1, 2. ?From wanem yumi mas trenem ol narafala blong prij mo mekem wok long kongregesen?

JISAS i wok had blong talemaot Kingdom. Mo tu hem i spenem plante taem blong trenem ol disaepol blong hem. Hem i soemaot long olgeta olsem wanem blong tij mo blong lukaotgud long ol man blong God. Ol disaepol oli lanem blong kam olsem ol man blong lukaot long ol sipsip. (Matiu 10:5-7) Filip tu i wok had blong prij, mo hem i trenem ol gel blong hem tu blong mekem sem wok. (Ol Wok 21:8, 9) Tede tu yumi mas trenem ol narafala. ?From wanem?

² Long ol kongregesen raon long wol, i gat plante niuwan we oli no baptaes yet. Olgeta ya oli nidim blong kasem trening. Yumi mas givhan long olgeta blong oli kasemsave from wanem olgeta wanwan oli mas ridim mo stadi long Baebol. Mo tu, yumi mas trenem olgeta blong oli prij mo tijim ol man long trutok. Ol brata we oli jes baptaes, oli nidim blong kasem trening blong oli save kam man blong givhan mo elda. Evriwan long kongregesen oli save mekem plante samting blong givhan long ol niuwan.​—Ol Proveb 4:2.

3, 4. (1) ?Olsem wanem Pol i soemaot se taem yumi stadi Baebol, hemia i save givhan long yumi long wok blong prij? (2) Blong givhan long ol Baebol stadi blong oli mekem prapa stadi blong olgeta, ?yumi mas mekem wanem fastaem?

³ Olgeta man blong Jehova oli mas ridim Baebol mo stadi long hem blong oli kasem save samting we God i wantem. Hemia nao samting we aposol Pol i talem long ol brata mo sista long Kolosi, hem i se: ‘Oltaem mitufala i stap prea from yufala. Mitufala i stap askem long God blong yufala i luksave olgeta samting we God i wantem, blong bambae yufala i savegud olgeta.’ ?From wanem i impoten blong ridim Baebol mo stadi long hem? From we hemia bambae i mekem olgeta oli waes mo i givhan long olgeta blong oli kasemsave olsem wanem blong ‘mekem laef blong olgeta i kam stret gud olsem we Jehova i wantem.’ Mo tu bambae i givhan long olgeta blong mekem “ol gudgudfala wok” we Jehova i wantem, speseli wok blong talemaot gud nius. (Kolosi 1:9, 10) Taswe, taem yumi stadi wetem wan man, yumi mas givhan long hem blong i kasemsave se sipos hem i ridim Baebol oltaem mo i stadi long hem, hemia i save givhan long hem blong i mekem wok blong Jehova.

⁴ Sipos yumi wanwan i no mekem prapa stadi blong yumi, yumi no save givhan long ol Baebol stadi blong oli kasem save se i impoten blong mekem prapa stadi blong olgeta. Be sipos oltaem yumi ridim Baebol mo yumi tingting dip long hem, hemia bambae i givhan long laef blong yumi mo long wok blong prij. Taem yumi stap prij mo wan man i askem wan kwestin we i had, bambae yumi naf blong yusum Baebol blong ansa long hem. Mo, taem yumi ridim stori blong Jisas, Pol mo ol narafala we oli wok strong blong prij, hemia bambae i leftemap tingting blong yumi blong gohed blong prij nating se i had. Sipos yumi tokbaot ol samting we yumi lanem mo ol gudfala samting we yumi kasem, maet hemia i leftemap tingting blong ol narafala, nao olgeta tu oli save stadi gud long Baebol mo kasem gudfala samting from.

