minim wanem? Long Baebol Long Niu Wol Translesen, tok ya “lavem man oltaem” i kamaot samwe 150 taem. Long “Diksonari Blong Ol Wod Long Baebol” ya, tok ya i minim “lav we i pusum man blong mekem samting we hem i talem, blong i holemstrong long narafala, mo blong i fasgud long wan samting. Plante taem oli yusum blong tokbaot lav we God i gat long ol man, be i go tu long lav we ol man oli gat bitwin olgeta.” Jehova nao i beswan eksampol blong soemaot lav ya. Long stadi ya, bambae yumi tokbaot olsem wanem Jehova i soemaot lav ya long ol man. Long nekis stadi, bambae yumi tokbaot olsem wanem ol man blong God oli save folem fasin blong Jehova blong soemaot lav ya bitwin olgeta.

3. ?Olsem wanem Jehova i tokbaot hem long Moses?

³ I no longtaem afta we ol man Isrel oli aot long Ijip, Jehova i talemaot nem blong hem mo ol fasin blong hem long Moses. Hem i se: “Jehova, Jehova, wan God we i gat sore mo i kaen, i no save kros kwik, mo fasin blong hem blong lavem man oltaem i bigwan tumas, mo hem i tok tru. Oltaem hem i soemaot se hem i lavem plante taosen man, hem i fogivim man we i mekem rong, no i brekem loa, no i mekem sin.” (Eks. 34:6, 7) Ol  gudfala tok ya oli soemaot long Moses wan spesel samting long saed blong lav ya blong Jehova. ?Wanem samting ya?

4-5. (1) ?Jehova i tokbaot hem wan olsem wanem? (2) ?Wanem ol kwestin we bambae yumi tokbaot?

⁴ Jehova i no talem nomo se hem i lavem man tumas, be i se “fasin blong hem blong lavem man oltaem i bigwan tumas.” Tok ya i kamaot sikis taem bakegen long Baebol. (Nam. 14:18; Neh. 9:17; Sam 86:15; 103:8; Joel 2:13; Jona 4:2) Evritaem we oli talem tok ya, oli yusum nomo blong tokbaot Jehova be i no man. I naes blong luk olsem wanem Jehova i tokbaot hem wan olsem long Baebol. Hemia i mekem yumi luksave se Jehova i tinghae long fasin ya blong lavem man oltaem. * Ating hemia nao from wanem King Deved i talem se: “O Jehova, fasin blong yu blong lavem man oltaem, i go kasem heven, . . . !O God, fasin blong yu blong lavem man oltaem, i gud tumas! Ol pikinini blong man oli kam haed, long sado blong ol wing blong yu.” (Sam 36:5, 7) ?Olsem wanem? ?Yumi tinghae long lav ya blong Jehova olsem Deved?

⁵ Blong kasem save moa long fasin blong Jehova blong lavem man oltaem, bambae yumi tokbaot tu kwestin: ?Jehova i soemaot fasin ya long hu? ?Mo olsem wanem lav ya i givhan long yumi?

6. ?Jehova i soem fasin ya blong lavem man oltaem long hu?

⁶ ?Jehova i soem fasin ya blong lavem man oltaem long hu? Hem i no soem long enikaen man, be long ol man we oli fren gud wetem hem. God blong yumi i stap tru long ol fren blong hem. Hem i gat wan gudfala plan long saed blong olgeta, mo bambae i neva stop blong lavem olgeta.

7. ?Olsem wanem Jehova i soem lav long evri man?

⁷ Jehova i soem lav long evri man. Jisas i talem long wan man we nem blong hem Nikodimas se: “God i lavem tumas ol man long wol, nao hem i givim stret Pikinini blong hem, wan nomo we hem i gat, blong olgeta man we oli soemaot se oli bilif long hem, oli no ded be oli kasem laef we i no save finis.”—Jon 3:1, 16; Mat. 5:44, 45.

8-9. (1) ?From wanem Jehova i soemaot long ol man blong hem se hem i lavem olgeta oltaem? (2) ?Naoia bambae yumi tokbaot wanem?

