1-2. (1) ?From wanem ol niufala mared kapol oli mas trastem Jehova? (Ol Sam 37:3, 4) (2) ?Bambae yumi tokbaot wanem long stadi ya?

?BAMBAE yu yu mared i no longtaem, o yu yu jes mared nomo? Sipos yes, i sua se yu luk fowod blong harem gud blong laef wetem hemia we yu lavem hem tumas. Be mared laef i no isi, mo i gat sam impoten desisen blong mekem. Samting we yu mekem taem yu fesem ol hadtaem, mo ol desisen we yu tekem, i save mekem yutufala i glad blong plante yia o nogat. Sipos yu dipen long Jehova, bambae yu mekem ol waes desisen mo mared blong yu bambae i kam strong moa, mo bambae yutufala i glad moa. Be sipos yu no folem ol advaes blong God, bambae yu fesem ol hadtaem we i save spolem mared blong yu, mo bambae yu no glad.—Ridim Ol Sam 37:3, 4.

² Nating se atikol ya i go long olgeta we oli jes mared, be i tokbaot ol trabol we evri mared kapol oli save fesem. Bambae i tokbaot samting we yumi save lanem long eksampol blong sam gudfala man mo woman long Baebol, mo ol nambawan lesen we yumi save folem long laef mo mared blong yumi. Mo tu, bambae yumi luk samting we yumi save lanem long ekspiriens blong sam kapol tede.

3-4. ?Wanem ol trabol we ol niufala kapol oli save fesem?

³ Sam man oli enkarejem ol niufala kapol blong oli gat gudfala laef olsem ol narafala man tede. Eksampol, maet ol perens mo ol famle oli save putum presa long wan kapol blong i mas gat pikinini afta we oli mared. O maet oli pulum olgeta blong pem wan haos mo gat ol sas samting.

⁴ Sipos wan kapol i no lukaot gud, oli save tekem wan desisen we i mekem oli gat plante kaon. Ale tufala i mas wok plante aoa blong pemaot ol kaon ya. Hemia i save blokem tufala blong no moa mekem prapa stadi, famle wosip, mo wok blong prij. Maet oli mestem miting from oli mas wok ovataem blong gat moa mane o blong oli no lusum wok blong olgeta. Sipos oli mekem olsem, bambae oli mestem ol nambawan janis blong mekem moa long wok blong Jehova.

5. ?Yu yu lanem wanem long eksampol blong Klaus mo Marisa?

⁵ Plante ekspiriens i soem se taem yumi putum ol sas samting fasples long laef blong yumi, bambae yumi no glad. Traem tingbaot samting we Klaus mo Marisa i lanem. * Taem tufala i jes mared, tufala tugeta i wok fultaem blong tufala i gat plante moa mane mo ol sas samting. Be tufala i no glad. Klaus i talem se: “Mitufala i gat evri samting we mitufala i nidim, be mitufala i no gat eni plan long wok blong Jehova. Blong talem stret, laef blong mitufala i had mo mitufala i gat plante wari.” Maet yu tu yu luksave se taem yu traehad blong kasem ol sas samting, yu no gat trufala glad. Sipos i olsem, yu no mas harem nogud. Gudfala eksampol blong ol narafala i save halpem yu blong mekem ol jenis. Fastaem bambae yumi tokbaot samting we ol hasban oli save lanem long eksampol blong King Jehosafat.

6. ?Olsem wanem Jehosafat i folem advaes blong Ol Proveb 3:5, 6, taem wan bigfala ami i kam blong faet agensem ol man blong hem?

⁶ Hasban, ?samtaem yu harem se yu gat tumas wok blong mekem? Sipos yes, eksampol blong King Jehosafat i save givhan long yu. !Olsem wan king, Jehosafat i gat responsabiliti ya blong meksua se ful nesen i stap sef! ?Wanem i givhan long hem blong i save mekem gud wok ya? Hem i mekem evri samting we hem i naf blong mekem blong protektem gud nesen ya. Hem i mekem ol stonwol we i goraon long ol taon blong Juda oli kam strong, mo i hivimap wan strong ami blong bitim 1,160,000 soldia. (2 Kron. 17:12-19) Biaen hem i fesem wan narafala problem. Wan bigfala ami blong ol man Amon, Moab, mo ol man long rijen blong ol hil blong Seiri, oli kam blong faet agensem hem mo ol famle blong hem mo ol man blong hem. (2 Kron. 20:1, 2)  ?Jehosafat i mekem wanem? Hem i askem Jehova blong i givim paoa mo i givhan long olgeta. Hemia i laenap wetem waes advaes ya we i stap long Ol Proveb 3:5, 6. (Ridim.) Prea blong Jehosafat long 2 Kronikel 20:5-12, i soem se hem i trastem Jehova bigwan. ?Jehova i mekem wanem blong ansarem prea blong Jehosafat?

