JEHOVA i pulum aposol Pol blong i raetemdaon naen gudfala fasin we oli kamaot long tabu spirit. (Galesia 5:22, 23) Baebol i kolem ol gudfala fasin ya se ‘frut blong tabu spirit.’ * Frut ya i joen wetem “niufala fasin” we ol Kristin oli mas wokem. (Kolosi 3:10) Wan tri we i kasem wota oltaem i karem frut, mo long sem fasin, wan man we tabu spirit i fulap long laef blong hem i save wokem ol nambawan fasin ya.—Ol Sam 1:1-3.

Fasin we Pol i talem fastaem, hemia lav. ?Lav i impoten olsem wanem? Pol i talem se sipos hem i no gat lav, bambae hem i “nating nomo.” (1 Korin 13:2) ?Be wanem ya lav? ?Olsem wanem blong gat lav mo soemaot evri dei?

I had blong eksplenem lav, be Baebol i tokbaot tingting mo fasin blong wan man we i gat lav. Baebol i talem se man we i gat lav, hem i gat “longfala tingting mo i kaen,” mo “hem i save glad long ol trutok nomo.” Man ya “i no letem wan samting i daonem tingting blong hem, mo hem i bilif long olgeta samting, hem i gat hop long olgeta samting, mo hem i stanap strong long olgeta samting.” Hem i tingbaot narafala, mo i wantem stap klosap long hem olsem wan gudfala fren. Be man we i no gat lav, hem i jalus, i flas, i no gat respek, i tingbaot hem wan nomo, mo i no save fogivim narafala. Yumi no wantem gat ol nogud fasin ya, be yumi wantem soemaot tru lav long ol narafala, hemia lav we yumi ‘no tingbaot yumi nomo.’—1 Korin 13:4-8.

“God hem i lav.” (1 Jon 4:8) Olgeta wok blong hem oli soemaot samting ya. Bigfala samting we hem i mekem blong soemaot lav, hem i sanem Jisas i kam long wol blong i safa mo i ded from yumi. Aposol Jon i talem se: “God i soemaot lav ya long yumi olsem: Hem i sanem stret Pikinini blong hem, wan nomo we hem i gat, i kam long wol, blong yumi save kasem laef from hem. Hem i soemaot lav ya, i no from we yumi lavem hem, be hem nao i lavem yumi, nao i sanem Pikinini blong hem i kam blong i ded olsem sakrefaes we i save mekem ol man oli fren wetem God.” (1 Jon 4:9, 10) From samting ya, God i save fogivim ol sin blong yumi, nao yumi gat janis blong kasem laef.

Jisas i soemaot se hem i lavem ol man taem hem i ded olsem wan sakrefaes, blong mekem samting we God i wantem. Aposol Pol i talem se: “Folem ‘samting we God i wantem,’ yumi kam tabu from we Jisas Kraes i givim bodi blong hem olsem wan sakrefaes wan taem nomo mo blong olwe.” (Hibrus 10:9, 10) I no gat wan man we i save soemaot lav olsem. Jisas i talem se: “Man we i rere blong ded blong sevem ol fren blong hem, lav ya blong hem i bigwan moa i bitim lav blong ol narafala man.” (Jon 15:13) ? Ol sinman, oli naf blong soemaot lav olsem Jehova mo Jisas i soemaot? !Yes! Bambae yumi tokbaot olsem wanem yumi save mekem olsem.

Pol i talem se: “Yufala i mas folem fasin blong God, olsem ol pikinini we hem i lavem olgeta tumas. Oltaem yufala i mas lavem ol man olsem we Kraes tu i lavem yumi, mo i givim laef blong hem from yumi.” (Efesas 5:1, 2) ?I minim wanem se “oltaem yufala i mas lavem ol man”? I min se yumi no talem nomo, be yumi soemaot lav ya long ol samting we yumi mekem. Jon i talem se: “Lav blong yumi i no mas kamaot long toktok no long maot nomo, be i mas kamaot long ol wok blong yumi tu, mo i mas tru.” (1 Jon 3:18) Yumi mekem olsem taem yumi talemaot “gud nius ya blong Kingdom” from we yumi lavem Jehova mo ol man raonabaot long yumi. (Matiu 24:14; Luk 10:27) Mo tu, yumi ‘lavem man oltaem’ sipos yumi soemaot longfala tingting, yumi kaen, mo yumi fogivim narafala. Yumi folem advaes ya blong Baebol se: “Jehova i glad oltaem blong fogivim yufala, ale yufala tu i mas mekem sem mak.”—Kolosi 3:13.

Sipos yumi stretem narafala o givim advaes long hem, hemia i no min se yumi no lavem hem. Traem tingbaot ol papa mo mama. Taem pikinini i stap krae, sam papa mo mama oli givim eni samting we hem i wantem blong mekem hem i stop. Be papa mo mama we tufala i lavem pikinini blong tufala, bambae tufala i stretem hem taem i nidim. Long sem fasin, Jehova we hem i lav, “i stap stretem olgeta we hem i lavem olgeta.” (Hibrus 12:6) Taswe, sipos yumi stretem narafala taem hem i nidim, yumi stap soemaot lav. (Ol Proveb 3:11, 12) Be from we yumi sinman, plante taem yumi no soemaot lav. Taswe, yumi evriwan i save kam gud moa. ?Yumi save mekem wanem? Bambae yumi tokbaot tri samting.

