1, 2. (1) ?Aesea 60:22 i kamtru olsem wanem long taem blong en? (2) ?Long ogenaesesen blong Jehova long wol, i nidim wanem?

‘WAN smolwan bambae i kam wan taosen, mo wan smolwan bambae i kam wan bigfala neson.’ (Aesea 60:22, NW) Ol tok ya oli stap kamtru long taem blong en. Blong talem stret, long 2015, i gat 8,220,105 Witnes blong Jehova we oli stap talemaot gud nius blong Kingdom long fulwol. God i tokbaot samting ya, se: “Mi Jehova, bambae mi mekem i spid long prapa taem blong hem.” Taswe, i gat plante wok yet blong yumi evriwan i mekem. ?Olsem wanem? ?Yumi stap mekem evri samting we yumi naf blong mekem, blong yumi prij mo tijim ol man long gud nius? Plante brata mo sista oli stap mekem wok blong haftaem mo fultaem paenia. Mo samfala oli muv i go long wan narafala ples blong givhan long wok blong prij, mo sam narafala oli stap wok had blong bildim ol Haos Kingdom.

² Evri yia, i gat samwe long 2,000 niufala kongregesen. Ol kongregesen ya oli nidim elda mo man blong givhan. Evri yia, i nidim we plante taosen man blong givhan oli kam elda,  mo plante taosen brata oli kam man blong givhan. I klia nomo se i gat “plante wok blong mekem long wok blong Masta,” i no blong ol brata nomo, be blong ol sista tu.​—1 Korin 15:58, NW.

3, 4. ?Sipos yu wantem gohed gud, yu mas mekem wanem?

³ Ridim 1 Timoti 3:1. * Aposol Pol i talem gudfala toktok long ol brata we oli “wantem mekem” wok blong elda. Sipos wan man i wantem tekem wan samting we i stap longwe long hem, hem i mas traehad, mo maet i mas pusum han blong hem i go blong kasem. Traem tingbaot wan brata we i wantem kam man blong givhan. Hem i luksave se hem i mas traehad blong kamgud moa long ol Kristin fasin. Biaen, taem hem i kasem mak ya, hem i gohed blong wok had blong i save kam wan elda.

⁴ Sam brata mo sista oli jenisim sam samting long laef blong olgeta, from we oli wantem mekem moa long wok blong Jehova. Maet oli wantem kam paenia, wok long Betel, no bildim ol Haos Kingdom. Naoia i gud yumi luk olsem wanem Baebol i save givhan long yumi evriwan blong yumi gohed gud.

5. ?Ol yangfala oli save yusum paoa blong olgeta olsem wanem?

⁵ Ol yangfala oli save mekem plante samting long wok blong Jehova, from we oli strong mo oli gat gudfala helt. (Ridim Ol Proveb 20:29.) Sam yangfala brata oli wok blong wokem ol buk mo Baebol long Betel. Plante yangfala brata mo sista oli bildim ol Haos Kingdom no oli givhan blong riperem. Samfala oli go givhan long ol ples we i gat disasta. Mo plante yangfala paenia oli lanem wan narafala lanwis, no oli go long wan narafala ples blong prij.

6-8. (1) ?Eron i mekem wanem blong jenisim tingting blong hem? ?Wanem i kamaot from? (2) ?Olsem wanem yumi save trastem Jehova mo luk se hem i gud?

⁶ Yumi lavem Jehova, mo yumi wantem mekem bes blong yumi long wok blong hem. Nating se i olsem, maet yumi gat sem filing olsem Brata Eron. Hem i wantem kasem glad long wok blong God, be hem i no kasem. Stat taem Eron i smol nomo, hem i stap go long ol miting mo i go prij, be hem i talem se: “Mi harem se miting mo wok blong prij i ded we.” ?Ale hem i mekem wanem?

⁷ Eron i traehad blong ridim Baebol evridei, mo blong rerem mo givim ansa long ol miting. Mo tu hem i prea oltaem. Olgeta samting ya oli givhan long hem blong i gohed gud. Sloslo hem i kasem save moa long Jehova, mo hem i lavem hem moa. Ale Eron i glad moa. Hem i kam wan paenia, i givhan long ol narafala taem i gat disasta, mo i go prij long wan narafala kantri. Naoia hem i wan elda mo i wok long Betel. ?Wanem tingting blong hem long laef blong hem? Hem i se: “Mi trastem Jehova mo mi luk se hem i gud tumas. Jehova i blesem mi bigwan, mo mi harem se mi gat kaon long hem, nao samting ya i pusum mi blong mi mekem moa long wok blong hem, ale mi kasem plante moa blesing.”

⁸ Man blong raetem Sam i talem se:  “Yufala i traem trastem hem [“Jehova,” NW]. Bambae yufala i faenemaot we hem i tru [“gud,” NW].” Mo hem i gohed se: “Olgeta we oli stap luk long Hae God oli no save sot long wan gudfala samting.” (Ridim Ol Sam 34:8-10.) Yes, taem yumi mekem bes blong yumi long wok blong Jehova, yumi glad tumas from we yumi save se yumi stap mekem hem i glad. Mo bambae hem i holem promes blong hem blong lukaot gud long yumi.