5. Yu tokbaot ol rod blong givhan long ol niuwan blong oli mekem prapa stadi blong olgeta.

⁵ Maet yu askem se, ‘?Olsem wanem mi save trenem studen blong mi blong hem i stadi Baebol oltaem?’ Maet yu soem long hem olsem wanem blong rerem buk blong hem. Maet yu talem long hem blong i ridim wan haf we i joen wetem stadi blong yutufala, long diksonari blong buk ya ?Wanem Samting  We Baebol i Rili Tijim? mo blong jekem ol vas. Biaen, yu save soem long hem olsem wanem blong rerem ol miting, nao hem i save givim wan ansa. Yu talem long hem blong i ridim evri Wajtaoa mo Wekap! Mo yu soem long hem olsem wanem blong faenem ansa long ol kwestin long Baebol. Olsem nao, hem i save yusum Watchtower Library no Wajtaoa LAEBRI LONG INTENET. Sipos hem i traem ol defdefren rod ya blong mekem prapa stadi blong hem, bambae hem i glad mo i wantem lanem moa.

6. (1) ?Olsem wanem blong givhan long wan studen blong i laekem Baebol? (2) ?Sipos hem i laekem Baebol tumas, bambae hem i gat wanem tingting?

⁶ Taem yumi stadi wetem wan man, yumi wantem we hem i laekem Baebol from we i luksave se Baebol i givhan long hem blong i save gud Jehova. Yumi no mas fosem hem blong stadi, be yumi soem long hem olsem wanem blong harem gud blong stadi. Taem hem i stadi moa long Baebol, bambae hem i gat sem tingting olsem man blong raetem Sam, we i se: “Taem we mi mi kam stap klosap long yu, mi harem se i gud tumas long mi. Yu yu sefples blong mi, yu yu stap blokem mi.” (Ol Sam 73:28) Tabu spirit blong Jehova bambae i givhan long man we i wantem kam klosap long hem.

7. ?Olsem wanem Jisas i trenem ol man blong oli talemaot gud nius? (Yu luk pija long stat blong stadi.)

⁷ Yumi save lanem plante samting long fasin blong Jisas blong trenem ol aposol blong hem. Jisas i tekem olgeta oli go prij mo oli luk fasin blong hem blong tijim ol man. Mo tu, hem i talem long olgeta olsem wanem blong prij. (Matiu, japta 10) ^[1] (Yu luk ol not, pej 26.) I no longtaem, ol aposol oli save olsem wanem blong tijim ol man long trutok. (Matiu 11:1) Bambae yumi luk tu samting we yumi save trenem ol niuwan blong mekem taem oli prij.

8, 9. (1) ?Jisas i toktok olsem wanem long ol man wanwan long wok blong prij? (2) ?Olsem wanem yumi save givhan long ol niufala pablisa blong oli folem fasin blong Jisas blong toktok?

⁸ Toktok wetem ol man wanwan. I no oltaem we Jisas i toktok wetem bigfala grup blong ol man. Plante taem hem i toktok gud tu wetem ol man wanwan. Traem tingbaot taem ya we hem i storian gud wetem wan woman we i kam blong kasem wota long wan wel, klosap long taon ya Saeka. (Jon 4:5-30) Mo tu, Jisas i toktok wetem Matiu Livae we i wan man blong tekem mane blong takis, mo hem i singaot man ya blong i kam disaepol blong hem. Matiu i glad, mo biaen hem i singaot Jisas mo sam narafala blong oli kam kakae long haos blong hem. Long ples ya, Jisas i toktok wetem plante man.​—Matiu 9:9; Luk 5:27-39.

⁹ Jisas i toktok long Nataniel long kaen fasin, nating se Nataniel i talem  sam nogud tok long saed blong ol man Nasaret. From samting ya, Nataniel i jenisim tingting we hem i gat long man Nasaret ya, Jisas. Nataniel i wantem save moa long samting we Jisas i tijim. (Jon 1:46-51) Eksampol blong Jisas i tijim yumi se, taem yumi toktok gud wetem ol man long kaen fasin, bambae oli glad moa blong lesin long yumi. ^[2] [Yu luk ol not, pej 26.] Taem yumi trenem ol niuwan blong oli toktok olsem, bambae oli glad moa blong prij.

