1, 2. (1) ?Fasin blong mared i stat olsem wanem? (2) ?Adam mo Iv i kasem save long wanem? (Yu luk pija long stat blong stadi.)

I STRET nomo blong ol man oli mared. ?Be fasin blong mared i stat olsem wanem, mo i blong wanem? Sipos yumi save ansa long kwestin ya, bambae yumi gat stret tingting long mared mo long blesing we i kamaot from. God i wokem fas man ya Adam, mo i talem long hem blong i putum nem blong ol anamol. Adam i luk se evri anamol oli gat ol fren blong olgeta, “be hem i no faenem wan fren blong hem yet we i stret olsem hem, mo we i save givhan long hem.” Ale God i mekem Adam i slip ded, nao i tekemaot wan rib blong hem mo i mekem wan woman long hem. Biaen Jehova i tekem woman ya i kam long Adam, nao hem i kam waef blong hem. (Ridim Jenesis 2:20-24.) Taswe, mared i wan presen we Jehova i givim.

² Plante yia afta, Jisas i ripitim ol tok we Jehova i talem long garen blong Iden, i se: “Bambae man i mas aot long papa mo mama blong hem, i mas go joen wetem woman blong hem. Nao tufala bambae i kam olsem wan bodi nomo.” (Matiu 19:4, 5) God i tekemaot rib blong Adam blong wokem Iv, taswe tufala i kasem save se tufala i wan nomo. Jehova i no wantem  nating se hasban mo waef i divos, mo man i gat plante woman wantaem.

3. ?Wanem wan impoten risen blong mared?

³ Adam i glad tumas long waef blong hem, we biaen hem i kolem hem se Iv. Hem i prapa fren blong Adam we i save givhan long hem. Bambae Adam mo Iv tufala i harem gud taem tufala i stap tugeta olsem hasban mo waef. (Jenesis 2:18) Wan impoten risen blong mared i blong fulumap wol. (Jenesis 1:28) Nating se ol pikinini oli lavem papa mo mama blong olgeta, be bambae oli lego tufala, blong go statem prapa famle blong olgeta. Ol man bambae oli fulumap wol ya, mo oli mekem i kam wan paradaes.

4. ?Wanem i spolem mared blong Adam mo Iv?

⁴ Taem Adam mo Iv i no obei long Jehova, tufala i spolem mared blong tufala. Setan we i “snek blong bifo,” i trikim Iv se sipos hem i kakae frut blong “tri ya blong save wanem samting i gud mo wanem samting i nogud,” bambae hem i kasem spesel save. Setan i talem se sipos hem i kakae frut ya, bambae hem i naf blong mekem prapa desisen blong hem long samting we i gud mo samting we i nogud. Iv i no go toktok wetem Adam, be i girap i kakae frut ya. Samting ya i soemaot se hem i no respektem Adam we i hed blong famle. Mo taem Adam i kakae frut we Iv i givim long hem, hem i soemaot se hem i no obei long God.​—Revelesen 12:9; Jenesis 2:9, 16, 17; 3:1-6.

5. ?Yumi lanem wanem long ansa blong Adam mo Iv?

⁵ Taem Jehova i toktok long tufala, Adam i blemem Iv, se: “Woman ya we yu yu givim long mi blong i stap wetem mi, hem nao i givim frut blong tri ya long mi, nao mi kakae.” Mo Iv i girap i blemem snek, se i trikim hem. (Jenesis 3:12, 13) Tufala i faenem eskius blong no obei, mo Jehova i jajem tufala stronghed ya. !Tru ya, samting ya i wan woning long yumi! Sipos ol man mo woman oli wantem wan gudfala mared, oli mas obei long Jehova mo oli no mas blemem narafala.

6. ?Jenesis 3:15 i tokbaot wanem?

⁶ Setan i mekem bigfala trabol long Iden, be Jehova i meksua se ol man oli gat wan hop blong fiuja. Hop ya i stap long fas profet tok long Baebol. (Ridim Jenesis 3:15.) * Profet tok ya i soemaot se wan “pikinini blong woman” bambae i smasem hed blong Setan. Long heven, plante plante gudfala enjel oli stap mekem wok blong God, mo olgeta ya oli fren gud wetem hem. Olgeta oli olsem waef blong Jehova. Bambae hem i sanem wan long olgeta ya blong i “smasem hed” blong Setan. Pikinini ya bambae i mekem se ol man we oli obei, oli save kasem  blesing we Adam mo Iv i lusum. Ol man ya bambae oli gat janis blong laef olwe long wol ya, olsem we Jehova i wantem fastaem.​—Jon 3:16.

