1. ?Olsem wanem yumi save se Jehova i wantem stap klosap long yumi?

 JEHOVA i invaetem yumi blong kam klosap long hem. (Jem. 4:8) Hem i wantem stap olsem God blong yumi, Papa blong yumi, mo Fren blong yumi. Hem i ansarem ol prea blong yumi mo i halpem yumi long taem blong trabol. Mo hem i yusum oganaesesen blong hem blong tijim mo protektem yumi. ?Be yumi mas mekem wanem blong kam klosap long Jehova?

2. ?Olsem wanem yumi save kam klosap long Jehova?

² Yumi save kam klosap long Jehova taem yumi prea long hem, mo yumi ridim mo tingting dip long Tok blong hem. Taem yumi mekem olsem, bambae yumi lavem hem mo tinghae moa long hem. Yumi wantem tumas blong obei long hem mo givim ona long hem we i stret nomo blong hem i kasem. (Rev. 4:11) Taem yumi traehad blong save gud Jehova, bambae yumi trastem hem moa, mo oganaesesen ya we hem i givim blong halpem yumi.

3. ?Olsem wanem Setan i traem stopem yumi blong no moa wosipim Jehova? ?Wanem bambae i halpem yumi blong no lego Jehova mo oganaesesen blong hem? (Ol Sam 31:13, 14)

³ Setan i traem stopem yumi blong no moa wosipim Jehova, speseli taem yumi fesem ol trabol. ?Hem i mekem samting ya olsem wanem? Hem i traem mekem se sloslo yumi no moa trastem Jehova mo oganaesesen blong hem. Be yumi save stanap strong agensem ol plan blong hem. Taem bilif blong yumi i strong mo yumi trastem Jehova fulwan, bambae yumi no save lego God blong yumi mo oganaesesen blong hem.—Ridim Ol Sam 31:13, 14.

4. ?Bambae yumi tokbaot wanem long stadi ya?

⁴ Long stadi ya, bambae yumi tokbaot tri traem we maet yumi fesem aotsaed long kongregesen. Ol traem ya wanwan  oli save spolem tras blong yumi long Jehova mo oganaesesen blong hem. ?Olsem wanem ol traem ya oli save stopem yumi blong no moa wosipim Jehova? ?Mo yumi save mekem wanem taem yumi fesem ol traem ya?

5. ?Olsem wanem ol trabol oli save mekem yumi no moa trastem Jehova mo oganaesesen blong hem?

⁵ Samtaem, yumi fesem sam trabol olsem, famle i agensem yumi o yumi lusum wok blong yumi. ?Olsem wanem ol trabol ya oli save mekem yumi no moa trastem oganaesesen blong Jehova, mo stopem yumi blong no moa wosipim hem? Taem yumi fesem wan trabol longtaem tumas, hemia i save mekem yumi harem se i no gat rod blong winim mo tingting blong yumi i foldaon. Long taem olsem, Setan i save yusum filing ya blong mekem yumi ting se Jehova i no moa lavem yumi. Setan i wantem yumi ting se Jehova o oganaesesen blong hem nao i stamba blong ol trabol we i mekem yumi safa. Wan samting olsem i bin hapen long sam man Isrel, taem oli stap long Ijip. Long stat, oli bilif se Jehova i jusum Moses mo Eron blong mekem oli go fri long Ijip. (Eks. 4:29-31) Be biaen, taem Fero i mekem laef blong olgeta i kam had moa, oli blemem Moses mo Eron, oli talem se: “Yutufala i mekem Fero mo ol man blong wok blong hem oli no laekem mifala nating, mo yutufala i putum naef blong faet long han blong olgeta blong oli kilim mifala i ded.” (Eks. 5:19-21) Oli stap blemem tufala man ya we i mekem wok blong God. !Hemia i nogud tumas! Sipos yu yu stap fesem wan trabol we i stap longtaem, ?olsem wanem yu save gohed blong trastem moa Jehova mo oganaesesen blong hem?

