1-2. (1) ?Wanem ol kwestin we bambae yumi tokbaot? (2) ?Wanem i soemaot se Jehova i wantem tumas blong halpem yumi?

 JEHOVA i save halpem yumi blong dil wetem ol problem blong laef, mo glad long wok blong hem we yumi mekem. ?Hem i mekem wanem blong halpem yumi? ?Mo yumi save kasem wanem from help we hem i givim? Bambae yumi faenem ansa blong ol kwestin ya long stadi ya. Be fastaem, i gud yumi tokbaot kwestin ya se: ?I tru se Jehova i rili wantem halpem yumi?

² Long leta we aposol Pol i raetem i go long ol man Hibru, hem i yusum wan tok we i halpem yumi blong faenem ansa blong kwestin ya. Pol i raetem se: “Jehova nao i stap halpem mi. Bambae mi no fraet. ?Man i save mekem wanem long mi?” (Hib. 13:6) Wan buk we i tokbaot Baebol i talem se tok ya “halpem,” we oli yusum long vas ya, i givim tingting ya se wan man i resis i go blong givhan long wan man we i stap krae from i nidim help. Nao traem pijarem Jehova we i resis i go blong halpem wan man we i stap long trabol. I sua se bambae yu agri se tok ya i soemaot we Jehova i wantem tumas blong halpem yumi. Taem Jehova i halpem yumi, yumi naf blong stanap strong long ol trabol we yumi glad nomo.

3. ?Wanem tri samting we Jehova i mekem blong halpem yumi blong stanap strong we yumi glad nomo?

³ ?Wanem sam samting we Jehova i mekem blong halpem yumi blong stanap strong long ol trabol we yumi glad nomo? Blong faenem ansa, bambae yumi tokbaot sam vas long buk blong Aesea. ?From wanem? From we plante profet tok blong Aesea, oli stret tu long ol man blong God tede. Mo tu, plante taem Aesea i tokbaot Jehova long wan fasin we i isi blong yumi  kasemsave. Eksampol, long Aesea japta 30, Aesea i yusum ol naesfala pijatok blong soemaot olsem wanem Jehova i halpem yumi we yumi man blong hem. Hem i talem se Jehova i halpem yumi taem (1) i lesin gud mo i ansa long ol prea blong yumi, (2) i lidim yumi, mo (3) i blesem yumi naoia mo long fiuja. Naoia, i gud yumi tokbaot moa trifala samting ya we Jehova i mekem blong halpem yumi.

4. (1) ?Jehova i tokbaot ol man Jiu long taem blong Aesea se oli olsem wanem, mo hem i letem wanem i hapen long olgeta? (2) ?Jehova i givim wanem hop long ol man we oli holemstrong long hem? (Aesea 30:18, 19)

⁴ Ol faswan tok we i stap long Aesea japta 30, Jehova i tokbaot ol man Jiu olsem “ol pikinini ya we oli stronghed,” we oli stap “hivimap sam moa sin antap long ol sin bakegen.” Hem i gohed i se: “Oli ol man blong rebel, . . . we oli no glad blong lesin long loa blong Jehova.” (Aes. 30:1, 9) From we ol man ya oli no wantem lesin, Aesea i talemaot se Jehova bambae i letem oli kasem trabol we i mekem oli safa. (Aes. 30:5, 17; Jer. 25:8-11) Mo samting ya i hapen, taem ol man oli tekem olgeta i go kalabus long Babilon. Be long olgeta ya, i gat samfala we oli holemstrong long Jehova, mo Aesea i gat wan mesej we i save givim hop long olgeta. Hem i talem long olgeta se, wan dei Jehova bambae i letem olgeta oli gobak long Jerusalem. (Ridim Aesea 30:18, 19.) Mo hemia nao samting we i hapen. Jehova i tekemaot olgeta long Babilon. Be hemia i hapen plante yia afta. Tok ya se “Jehova i stap wet wetem longfala tingting, blong mekem i gud long yufala,” i soemaot se sam taem i mas pas fastaem bifo we hem i sevem ol gudfala man we oli holemstrong long hem. I tru, ol man Isrel oli kalabus 70 yia long Babilon, bifo we sam long olgeta oli gobak long Jerusalem. (Aes. 10:21; Jer. 29:10) Taem oli kasem kantri blong olgeta, oli no moa krae from we oli harem nogud, be oli krae from we oli glad tumas.

5. ?Olsem wanem Aesea 30:19 i leftemap tingting blong yumi?

