Bifo we mi tokbaot samting we i hapen afta, fastaem bambae mi tokbaot olsem wanem mi stat blong mekem wok blong Jehova fultaem.

Mi mi bon long 1942 long wan naesfala aelan blong Karibin, hemia Curaçao. Papa blong mi i blong Surinam, be hem i muv i go long aelan blong wok. Sam yia bifo we mi bon, hem i wan long ol faswan Witnes blong Jehova long Curaçao. a Evri wik, hem i stadi Baebol wetem mifala ol pikinini, nating se samtaem mifala i no wantem stadi. Taem mi gat 14 yia, famle blong mifala i muv i gobak long Surinam from papa i mas lukaot long mama blong hem we i olfala.

Taem mi stap long Surinam, mi stat blong joen wetem ol yangfala long kongregesen we oli wok strong long wok blong Jehova. Olgeta ya oli olfala smol long mi, mo oli mekem wok blong fultaem paenia.Taem oli stap tokbaot ol ekspiriens we oli gat long wok blong prij, mi luk se oli rili glad. Samtaem, afta long ol miting, mifala i sidaon aotsaed, lukluk ol sta, mo tokbaot plante samting long saed blong Baebol. Ol fren ya oli givhan long mi blong luksave samting we mi wantem mekem long laef. Mi mi wantem mekem wok blong Jehova, taswe taem mi gat 16 yia, mi tekem baptaes. Biaen, taem mi gat 18 yia, mi stat blong mekem wok blong fultaem paenia.

Taem mi paenia, mi lanem plante lesen, mo hemia i halpem mi long olgeta yia we mi mekem wok blong Jehova fultaem. Eksampol, faswan lesen we mi bin lanem hemia se i impoten blong trenem ol narafala. Taem mi stat blong paenia, wan misinari we nem blong hem Willem van Seijl, i intres bigwan long mi. b Hem i tokbaot plante samting long mi. Eksampol, hem i tokbaot olsem wanem blong mekem gud ol asaenmen blong mi. Be long taem ya, mi no ting se mi nidim plante trening olsem. Be wan yia afta, oli putumap mi  olsem spesel paenia, mo biaen mi stat blong lukaot long wan smol grup blong ol brata mo sista long dakbus blong Surinam. !Mi glad tumas long ol trening we mi bin kasem! Stat long taem ya, mi wantem tumas blong folem eksampol blong ol brata ya blong tekem taem blong trenem ol narafala tu.

Seken lesen we mi bin lanem hemia se i gud blong gat wan simpol laef, be mi oganaes gud. Long stat blong evri manis, mi mo paenia patna blong mi i mekem lis blong ol samting we mitufala i nidim long saed blong bodi long ol wik we i kam. Biaen, wan long mitufala bambae i go long taon blong pem ol samting ya. Mitufala i mas yusum gud mane mo ol samting we mitufala i pem, blong mitufala i save gat i naf samting kasem en blong manis. Sipos i hapen se mitufala i sot long sam samting taem mitufala i stap long dakbus, sam man o eni man i save halpem mitufala. Mi sua se from we mi lanem blong gat wan simpol laef mo mi oganaes gud taem mi yangfala, hemia i halpem mi blong mi gohed blong fokas nomo long wok blong Jehova.

Nambatri lesen we mi bin lanem, hemia se gudfala frut i save kamaot taem yumi tijim ol man long prapa lanwis blong olgeta. Taem mi gruap, mi toktok lanwis Dutch, Inglis, Papiamento, mo Sranantongo (we oli singaot tu se Sranan), we i men lanwis blong Surinam. Be long dakbus, mi luk se ol man oli glad moa blong lesin long gud nius taem mifala i toktok prapa lanwis blong olgeta. Mi faenem i had blong yusum sam long ol lanwis ya, olsem lanwis Saramaccan, from oli yusum ol tiun we i go antap mo i godaon. Be mi glad se mi traehad blong yusum lanwis ya. Blong plante yia, mi naf blong tijim trutok long plante moa man, from we mi save toktok long prapa lanwis blong olgeta.

I tru, samtaem mi talem sam samting we i krangke nomo. Eksampol, wan taem wan Baebol stadi i harem nogud from bel blong hem i soa. So mi wantem askem long hem long lanwis Saramaccan se hem i harem olsem wanem. !Be mi mestem, nao mi girap mi askem sipos hem i gat bel! I tru, kwestin blong mi i mekem hem i no glad nating. Be nomata se mi mestem, oltaem mi traehad blong toktok lanwis blong olgeta taem mi prij.

