1. Nating se tufala we i jes mared i glad tumas, ?tufala i save se wanem bambae i hapen? (Yu luk pija long stat blong stadi.)

LONG dei blong mared, man mo woman we i rere blong mared, tufala i glad bitim mak. Taem tufala i stap fren, tufala i lavlavem tufala nao tufala i wantem mared. Mo tufala i promes blong stap tru long tufala. Afta long lafet blong mared, tufala i mas jenisim sam samting blong tufala i save gohed blong joen gud. Jehova we i Stamba blong mared, hem i wantem se olgeta we oli mared, oli glad mo oli gat wan gudfala mared. Taswe hem i givim ol waes advaes long Tok blong hem, Baebol. (Ol Proveb 18:22) Nating se i olsem, Baebol i talem se olgeta we oli mared, bambae oli gat “trabol long laef blong olgeta” from we oli sinman. (1 Korin 7:28) ?Olsem wanem ol hasban mo waef oli save mekem se i no gat tumas trabol long laef blong olgeta? ?Ol Kristin oli mas mekem wanem blong gat wan gudfala mared?

2. ?Wanem ol defdefren kaen lav we hasban mo waef i mas soemaot?

² Baebol i talem se lav i wan fasin we i impoten tumas. Be i gat defdefren kaen lav we hasban mo waef i mas soemaot.  Tufala i mas lavlavem tufala olsem ol fren, mo olsem man mo woman. Mo sipos tufala i gat pikinini, i impoten tumas we tufala i lavem olgeta olsem ol famle. Be blong tufala i gat wan gudfala mared, tufala i mas gat wan narafala lav tu, hemia we i stanap long ol rul blong Baebol. Aposol Pol i tokbaot lav ya, se: “Man i mas lavem woman blong hem, i mas lukaot gud long hem olsem we i stap lukaot gud long bodi blong hem nomo. Mo woman i mas ona gud long man blong hem.”​—Efesas 5:33.

3. ?Hasban mo waef i mas lavlavem tufala go kasem wanem mak?

³ Pol i raetem se: “Yufala ol man we i mared, yufala i mas lavem ol woman blong yufala, olsem we Kraes i lavem jos [“kongregesen,” NW] ya. Taswe hem i letem laef blong hem, blong sevem [kongregesen] ya.” (Efesas 5:25) Ol Kristin tede oli folem eksampol blong Jisas, taem oli lavlavem olgeta olsem we Jisas i lavem ol disaepol blong hem. (Ridim Jon 13:34, 35; 15:12, 13.) Kristin hasban mo waef i mas lavlavem tufala tumas, we tufala i rere blong ded from tufala. Be taem wan bigfala problem i kamaot, maet samfala oli harem se lav blong olgeta i no moa bigwan olsem. ?Wanem i save givhan long olgeta? Lav we i stanap long ol rul blong Baebol. Man we i gat lav ya, hem i ‘no letem wan samting i daonem tingting blong hem, oltaem hem i bilif strong long God, mo i putum tingting blong hem i strong long hem. Maet bigfala trabol i kasem hem, be tingting blong hem i no foldaon.’ Kaen lav ya “bambae i no save finis samtaem.” (1 Korin 13:7, 8) Hasban mo waef i mas tingbaot se tufala i bin mekem wan promes, se bambae tufala i lavlavem tufala mo stap tru long tufala. Sipos ol Kristin hasban mo waef oli tingbaot samting ya, hemia bambae i pusum olgeta blong oli lukaot ol rod blong Jehova, mo blong oli wok tugeta blong stretem ol problem.

4, 5. (1) ?Wanem wok blong hasban olsem hed blong famle? (2) ?Waef i soemaot olsem wanem se hem i respektem hasban olsem hed blong famle? (3) ?Kati mo Fred i mas mekem wanem jenis?