10-12. (1) Taem man i intres long gud nius ?Jisas i tijim hem olsem wanem? (2) ?Olsem wanem blong tijim ol niufala pablisa blong oli kam gud moa blong tijim ol man?

¹⁰ Tijim olgeta we oli glad blong lesin. Jisas i gat plante wok blong mekem. Nating se i olsem, taem ol man oli glad blong lesin long hem, hem i spenem taem wetem olgeta mo i tijim olgeta long plante samting. Wan dei i gat plante man we oli hivap wanples long saed blong solwota blong lesin long ol tok blong Jisas. Nao Jisas i klaem long wan bot wetem Pita nao i tijim olgeta. Biaen, hem i wantem tijim Pita long wan samting. Ale, hem i mekem wan merikel nao Pita i pulum plante fis. Nao hem i talem long Pita se: “Yu yu man blong pulum fis, be i stat naoia, bambae yu yu man blong pulum man.” Wantaem nomo, Pita mo olgeta we oli stap wetem hem “oli livim olgeta samting blong olgeta, oli biaen long Jisas,” mo oli kam man blong hem.​—Luk 5:1-11.

¹¹ Nikodimas tu i wantem save moa long ol tijing blong Jisas. Be from we hem i wan memba blong Sanhedrin, hem i fraet long samting we ol narafala oli save talem sipos oli faenemaot. Ale, hem i go luk Jisas long naet. Jisas i no ronemaot hem, be hem i spenem taem blong eksplenem ol impoten trutok long hem. (Jon 3:1, 2) Jisas i glad nomo blong spenem taem blong tijim ol man long trutok mo blong mekem bilif blong olgeta i strong. Long sem fasin, yumi mas glad nomo blong go visitim ol man long taem we i stret long olgeta, mo yumi mas spenem taem blong givhan long olgeta blong oli kasem save long Baebol.

¹² Taem yumi prij wetem ol niuwan, yumi save tijim olgeta blong oli gobak blong visitim ol man we oli intres. Mo tu, yumi save askem long ol niuwan blong oli folem yumi long ol visit mo ol Baebol stadi. Long rod ya, bambae oli lanem olsem wanem blong tijim ol narafala, mo bambae oli harem gud blong givhan long ol man blong oli save trutok. Biaen, bambae oli glad blong gobak bakegen mo stadi wetem olgeta. Mo tu, bambae oli lanem blong gat longfala tingting, mo blong no lego man kwiktaem sipos oli no faenem hem long haos.​—Galesia 5:22; yu luk bokis ya “ Hem i No Lego.”

13, 14. (1) ?Wanem tingting blong yu long ol man long Baebol we oli hadwok blong givhan long ol narafala? (2) ?Wanem sam rod blong trenem ol niufala pablisa mo ol yangfala blong oli soemaot lav long ol brata mo sista?

¹³ Jehova i wantem se ol man blong hem oli lavlavem olgeta olsem ol brata mo sista mo oli givgivhan long olgeta. (Ridim Luk 22:24-27; 1 Pita 1:22.) Baebol i eksplenem se Jisas i mekem evri samting blong givhan long ol narafala,  mo hem i givim laef blong hem tu. (Matiu 20:28) Dokas i wan woman we i “mekem ol gudfala wok, mo i stap givhan long ol puaman.” (Ol Wok 9:36, 39) Meri i wok had blong givhan long ol brata mo sista long Rom. (Rom 16:6) ?Olsem wanem yumi save halpem ol niuwan blong oli kasemsave se i impoten tumas blong oli mekem ol gudfala samting long ol brata mo sista blong olgeta?

