1-2. ?Wanem “gudfala wok” we wan elda i mekem?

 SIPOS yu bin mekem wok olsem man blong givhan blong sam taem, maet yu wok had finis blong gat sam gudfala fasin we yu nidim blong kam wan elda. ?Yu yu wantem kasem “gudfala wok” ya?—1 Tim. 3:1.

² ?Wanem wok blong wan elda? Hem i lidim wok blong prij, i wok had blong visitim ol brata mo sista blong leftemap tingting blong olgeta, i tijim olgeta, mo i mekem kongregesen i kam strong taem i talem ol gudfala toktok long olgeta mo i soem gudfala eksampol. Hemia nao from wanem Baebol i tokbaot ol elda se “oli olsem presen.”—Efes. 4:8.

3. ?Wan brata i mas mekem wanem blong i save kam wan elda? (1 Timoti 3:​1-7; Taetas 1:​5-9)

³ ?Yu save mekem wanem blong kam wan elda? Blong kam wan elda, i no naf nomo we yu gat gudhan blong mekem wan wok. Long wol, plante taem blong kasem wan wok, yu mas gat gudhan long wok we masta i wantem. Be blong kam wan elda, hemia i defren. I no naf nomo we yu gat gudhan long wok blong prij mo tij, be yu mas gat ol gudfala fasin we 1 Timoti 3:​1-7 mo Taetas 1:​5-9 (Ridim.) i talem se wan elda i mas gat. Taswe long stadi ya, bambae yumi tokbaot tri samting we wan elda i mas mekem. Hem i mas gat gudnem insaed mo aotsaed long kongregesen, hem i soem gudfala eksampol long famle blong hem, mo i mas glad blong givhan long kongregesen.

 GAT WAN GUDNEM

4. ?I minim wanem se yu “no mas gat poen” long yu?

⁴ Blong kam wan elda, yu “no mas gat poen” long yu. Hemia i minim se ol narafala oli gat gudfala tingting long yu from we yu gat ol gudfala fasin, mo i no gat wan risen blong ol man oli tok agensem yu. Antap long hemia, ‘ol man aotsaed oli mas luk se yu wan gudfala man.’ I tru, ol man we oli no bilif oli save jikim yu from bilif blong yu, be sipos yu tok tru mo yu gat ol gudfala fasin, bambae oli no save faenem eni poen long yu. (Dan. 6:​4, 5) Taswe, i gud yu askem se: ‘?Mi mi gat gudnem insaed mo aotsaed long kongregesen?’

5. ?I minim wanem se yu “laekem blong mekem ol gudfala fasin”?

⁵ Sipos yu “laekem blong mekem ol gudfala fasin,” bambae yu lukluk nomo gudfala fasin blong ol narafala mo yu talem ol gudfala tok long olgeta from. Mo tu, yu glad blong mekem i gud long ol narafala, mo yu mekem moa long wanem we oli tingbaot. (1 Tes. 2:8) ?From wanem i impoten we ol elda oli gat fasin ya? From we bambae oli yusum plante taem blong olgeta blong leftemap tingting blong ol brata mo sista long kongregesen, mo mekem gud ol narafala wok blong olgeta. (1 Pita 5:​1-3) Nating se oli gat plante wok blong mekem, be oli glad moa taem oli givhan long narafala.—Wok 20:35.

6. ?I minim wanem blong “welkamem ol narafala”? (Hibru 13:​2, 16; mo tu, yu luk pija.)

⁶ Yu soemaot se yu “welkamem ol narafala,” taem yu mekem i gud long ol narafala, mo hemia minim tu olgeta we oli no ol besfren blong yu. (1 Pita 4:9) Wan buk i tokbaot se wan man we i glad blong welkamem narafala i kam long haos, “doa blong haos blong hem, mo hat blong hem i mas open long ol strenja.” Askem yu wan se: ‘?Ol narafala oli tingbaot mi olsem wan man we i kaen long ol visita we oli kam long kongregesen blong mi?’ (Ridim Hibru 13:​2, 16.) Wan man we i glad blong welkamem ol narafala, hem i serem samting we hem i gat wetem ol visita, we hemia i minim olgeta we oli no gat plante samting, mo ol brata we oli kam givim ol tok, olsem ol eria elda mo ol narafala brata.—Jen. 18:​2-8; Prov. 3:27; Luk 14:​13, 14; Wok 16:15; Rom 12:13.

