1. ?Aposol Pol i gat wanem tingting long ol man blong givhan?

 OL MAN blong givhan oli mekem sam impoten wok insaed long kongregesen. Aposol Pol i tinghae long ol brata ya. Taswe taem hem i raet i go long ol Kristin long Filipae, hem i talem halo long ol man blong givhan wetem ol elda.—Fil. 1:1.

2. ?Luis i gat wanem tingting long wok we hem i mekem olsem wan man blong givhan?

² Plante brata we oli baptaes finis, nating se oli yangfala o olfala, oli kasem bigfala glad taem oli mekem wok olsem man blong givhan. Eksampol, Devan i kam man blong givhan taem hem i gat 18 yia. Mo wan brata we nem blong Luis, i kam man blong givhan taem hem i gat samwe 50 yia. Luis i tokbaot filing we plante narafala brata oli gat, hem i se: “Mi mi glad tumas blong mekem wok olsem wan man blong givhan, antap moa taem mi tingbaot bigfala lav we kongregesen i soem long mi.”

3. ?Wanem ol kwestin we bambae yumi tokbaot long stadi ya?

³ Sipos yu yu wan brata we i baptaes finis, mo yu no wan man blong givhan yet, ?yu yu save traehad blong kasem mak ya? ?Wanem i save pulum yu blong kasem mak ya? ?Mo wanem ol fasin we Baebol i talem se wan man blong givhan i mas gat? Bambae yumi tokbaot ansa blong ol kwestin ya long stadi ya. Be fastaem, bambae yumi luk se wanem nao wok blong wan man blong givhan.

?WANEM WOK BLONG WAN MAN BLONG GIVHAN?

4. ?Wanem wok blong wan man blong givhan? (Mo tu, yu luk pija.)

⁴ Wan man blong givhan, hemia wan brata we i baptaes finis  mo tabu spirit i putumap hem blong i halpem ol elda blong mekem plante impoten samting insaed long kongregesen. Sam man blong givhan oli meksua se ol pablisa oli gat naf teritori mo ol buk blong yusum long wok blong prij. Sam narafala oli givhan blong klinim mo lukaot gud long Haos Kingdom. Mo tu, ol man blong givhan oli mekem wok blong welkam, mo oli lukaot long ol samting blong saon mo video, long taem blong ol miting. Plante wok we ol man blong givhan oli mekem, i givhan bigwan long kongregesen. Be samting we i moa impoten, hemia se oli ol man we oli bigman long spirit, oli lavem Jehova, mo oli folem ol rul blong hem. Mo tu, oli lavem ol brata mo sista. (Mat. 22:​37-39) ?Olsem wanem wan brata we i baptaes finis i save traehad blong kam wan man blong givhan?

5. ?Wan brata i mas mekem wanem blong i kam wan man blong givhan?

⁵ Baebol i tokbaot ol fasin we wan brata i mas gat, blong i save kam wan man blong givhan. (1 Tim. 3:​8-10, 12, 13) Yu save kasem mak ya, sipos yu stadi long ol fasin ya we Baebol i tokbaot, mo biaen yu traehad blong wokem ol fasin ya. Be fastaem, yu mas tingbaot from wanem yu wantem kasem mak ya.

?FROM WANEM YU WANTEM KAM WAN MAN BLONG GIVHAN?

6. ?Wanem i mas pulum yu blong wantem givhan long ol brata mo sista? (Matiu 20:28; mo tu, yu luk pija.)

⁶ Jisas Kraes i soemaot gudfala eksampol long saed ya. Hem i lavem Papa blong hem, mo ol man. Mo lav ya i pulum hem blong wok had mo mekem ol wok we ol narafala oli ting nating long hem, blong givhan long ol narafala. (Ridim Matiu 20:28; Jon 13:​5, 14, 15) Sipos lav nao i pulum yu, Jehova bambae i blesem yu mo i halpem yu blong kasem mak ya blong kam wan man blong givhan.—1 Kor. 16:14; 1 Pita 5:5.

7. ?From wanem wan brata i mas blokem fasin ya blong tingbaot hem wan nomo?