7. (1) Afta we Adam mo Iv i no obei, ?wanem i hapen long mared? (2) ?Baebol i talem se ol hasban mo waef oli mas mekem wanem?

⁷ Samting we Adam mo Iv i mekem, i karem trabol i kam long mared blong tufala mo ol mared we oli kam biaen. Iv mo ol narafala woman we oli kam biaen, oli harem nogud bitim mak taem oli bonem pikinini. Ol woman oli wantem tumas hasban blong olgeta, be hasban i bos long olgeta, mo samtaem i kilim olgeta olsem we i stap hapen tede. (Jenesis 3:16) Jehova i wantem se hed blong famle i lavem waef blong hem. Mo hem i wantem se waef i obei long hasban blong hem. (Efesas 5:33) Taem tufala i givgivhan long tufala, samting ya i save blokem plante trabol.

8. ?Mared i olsem wanem, long taem blong Adam go kasem Noa?

⁸ Bifo we Adam mo Iv i ded, tufala i gat ol pikinini boe mo gel. (Jenesis 5:4) Fasbon boe blong tufala, Ken, i maredem famle blong hem bakegen. Lamek we i kamaot long laen blong Ken, hem i faswan we Baebol i tokbaot se i gat tu waef. (Jenesis 4:17, 19) Stat long taem blong Adam kasem Noa, smol man nomo oli wosipim Jehova. Sam long olgeta ya, hemia Ebel, Inok, mo Noa wetem famle blong hem. Baebol i talem se long taem blong Noa, ol enjel blong God oli luk we ol gel long wol ya oli naes tumas, “nao oli stap tekem olgeta olsem we oli wantem.” Be samting ya i no stret nating, mo ol pikinini blong ol enjel wetem ol woman ya, oli kam ol dabolbun we oli raf tumas. Baebol i kolem olgeta se ol Nefilim. Long taem ya, “olgeta man long wol oli stap mekem i nogud tumas, mo oltaem, tingting blong olgeta i fulap nomo long ol rabis fasin.”​—Jenesis 6:1-5.

9. ?Long taem blong Noa, Jehova i mekem wanem long ol rabis man? ?Samting we i hapen long taem ya, i tijim yumi long wanem?

⁹ Jehova i talem se bambae hem i mekem bigfala wota i ron, blong spolem olgeta rabis man long wol ya. Noa “i wan prija we i stap talemaot stret fasin,” taswe hem i talemaot bigfala wota ya long ol man. (2 Pita 2:5) Be olgeta oli no lesin from we oli bisi tumas long ol samting blong laef, mo wan long ol samting ya, hemia mared. Jisas i talem se taem blong yumi i olsem taem blong Noa. (Ridim Matiu 24:37-39.) Tede, plante man oli no lesin long gud nius blong Kingdom, we yumi stap talemaot bifo we rabis wol ya i lus. ?Samting we i hapen long taem blong Noa, i tijim yumi long wanem? Yumi no mas letem ol samting olsem tingting blong mared mo blong gat pikinini, oli kam impoten moa long laef blong yumi, nao yumi fogetem se dei blong Jehova i klosap.

10. (1) ?Long plante kantri, ol man oli mekem wanem fasin? (2) ?Ebraham mo Sera i soemaot wanem gudfala eksampol?

¹⁰ Noa mo ol trifala boe blong hem, olgeta wanwan oli gat wan waef nomo. Be afta we bigfala wota i ron, ol man oli gat plante waef. Long plante kantri, ol man oli stap mekem rabis fasin blong seks, mo rabis fasin ya i kam wan haf blong wosip blong sam skul tu. Taem Ebraham mo Sera i muv i go long Kenan, tufala i stap long medel blong ol man we  oli stap slip olbaot mo oli no tinghae long mared. Biaen, Jehova i spolem taon blong Sodom mo Gomora from we ol man long tufala taon ya oli stap mekem plante rabis fasin. Be fasin blong Ebraham i defren long fasin blong ol man ya. Hem i hed blong famle long gudfala fasin, we i lukaot gud long waef blong hem, mo Sera i soemaot gudfala eksampol blong obei long hasban blong hem. (Ridim 1 Pita 3:3-6.) Ebraham i meksua se boe blong hem Aesak i maredem wan woman we i wosipim Jehova. Mo Aesak tu i mekem sem samting long Jekob, we biaen ol pikinini blong hem oli kam ol 12 laen blong Isrel.