¹⁴ Yumi save askem long ol niuwan blong oli folem yumi blong visitim ol olfala mo olgeta we oli sik. Mo ol papa mo mama tu oli save tekem ol pikinini blong olgeta tu taem oli go visitim olgeta. Ol elda oli save askem long ol yangfala mo ol niuwan blong oli givhan long olgeta, taem oli karem kakae i go long ol olfala no oli riperem haos blong olgeta. Taem ol yangfala mo ol niuwan ya oli luk olsem wanem ol brata mo sista oli givgivhan long olgeta, bambae olgeta tu oli mekem sem mak. Long wan kongregesen, taem oli go prij long teritori we i stap longwe, oltaem wan elda i go visitim ol brata we oli stap long ples ya. Oltaem wan yangfala brata i go wetem elda ya, mo i lanem wanem samting we hem i mas mekem blong givhan long ol brata mo sista.​—Rom 12:10.

15. ?From wanem i impoten we ol elda oli givhan long ol brata blong oli gohed gud?

¹⁵ Jehova i givim wok long ol man, blong oli tijim olgeta long kongregesen long Baebol. Taswe i impoten we ol brata oli lanem gudfala fasin blong tij taem oli givim ol tok. Sipos yu yu wan elda, i gud yu lesin long wan man blong givhan taem hem i stap lanem tok blong hem, mo yu givhan long hem blong i kam gud moa. (Nehemaea 8:8) ^[3]​—Yu luk ol not, pej 26.

16, 17. (1) ?Olsem wanem Pol i givhan long Timoti blong i gohed gud? (2) ?Olsem wanem ol elda oli save trenem gud ol brata we bambae oli mekem wok long kongregesen?

¹⁶ I gat plante brata yet we oli nidim trening blong oli kam elda long kongregesen. Pol i trenem Timoti mo i leftemap tingting blong hem blong i trenem ol narafala. Pol i talem se: “Yu yu mas strong long paoa we Jisas Kraes i stap givim long gladhat blong hem, long yumi ya we yumi stap joen long hem. Yu harem finis ol samting we mi stap tijim yufala long hem long fes blong plante man. Naoia yu mas putum ol tok ya blong mi long han blong ol man we yu save trastem olgeta, se oli naf blong tijim ol narafala man bakegen long ol tok ya.” (2 Timoti 2:1, 2) Pol i wan elda mo wan  aposol, mo Timoti i lanem plante samting long hem. Hem i lanem olsem wanem blong kam gud moa long wok blong prij, mo blong givhan long ol narafala long kongregesen.​—2 Timoti 3:10-12.

¹⁷ Pol i spenem plante taem wetem Timoti from we hem i wantem meksua se hem i trenem gud Timoti. (Ol Wok 16:1-5) Ol elda oli save folem eksampol blong Pol taem oli tekem ol man blong givhan we oli naf gud, blong visitim ol brata mo sista. Long rod ya, oli save trenem ol man blong givhan blong oli tijim ol narafala, mo blong oli soemaot lav mo longfala tingting, mo blong oli trastem Jehova taem oli lukaot long ol sipsip blong hem.—1 Pita 5:2.

18. ?From wanem i impoten blong yumi trenem ol narafala?

¹⁸ Long ol las dei ya, plante niuwan oli nidim trening blong kam gud moa long wok blong prij. Mo tu, ol brata oli nidim trening blong lukaot long kongregesen. Jehova i wantem se olgeta man blong hem oli kasem gudfala trening, mo hem i givim nambawan janis long yumi blong yumi trenem ol niuwan. Taswe i impoten blong wok had blong trenem ol narafala, olsem we Jisas mo Pol i mekem. Yumi mas trenem plante man, from we i gat plante wok yet blong mekem, bifo we en i kam.

19. ?From wanem yu save sua se wok blong trenem ol narafala i no blong nating nomo?

¹⁹ Yumi nidim taem blong trenem ol narafala, mo yumi mas traehad. Be yumi save sua se Jehova mo Jisas, bambae tufala i givhan long yumi blong yumi trenem ol narafala long rod we i beswan. Bambae yumi harem gud taem yumi luk olgeta we yumi trenem, oli wok had long kongregesen mo long wok blong prij. (1 Timoti 4:10) Long sem taem, yumi mas traehad blong gohed gud, kam gud moa long ol Kristin fasin, mo kam klosap moa long Jehova.