6. ?Eksampol blong profet Habakuk i givhan olsem wanem long yumi taem yumi fesem ol trabol? (Habakuk 3:17-19)

⁶ Talemaot long Jehova samting we i stap long hat blong yu tru long prea, mo letem hem i halpem yu. Profet Habakuk i bin fesem plante trabol. Be i gat wan taem we hem i no moa sua sipos Jehova i kea long hem o nogat. Ale, hem i prea long Jehova, i talemaot ol filing blong hem. Hem i talem se: “O Jehova, mi stap krae from help, be yu yu no harem mi. Bambae mi mekem olsem gogo kasem wetaem? . . . ?From wanem yu letem fasin safa i stap?” (Hab. 1:2, 3) Jehova i ansarem prea blong gudfala man blong wok blong hem. (Hab. 2:2, 3) Afta we hem i tingting dip long fasin blong Jehova blong sevem ol man blong hem, hem i glad bakegen. Naoia hem i trastem se Jehova i kea long hem, mo bambae i halpem hem blong i stanap strong long eni trabol. (Ridim Habakuk 3:17-19.) ?Hemia i tijim yumi long wanem? Taem yu fesem trabol, i gud yu prea long Jehova mo talemaot ol filing blong yu long hem. Biaen yu letem hem i halpem yu. Long rod ya, yu save sua se Jehova bambae i givim paoa we yu nidim blong stanap strong. Mo taem yu luk se Jehova i halpem yu, hemia bambae i mekem bilif blong yu long hem i kam strong moa.

7. ?Ol famle blong Shirley oli traem mekem wanem, mo wanem i halpem hem blong i holemtaet bilif?

⁷ Holemtaet gudfala program blong yu long saed blong spirit. Hemia nao samting we i halpem Shirley, we i wan sista long Papua Niu Gini, taem hem i fesem sam trabol. b Famle blong hem i pua mo samtaem i had blong oli kasem naf kakae. Wan famle blong hem i traem blong mekem hem i no moa trastem Jehova. Hem i talem se: “Yu talem se tabu spirit blong God i stap halpem yu, ?be hem i mekem wanem blong halpem yu? Famle blong yu i pua yet. Yu stap westem taem blong yu nomo blong prij.” Shirley i talem se: “Mi stap  tingting se: ‘?God i rili kea long mifala o nogat?’ Ale, kwiktaem nomo mi prea long Jehova mo mi talemaot evri samting we i stap long tingting blong mi. Mi gohed blong ridim Baebol mo ol buk blong yumi, mo mi gohed blong prij mo go long ol miting.” Biaen, hem i stat blong luksave se Jehova i stap lukaot gud long famle blong hem. Famle blong hem i no go slip we oli hanggri, mo oltaem oli glad. Shirley i talem se: “Mi harem save se Jehova i ansarem ol prea blong mi.” (1 Tim. 6:6-8) Sipos yu gohed blong holemtaet gudfala program blong yu long saed blong spirit, yu tu bambae yu naf blong no letem ol trabol, o tu tingting i stopem yu blong wosipim Jehova.

8. ?Wanem i save hapen long ol brata we oli stap lidim wok long oganaesesen blong Jehova?

⁸ Tru long media mo sosol netwok, ol man oli save spredem ol giaman toktok o infomesen long saed blong ol brata we oli stap lidim wok long oganaesesen blong Jehova. (Sam 31:13) Sam brata, oli arestem olgeta mo jajem olgeta olsem ol kriminol. Ol faswan Kristin tu oli fesem wan situesen we i klosap sem mak, hemia taem ol man oli talem ol giaman tok long saed blong aposol Pol mo oli arestem hem. ?Long taem olsem, oli mekem wanem?

9. ?Sam Kristin oli mekem wanem taem aposol Pol i stap long kalabus?

⁹ Sam Kristin long faswan handred yia, oli stop blong sapotem Pol taem hem i stap kalabus long Rom. (2 Tim. 1:8, 15) ?From wanem? ?Oli sem from we ol man oli luk Pol olsem wan kriminol? (2 Tim. 2:8, 9) ?O oli fraet se ol man bambae oli ronem mo kilim olgeta tu? Nomata se oli gat wanem risen, be traem tingbaot filing blong Pol long taem ya. Hem i bin stanap strong long plante trabol mo i putum laef blong hem long denja tu blong sevem laef blong olgeta. (Wok 20:18-21; 2 Kor. 1:8) !Yumi neva mas mekem olsem olgeta ya we oli lego Pol, long taem we hem i nidim olgeta! ?Be yumi mas tingbaot wanem taem ol man oli agensem ol brata we oli gat wok long oganaesesen?

10. ?Yumi mas tingbaot wanem taem ol man oli mekem i nogud long ol brata we oli lidim yumi, mo from wanem?