⁵ Tede, ol tok ya oli save leftemap tingting blong yumi, we i se: “Bambae hem i mekem i gud long yu taem yu krae long hem blong i halpem yu.” (Aes. 30:19) Aesea i mekem yumi sua se Jehova bambae i lesin gud taem yumi krae i go long Hem, mo bambae Hem i ansa kwiktaem long ol prea blong yumi. Aesea i talem tu se: “Bambae hem i ansa long yu, stret long taem we hem i harem yu.” Ol tok ya oli rimaenem yumi se Papa blong yumi Jehova i rere mo i wantem tumas blong givhan long yumi, taem yumi askem hem blong i halpem yumi. Taem yumi save samting ya, bambae yumi stanap strong mo yumi glad nomo.

6. ?Olsem wanem ol tok blong Aesea oli soemaot se Jehova i lesin long ol prea blong wanwan man blong hem?

⁶ ?Yumi lanem wanem moa long vas ya long saed blong ol prea blong yumi? Jehova i lesin gud long prea blong yumi wanwan. ?From wanem yumi talem olsem? Long stat blong Aesea japta 30, oli yusum tok ya “yufala” from we Jehova i stap toktok long wan grup blong ol man blong hem. Be long vas 19, oli yusum tok ya “yu” blong soemaot se mesej ya i go long wanwan man. Aesea i raetem se: “Bambae yu no moa krae”; “bambae hem i mekem i gud long yu”; “bambae hem i ansa long yu.” From we Jehova i wan Papa we i gat lav, hem i no save daonem boe o gel blong hem se: “Yu mas strong olsem brata o sista blong yu.” Defren olgeta, hem i kea long yumi mo i lesin gud long ol prea blong yumi.—Sam 116:1; Aes. 57:15.

7. ?Olsem wanem Aesea mo Jisas i soemaot se i impoten we yumi gohed blong prea?

⁷ Taem yumi prea long God from wan samting we i afektem yumi, Jehova i ansa kwiktaem taem i givim paoa we yumi nidim blong  stanap strong. Mo sipos situesen ya i no kamgud olsem we yumi wantem, i gud yumi askem plante taem long Jehova blong i givim paoa we yumi nidim blong stanap strong. Hem i wantem se yumi mekem olsem. Yumi luk samting ya long ol tok we Aesea i talem, i se: “Yufala i no mas letem [Jehova] i spel.” (Aes. 62:7) ?Hemia i minim wanem? Taem yumi prea oltaem long Jehova, hemia i olsem we yumi no letem hem i spel. Ol tok blong Aesea oli rimaenem yumi long pijatok blong Jisas long saed blong prea we i stap long Luk 11:8-10, 13. Long ol vas ya, Jisas i enkarejem yumi blong prea we yumi “no sem blong askem samting ya plante taem” mo “gohed blong askem” hem blong i givim tabu spirit. Mo tu, yumi save askem strong long Jehova blong i lidim yumi blong mekem ol gudfala desisen.

8. ?Olsem wanem ol tok blong Aesea 30:20, 21 oli kamtru bifo?

⁸ Ridim Aesea 30:20, 21. Taem ami blong Babilon i raonem Jerusalem blong wan yia mo sikis manis, ol man oli fesem plante trabol, mo from we ol trabol ya oli stap longtaem tumas, naoia i kam wan nomol samting olsem bred mo wota blong olgeta. Be folem vas 20 mo 21, Jehova i promes long ol man Jiu se sipos oli tanem tingting blong olgeta mo oli jenisim ol fasin blong olgeta, bambae hem i sevem olgeta. Aesea i tokbaot Jehova se i “Bigfala Tija,” mo i promes long ol man se Jehova bambae i tijim olgeta olsem wanem blong wosipim hem long rod we i stret. Ol tok ya oli kamtru taem ol man Jiu oli aot long Babilon. Jehova i pruvum se hem i Bigfala Tija blong olgeta, mo from we hem i lidim olgeta, hemia i mekem se oli naf blong stanemap tru wosip bakegen. Yumi glad tumas from we tede Jehova i Bigfala Tija blong yumi.

9. ?Wanem faswan rod we Jehova i yusum blong lidim yumi tede?