7. ?I minim wanem se yu “no mas wan man we i laekem mane tumas”?

⁷ Yu “no mas wan man we i laekem mane tumas.” Hemia i min se yu no tingbaot nomo ol  samting blong bodi. Nating se yu rij o pua, i gud yu putum Kingdom i stap fasples long laef blong yu. (Mat. 6:33) Yu yusum taem, paoa, mo ol narafala samting we yu gat blong wosipim Jehova, yu lukaot gud long famle blong yu, mo yu givhan long kongregesen. (Mat. 6:24; 1 Jon 2:​15-17) Askem yu wan se: ‘?Mi mi gat wanem tingting long saed blong mane? ?Mi mi glad long wanem we mi gat? ?O oltaem mi wantem kasem plante moa mane mo ol sas samting?’—1 Tim. 6:​6, 17-19.

8. ?Wanem sam rod blong soemaot se yu “kontrolem ol fasin”blong yu mo yu “bos long tingting”?

⁸ Sipos yu “kontrolem ol fasin” blong yu mo yu “bos long tingting,” hemia i soemaot se yu gat stret tingting long evri samting we yu mekem long laef. Eksampol, yu no kakae mo dring bitim mak, stael blong klos mo hea blong yu i stret, mo yu jusum gud ol samting we yu mekem blong spel mo pleplei. Mo tu, yu no folem fasin blong laef blong ol man blong wol. (Luk 21:34; Jem. 4:4) Yu gohed blong gat ol gudfala fasin nating se ol man oli no kaen long yu. Yu ‘no wan man blong drong,’ mo ol narafala oli no tingbaot yu olsem wan man blong dring bitim mak. Askem yu wan se: ‘?Fasin blong laef blong mi i soemaot se mi stap kontrolem ol fasin blong mi mo mi bos long tingting?’

9. ?I minim wanem se yu “gat stret tingting” mo ‘laef blong yu i no olbaot’?

⁹ Sipos yu “gat stret tingting,” yu save skelem gud ol samting folem ol stamba trutok blong Baebol. Yu tingting dip long ol stamba trutok ya, mo hemia i givhan long yu blong luksave mo kasemsave samting. Yu no kwik blong mekem desisen, be yu meksua se yu gat evri save we yu nidim. (Prov. 18:13) From samting ya, yu mekem ol gudfala desisen we i laenap wetem tingting blong Jehova. Sipos ‘laef blong yu i no olbaot,’ yu save mekem gudfala plan mo mekem samting long stret taem. Ol narafala oli save tingbaot yu olsem wan man we i folem gud ol daereksen, mo oli save trastem yu. Ol fasin ya oli save halpem yu blong gat wan gudnem. Naoia, bambae yumi tokbaot ol fasin we Baebol i talem se wan elda i mas gat, blong hem i save soem gudfala eksampol long famle blong hem.

SOEM GUDFALA EKSAMPOL LONG FAMLE

10. ?Olsem wanem wan man i save “lidim gud famle blong hem”?

¹⁰ Sipos yu yu wan hasban mo yu wantem kam wan elda, famle blong yu tu i mas soem gudfala eksampol long ol narafala. Taswe, yu mas “lidim gud famle blong [yu.]” Ol narafala oli mas luksave se yu lavem famle blong yu, mo yu mekem gud wok blong yu olsem hed blong famle. Hemia i minim tu se yu lidim gud olgeta long evri samting we yufala i mekem long saed blong wosip. ?From wanem hemia i impoten? Aposol Pol i talem se: “Sipos wan man i no save lidim gud famle blong hem, ?bambae hem i save lidim gud kongregesen blong God olsem wanem?”—1 Tim. 3:5.