 ¹⁰ Tingbaot from wanem ol man oli mekem i nogud long yumi, mo hu nao i stamba blong hem. Seken Timoti 3:12 i talem se: “Olgeta man we oli wantem soem long laef blong olgeta se oli fasgud long God from we oli joen long Kraes Jisas, bambae ol man oli mekem i nogud long olgeta tu.” Taswe yumi no mas sapraes se Setan i traehad moa blong atakem ol brata we oli lidim yumi. Hem i wantem mekem ol brata ya oli no moa holemstrong long Jehova mo mekem yumi tu yumi fraet.—1 Pita 5:8.

11. ?Yumi lanem wanem long eksampol blong Onesiforas? (2 Timoti 1:16-18)

¹¹ Gohed blong sapotem ol brata mo yu no lego olgeta. (Ridim 2 Timoti 1:16-18.) Wan Kristin long faswan handred yia we nem blong hem Onesiforas, i mekem samting we i defren. Taem Pol i ‘stap long kalabus, Onesiforas i no sem nating from samting ya.’ Hem i lukaotem Pol, mo taem i faenem hem, hem i lukaot rod blong halpem hem. Mo taem hem i mekem olsem, hem i putum laef blong hem long denja. ?Hemia i tijim yumi long wanem? Yumi no mas letem fasin blong fraet long man, i blokem yumi blong no halpem ol brata we ol man oli mekem i nogud long olgeta. Be, i gud yumi difendem olgeta mo halpem olgeta. (Prov. 17:17) Oli nidim lav mo sapot blong yumi.

12. ?Yumi lanem wanem long eksampol blong ol brata mo sista long Rasia?

¹² Traem tingbaot olsem wanem ol brata mo sista long Rasia oli halpem ol Kristin we oli stap long kalabus. Taem sam long olgeta oli pas long kot, plante brata mo sista oli kam long kot blong sapotem olgeta. ?Hemia i tijim yumi long wanem? Taem ol man oli tok nogud, oli arestem, o mekem i nogud long ol brata we oli gat wok long oganaesesen, yumi no mas fraet. Yumi mas prea from olgeta, halpem ol memba blong famle blong olgeta, mo tingbaot sam narafala rod blong soemaot se yumi sapotem olgeta.—Wok 12:5; 2 Kor. 1:10, 11.

13. Taem ol man oli tok nogud long yumi, ?olsem wanem hemia i save spolem tras blong yumi long Jehova mo oganaesesen blong hem?

¹³ Ol famle blong yumi we oli no bilif, ol fren long wok o long skul, maet oli save tok nogud long yumi from yumi stap prij, o from yumi stap folem ol rul blong Jehova. (1 Pita 4:4) Maet oli talem se: “Mi mi laekem yu, be jos blong yu i strik tumas mo i stap folem ol rul blong bifo.” Maet samfala oli tok nogud long yumi from fasin we yumi mekem long ol man we oli disfelosip, oli se: “?Olsem wanem yufala i save talem se yufala i stap lavem ol man?” Ol tok olsem oli save mekem yumi gat tu tingting long ol loa blong Jehova. Maet yumi save stat blong tingting se: ‘?Jehova i askem tumas samting long mi? ?Oganaesesen blong hem i putum ol rul we i strong tumas?’ Sipos yu fesem wan situesen olsem, ?yu save mekem wanem blong stap klosap long Jehova mo oganaesesen blong hem?

14. ?Yumi mas mekem wanem taem ol narafala oli tok nogud long yumi from yumi folem ol rul blong Jehova? (Sam 119:50-52)

¹⁴ Gat strong tingting blong folem ol rul blong Jehova. Job i wan man we i folem ol rul blong Jehova, nating se ol man oli tok nogud long hem from. Wan long ol giaman fren blong Job i talem long hem se, God i no kea sipos Job i folem ol rul blong Hem o nogat. (Job 4:17, 18; 22:3) Be Job i no wantem bilivim ol giaman tok ya. Hem i save se ol rul we Jehova i putum long samting we i stret mo samting we i rong, oli stret nomo, mo hem i gat strong tingting blong folem olgeta. Hem i no letem ol narafala oli mekem se hem i no  moa holemstrong long God. (Job 27:5, 6) ?Hemia i tijim yumi long wanem? Yu no letem ol nogud tok we ol man oli talem, i mekem yu gat tu tingting long ol rul blong Jehova. Tingbaot ol samting we oli hapen long laef blong yu. Maet plante taem yu makem se laef blong yu i gud moa taem yu folem ol rul blong Jehova. I gud yu gat strong tingting blong sapotem oganaesesen we i folem ol rul ya. Long rod ya, nomata se plante taem ol man oli tok nogud long yu, be bambae yu neva stop blong wosipim Jehova.—Ridim Ol Sam 119:50-52.