⁹ Long pijatok blong Aesea, hem i komperem yumi olsem ol studen we Jehova i tijim yumi long tu rod. Faswan, Aesea i talem se: “Bambae yu luk Bigfala Tija blong yu, long prapa ae blong yu.” Long pijatok ya, Aesea i talem se Tija i stap stanap long fored blong ol studen. Tede, yumi gat nambawan privilej ya blong God i tijim yumi. ?Hem i tijim yumi olsem wanem? Hem i tijim yumi tru long oganaesesen blong hem. !Yumi glad tumas se Jehova i yusum oganaesesen blong hem blong givim ol klia instraksen long yumi! Yumi kasem ol instraksen ya tru long ol miting, ol asembli, ol buk, brodkasting, mo plante  moa, blong halpem yumi long taem blong trabol blong yumi stanap strong mo yumi glad nomo.

10. ?Olsem wanem yumi harem “wan toktok biaen long [yumi]”?

¹⁰ Aesea i tokbaot seken rod we Jehova i yusum blong tijim yumi i se: “Prapa sora blong yu bambae i harem wan toktok biaen long yu.” Profet Aesea i tokbaot Jehova olsem wan tija we i stap wokbaot biaen long ol studen blong hem blong lidim olgeta, mo talem wanem rod oli mas folem. Tede yumi stap harem voes blong God biaen long yumi. ?Yumi harem voes ya olsem wanem? Hemia tru long tok blong God we i stap plante yia finis. So, taem yumi ridim Baebol, i olsem we yumi stap harem voes blong God biaen long yumi.—Aes. 51:4.

11. Sipos yumi wantem stanap strong mo stap glad, ?yumi mas mekem wanem mo from wanem?

¹¹ ?Yumi save kasem wanem from ol instraksen we Jehova i givim long yumi tru long oganaesesen blong hem mo Tok blong hem? Makem se Aesea i tokbaot tu samting. Faswan i se, “hemia rod.” Seken wan i se, “yufala i folem.” (Aes. 30:21) I no naf nomo blong save se hemia “rod.” Be yumi mas “folem” tu. Tru long Tok blong Jehova mo ol tijing we yumi kasem long oganaesesen, yumi lanem ol samting we Jehova i wantem yumi blong mekem. Mo tu, yumi lanem olsem wanem blong folem ol samting we yumi lanem. Sipos yumi wantem stanap strong mo glad long wok we yumi mekem blong Jehova, yumi mas folem tufala samting ya. Long rod ya, yumi sua se Jehova bambae i blesem yumi.

12. Folem Aesea 30:23-26, ?olsem wanem Jehova i blesem ol man blong hem?

¹² Ridim Aesea 30:23-26. ?Olsem wanem profet tok ya i kamtru long ol man Jiu we oli gobak long Isrel afta we oli kam fri long Babilon? Oli kasem plante blesing long saed blong bodi mo spirit. Jehova i mekem se ol man blong hem oli gat plante kakae. Be samting we i moa impoten, se hem i givim evri samting we oli nidim blong frengud wetem hem, mo statem tru wosip bakegen. Long taem ya, ol man blong God oli kasem plante gudfala samting i bitim bifo. Vas 26 i soemaot se Jehova i mekem laet long saed blong spirit i laet strong moa. (Aes. 60:2) From we Jehova i blesem olgeta, hemia i mekem se oli glad nomo blong wosipim hem, mo oli gat paoa “from we hat blong olgeta i gud.”—Aes. 65:14.

13. ?Olsem wanem profet tok ya blong stanemap tru wosip bakegen i kamtru tede?

¹³ ?Profet tok ya blong stanemap tru wosip  bakegen i stret yet tede? !Yes! ?From wanem yumi talem olsem? Stat long 1919 K.T., plante milian man oli kam fri long Bigfala Babilon, hemia olgeta giaman skul long wol. Mo Jehova i lidim olgeta i go long wan ples we i gud moa i bitim Promes Lan we ol man Isrel oli go long hem. Hem i lidim olgeta i go long paradaes long saed blong spirit. (Aes. 51:3; 66:8) ?Wanem ya paradaes long saed blong spirit?

14. ?Wanem ya paradaes long saed blong spirit, mo hu i stap insaed long hem tede? (Yu luk Mining Blong Toktok.)

¹⁴ Stat long yia 1919 K.T., olgeta we tabu spirit i makemaot olgeta, oli glad blong stap long paradaes ya long saed blong spirit. b Taem ol yia we oli pas, olgeta we oli gat hop blong laef long wol, hemia “ol narafala sipsip,” olgeta tu oli go insaed long paradaes ya mo oli harem gud long ol blesing blong Jehova.—Jon 10:16; Aes. 25:6; 65:13.