11-12. ?From wanem i impoten we ol pikinini blong wan brata oli gat ol gudfala fasin? (Mo tu, yu luk pija.)

¹¹ Sipos yu yu wan papa, ‘ol pikinini blong yu oli mas obei gud long yu mo oli mas gat gudfala fasin.’ Yu mas soem lav taem yu stap tijim mo trenem olgeta. I tru, bambae oli laf mo pleplei olsem ol narafala pikinini. Be from we yu trenem gud olgeta, bambae oli obei long yu, respektem yu, mo oli gat ol gudfala fasin. Mo tu, yu mas mekem bes blong yu blong halpem ol pikinini blong yu, blong oli frengud wetem Jehova, oli folem ol stamba trutok blong Baebol, mo oli gohed gud kasem we oli baptaes.

¹² ‘Ol pikinini oli mas bilif, mo oli no mas mekem stronghed, mo oli no mas mekem nogud, nao ol man oli stap tokbaot olgeta from.’ Sipos pikinini blong wan brata i mekem wan bigfala sin, ol elda bambae oli luk sipos brata ya i save kam wan man blong givhan mo wan elda, o nogat.  Sipos papa ya i no trenem mo stretem pikinini blong hem, i klia se hem i no naf blong kam wan elda.—Yu luk Wajtaoa blong 15 Oktoba 1996, pej 21 haf 6-7.

GIVHAN LONG KONGREGESEN

13. ?Olsem wanem yu soemaot se yu ‘rere blong lego prapa tingting blong yu’ mo ‘no folem prapa tingting blong yu nomo’?

¹³ Ol brata we oli gat ol gudfala Kristin fasin, oli save givhan bigwan long kongregesen. Wan man we i “rere blong lego prapa tingting blong hem,” hem i wan man blong mekem pis. Sipos yu wantem se ol narafala oli tingbaot yu olsem wan man we i rere blong lego prapa tingting blong hem, bambae yu lesin gud long olgeta mo traem kasemsave long tingting blong olgeta. Traem tingbaot se yu yu wan elda mo yu stap long wan miting wetem ol narafala elda. ?Bambae yu yu glad blong sapotem desisen blong ol narafala, sipos i no go agensem ol loa mo stamba trutok blong Baebol? Yu ‘no folem prapa tingting blong yu nomo,’ i min se yu no traem pulum ol narafala blong mekem ol samting folem tingting blong yu. Yu save se i impoten we yu lesin long tingting blong ol narafala. (Jen. 13:​8, 9; Prov. 15:22) Yu ‘no wan man blong rao’ o ‘kros kwik.’ Hemia i min se yu no tok strong long narafala, o soem se yu no respektem olgeta. Defren olgeta, yu toktok kaen mo yu toktok long fasin we i waes. Olsem wan man blong pis, yu yu tekem faswan step blong mekem pis wetem ol narafala, nating se i had. (Jem. 3:​17, 18) Sipos yu toktok kaen long narafala, antap moa long man we i agens, bambae yu mekem se oli no kros tumas.—Jaj. 8:​1-3; Prov. 20:3; 25:15; Mat. 5:​23, 24.

14. ?I minim wanem se yu “no mas wan man we i jes kam disaepol” mo yu “holemstrong long God”?

¹⁴ Wan brata we i naf blong mekem wok olsem wan elda, hem i “no mas wan man we i jes kam disaepol.” Nating se yu baptaes i no longtaem i pas, yu nidim taem blong yu save kam bigwan long Kristin fasin. Bifo we yu kam wan elda, yu mas soemaot se yu gat tingting daon olsem Jisas, mo yu glad nomo blong wet long Jehova blong i givim wok long yu. (Mat. 20:23; Fil. 2:​5-8) Yu save pruvum se yu “holemstrong long God,” taem yu fasgud long Jehova mo  long ol rul blong hem, mo yu folem gud ol daereksen we i kam long oganaesesen blong Jehova.—1 Tim. 4:15.