⁴ Pol i tokbaot wok blong hasban mo waef, se: “Yufala ol woman we i mared. Yufala i mas ona long ol man blong yufala, olsem we yufala i stap ona long Masta blong yumi, from we man i hed blong woman blong hem, olsem we Kraes i hed blong jos [“kongregesen,” NW].” (Efesas 5:22, 23) Hemia i no min se hasban i gud moa long waef. Nogat. Jehova i tokbaot impoten wok blong waef, se: ‘I nogud we man i stap hem wan. I moa gud mi mekem wan fren blong hem we i olsem hem, blong i givhan long hem.’ (Jenesis 2:18) Waef i mas givhan long hasban blong i mekem gud wok blong hem olsem hed blong famle. Mo hasban i mas folem gudfala eksampol blong Jisas we i ‘hed blong kongregesen.’ Sipos hasban i mekem olsem, waef bambae i harem se hem i sef mo i isi blong respektem mo sapotem hem.

⁵ Kati we i mared long Fred, i talem se: “Taem mi mi singel, mi fri blong mekem eni samting we mi wantem, mo mi lukaot long mi wan nomo. Be taem mi mared, mi mas jenisim tingting blong mi mo mi mas dipen long hasban blong mi. I no isi oltaem, be mitufala i kam klosap moa taem mitufala i mekem samting we Jehova i talem.” ^[1] (Yu luk ol not, pej 14.) Fred i talem se: “Oltaem i had blong mi mekem ol desisen. Long mared, i had moa from we mi mas tingbaot waef blong mi  tu. Be taem mi prea blong askem help blong Jehova, mo mi tingbaot samting we waef blong mi i talem, ol samting i kam isi moa. !Mi harem se mitufala i wok olsem wan tim nomo!”

6. Taem i gat problem long mared, ?olsem wanem lav “i save joenemgud olgeta samting”?

⁶ Hasban mo waef i save gat wan gudfala mared, sipos tufala ‘i no hareap blong kros, mo taem wan long tufala i gat poen agens long narawan, tufala i mas rere oltaem blong fofogivim tufala.’ Bambae tufala i mekem mastik, from we tufala i sinman. Sipos samting olsem i hapen, tufala i save lanem wan lesen long rong we tufala i mekem, mo tufala i lanem blong fogivim tufala mo blong soemaot lav ya we i stanap long ol rul blong Baebol. Lav ya “i save joenemgud olgeta samting, blong oli kam wan.” (Kolosi 3:13, 14) Tufala i save soemaot lav ya taem tufala i gat longfala tingting, tufala i kaen, mo tufala i ‘no stap kros longtaem.’ (1 Korin 13:4, 5) Sipos tufala i rao, tufala i mas traem blong stretem kwiktaem, bifo we san i godaon. (Efesas 4:26, 27) Tufala i mas gat tingting daon mo no fraet blong talem se: “Mi sore we mi mekem yu yu harem nogud.” Be taem tufala i mekem olsem, hemia i givhan blong stretem ol problem blong tufala, mo i pulum tufala blong kam klosap moa long tufala.

7, 8. (1) ?Baebol i givim wanem advaes long fasin blong slip tugeta? (2) ?From wanem hasban mo waef i mas kaen gud long tufala?

⁷ Baebol i givim ol gudfala advaes we oli save givhan long hasban mo waef, blong tufala i gat stret tingting long seks. (Ridim 1 Korin 7:3-5.) I impoten we tufala i tingbaot filing blong tufala mo samting we tufala i nidim. Sipos hasban i no kaen gud long waef blong hem, maet waef i no harem gud blong slip wetem hem. Hasban i mas “tingbaotgud” waef blong hem. (1 Pita 3:7) Tufala i save slip tugeta taem tufala i glad blong mekem, be wan i neva mas fosem narawan, no i talem strong long hem. Plante taem, man i kwik moa blong gat filing blong seks i bitim woman, be i moa gud we tufala i slip tugeta taem tufala i gat sem filing.

⁸ I no gat wan rul long Baebol we i talem se hasban mo waef i mas mekem olsem wanem, taem tufala i soemaot lav blong pulum filing blong tufala blong slip tugeta, mo Baebol i no blokem tufala blong mekem olsem. Hem i tokbaot samfala we oli mekem fasin ya. (Sing Blong Solomon 1:2; 2:6) Kristin hasban i mas kaen gud long waef blong hem, mo waef tu i mas mekem sem mak.