⁷ Plante man long wol tede, oli tinghae long ol man we oli stap leftemap olgeta wan. Be long oganaesesen blong Jehova i no olsem. Wan brata we lav nao i pulum hem blong wok, olsem Jisas, hem i no traem blong kasem paoa, bos long ol narafala, o wantem kasem haenem. Sipos oli putumap wan man long kongregesen we i stap tinghae long hem wan, i sua se bambae hem i no wantem mekem ol wok we oli daon, o sam narafala wok we hem i mas mekem blong  lukaot long ol sipsip blong Jehova. Maet hem i save gat tingting ya se, from we hem i impoten, i no nid blong hem i mekem ol smosmol wok ya. (Jon 10:12) Jehova bambae i no blesem traehad blong wan man olsem we i flas o i tingbaot hem wan nomo.—1 Kor. 10:​24, 33; 13:​4, 5.

8. ?Wanem advaes we Jisas i givim long ol aposol blong hem?

⁸ Samtaem, ol gudfala fren blong Jisas tu oli traehad blong kasem sam spesel wok, be risen we i pulum olgeta i no stret. Traem tingbaot samting we tu aposol blong Jisas, hemia Jemes mo Jon, tufala i mekem. Tufala i askem long Jisas blong i givim wan hae posisen long tufala insaed long Kingdom blong hem. Jisas i no talem se i oraet nomo we tufala i askem samting ya, be hem i eksplenem long ol 12 aposol blong hem se: “Sipos wan long yufala i wantem kam hae moa long yufala, hem i mas kam minista blong yufala, mo sipos wan long yufala i wantem kam faswan long yufala, hem i mas kam olsem slef blong evriwan.” (Mak 10:​35-37, 43, 44) Ol brata we stret tingting nao i pulum olgeta blong kam man blong givhan, bambae oli givhan bigwan long kongregesen.—1 Tes. 2:8.

?WANEM I SAVE HALPEM YU BLONG WANTEM GIVHAN LONG OL BRATA MO SISTA?

9. ?Wanem i save halpem yu blong wantem kam wan man blong givhan?

⁹ I sua se yu lavem Jehova mo yu wantem givhan long ol narafala. Be maet, yu no gat tingting ya blong kam wan man blong givhan. ?Wanem i save halpem yu blong wantem mekem wok ya? I gud yu tingbaot glad we bambae yu kasem taem yu givhan long ol brata mo sista. Jisas i talem se: “Man i harem gud moa taem hem i givim samting, i bitim we hem i kasem samting.” (Wok 20:35) Yes, Jisas i folem gud ol tok ya. Mo hem i kasem bigfala glad taem hem i givhan long ol narafala, mo yu tu yu save mekem sem mak.

10. ?Olsem wanem Jisas i soemaot se hem i glad blong givhan long ol narafala? (Mak 6:​31-34)

¹⁰ Traem tingbaot wan eksampol we i soemaot se Jisas i glad blong givhan long ol narafala. (Ridim Mak 6:​31-34.) Wantaem, Jisas mo ol aposol blong hem oli taed tumas. Ale, oli go long wan ples we i kwaet blong oli save spel smol. Be wan bigfala hip blong ol man oli go fastaem long olgeta, from oli wantem se Jisas i tijim olgeta. Jisas i save talem no long olgeta, from hem mo ol aposol “oli no gat taem nating blong spel mo blong kakae.” O Jisas i save tijim olgeta long wan o tu trutok nomo, mo biaen i sanem olgeta oli gobak. Be hem i no mekem olsem. From we hem i lavem olgeta, “hem i tijim olgeta long plante samting.” Mo hem i gohed blong tijim olgeta gogo kasem “long sapa.” (Mak 6:35) Hem i mekem olsem from we “hem i sore tumas long olgeta.” Hem i wantem blong tijim olgeta from we hem i lavem olgeta. Yes, Jisas i kasem bigfala glad taem hem i givhan long ol narafala.

11. ?Olsem wanem Jisas i halpem ol narafala? (Mo tu, yu luk pija.)

¹¹ Taem Jisas i stap tijim ol hip man ya, hem i mekem sam moa narafala samting blong givhan long olgeta. Hem i givim ol samting we oli nidim long saed blong bodi tu. Hem i mekem merikel blong i gat plante kakae, mo i askem long ol disaepol blong hem blong oli givimaot long ol man. (Mak 6:41) Taem hem i mekem olsem, hem i stap tijim ol disaepol blong hem olsem wanem blong givhan long ol narafala. Mo tu, hem i wantem soemaot long olgeta se ol wok olsem oli impoten, mo hemia nao wok we ol man blong givhan oli stap mekem. !Traem tingbaot glad we ol aposol oli kasem taem oli givhan long Jisas blong givimaot kakae long ol man, gogo kasem we “olgeta evriwan oli kakae mo oli fulap gud”! (Mak 6:42) I tru, i no long taem ya nomo we Jisas tingbaot ol narafala i  bitim hem wan. Be hem i mekem olsem long ful laef blong hem taem hem i stap long wol ya. (Mat. 4:23; 8:16) Jisas i glad tumas blong tijim ol narafala mo givim samting we oli nidim. Yu tu bambae yu kasem bigfala glad taem yu no tingbaot yu wan nomo, be yu mekem wok blong givhan long ol narafala.