11. ?Olsem wanem Loa blong Moses i lukaotgud long ol man Isrel?

¹¹ Sam yia biaen, Jehova i mekem wan kontrak wetem neson blong Isrel. Hem i givim Loa blong Moses long olgeta, we i lukaotgud long ol hasban mo waef, blong oli save gohed blong wosipim Jehova. I gat ol loa we oli tokbaot ol kastom blong mared we ol man oli stap mekem, olsem fasin ya blong gat plante woman wantaem. Mo loa i talem se ol man Isrel oli no mas maredem olgeta we oli wosipim ol giaman god. (Ridim Dutronome 7:3, 4.) Taem wan bigfala problem i kamaot long mared, ol elda oli givhan. Mo tu, sipos wan long tufala we i mared i no stap tru long narawan, no i jalus, no i gat nogud tingting, i gat loa i stap blong stretem. Tufala i save divos, be i gat rul blong hem tu. Wan man i save divosem waef blong hem from we i “faenem wan samting long hem we i no laekem hem from.” (Dutronome 24:1) Baebol i no eksplenem wanem samting ya, be hasban i no mas divosem hem from wan smol mastik nomo.​—Levitikas 19:18.

12, 13. (1) ?Long taem blong Malakae, sam man oli mekem wanem long waef blong olgeta? (2) ?Tede sipos wan brata i slip wetem wan narafala woman, wanem bambae i hapen?

¹² Long taem blong profet Malakae, plante man Jiu oli divos from enikaen samting nomo. Ol man ya oli divosem waef blong olgeta, blong oli save maredem ol woman we oli yangfala moa no ol woman we oli no wosipim Jehova. Long taem blong Jisas, ol man Jiu oli stap gohed yet blong divos from enikaen risen nomo. (Matiu 19:3) Jehova God i no laekem nating ol divos olsem.​—Ridim Malakae 2:13-16.

¹³ Tede, Jehova i wantem se ol man blong hem oli stap tru long hasban no waef blong olgeta. Mo klosap oltaem samting ya i hapen. Traem tingbaot sipos wan brata i slip wetem wan narafala woman, nao i divosem waef blong hem blong i save mared wetem woman ya. Sipos man ya i no tanem tingting blong hem, bambae kongregesen i putumaot hem, nao kongregesen i stap klin mo tabu. (1 Korin 5:11-13) Bifo we oli tekembak man ya, hem i mas tanem tingting blong hem mo i “mas soemaot samting ya long laef blong” hem. (Luk 3:8; 2 Korin 2:5-10) I no gat rul we i talem se man ya i mas stap afsaed gogo kasem wetaem. Samtaem i tekem wan yia no plante yia blong wan sinman i pruvum se hem i rili tanem tingting blong hem, mo blong kongregesen i tekembak hem. Be nating se oli tekembak hem, bambae hem i ‘mas stanap long fes blong God yet, blong hem i jajem’ hem.​—Rom 14:10-12; yu luk Wajtaoa blong 15 Novemba 1979, pej 31-32, long Franis mo Inglis.

14. ?Loa i givhan long ol man olsem wanem?

¹⁴ Ol man Isrel oli stap aninit long Loa blong Moses blong bitim 1,500 yia. Loa ya i givhan long ol man blong God long plante rod. Long Loa ya, i gat ol rul we oli givhan long olgeta blong stretem problem insaed long famle, mo Loa ya i lidim olgeta i go long Mesaea. (Galesia 3:23, 24) Be taem Jisas i ded, Loa ya i finis mo God i stanemap wan niufala rod. (Hibrus 8:6) Nating se i olsem, i gat sam samting we ol man oli mekem aninit long Loa blong Moses, be ol Kristin oli no moa save mekem.

15. (1) ?Wanem fasin we ol Kristin oli mas folem long mared? (2) ?Wan Kristin we i wantem divos i mas tingbaot wanem?