7. ?Olsem wanem Jehova i ansa long prea blong Jehosafat?

⁷ Jehova i yusum Jahasiel we i wan Livaet blong toktok long Jehosafat. Hem i talem se: “Yufala i stanap rere nomo long ples blong yufala, mo luk we Jehova i faet long bihaf blong yufala blong sevem yufala.” (2 Kron. 20:13-17) !Blong talem stret, hemia i no wan fasin blong faet! Be ol instraksen ya oli no kam long wan man, oli kam long Jehova. Jehosafat i trastem God mo i obei long instraksen ya. Taem hem mo ol soldia oli go long ples blong faet, hem i no putum ol beswan soldia long fored, be hem i putum ol man blong singsing. Mo Jehova i holem promes we hem i mekem long Jehosafat, hem i winim ol enemi blong hem.—2 Kron. 20:18-23.

8. ?Ol hasban oli save lanem wanem long eksampol blong Jehosafat?

⁸ Hasban, yu save lanem lesen long eksampol blong Jehosafat. Yu gat wok ya blong kea long famle blong yu, taswe yu mas wok had blong protektem mo sapotem olgeta. Taem yu fesem problem, maet yu ting se yu save stretem yu wan, be yu no mas dipen long prapa paoa blong yu. Prea long Jehova blong i givhan long yu taem yu stap yu wan mo taem yu stap wetem waef blong yu. Lukaot advaes blong Jehova long Baebol mo ol buk we oganaesesen blong hem i wokem, mo folem ol advaes we yu faenem. Maet bambae ol narafala oli no agri long desisen we yu tekem mo oli save talem se yu krangke. Maet oli talem se mane mo ol samting we yu save pem, hemia nao samting we i save protektem famle blong yu. Be tingbaot eksampol blong Jehosafat. Hem i trastem Jehova mo i soemaot samting ya long ol aksen blong hem. Jehova i no lego Jehosafat mo bambae hem i no lego yu. (Sam 37:28; Hib. 13:5) ?Wanem narafala samting bakegen we ol kapol oli save mekem blong harem gud long laef?

9. ?Yumi save talem wanem long saed blong profet Aesea mo waef blong hem?

⁹ Impoten samting long laef blong profet Aesea mo waef blong hem, hemia blong mekem wok blong Jehova. Aesea i wan profet, mo maet waef blong hem tu i stap talemaot ol profet tok, from we Baebol i talem se hem i wan “woman profet.” (Aes. 8:1-4) Aesea mo waef blong hem i putum wosip blong Jehova fasples long laef blong tufala. !Hemia wan gudfala eksampol blong ol mared kapol tede!

10. Taem ol kapol oli stadi long ol profet tok blong Baebol, ?hemia i givhan long olgeta olsem wanem?

¹⁰ Ol mared kapol tede oli save folem eksampol blong Aesea mo waef blong hem, taem oli mekem bes blong olgeta long wok blong Jehova. Sipos oli stadi long ol profet tok blong Baebol, mo luk olsem wanem oli kamtru, hemia i save mekem oli trastem Jehova moa. (Taet. 1:2) Tufala i save tingbaot olsem wanem tufala i save givhan blong mekem sam profet tok blong Baebol oli kamtru. Eksampol, tufala i save givhan blong mekem profet tok blong Jisas i kamtru, we i se gud nius blong Kingdom i mas kasem olgeta ples long wol bifo en i kam. (Mat.  24:14) Taem ol kapol oli sua se ol profet tok blong Baebol oli stap kamtru, bambae oli gat strong tingting blong mekem moa long wok blong Jehova.