12. ?From wanem yumi no mas ting se yumi no gat gudhan blong givhan long kongregesen?

¹² Sipos yu harem se yu no gat gudhan blong mekem wan wok, yu no mas harem nogud. I sua se yu gat sam gudfala fasin we i mekem se yu save givhan long kongregesen. I gud yu tingbaot samting we Pol i talem long 1 Korin 12:​12-30, mo biaen yu askem Jehova blong i halpem yu blong luk olsem wanem yu save folem. Ol tok blong Pol oli soemaot klia se yu yu sem mak olsem ol narafala man blong Jehova we oli sas, mo kongregesen i nidim yu. Sipos yu mas kam gud moa yet long sam fasin, blong yu save kam wan man blong givhan, yu no mas harem nogud. Defren olgeta, i gud yu mekem wanem we yu naf blong mekem blong wosipim Jehova mo halpem ol brata mo sista. Yu save sua se ol elda bambae oli tingbaot yu, mo oli givim ol wok we yu naf blong mekem taem yu stap traehad blong kam wan man blong givhan.—Rom 12:​4-8.

13. ?From wanem i impoten blong wokem ol fasin we Baebol i talem se ol man blong givhan oli mas gat?

¹³ Traem tingbaot wan moa risen from wanem yu mas traehad blong kasem mak blong kam wan man blong givhan. Bighaf blong ol fasin we Baebol i talem se ol man blong givhan oli mas gat, hemia ol sem fasin we olgeta Kristin oli mas gat. Blong talem stret, evri Kristin oli mas frengud wetem Jehova, oli glad blong givim samting long ol narafala, mo oli mas soemaot wan gudfala eksampol long laef blong olgeta. Taswe, ?wanem sam moa fasin we wan brata i mas gat blong hem i save kam man blong givhan?

?OLSEM WANEM BLONG KASEM MAK YA BLONG KAM MAN BLONG GIVHAN?

14. ?I minim wanem blong ‘mekem ol fasin we narafala i save respektem yu from’? (1 Timoti 3:​8-10, 12)

¹⁴ Naoia bambae yumi luk sam long ol fasin we 1 Timoti 3:​8-10, 12 (Ridim.) i tokbaot. Wan man blong givhan i mas ‘mekem ol fasin we narafala i save respektem hem from.’ Maet tok ya i minim tu se man i “tinghae” o “ona” long hem. Sipos yu kam wan man blong givhan, hemia i no minim se yu no save laflaf o mekem samting blong haremgud. (Pri. 3:​1, 4) Be i minim se yu mas wok had blong mekem  gud olgeta wok we yu kasem. Sipos oltaem yu stap finisim mo mekem gud ol wok we yu kasem, bambae kongregesen i trastem mo respektem yu.

15. ?Tok ya “oli no mas talem ol tok blong trikim ol man” mo “oli no mas griri nao oli mekem samting we i blong givhan long olgeta nomo,” i minim wanem?

¹⁵ “Oli no mas talem ol tok blong trikim ol man,” hemia i minim se yu mas tok tru, yu no giaman, mo yu talem ol tok we ol narafala oli save trastem. Yu mekem samting we yu talem se bambae yu mekem, mo yu no giaman long ol narafala man. (Prov. 3:32) “Oli no mas griri nao oli mekem samting we i blong givhan long olgeta nomo,” hemia i minim se oli mas tok tru taem oli mekem bisnes wetem narafala mo taem oli mekem ol wok we i joen wetem mane. Yu no mas yusum gudfala fasin fren we yu gat wetem olgeta long kongregesen, olsem wan rod blong yu save winim moa mane.

16. (1) ?I minim wanem se “oli no mas dring tumas waen?” (2) ?I minim wanem se “tingting blong olgeta i no stikim olgeta”?