Long 1970, oli putumap mi olsem eria elda. Long yia ya, mi soemaot slaed blong program ya “Visiting the World Headquarters of Jehovah’s Witnesses” long plante smol grup blong ol brata mo sista we oli stap long dakbus. Blong kasem ol ples ya, mi wetem wan grup blong ol brata, mifala i folem reva long wan longfala bot we oli wokem long wud. Bot ya i hevi gud long wan jenereta, wan tang fuel, wan laet we i yusum petrol, mo wan tul blong soemaot slaed ya. Taem mifala i kasem longwe, mifala i karem ol samting ya i go long ples we bambae mifala i soemaot slaed ya long hem. Samting we mi tingbaot moa long trip ya, hemia se ol man long ples ya oli harem gud tumas long ol program ya. Mi mi glad tumas blong halpem ol man blong oli save Jehova mo oganaesesen blong hem long wol ya. Taem mi luk olsem wanem ol man oli kam klosap long Jehova, mi glad tumas from mi harem se had wok blong mifala i no blong nating.

Mi luksave se isi moa blong mekem wok blong Jehova taem mi singel, be nating se i olsem, mi wantem blong mared. So mi stat blong prea, mo mi talemaot stret long Jehova se mi wantem wan waef we bambae i laekem blong mekem wok blong Jehova fultaem wetem mi long dakbus. Samwe wan yia afta, mi stat blong frenem Ethel. Hem i wan spesel paenia we i wok strong long wok blong Jehova, nating se i no isi. Taem Ethel i yangfala, hem i laekem stori blong aposol Pol mo i wantem folem eksampol blong Pol blong mekem evri samting we hem i naf blong mekem long wok blong prij. Mitufala i mared long Septemba 1971, mo mitufala i stat blong mekem wok blong eria elda tugeta.

Famle blong Ethel i no gat tumas samting, taswe i isi nomo long hem blong mekem wok blong eria elda wetem mi long dakbus. Eksampol, taem mitufala i rere blong visitim ol kongregesen long dakbus, mitufala i no karem plante samting. Mitufala i wasem ol klos mo swim long reva. Mo tu, long haos blong ol brata mo sista, mitufala i lanem blong kakae eni samting we oli givim long mitufala, olsem lised ya iguana, fis ya piranha, o eni samting we oli kasem long bus o long reva. Taem i no gat ol plet, mifala i kakae long ol lif blong banana. Taem i no gat ol samting blong kakae, mifala i yusum ol fingga blong mifala. Taem mi mo Ethel i mekem ol sakrefaes olsem tugeta, hemia i mekem frensip blong mitufala wetem Jehova i kam strong olsem tri rop we oli tantanem tugeta. (Pri. 4:12) !I no gat wan samting i save tekemaot ol gudfala ekspiriens ya long hat blong mitufala!

Wan dei, afta we mifala i visitim ol eria long dakbus ya mo mifala i stap kambak, wan samting i hapen long mifala olsem we mi bin talem long stat blong stori ya. Bot blong mifala i draon mo kwiktaem nomo i kam antap bakegen. Mi glad se mifala i werem laef jaket mo mifala i no foldaon aot long bot. Be wota i fulap long bot blong mifala. Taswe, mifala i kafsaedem ol kakae  blong mifala long kontena i go long reva, mo mifala i yusum ol kontena ya blong tekemaot wota long bot.

Naoia we mifala i no moa gat kakae, mifala i stat blong fising taem mifala i stap folem reva ya. Be mifala i no kasem eni fis. So mifala i prea long Jehova mo askem hem blong i givim kakae blong mifala i kakae long dei ya. Stret afta we mifala i prea, wan long ol brata i sakem string blong hem mo i kasem wan bigfala fis we i naf blong mifala faef i kakae long naet ya.

Faef yia afta we mifala i mekem wok blong eria elda, mi mo Ethel i kasem wan blesing we mitufala i no tingbaot nating, hemia se bambae mitufala i kam papa mo mama. Mi mi glad blong harem nius ya, be mi no sua se fiuja blong mifala bambae i olsem wanem. Mi mo Ethel i wantem tumas blong gohed long wok blong Jehova fultaem, sipos i stret. Long 1976, boe blong mitufala Ethniël i bon. Mo afta long tu yia mo sikis manis, seken bon boe blong mitufala Giovanni i bon.