⁸ Olsem yumi tokbaot finis, Jehova i soemaot long olgeta ya nomo we oli fren gud wetem hem se hem i lavem man oltaem. Yumi makem samting ya long tok we King Deved mo profet  Daniel i talem. Eksampol, Deved i se: “Yu gohed blong soemaot fasin blong yu blong lavem man oltaem long olgeta we oli save yu.” “Fasin blong Jehova blong lavem man oltaem, i stap oltaem gogo i no save finis, bambae hem i soemaot long olgeta we oli fraet long hem.” Mo Daniel i talem se: “O Jehova, God ya we i tru, i gat paoa, mo i stap mekem ol samting blong sapraes, mo i stap holemtaet kontrak blong hem, mo i soemaot se i lavem oltaem olgeta we oli lavem hem mo oli holemtaet ol komanmen blong hem.” (Sam 36:10; 103:17; Dan. 9:4) Ol vas ya oli mekem yumi luksave se Jehova i soemaot lav ya long ol man blong hem, from we oli save hem, oli fraet long hem, oli lavem hem, mo oli holemtaet ol komanmen blong hem. Yes, Jehova i soemaot long olgeta ya nomo we oli wosipim hem long stret fasin, se hem i lavem olgeta oltaem.

⁹ Bifo we yumi save Jehova, yumi kasem lav ya nomo we Jehova i soemaot long olgeta man. (Sam 104:14) Be taem yumi wosipim hem, hem i soemaot long yumi tu se hem i lavem yumi oltaem. Jehova i talem long ol man blong hem se: “I no gat wan samting i save tekemaot lav blong mi long yu.” (Aes. 54:10) Olsem Deved i talem: “Jehova bambae i tritim man blong hem we i holemstrong long hem, long wan spesel fasin.” (Sam 4:3) ?Hemia i pulum yumi blong mekem wanem? Man blong raetem sam i talem se: “Man we i waes bambae i lukluk gud ol samting ya, mo bambae hem i tingting gud long ol samting we Jehova i mekem blong soemaot fasin blong hem blong lavem man oltaem.” (Sam 107:43) Jehova nao i givim gudfala advaes ya. Naoia bambae yumi tokbaot tri rod olsem wanem lav ya blong Jehova i save givhan long ol man blong hem.

10. ?Olsem wanem fasin blong God blong lavem man oltaem i halpem yumi? (Ol Sam 31:7)

¹⁰ Fasin blong God blong lavem man oltaem i stap olwe. Tok ya i kamaot 26 taem long Ol Sam 136. Long vas 1 yumi ridim se: “Yufala i talem tangkiu long Jehova, from hem i gud. Fasin blong hem blong lavem man oltaem i stap olwe.” (Sam 136:1) Long vas 2 kasem 26, yumi luk tok ya “fasin blong hem blong lavem man oltaem i stap olwe.” Taem yumi ridim ol narafala vas blong sam ya, yumi sapraes blong  luk ol defren rod we Jehova i soemaot lav ya long yumi we i no save finis samtaem. Taem oli ripitim tok ya “fasin blong hem blong lavem man oltaem i stap olwe,” hemia i mekem yumi sua se fasin ya blong hem i no save jenis. !I gud tumas blong save se Jehova i no kwik blong lego ol man blong hem! Be hem i stap klosap long ol man we oli wosipim hem, mo i no lego olgeta speseli long taem blong trabol. ?Hemia i halpem yumi olsem wanem?: Taem yumi save se Jehova i stap klosap long yumi, yumi kasem glad mo paoa we yumi nidim blong dil wetem ol trabol mo gohed blong wokbaot long rod blong laef.—Ridim Ol Sam 31:7.