9. ?From wanem i no stret nating blong gat filing long narafala we i no hasban no waef blong yumi?

⁹ Sipos yumi lavem God mo ol man raonabaot long yumi, bambae yumi no letem wan man no wan samting i spolem mared blong yumi. Samfala oli lukluk ol rabis pija gogo oli no moa glad long mared blong olgeta, mo samfala oli spolem mared blong olgeta. Yumi mas blokem eni samting we i pulum yumi blong  lukluk ol rabis pija, no blong gat filing long narafala. Mo yumi no mas mekem eni samting we i save givim tingting se yumi stap pulum filing blong narafala we i no hasban no waef blong yumi. Sipos yumi mekem olsem, yumi no gat lav. Yumi mas tingbaot se God i save olgeta tingting mo aksen blong yumi. Hemia bambae i givhan long yumi blong yumi strong moa blong mekem Jehova i glad, mo blong yumi stap tru long hasban no waef blong yumi.​—Ridim Matiu 5:27, 28; Hibrus 4:13.

10, 11. (1) ?Divos i stap kam antap olsem wanem? (2) ?Baebol i talem wanem long fasin blong seraot? (3) ?Wanem bambae i blokem hasban mo waef blong tufala i no hareap blong seraot?

¹⁰ Sam hasban mo waef oli no stretem ol bigfala problem blong olgeta, nao oli seraot no oli divos. Long sam kantri, bitim haf blong olgeta we oli mared, oli divos. I tru se fasin ya i no hapen tumas long Kristin kongregesen. Nating se i olsem, plante moa Kristin oli stap gat bigfala problem long mared blong olgeta.

¹¹ Baebol i givim advaes ya: “Woman i no mas lego man blong hem. Sipos woman i lego man blong hem, bambae i mas stap olsem nomo, i no mared bakegen. No sipos no, bambae i mas kambak blong joen gud bakegen long man blong hem. Mo man i no mas mekem divos long woman blong hem.” (1 Korin 7:10, 11) Sam hasban mo waef oli harem se problem blong olgeta i bigwan tumas mo oli mas seraot from. Be Jisas i soemaot se fasin ya blong seraot i no wan pleplei. Hem i ripitim tok we God i talem long garen blong Iden, mo i talem se: “From we God i joenem tufala olsem, man i no mas brekem mared blong tufala.” (Matiu 19:3-6; Jenesis 2:24) Jehova i wantem se hasban mo waef i stap tugeta. (1 Korin 7:39) Yumi evriwan i mas rimemba se Jehova bambae i jajem yumi from ol samting we yumi mekem. Hemia bambae i givhan long yumi blong stretem ol problem kwiktaem, bifo we oli kam bigwan.

12. ?Wanem i save mekem se hasban mo waef i wantem seraot?

¹² ?From wanem sam hasban mo waef oli gat bigfala problem? Samfala oli harem nogud mo oli kros, from se samting we oli tingbaot, i no kamtru long mared blong olgeta. Plante taem hasban mo waef i gat defdefren tingting from we tufala i no gruap long sem famle, mo fasin blong tufala i defren. Mo problem i kamaot taem wan long tufala i no joen gud wetem papa no mama blong narawan, no maet tufala i raorao from mane, no maet from fasin blong tijim pikinini. Be i gud blong luk se plante Kristin hasban mo waef oli faenem rod blong stretem ol problem blong olgeta, from we oli letem God i lidim olgeta.

13. ?Wanem ol stret risen blong seraot?

¹³ Be samtaem i gat stret risen blong tufala i seraot. Hemia ol samting we i nogud tumas, olsem maet hasban i no  wantem givim samting we famle i nidim, no wan long tufala i stap kilim nogud narawan, no i blokem hem blong i no moa wosipim Jehova. Taem hasban mo waef i gat ol bigfala problem, tufala i mas askem help long ol elda. Olgeta ya oli gat plante ekspiriens, mo oli save givhan long tufala blong folem advaes blong God long laef blong tufala. Mo taem tufala i askem tabu spirit blong Jehova, hemia i save givhan long tufala blong folem ol rul blong Baebol mo soemaot ol Kristin fasin. (Galesia 5:22, 23) ^[2]​—Yu luk ol not long pej 14.