Be from we long taem ya i gat nid long Surinam, branj ofis i mekem plan blong mi gohed blong mekem wok blong eria elda, mo lukaot long ol pikinini blong mitufala. Taem ol boe blong mitufala oli kam yangfala, oli sanem mi blong lukaot long sam seket mo sam kongregesen. Hemia i mekem se evri manis, mi mekem wok blong eria elda blong sam wik mo ol narafala dei blong manis mi spenem blong mekem wok blong paenia long kongregesen we oli jusum blong mifala i joen long hem. Ethel mo ol boe oli folem mi taem mi visitim ol kongregesen klosap long ples blong mifala. Be mi go mi wan nomo, taem mi visitim ol kongregesen mo mekem ol asembli long dakbus.

Mi mekem gud ol plan blong mi blong mi save mekem gud evri responsabiliti blong mi. Mi meksua se mifala i mekem famle wosip evri wik. Taem mi aot blong go visitim ol kongregesen long dakbus, Ethel nao i mekem famle stadi wetem ol boe long haos. Be sipos i posibol, oltaem mifala i joen tugeta blong mekem sam samting. Oltaem mi mo Ethel i plei sam gem wetem ol boe o visitim sam naes ples tugeta. Plante taem, mi wekap let long naet from mi stap rerem ol tok blong mi. Ethel i wan gudfala waef olsem Ol Proveb 31:15 i tokbaot, hem i stap girap long eli moning blong meksua se mifala i joen wanples blong ridim vas blong dei mo dring ti tugeta, bifo we ol pikinini oli go long skul. !Mi glad tumas blong gat wan waef olsem, we oltaem i rere blong lego samting we hem i wantem, mo halpem mi blong mi mekem gud olgeta wok we Jehova i givim long mi!

 Mitufala i wok had blong halpem ol boe blong mitufala blong oli lavem Jehova mo wok blong prij. Mitufala i wantem tumas se ol boe blong mitufala oli jusum blong mekem wok blong Jehova fultaem, be olgeta nao oli mas jusum blong mekem olsem. Oltaem mitufala i stap tokbaot glad we oli save kasem sipos oli mekem wok blong Jehova fultaem. Nating se mifala i fesem sam hadtaem, be mitufala i makem gud long tufala boe olsem wanem Jehova i stap halpem mo blesem famle blong mifala. Mo tu, mitufala i meksua se ol boe blong mitufala oli joen wetem ol Kristin we oli putum Jehova fasples long laef blong olgeta.

Jehova i givim evri samting we famle blong mifala i nidim. I tru, oltaem mi traehad blong mekem samting we mi naf blong mekem blong sapotem famle blong mi. Ekspiriens blong mi olsem wan yang spesel paenia long dakbus, i tijim mi blong plan rere from ol samting we mifala i nidim long saed blong bodi. Be samtaem, nating se mifala i mekem bes blong mifala, be mifala i no kasem evri samting we mifala i nidim. Long ol taem olsem, mi trastem se Jehova i save halpem mifala. Eksampol, long en blong ol yia 1980 mo long stat blong ol yia 1990, praes blong ol samting long Surinam i go antap bigwan. Long ol yia ya, i had blong kasem ol samting, iven ol smol samting we mifala i nidim evri dei. Nating se i olsem, Jehova i givim evri samting we mifala i nidim.—Mat. 6:32.

Long ful laef blong mifala, oltaem Jehova i lukaot gud long mifala mo i halpem mifala blong harem gud mo glad long laef. Ol pikinini blong mitufala oli olsem wan bigfala blesing long mitufala, mo i wan privilej blong givhan long olgeta blong save Jehova. Mitufala i glad tumas se olgeta tu oli jusum blong mekem wok blong Jehova fultaem, long laef blong olgeta. Ethniël mo Giovanni, tufala tugeta i graduet long sam tiokratik skul, mo naoia tufala i stap wok long branj ofis long Surinam wetem ol waef blong tufala.

Naoia mi mo Ethel i kam olfala moa, be mitufala i stap gohed yet blong mekem wok blong spesel paenia. !Mitufala i bisi tumas, mekem se mi no gat taem blong lanem blong swim! Be mi no rigret nating. Blong talem stret, taem mi tingting bak, mi harem se desisen blong mi blong mekem wok blong Jehova fultaem taem mi yangfala, hemia wan long ol beswan desisen we mi mekem long laef blong mi.