9, 10. ?From wanem yumi nidim longfala tingting?

⁹ Maet yumi wantem mekem moa long wok blong Jehova. ?Be olsem wanem sipos yumi bin wet longtaem finis blong kasem wan wok long kongregesen, no blong ol samting long laef blong yumi oli kamgud moa? Yumi mas gat longfala tingting. (Maeka 7:7) Mo nating se Jehova i letem ol samting ya oli gohed olsem, be yumi sua se bambae hem i gohed blong givhan long yumi. Eksampol blong Ebraham i save givhan long yumi. Jehova i bin promes long hem se bambae hem i gat wan boe, be hem i mas wet plante yia bifo we Aesak i bon. Long ol taem ya, Ebraham i gat longfala tingting mo i neva lego bilif blong hem.​—Jenesis 15:3, 4; 21:5; Hibrus 6:12-15.

¹⁰ I tru, i no isi blong wet. (Ol Proveb 13:12) Be sipos yumi stap tingting tumas from we laef blong yumi i no jenis kwik nao yumi no glad, bambae tingting blong yumi i foldaon bigwan. Be taem yumi stap wet, i gud yumi traehad blong kamgud moa long ol fasin we yumi mas gat, blong bambae yumi save mekem sam wok long kongregesen.

11. ?Wanem ol fasin we yumi mas wokem, mo from wanem oli impoten?

¹¹ Wokem ol gudfala fasin mo lanem blong mekem samting. Taem yu ridim Baebol mo yu tingting dip long hem, yu kam waes, yu luksave samting, yu tingting gud, mo yu mekem ol gudfala desisen. Ol brata oli nidim ol fasin ya, blong lukaot long kongregesen. (Ol Proveb 1:1-4; Taetas 1:7-9) Taem yumi stadi long Baebol, yumi faenemaot tingting blong Jehova long ol defdefren samting. Ale long evri dei, yumi save yusum ol save we yumi lanem, blong mekem ol desisen we oli mekem Jehova i glad. Bambae yumi save wanem fasin blong mekem long ol narafala, olsem wanem blong yusum mane, mo olsem wanem blong jusum klos mo ol samting blong mekem taem yumi spel.

12. ?Ol brata mo sista oli soemaot olsem wanem se oli naf blong mekem gud wok?

¹² Mekem gud ol wok we yu kasem. Taem ol man blong God oli stap wokem tempol bakegen, Nehemaea i nidim sam man blong lukaot long ol defdefren wok. Hem i jusum ol man we  oli gat gudnem. Hem i save se ol man ya oli lavem God, mo bambae oli wok had long eni wok we oli kasem. (Nehemaea 7:2; 13:12, 13) Long sem fasin, tede olgeta we oli rere oltaem blong wok mo oli wok had, bambae oli gat gudnem mo bambae oli kasem plante moa wok. (1 Korin 4:2) Taswe, nomata se yumi brata no sista, be oltaem yumi mas mekem bes blong yumi long enikaen wok we yumi kasem.​—Ridim 1 Timoti 5:25.

13. ?Taem sam narafala oli mekem i no stret long yu, yu save folem eksampol blong Josef olsem wanem?

¹³ Trastem Jehova. ?Sipos sam narafala oli mekem i no stret long yu, yu save mekem wanem? Maet yu save talem long olgeta se yu harem olsem wanem. Be sipos yu stap gohed blong toktok blong pruvum se yu no rong, problem ya i save kam mowas. Eksampol blong Josef i save tijim yumi long plante samting. Ol brata blong hem oli mekem i nogud long hem. Ol man oli talem giaman tok long saed blong hem, ale hem i go long kalabus from samting we hem i no mekem. Be Josef i trastem Jehova. Hem i tingbaot ol promes blong Jehova, mo hem i obei long hem. (Ol Sam 105:19) Long ol hadtaem ya, hem i wokem plante gudfala fasin we oli givhan long hem biaen, taem hem i kasem wan impoten wok. (Jenesis 41:37-44; 45:4-8) Sipos sam narafala oli mekem i no stret long yu, yu prea long Jehova blong kasem waes. Bambae hem i  givhan long yu blong yu stap kwaet mo yu toktok kaen long olgeta.​—Ridim 1 Pita 5:10.

14, 15. (1) ?From wanem yumi mas ‘lukaot gud long fasin blong’ yumi blong prij? (2) ?Yu save mekem wanem taem ol samting oli jenis? (Yu luk pija long stat blong stadi, mo bokis ya “ ?Yu Yu Rere Blong Traem Wan Narafala Rod?”)

¹⁴ Pol i talem long Timoti se hem i mas kamgud moa long fasin blong hem blong eksplenem Baebol. Hem i talem se: “Yu mas lukaot gud long fasin blong yu, mo long ol tok we yu stap tijim ol man long hem.” (1 Timoti 4:13, 16) Timoti i stap prij plante yia finis. ?Taswe from wanem hem i mas kamgud moa? Timoti i save se ol man mo ol samting long laef blong ol man oli stap jenis. Hem i wantem se ol man oli gohed blong lesin long hem, taswe hem i mas kamgud moa mo jenisim fasin blong hem blong tij. Tede tu, yumi mas mekem sem mak taem yumi prij.