15. ?From wanem oli tok nogud long Brizit?

¹⁵ Traem tingbaot ekspiriens blong Brizit, wan sista long India. Ol famle blong hem oli tok nogud long hem from bilif blong hem. Hem i baptaes long 1997, mo smoltaem afta, hasban blong hem i lusum wok blong hem. Ale hasban blong hem i disaed se hem, Brizit, mo ol gel, oli mas muv i go laef wetem ol perens blong hem long wan narafala taon. Be Brizit bambae i fesem sam trabol we i bigwan moa. From we hasban blong hem i no wok, Brizit i mas wok evri dei blong sapotem famle blong hem. Mo tu, kongregesen we i stap klosap moa long hem, i stap samwe 350 kilometa longwe. Antap long hemia, famle blong hasban blong hem oli agensem hem from bilif blong hem. Mo from we oli agensem hem tumas, famle blong hem i mas muv bakegen. Be biaen, hasban blong hem i ded. Mo samtaem afta, gel blong hem tu we i gat 12 yia, i ded from kansa. Be hemia i no finis long ples ya, ol famle blong Brizit oli blemem hem from ol samting we oli hapen. Oli talem se sipos hem i no bin kam wan Witnes blong Jehova, olgeta nogud samting ya oli no save hapen. Be Brizit i gohed blong trastem Jehova mo oltaem hem i stap klosap long oganaesesen blong Hem.

16. ?Brizit i kasem wanem blesing from we hem i stap klosap long Jehova mo oganaesesen blong hem?

¹⁶ From we ples we Brizit i laef long hem i longwe tumas long kongregesen, wan eria elda i enkarejem hem blong i prij nomo long eria blong hem, mo mekem miting long haos blong hem. Long stat, Brizit i harem se i had tumas, be hem i folem advaes we brata ya i  givim. Hem i prij long ol narafala, i mekem miting long haos blong hem, mo i jusumaot wan taem blong mekem famle wosip wetem ol gel blong hem. ?Wanem i kamaot from? Brizit i stat blong mekem plante Baebol stadi, mo plante long olgeta oli tekem baptaes. Long 2005, hem i stat blong mekem fultaem paenia. Jehova i blesem Brizit from we hem i trastem Hem mo i no lego oganaesesen blong Hem. !Ol gel blong hem oli gohed blong wosipim Jehova, mo naoia i gat tu kongregesen long eria ya! Brizit i trastem se Jehova nao i givim paoa long hem blong dil wetem ol hadtaem we hem i kasem, mo blong i stanap strong taem ol famle blong hem oli tok nogud long hem.

17. ?Yumi mas gat strong tingting blong mekem wanem?

¹⁷ Setan i wantem yumi bilivim se Jehova bambae i lego yumi taem yumi kasem trabol, mo se taem yumi sapotem oganaesesen blong Jehova, laef blong yumi bambae i kam had moa. Setan i wantem mekem yumi fraet, taem i yusum ol man blong talem ol giaman tok, mekem i nogud long ol brata we oli lidim yumi, o putum olgeta long kalabus. Mo tu, hem i yusum ol nogud tok we ol man oli talem blong traem mekem yumi no moa trastem ol rul blong Jehova mo oganaesesen blong Hem. Be yumi save gud ol rabis plan ya blong hem, taswe hem i no save trikim yumi. (2 Kor. 2:11) Yumi gat strong tingting blong blokem ol giaman tok blong Setan mo blong holemstrong long Jehova mo oganaesesen blong Hem. Tingbaot, Jehova bambae i neva lego yumi. (Sam 28:7) !Taswe, yumi no mas letem eni samting i stopem yumi blong wosipim Jehova!—Rom 8:35-39.

18. ?Bambae yumi tokbaot wanem long nekis stadi?

¹⁸ Long stadi ya, yumi bin tokbaot ol traem we maet yumi save fesem aotsaed long kongregesen. Be i gat sam samting tu insaed long kongregesen we i save traem fasin blong yumi blong trastem Jehova mo oganaesesen blong hem. Sipos samting olsem i hapen, ?yumi save mekem wanem blong yumi no lego Jehova mo oganaesesen blong hem? Bambae yumi tokbaot samting ya long nekis stadi.