14. ?Baebol i givim wanem advaes long ol Kristin we hasban no waef blong olgeta i no wosipim Jehova?

¹⁴ Baebol i soemaot se nating we hasban no waef i no wosipim Jehova, be gudfala frut i save kamaot sipos tufala i stap tugeta. (Ridim 1 Korin 7:12-14.) Hemia we i no bilif i “wan stret man” from we hem i mared long wan man blong God. Mo ol smol pikinini blong tufala oli “tabu,” taswe God i save protektem olgeta. Pol i talem long ol Kristin hasban mo waef se: “?Sipos yu yu woman olsem, olsem wanem yu ting se yu no save sevem man blong yu? ?No sipos yu yu man olsem, olsem wanem yu ting se yu no save sevem woman blong yu?” (1 Korin 7:16) I gat plante gudfala stori blong ol Kristin we oli givhan long hasban no waef blong olgeta, blong i kam man blong Jehova.

15, 16. (1) ?Baebol i givim wanem advaes long ol Kristin waef we hasban blong olgeta i no bilif? (2) ?Wan Kristin i mas mekem wanem sipos hasban no waef blong hem we i no bilif, i wantem lego hem?

¹⁵ Aposol Pita i givim advaes long ol Kristin waef blong oli obei long hasban blong olgeta. Hem i talem se: “Bambae fasin nomo blong yufala i save pulum olgeta blong oli bilif. Taem ol man blong yufala oli luk we fasin blong yufala i klin gud, mo yufala i gat ona, hemia i naf blong pulum olgeta. Bambae i no nid blong yufala i  talem wan samting long olgeta.” I moa gud waef ‘i kwaet woman we fasin blong hem i stret gud’ bitim we hem i tokbaot bilif blong hem oltaem. “Fasin olsem i gud tumas long fes blong God.” Hemia i save givhan long man blong hem blong laekem trutok.​—1 Pita 3:1-4.

¹⁶ ?Olsem wanem sipos hasban no waef we i no bilif, i wantem seraot? Baebol i talem se: ‘Sipos man we i no bilif i wantem lego woman blong hem we i Kristin, i gud nomo, hem i save mekem. Nao woman we i Kristin, hem i no moa gat samting i fasem hem long man we i lego hem. God i singaot yumi, blong yumi stap long kwaet laef.’ (1 Korin 7:15) Nating se i gat pis taem tufala i seraot, be folem Baebol, Kristin hasban no waef ya i no fri blong mared long narafala bakegen. Be hem i no nid blong fosem hasban no waef blong hem blong i stap. Maet wan dei hem i wantem kambak long Kristin hasban no waef blong hem. Mo long fiuja, maet hem i save kam wan man blong Jehova tu.

17. ?Kristin hasban mo waef i mas putum wanem long fasples?

¹⁷ Yumi laef long ol las dei, taswe ‘laef i strong tumas.’ (2 Timoti 3:1-5) Be sipos yumi fren gud wetem Jehova, samting ya i save protektem yumi. Pol i raetem se: ‘Yumi no gat plante taem i stap. Ale, man we i mared, i gud hem i stap olsem we i no mared. . . . Mo olgeta we oli stap yusum wol, oli mas kam olsem olgeta we oli no stap yusum tumas wol ya.’ (1 Korin 7:29-31) Pol i no min se ol Kristin oli no moa lukaot gud long hasban no waef blong olgeta, nogat. Be from we yumi stap laef long ol las dei, yumi mas putum wosip blong Jehova i stap long fasples.​—Matiu 6:33.

18. ?Olsem wanem ol Kristin oli save gat wan gudfala mared we i givim glad?

¹⁸ Long ol hadtaem ya, yumi luk se plante mared oli stap brobrok. ?Be yumi save gat wan gudfala mared we i mekem yumi glad? Yes, sipos yumi stap klosap long Jehova mo ol man blong hem, yumi folem ol rul blong Baebol, mo yumi letem tabu spirit blong Jehova i lidim yumi. Taem yumi mekem olsem, yumi tinghae long plan ya “we God i joenem” man mo woman long mared.—Mak 10:9.