15. ?Wan elda i mas wan nambawan man blong givim tok? Yu eksplenem.

¹⁵ Baebol i talem klia se ol ovasia oli “mas naf blong tijim ol narafala.” ?Be hemia i min se yu mas wan nambawan man blong givim ol tok? Nogat. I no evri elda we oli gat gudhan blong mekem ol tok. Be taem oli prij mo leftemap tingting blong ol brata mo sista, oli mas naf blong yusum gud Baebol blong tijim mo leftemap tingting blong ol brata sista. (Skelem wetem 1 Korin 12:​28, 29 mo Efesas 4:11.) Nating se i olsem, yu mas traehad oltaem blong kam gud moa long fasin blong yu blong tij. ?Yu save mekem samting ya olsem wanem?

16. ?Yu save mekem wanem blong kam wan gudfala tija? (Mo tu, yu luk pija.)

¹⁶ “Folem gud ol tok ya we i tru.” Blong kam wan gudfala tija, ol tijing mo ol advaes we yu givim long narafala, oli mas stanap long Baebol. Blong mekem olsem, yu mas stadi gud long Baebol mo long ol buk blong yumi. (Prov. 15:28; 16:23) Taem yu stadi, i gud yu makem olsem wanem ol buk blong yumi oli eksplenem ol vas blong Baebol. Mo taem yu tij, i gud yu traem kasem hat blong ol man we oli lesin. Yu save kam wan gudfala tija, sipos yu askem advaes long ol elda we oli gat ekspiriens mo folem advaes blong olgeta. (1 Tim. 5:17) Ol elda oli mas “save” olsem wanem blong “leftemap tingting” blong ol brata mo sista. Be samtaem ol elda oli mas givim advaes o “stretem” olgeta tu. Sipos oli mekem olsem, oltaem oli mas toktok kaen. Sipos yu toktok kaen, yu soemaot lav, mo ol tijing blong yu oli stanap long Baebol, bambae yu naf blong kam wan gudfala tija from we yu stap folem fasin blong Jisas, we hem nao i Bigfala Tija.—Mat. 11:​28-30; 2 Tim. 2:24.

GOHED BLONG TRAEHAD

17. (1) ?Wanem i save halpem ol man blong givhan blong oli gohed blong traehad? (2) ?Ol elda oli mas tingbaot wanem taem oli stap lukluk sipos wan brata i save kam wan elda? (Yu luk bokis ya, “ Gat Stret Tingting Taem Yufala i Stap Tokbaot Sipos Wan Brata i Save Kam Wan Elda.”)

¹⁷ Sam man blong givhan, maet oli harem se  bambae oli neva kam wan elda from oli luk se i gat plante fasin we oli mas wok long hem. Be tingbaot se Jehova mo oganaesesen blong hem i no askem yu blong soemaot ol fasin ya, long wan fasin we i stret gud olgeta. (1 Pita 2:21) Mo tabu spirit blong Jehova nao i save halpem yu blong wokem ol fasin ya. (Fil. 2:13) ?Be i gat wan fasin we yu yu wantem kam gud moa long hem? I gud yu prea long Jehova from. Biaen yu mekem risej long fasin ya, mo yu askem wan long ol elda blong i save givhan long yu blong kam gud moa long hem.

18. ?Stadi ya i leftemap tingting blong ol man blong givhan blong oli mekem wanem?

¹⁸ I gud evri brata wetem olgeta we oli kam elda finis, oli gohed blong wokem ol fasin we yumi tokbaot long stadi ya. (Fil. 3:16) ?Yu yu wan man blong givhan? !I gud yu gohed blong traehad! Askem Jehova blong i halpem yu mo trenem yu blong yu save mekem moa long wok blong hem mo halpem kongregesen. (Aes. 64:8) I gud Jehova i blesem yu from olgeta traehad we yu mekem blong kam wan elda.