¹⁵ Wan dei, ol Farisi oli askem kwestin long Jisas long saed blong mared. Jisas i ansa se aninit long Loa blong Moses, God i letem ol man Isrel oli divos, be hemia i no samting we hem i wantem fastaem. (Matiu 19:6-8) Ansa blong Jisas i soemaot se fasin we ol Kristin oli mas folem, hemia fasin we God i stanemap long garen blong Iden. (1 Timoti 3:2, 12) Tufala we i mared i “kam olsem wan bodi nomo,” hemia i min se tufala i mas stap tugeta. Bambae tufala i joen gud sipos tufala i lavem God mo tufala i lavlavem tufala. Kristin man mo woman i save divos nomo from rabis blong seks, be sipos i from wan narafala samting, tufala i no gat raet blong mared long wan narafala bakegen. (Matiu 19:9) Sipos wan long tufala i mekem sin be i tanem tingting blong hem from, maet narawan i jusum blong fogivim hem. Hemia nao samting we profet Hosea i mekem long waef blong hem Goma we i bin slip olbaot. Mo Jehova tu i fogivim ol man Isrel taem oli tanem tingting blong olgeta. (Hosea 3:1-5) Mo tu, sipos wan man i save se waef blong hem i mekem nogud fasin blong seks, be hem i jusum blong slip wetem hem bakegen, hem i soemaot se i fogivim hem finis. Long taem ya, i no moa gat risen folem Baebol blong divosem hem.

16. ?Jisas i talem wanem long saed blong olgeta we oli singel?

¹⁶ Jisas i talem se, ol Kristin oli save divos nomo sipos hasban no waef blong olgeta i mekem rabis fasin blong seks. Biaen hem i tokbaot olgeta we oli gat presen ya blong stap singel. Hem i talem se: “Man we i save holem tok ya, hem i mas holem.” (Matiu 19:10-12) Plante brata mo sista oli no mared, from we oli wantem mekem wok blong Jehova we i no gat wan samting i blokem olgeta. !Yumi talem gudfala toktok long olgeta from desisen ya!

17. ?Wanem i save givhan long wan Kristin blong i mekem desisen blong mared no nogat?

¹⁷ ?Wanem i save givhan long wan man blong mekem desisen blong mared no blong stap singel? Wan man i mas skelem sipos hem i naf blong stap singel no nogat. Aposol Pol i talem se i moa gud blong man i no mared. Be hem i talem tu se: “From we i gat tumas man we oli stap mekem nogud, i stret nomo blong man i gat woman blong hem, mo woman i gat man blong hem.” Hem i gohed se: “Be sipos yufala i harem we yufala i wantem tumas blong yufala i mared, yufala i mared. Mared i moa gud, i winim fasin ya we oltaem man i wantem woman tumas.” Taswe maet wan man no woman i jusum blong mared blong hem i save blokem ol  filing blong seks we oli pulum hem blong pleplei wetem seks blong hem, no mekem rabis fasin blong seks. Be olgeta we oli singel, oli mas tingbaot sipos oli yang tumas blong mared. Pol i talem se: “Sipos wan man i ting se hem i stap mekem i no stret from we hem i no mared yet, mo sipos man ya i pastru long yang taem blong hem finis, mo ol samting oli mas kamtru olsemia, oraet, hem i save mekem wanem samting hem i wantem. Hem i no stap mekem sin. Hem i save mared.” (1 Korin 7:2, 9, 36, NW; 1 Timoti 4:1-3) I no stret blong wan man i mared nomo from we hem i gat ol filing blong seks, olsem we i stap hapen long plante yangfala. Maet man ya i no naf blong mekem ol wok insaed long mared.

18, 19. (1) ?Tufala we i wantem mared insaed long kongregesen, tufala i mas olsem wanem? (2) ?Long nekis stadi bambae yumi tokbaot wanem?

¹⁸ Long kongregesen, taem man mo woman i wantem mared, tufala i mas baptaes finis, mo tufala i mas lavem Jehova long fulhat blong tufala. Mo tufala i mas lavlavem tufala tumas, nao tufala i wantem spenem ful laef blong tufala tugeta. Jehova bambae i blesem tufala from we tufala i obei long advaes ya se, man i mas mared long “man blong Masta” nomo. (1 Korin 7:39) Mo sipos tufala i gohed blong obei long ol advaes blong Baebol, bambae mared blong tufala i stap gud.

¹⁹ Tede yumi stap laef long ‘ol las dei,’ mo plante man oli no gat ol gudfala fasin we i save mekem mared blong olgeta i stap gud. (2 Timoti 3:1-5) Long nekis stadi, bambae yumi tokbaot ol nambawan rul blong Baebol. Ol rul ya oli save givhan long ol Kristin, blong mekem mared blong olgeta i stap gud mo oli glad, nating se i no isi. Hemia bambae i givhan long olgeta blong oli wokbaot oltaem long rod blong laef we i no save finis.​—Matiu 7:13, 14.