Fas samting, yu askem long God blong i givim tabu spirit, from we lav i frut blong tabu spirit. Jisas i talem se Jehova i save givim “tabu spirit long olgeta we oli stap askem long hem.” (Luk 11:13) Taswe sipos yu prea from tabu spirit mo yu letem spirit ya i lidim yu, bambae yu soemaot lav moa. (Galesia 5:16) Olsem nao, sipos yu wan elda, yu save prea blong tabu spirit i givhan long yu, blong yu soemaot lav taem yu yusum Baebol blong givim advaes long narafala. Sipos yu wan papa no mama, yu save prea blong tabu spirit i givhan long yu, blong yu stretem pikinini wetem lav be i no wetem kros.

Seken samting, yu tingting dip long fasin blong Jisas blong soemaot lav, taem ol narafala oli mekem i nogud long hem. (1 Pita 2:21, 23) Taem narafala i mekem yu yu kros o i mekem i no stret long yu, traem tingbaot se, ‘?Jisas bambae i mekem wanem?’ Wan sista we nem blong Lei, i talem se kwestin ya i givhan long hem blong i tingting gud bifo we i mekem wan samting. Lei i talem se: “Wan woman we i wok wetem mi i sanem wan imel i go long ol narafala long ples blong wok, mo i talem ol nogud tok long saed blong mi mo wok blong mi. Mi mi harem nogud tumas. Be mi tingbaot se, ‘?Olsem wanem mi save mekem olsem Jisas?’ Mi tingbaot samting we Jisas bambae i mekem sipos hem i stap, nao mi mekem desisen blong lego nomo. Biaen, mi faenemaot se woman ya i bin kasem wan bigfala sik mo i stap wari tumas. Mi kasem save se hem i no minim samting we hem i raetem long imel. Taem mi tingbaot olsem wanem Jisas i soemaot lav long ol narafala we oli mekem i nogud long hem, hemia i givhan long mi blong mi mekem sem mak long woman ya we i wok wetem mi.” Sipos yumi folem fasin blong Jisas, bambae yumi soemaot lav oltaem.

Namba tri samting, yu mas rere blong lego samting blong soemaot lav long narafala. Hemia nao lav ya we i makemaot yumi se yumi ol man blong Jisas. (Jon 13:34, 35) Jisas i soemaot nambawan eksampol long yumi long saed blong lav ya. ?Olsem wanem hem i mekem olsem? Hem i aot long heven, “i lego olgeta samting” blong givhan long yumi, “nating se hem i mas ded from.” (Filipae 2:5-8) Taem yumi mekem olsem Jisas we i lego evri samting blong  soemaot lav long ol narafala, bambae yumi gat ol tingting mo filing olsem hem, nao bambae yumi no tingbaot yumi nomo, be yumi tingbaot narafala fastaem.

Taem yumi soemaot lav, yumi kasem plante blesing. Traem tingbaot tufala blesing ya:

• BIGFALA FAMLE BLONG OL BRATA MO SISTA LONG FULWOL: From we yumi lavlavem yumi, yumi save se nomata wanem kongregesen yumi go long hem long fulwol, ol brata mo sista bambae oli welkamem yumi. !Hemia wan bigfala blesing blong save se ‘olgeta brata blong yumi long fulwol’ oli lavem yumi! (1 Pita 5:9) Ol man blong God nomo oli gat lav ya.

• PIS: Taem ‘yumi lavlavem yumi mo yumi no raorao,’ yumi joen gud mo yumi gat pis. (Efesas 4:2, 3) Yumi haremsave pis ya long ol miting mo ol asembli. ?Yu yu agri se pis ya i spesel long wol ya we ol man oli no save joen gud? (Ol Sam 119:165; Aesea 54:13) Taem yumi traehad blong gat pis wetem ol narafala, yumi soemaot se yumi lavem olgeta, nao Papa blong yumi long heven i glad.—Ol Sam 133:1-3; Matiu 5:9.

Pol i talem se lav i “leftemap laef blong man.” (1 Korin 8:1, Baebol Long Bislama) ?Hemia i minim wanem? Long 1 Korin japta 13, we samfala oli kolem “Wan Sam Blong Lav,” Pol i eksplenem olsem wanem lav i leftemap laef blong man. Man we i gat lav, i mekem i gud long narafala. Hem i tingbaot samting we narafala i nidim. (1 Korin 10:24; 13:5) Lav i pulum man blong i tingbaot narafala, i kaen, mo i gat longfala tingting. Taswe lav i mekem ol famle mo kongregesen oli joen gud.—Kolosi 3:14.

I gat plante rod blong soemaot lav long ol narafala, be lav ya we i impoten moa blong leftemap laef blong yumi, hemia lav long God. ?From wanem? !From we lav ya i mekem yumi joen gud! Ol man blong ol defdefren kala mo lanwis we oli kamaot long ol defren kaen laef oli joen gud blong wosipim Jehova, “we solda blong wan i joen long solda blong narawan.” (Sefanaea 3:9, NW) I gud yumi gat strong tingting blong soemaot evri dei, nambawan fasin ya lav we i frut blong tabu spirit.