11. ?Prisila mo Akwila i naf blong mekem wanem, mo from wanem?

¹¹ Ol niufala kapol oli save lanem lesen from Prisila mo Akwila we tufala i man Jiu mo tufala i laef long taon blong Rom. Tufala i bin harem gud nius blong Jisas, mo tufala i kam Kristin. I sua se tufala i glad long laef blong tufala. Be wan taem nomo laef blong tufala i jenis, taem Empera Klodias i givim oda blong ol man Jiu oli aot long Rom. Hemia i min se naoia tufala i mas lego ples we tufala i save gud, faenem wan niufala haos mo wan niufala ples blong statem bisnes blong tufala blong somap haos tapolen. ?Olsem wanem? ?Jenis ya bambae i blokem tufala blong no moa mekem wok blong Jehova? Ating yu save ansa blong kwestin ya. Long niufala ples blong tufala long Korin, Akwila mo Prisila i stat blong halpem kongregesen mo wok wetem aposol Pol blong leftemap tingting blong ol brata sista long ples ya. Biaen oli muv i go long ol narafala taon blong prij long ol eria we i gat nid. (Wok 18:18-21; Rom 16:3-5) !Yes, tufala i bisi, be tufala i gat wan hapi laef!

12. ?From wanem ol mared kapol oli mas putum sam mak blong kasem long wok blong Jehova?

¹² Tede ol kapol oli save folem eksampol blong Prisila mo Akwila, taem oli putum Kingdom fasples. Beswan taem blong wan kapol i tokbaot ol mak we oli wantem kasem long laef, hemia bifo we oli mared. Taem wan kapol i putum ol mak blong kasem long wok blong Jehova, mo oli wok had blong kasem ol mak ya, bambae oli gat janis blong luk olsem wanem Jehova i halpem olgeta long laef blong olgeta. (Pri. 4:9, 12) Tingbaot ekspiriens blong Russell mo Elisabet. Russell i se: “Bifo we mitufala i mared, mitufala i tokbaot samting we mitufala i wantem mekem long wok blong Jehova.” Elisabet i se: “Mitufala i tokbaot ol samting ya blong mekem se taem mitufala i wantem mekem desisen, mitufala i meksua se desisen ya i no stopem mitufala blong kasem ol mak we mitufala i wantem  kasem.” Hemia i mekem se Russell mo Elisabet i save muv i go long Maekronesia blong prij long ples we i gat nid.

13. Folem Ol Sam 28:7, ?wanem bambae i hapen taem yumi trastem Jehova?

¹³ Olsem Russell mo Elisabet, plante kapol tede oli mekem laef blong olgeta i simpol, blong oli save prij mo tijim ol man long gud nius blong Kingdom. Taem wan kapol i putum ol mak long wok blong Jehova mo tufala i traehad blong kasem, bambae tufala i kasem blesing. Bambae tufala i luk olsem wanem Jehova i kea long tufala, tufala i trastem Jehova moa, mo bambae tufala i kasem trufala glad.—Ridim Ol Sam 28:7.

14. ?Olsem wanem aposol Pita mo waef blong hem i soem se tufala i trastem promes ya long Matiu 6:25, 31-34?

¹⁴ Ol mared kapol oli save lanem lesen tu long eksampol blong aposol Pita mo waef blong hem. Samwe sikis manis o wan yia afta we Pita i mitim Jisas blong faswan taem, hem i mas mekem wan impoten desisen. Pita i gat bisnes blong salem fis blong lukaot long nid blong famle blong hem. Taem Jisas i invaetem Pita blong i folem hem fultaem, Pita i mas tingbaot waef blong hem tu, taem i mekem desisen ya. (Luk 5:1-11) Pita i jusum blong go mo prij wetem Jisas. Hem i mekem waes desisen. Mo yumi sua se waef blong hem tu i sapotem desisen ya. Baebol i soemaot se afta we Jisas i laef bakegen, waef blong Pita i bin travel wetem Pita blong sam taem. (1 Kor. 9:5) Taswe, from we hem i wan gudfala Kristin waef, hemia i mekem se Pita i save givim ol gudfala advaes long ol Kristin hasban mo waef. (1 Pita 3:1-7) Blong talem stret, Pita mo waef blong hem i trastem Jehova se bambae hem i givim samting we tufala i nidim, sipos tufala i putum Kingdom fasples long laef blong tufala.—Ridim Matiu 6:25, 31-34.