15. ?Paradaes ya long saed blong spirit i stap wea?

¹⁵ ?Paradaes ya long saed blong spirit i stap wea tede? Ol man we oli wosipim Jehova, oli stap long evri ples long wol. Taswe paradaes ya long saed blong spirit tu, i stap long evri ples long wol. So, tede, nomata weples yumi laef long hem, sipos yumi gohed blong sapotem tru wosip, yumi save kam pat blong paradaes ya long saed blong spirit.

16. ?Olsem wanem yumi save gohed blong luk naesfala paradaes ya long saed blong spirit?

¹⁶ Blong stap oltaem long paradaes long saed blong spirit, yumi mas gohed blong glad from Kristin kongregesen we i stap raon long wol. ?Olsem wanem blong mekem? Hemia taem yumi tingbaot nomo ol gudfala fasin blong ol brata mo sista, be i no ol slak fasin blong olgeta. (Jon 17:20, 21) ?From wanem hemia i impoten? Traem tingbaot. Taem yumi stap long wan pak o wan garen, yumi save se bambae yumi luk plante defren kaen tri. Long sem fasin, long ol kongregesen tede, i gat plante defren kaen man we oli olsem ol tri. (Aes. 44:4; 61:3) Yumi mas meksua se yumi gohed blong tingbaot nomo samting we i mekem “pak” ya i luk naes, be i no ol nogud samting long “ol tri” ya we i stap klosap long  yumi. Yumi no mas letem ol slak fasin blong yumi o blong narafala long kongregesen, i blokem yumi blong luk naesfala fasin joengud we i stap long Kristin kongregesen raon long wol.

17. ?Yumi wanwan i save mekem wanem blong kongregesen i gohed blong joen gud?

¹⁷ ?Yumi wanwan i save mekem wanem blong kongregesen i gohed blong joen gud? Hemia taem yumi kam man blong mekem pis. (Mat. 5:9; Rom 12:18) Evritaem we yumi traehad blong gat pis wetem narafala long kongregesen, yumi stap mekem paradaes ya long saed blong spirit i kam naes moa. Yumi mas gohed blong tingbaot se Jehova nao i pulum wanwan man we i stap insaed long paradaes ya, blong oli save wosipim hem long fasin we i klin. (Jon 6:44) Traem tingbaot, Jehova i glad tumas taem hem i luk we yumi traehad blong holemtaet pis mo joengud wetem ol man ya we oli sas long ae blong hem, hemia ol man blong hem.—Aes. 26:3; Hag. 2:7.

18. ?Yumi mas tingting dip oltaem long wanem, mo from wanem?

¹⁸ ?Yumi mas mekem wanem blong kasem gudfala samting from ol blesing we God i givim long ol man blong hem? Yumi mas tingting dip long ol samting we yumi lanem long Tok blong God, mo long ol buk blong yumi we i stanap long Baebol. Fasin blong stadi mo tingting dip bambae i halpem yumi blong wokem ol Kristin fasin, we i pulum yumi blong ‘lavlavem yumi olsem we yumi brata nomo,’ insaed long kongregesen. (Rom 12:10) Taem yumi tingting dip long ol blesing we yumi stap kasem naoia, frensip blong yumi wetem Jehova bambae i kam strong moa. Mo taem yumi tingbaot ol gudfala samting we Jehova i promes blong givim long fiuja, hemia i mekem yumi sua se yumi wantem gohed blong wosipim hem gogo i no save finis. Olgeta samting ya bambae oli mekem se yumi glad moa blong wosipim hem naoia.

19. (1) Folem Aesea 30:18, ?yumi save sua long wanem? (2) ?Wanem bambae i halpem yumi blong stanap strong mo stap glad?

¹⁹ Jehova ‘bambae i girap’ long bihaf blong yumi taem hem i finisim rabis wol ya. (Aes. 30:18) Yumi sua se Jehova we i “God blong jastis,” bambae i no letem wol blong Setan i stap wan moa dei. (Aes. 25:9) Olsem Jehova, yumi tu yumi stap wet wetem longfala tingting blong luk dei ya blong sevem man i kamtru. Be go kasem taem ya, yumi mas gohed blong tinghae long privilej ya blong prea, stadi mo folem Tok blong God, mo tingting dip long ol blesing we yumi kasem. Sipos yumi mekem olsem, Jehova bambae i halpem yumi blong stanap strong mo yumi glad blong wosipim hem.