11. Folem Ol Sam 86:5, ?wanem i pulum Jehova blong i fogivim man?

¹¹ Fasin blong God blong lavem man oltaem, i pulum hem blong fogivim man. Taem Jehova i luk se wan sinman i tanem tingting mo i lego nogud fasin blong hem, lav ya blong Jehova i pulum hem blong fogivim man ya. Deved, man ya blong raetem sam i tokbaot Jehova se: “Hem i no panisim yumi stret long mak blong ol sin blong yumi, mo i no givimbak long yumi stret folem ol mastik blong yumi.” (Sam 103:8-11) Deved i kasemsave gud filing blong man we i gilti mo i harem nogud. Be hem i lanem tu se Jehova i “rere blong fogif.” ?Wanem i pulum Jehova blong i fogivim man? Ansa i stap long Ol Sam 86:5. (Ridim.) Yes, olsem Deved i talem long prea blong hem, Jehova i fogif from we hem i lavem tumas olgeta we oli askem hem blong i fogivim olgeta.

12-13. Sipos yumi gilti mo yumi harem nogud from wan mastik we i pas finis, ?wanem i save halpem yumi?

¹² Taem yumi mekem sin, i stret nomo we yumi sore mo harem nogud from samting we yumi mekem. Hemia i save halpem yumi blong tanem tingting mo askem God blong i fogivim yumi. Be sam man blong God oli gohed blong gilti from sam mastik we oli bin mekem. Oli ting se Jehova bambae i neva fogivim olgeta nating se oli askem hem finis blong i fogivim olgeta mo oli lego ol nogud samting ya. Sipos yu gat ol filing olsem, samting we i save halpem yu, hemia blong traem kasemsave se Jehova i wantem tumas blong soemaot long yu se hem i lavem yu oltaem.

¹³ ?Hemia i halpem yumi olsem wanem?: Nating se yumi sinman, yumi save mekem wok  blong Jehova wetem wan tingting we i klin. Hemia i posibol from ‘blad blong Pikinini blong hem i mekem yumi klin long olgeta sin blong yumi.’ (1 Jon 1:7) Taem yu harem nogud from sam mastik blong yu, tingbaot se Jehova i rili wantem blong fogivim yu sipos yu tanem tingting blong yu. Makem olsem wanem Deved i joenem fasin blong Jehova blong lavem man oltaem wetem fasin blong fogif. Hem i raetem se: “Fasin blong hem blong lavem man oltaem, we hem i soemaot long olgeta we oli fraet long hem, i bigwan tumas, olsem we heven i hae moa i bitim wol. Hem i putum ol sin blong yumi oli stap longwe we longwe long yumi, olsem we is i stap longwe we longwe long wes.” (Sam 103:11, 12) Yes, Jehova i glad nomo blong “fogif long wan fasin we i bigwan.”—Aes. 55:7.

14. ?Olsem wanem fasin blong Jehova blong lavem man oltaem i protektem yumi?

¹⁴ Fasin blong God blong lavem man oltaem i protektem yumi long saed blong spirit. Long prea we Deved i mekem long Jehova, hem i talem se: “Yu yu ples blong haed blong mi. Bambae yu blokem gud mi blong trabol i no kasem mi. Bambae yu mekem se raon long mi, ol man oli glad oli stap singsingaot from we yu sevem mi. . . . Man we i stap trastem Jehova, fasin blong Hem blong lavem man oltaem i protektem hem.” (Sam 32:7, 10) Long taem bifo, stonwol blong wan taon i protektem ol man we oli stap insaed, sem mak, fasin blong Jehova blong lavem man oltaem i protektem yumi long ol samting we oli save spolem frensip blong yumi wetem hem. Mo tu, fasin blong Jehova blong lavem man oltaem i pulum yumi blong kam klosap long hem.—Jer. 31:3.

15. ?Olsem wanem fasin blong Jehova blong lavem man oltaem, i olsem wan sefples mo strong ples blong haed?

