?Yu yu wantem kasem plante moa gudfala samting long pesnel stadi blong yu? Hemia sam rod we i save halpem yu blong putum tingting blong yu i stap long samting we yu ridim:

• Jusum wan gudfala ples. Traem faenem wan ples we i klin mo i gat naf laet blong yu save rid. Yu save jusum blong sidaon long wan tebol, o wan narafala ples we yu harem se i stret long yu.

• Faenem wan ples we i no gat man. Jisas i jusum blong prea “long eli moning . . . long wan ples we i no gat man long hem.” (Mak 1:35) Sipos yu no save faenem wan ples we i no gat man, yu save letem famle blong yu o olgeta we yu laef wetem olgeta, oli save wetaem yu wantem stadi, mo askem blong oli no distebem yu long taem ya.

• No letem ol samting oli pulum tingting blong yu. Sipos yu yusum fon o tablet blong mekem pesnel stadi, i gud yu jenisim seting blong hem blong i no mekem noes, olsem nao bambae i no gat wan samting i distebem yu taem yu stap stadi. Sipos yu stap stadi, nao yu tingbaot se i gat wan samting we yu mas mekem, raetemdaon blong yu no fogetem blong mekem biaen. Sipos i had blong yu putum tingting blong yu i stap long wanem we yu stap stadi long hem, i gud yu spel smol mo go wokbaot, o mekem smol eksasaes.