15. ?Yumi lanem wanem long ekspiriens blong Tiago mo Esta?

¹⁵ Sipos yu mared plante yia finis, ?olsem wanem yu save gohed blong mekem moa long wok blong Jehova? Wan rod hemia blong lanem lesen long ol ekspiriens blong ol narafala kapol. Eksampol, yu save ridim ol haf ya “Oli Glad Nomo Blong Mekem Wok.” Haf ya i halpem Tiago mo Esta, wan kapol blong Brasil, blong tufala i wantem go long ples we i gat nid. Tiago i eksplenem se: “Taem mitufala i ridim ol ekspiriens mo luk olsem wanem Jehova i halpem ol man blong hem tede, mitufala tu i wantem ekspiriensem samting ya.” Ale, tufala i muv i go long Paragwe, mo long 2014 tufala i stat blong prij long wan teritori we ol man oli toktok lanwis Potugal. Esta i se: “Wan vas we mitufala i laekem tumas, hemia Efesas 3:20. Plante taem mitufala i luk we ol tok blong vas ya oli kamtru, taem mitufala i mekem wok blong Jehova.” Long vas ya blong Efesas, Pol i promes se Jehova bambae i givim plante samting i bitim wanem we yumi askem. !Promes ya i kamtru plante taem!

16. ?Ol niufala kapol oli save askem advaes long hu?

¹⁶ Tede ol niufala kapol oli save lanem samting long ekspiriens blong ol narafala we oli dipen long Jehova. Sam kapol, maet oli spenem plante yia blong mekem wok blong Jehova fultaem. Sipos yu stap tingbaot blong putum sam mak, i gud yu askem advaes long olgeta. Hemia wan rod blong soem se yu trastem Jehova. (Prov. 22:17, 19) Ol elda tu oli save halpem ol niufala kapol blong oli putum mo kasem ol mak long saed blong spirit.

17. ?Wanem i hapen long Klaus mo Marisa, mo yumi lanem wanem long ekspiriens blong tufala?

 ¹⁷ Samtaem desisen blong yumi blong mekem moa long wok blong Jehova, i no hapen olsem we yumi wantem. Tingbaot eksampol blong Klaus mo Marisa we yumi tokbaot long stat. Afta we tufala i mared blong tri yia, tufala i muvaot long haos blong tufala, mo volontia blong mekem konstraksen wok long Finlan branj. Be tufala i faenemaot se tufala i no save stap long ples ya bitim sikis manis. Fastaem tufala i harem nogud, be i no longtaem afta, oli invaetem tufala i go blong joen long wan kos long lanwis Arabik. Naoia tufala i glad blong stap long wan narafala kantri mo prij long wan teritori we i toktok lanwis Arab. Marisa i tingtingbak long samting we i bin hapen, mo i se: “Mi mi fraet blong mekem samting we mi neva mekem bifo. Mo mi nidim blong trastem Jehova fulwan, be mi luk olsem wanem Jehova i halpem mitufala oltaem long sam rod we mitufala i neva tingbaot. Afta long samting ya, mi trastem Jehova moa.” Eksampol ya i soem se yu save sua se oltaem Jehova bambae i blesem yu, sipos yu trastem hem fulwan.

18. ?Ol mared kapol oli save mekem wanem blong oli gohed blong trastem Jehova?

¹⁸ Mared i wan presen we Jehova i givim. (Mat. 19:5, 6) Hem i wantem se ol mared kapol oli enjoem presen ya. (Prov. 5:18) Ol niufala kapol, lukluk gud long samting we yu save mekem wetem laef blong yu. ?Yu yu mekem bes blong yu blong soem long Jehova se yu glad long presen we hem i givim? Toktok wetem Jehova long prea. Lukaot ol advaes blong Baebol we oli stret long situesen blong yu. Biaen folem ol advaes we Jehova i givim long yu. !Yu save sua se bambae yu kasem blesing mo gat wan hapi mared, sipos yu yusum mared laef blong yu blong mekem wok blong Jehova!