¹⁵ Deved i yusum wan narafala pijatok blong tokbaot olsem wanem God i protektem ol man blong hem. Hem i raetem se: “God i sefples blong mi, yes God we i soemaot se i lavem mi oltaem.” Deved i tokbaot Jehova tu se: “Hem nao i stap soemaot long mi se hem i lavem mi oltaem mo hem i strong ples blong haed blong mi, hem i sefples blong mi, mo man blong tekemaot mi long trabol, hem i sil blong mi mo Hem i selta we mi go haed long hem.” (Sam 59:17; 144:2) ?From wanem Deved i komperem fasin blong Jehova blong lavem man oltaem wetem sefples mo strong ples blong haed? Nomata weples yumi stap long hem, sipos yumi gohed blong stap olsem ol man blong Jehova, bambae hem i givim samting we yumi nidim blong protektem frensip blong yumi wetem hem. Sem tingting ya yumi luk long Ol Sam 91, we i talem se: “Bambae mi talem long Jehova se: ‘Yu yu ples blong haed blong mi, mo yu strong sefples blong mi.’” (Sam 91:1-3, 9, 14) Moses i talem wan sem pijatok olsem long saed blong ples blong haed. (Sam 90:1, fut.) Mo tu, bifo we Moses i ded hem i talem wan narafala samting bakegen, i se: “God i wan ples blong haed longtaem finis i kam, mo han blong hem we i stap blong olwe, i stap aninit long yu.” (Dut. 33:27) ?Tok ya “han blong hem we i stap blong olwe, i stap aninit long yu,” i soemaot wanem long saed blong Jehova?

16. ?Olsem wanem Jehova i halpem yumi? (Ol Sam 136:23)

¹⁶ Yumi harem se yumi sef taem yumi save se Jehova i ples blong haed blong yumi. Samtaem, yumi harem nogud mo maet i tekem longtaem blong yumi harem gud bakegen. Long taem olsem, ?Jehova bambae i mekem wanem? (Ridim Ol Sam 136:23.) Bambae hem i putum han blong hem aninit long yumi, i leftemap yumi sloslo, mo i halpem yumi blong harem gud bakegen. (Sam 28:9; 94:18) ?Hemia i halpem yumi olsem wanem?:  Taem yumi luksave se yumi save dipen oltaem long God, hemia i halpem yumi long tu rod. Faswan, nomata weples yumi stap long hem, yumi save se oltaem Jehova bambae i protektem yumi. Nambatu, Papa blong yumi long heven i kea bigwan long yumi.

17. ?Fasin blong God blong lavem man oltaem i mekem yumi sua long wanem samting? (Ol Sam 33:18-22)

¹⁷ Olsem we yumi lanem, nomata wanem hadtaem yumi fesem, yumi save sua se Jehova bambae i givhan long yumi blong gohed blong frengud wetem hem. (2 Kor. 4:7-9) Profet Jeremaea i talem se: “From we fasin blong Jehova blong lavem man oltaem nao i mekem se yumi no lus olgeta, from fasin blong hem blong gat sore i neva finis.” (Krae. 3:22) Yumi save sua se Jehova bambae i gohed blong lavem yumi oltaem, from we Baebol i talem se: “Ae blong Jehova i wajem olgeta we oli fraet long hem, hemia olgeta we oli stap wet long fasin blong hem blong lavem man oltaem.”—Ridim Ol Sam 33:18-22.

18-19. (1) ?Oltaem yumi mas tingbaot wanem? (2) ?Bambae yumi tokbaot wanem long nekis stadi?

¹⁸ ?Oltaem yumi mas tingbaot wanem? Bifo we yumi save Jehova, yumi kasem lav ya nomo we Jehova i stap soemaot long olgeta man. Be taem yumi wosipim hem, hem i soemaot long yumi tu se hem i lavem yumi oltaem. From lav ya blong hem, hem i putum han blong hem i goraon long yumi blong protektem yumi. Bambae hem i gohed blong mekem yumi stap klosap long hem, mo i holemtaet promes we hem i mekem long yumi. !Hem i wantem se yumi fren wetem hem olwe! (Sam 46:1, 2, 7) Taswe, nomata wanem trabol yumi fesem, Jehova bambae i givim paoa we yumi nidim blong holemstrong long hem.

¹⁹ Yumi luk olsem wanem Jehova i soemaot long ol man blong hem se hem i lavem olgeta oltaem. Long sem fasin, Jehova i wantem se yumi soemaot lav ya tu bitwin yumi. ?Olsem wanem blong mekem? Nekis stadi bambae i tokbaot impoten topik ya.