¹⁶ “Oli no mas dring tumas waen,” i minim se yu no mas dring alkol bitim mak o kam wan man we ol narafala oli save hem olsem wan alkolik. “Tingting blong olgeta i no stikim olgeta,” i minim se yu mas mekem laef blong yu i laenap wetem ol rul blong Jehova. Nating se yu no stret gud, be yu save gat pis long tingting from we yu frengud wetem God.

17. ?Tok ya ‘traem olgeta blong luk sipos oli naf’ i minim wanem? (1 Timoti 3:10; mo tu, yu luk pija.)

¹⁷ ‘Traem olgeta blong luk sipos oli naf,’ i minim se yu soemaot finis se ol narafala oli save trastem yu blong mekem ol wok. Taswe, taem ol elda oli givim wan wok long yu, i gud yu folem advaes blong olgeta mo ol daereksen we i kam long oganaesesen. I gud yu kasemsave samting we yu mas mekem mo wetaem blong finisim wok ya. Sipos yu mekem gud ol wok ya, ol narafala long kongregesen bambae oli luk mo oli glad long ol traehad blong yu. Ol elda, i gud yufala i trenem ol brata we oli baptaes finis. (Ridim 1 Timoti 3:10.) ?Long kongregesen blong yu i gat sam yangfala brata we oli baptaes finis? ?Oli gat wan gudfala program blong stadi olgeta wan mo rerem gud ol miting? ?Oltaem oli givim ol ansa long ol miting mo joen long wok blong prij? Sipos yes, givim wok long olgeta we i stret folem yia blong olgeta. Long rod ya, ol yangfala brata ya oli save soemaot “sipos oli naf” blong mekem ol wok ya. Mo taem oli kam bigwan moa, bambae oli naf blong kam ol man blong givhan.

18. ?Tok ya “oli no gat poen long olgeta” i minim wanem?

 ¹⁸ “Oli no gat poen long olgeta,” i minim se ol narafala oli no save tok agensem yu se yu mekem wan samting we i rong. I tru, ol man oli save talem ol giaman tok long saed blong ol Kristin. Hemia nao samting we i hapen long Jisas, mo hem i talem se semfala samting ya bambae i hapen long ol man blong hem. (Jon 15:20) Be sipos yu gohed blong holemtaet ol gudfala fasin olsem Jisas, bambae yu gat gudnem insaed long kongregesen.—Mat. 11:19.

19. ?Taem Baebol i talem se “oli gat wan waef nomo” hemia i minim wanem?

¹⁹ “Oli gat wan waef nomo.” Sipos yu yu mared, yu mas holemtaet stamba tingting blong Jehova long saed blong mared, hemia se wan man i mas gat wan woman nomo. (Mat. 19:​3-9) Wan Kristin man i neva mas mekem enikaen doti fasin blong seks. (Hib. 13:4) Be i no hemia nomo. Yu mas stap tru long waef blong yu, mo yu neva mas soemaot long wan narafala woman se yu gat intres long hem.—Job 31:1.

20. ?Olsem wanem wan man i soemaot se hem i “lidim gud” famle blong hem?

²⁰ “Oli lidim gud ol pikinini blong olgeta mo famle blong olgeta.” Sipos yu yu wan hed blong famle, yu mas tinghae long ol wok blong yu. Yu mekem famle wosip evri wik. Yu joen long wok blong prij wetem wanwan memba blong famle blong yu. Mo yu halpem ol pikinini blong yu, blong olgeta wan oli frengud wetem Jehova. (Efes. 6:4) Wan man we i lukaot gud long famle blong hem, hem i soemaot se hem i save lukaot gud long kongregesen.—Skelem wetem 1 Timoti 3:5.

21. ?Yu save mekem wanem sipos yu no wan man blong givhan yet?

²¹ Ol brata, sipos yu yu no wan man blong givhan yet, plis ridim gud atikol ya mo askem Jehova blong i halpem yu long saed ya. Yu stadi long ol fasin we wan man blong givhan i mas gat, mo yu wok had blong wokem ol fasin ya. Mekem lav we yu gat long Jehova mo long ol brata sista i kam bigwan moa. Mo i gud yu tingbaot from wanem yu wantem givhan long olgeta. (1 Pita 4:​8, 10) Bambae yu kasem bigfala glad taem yu mekem bes blong yu blong givhan long ol brata mo sista insaed long kongregesen. !I gud Jehova i blesem ol traehad blong yu, taem yu stap wok had blong kam wan man blong givhan!—Fil. 2:13.