¹⁵ Long sam ples, yumi no save faenem ol man long haos taem yumi prij. Long sam narafala ples, ol man oli stap long haos, be yumi no save kasem olgeta, from we maet ol get oli lok no yumi no save go long haos blong olgeta. ?Sipos teritori blong yu i olsem, yu save faenem sam narafala rod blong kasem ol man?

16. ?From wanem wok blong prij long pablik ples i wan gudfala rod?

¹⁶ Plante brata mo sista oli glad taem oli prij long ol pablik ples. Oli go long ol bas stop, maket, ol ples blong spel, mo long sam kantri oli go long ol stesen blong tren, blong storian wetem ol man. Maet wan Witnes i storian long man long saed blong wan nius we i jes kamaot. No maet hem i talem wan gudfala toktok long man ya from pikinini blong hem, no maet tufala i tokbaot wok blong man ya. Sipos man ya i glad blong storian, maet pablisa ya i tokbaot wan vas blong Baebol, mo askem tingting blong hem. Plante taem, ol man oli wantem save moa long Baebol.

17, 18. (1) ?Yu save mekem wanem blong yu no fraet blong prij long pablik ples? (2) ?Olsem wanem tok blong Deved i givhan long yu taem yu stap prij?

¹⁷ Maet yu harem se i had blong storian long wan strenja long rod. Hemia nao samting we i hapen long Edi, we i wan paenia long taon blong New York. Be hem i faenem wan rod we i givhan long hem blong i no fraet. Hem i talem se: “Long famle wosip, mi mo waef blong mi i mekem risej blong faenem ansa blong talem, taem ol man oli tok blong blokem mitufala, no taem oli askem kwestin. Mo tu, mitufala i askem advaes long ol narafala Witnes.” Naoia Edi i gat strong tingting blong prij long pablik ples.

¹⁸ Taem yumi glad blong prij mo yumi kamgud moa long fasin blong yumi blong talemaot gud nius, ol narafala bambae oli luksave se yumi stap gohed gud. (Ridim 1 Timoti 4:15.) Mo tu, maet yumi save givhan long wan man blong i kam man blong Jehova. Deved i talem se: “Oltaem mi bambae mi talem tangkiu long Hae God, bambae mi presem hem oltaem nomo. Bambae mi presem hem from ol samting we hem i mekem. I gud olgeta we ol man oli stap spolem olgeta oli lesin long tok ya, nao bambae oli glad.”​—Ol Sam 34:1, 2.

19. ?From wanem wan man blong Jehova i glad, nating se laef blong hem i no isi?

¹⁹ Deved i talem bakegen se: ‘Hae God. Olgeta samting ya we yu yu mekem, bambae oli presem yu, mo olgeta man blong yu bambae oli talem tangkiu long yu. Yu yu King, mo bambae oli stap tokbaot ol gudgudfala samting we yu yu mekem, mo bambae oli talemaot bigfala paoa we yu yu gat, blong olgeta man oli save ol bigbigfala wok blong yu, mo ol gudgudfala samting blong hae nem blong yu.’ (Ol Sam 145:10-12) Evriwan we oli lavem Jehova mo oli obei long hem, oli wantem tumas blong tokbaot hem. ?Be olsem wanem sipos yu sik no yu olfala, nao yu no save prij plante olsem we yu wantem? Oltaem yu mas tingbaot se taem yu toktok long ol narafala olsem ol nes no dokta, yu stap presem Jehova. Sipos yu stap long kalabus, yu save tokbaot Jehova yet long ol man, mo hemia i mekem Jehova i glad tumas. (Ol Proveb 27:11) Mo tu, sipos yu nomo yu stap wosipim hem, be ol narafala famle blong yu nogat, hem i glad tumas. (1 Pita 3:1-4) Nomata se i gat hadtaem, be yu save presem Jehova yet, kam klosap moa long hem, mo gohed gud.

20, 21. ?Sipos yu kasem moa wok long kongregesen, yu save mekem wanem blong givhan long ol narafala?

²⁰ Jehova bambae i blesem yu sipos yu gohed blong kam klosap long hem, mo yu mekem bes blong yu long wok blong hem. Sipos yu jenisim sam samting long program blong yu no long laef blong yu, bambae yu gat moa janis blong givhan long ol man, blong oli save ol nambawan promes blong Jehova. Mo tu, maet bambae yu naf blong givhan moa long ol brata mo sista. Mo ol brata mo sista bambae oli lavem yu from ol gudfala wok we yu mekem long kongregesen.

²¹ Nomata se yumi stap mekem wok blong Jehova longtaem finis, no nogat, be yumi evriwan i save kam klosap moa long Jehova mo gohed gud. Long nekis stadi, bambae yumi tokbaot olsem wanem yumi save givhan long ol narafala blong oli gohed gud.