1, 2. (1) Wanem i save mekem se yumi askem kwestin ya, “?Gogo kasem wetaem?” (2) ?From wanem eksampol blong ol gudfala man blong God bifo, i leftemap tingting blong yumi?

“?GOGO kasem wetaem?” Hemia nao kwestin we tufala profet ya, Aesea mo Habakuk i askem. (Aesea 6:11, NW; Habakuk 1:2, NW) Long Sam 13, King Deved i askem kwestin ya fo taem. (Ol Sam 13:1, 2) Mo taem ol man we oli no bilif oli raonem Jisas, hem tu i askem se: “?Gogo kasem wetaem?” (Matiu 17:17) Maet yumi tu yumi stap askem sem kwestin olsem tede.

² Wanem i save mekem se yumi askem kwestin ya, “?Gogo kasem wetaem?” Maet wan samting we i no stret i hapen long yumi. Maet yumi sik no yumi stap kam olfala. Maet yumi wari from we laef ‘i strong tumas mo i had blong winim ol trabol.’ (2 Timoti 3:1) Maet yumi taed long ol fasin nogud blong ol man raonabaot long yumi, nao tingting  blong yumi i foldaon. Nomata se i olsem wanem, i gud blong save se Jehova i no panisim ol gudfala man blong hem bifo, taem oli askem kwestin ya.

3. ?Wanem i save givhan long yumi taem yumi kasem hadtaem?

³ ?Wanem i save givhan long yumi taem yumi kasem hadtaem? Jemes we i smol brata blong Jisas, i talem se: “Yufala i mas mekem tingting blong yufala i longfala gogo kasem taem we Masta i stap.” (Jemes 5:7) Taswe yumi evriwan i mas gat longfala tingting. Be, ?wanem ya longfala tingting, mo olsem wanem yumi save soemaot nambawan fasin ya?

4, 5. (1) ?Wanem ol fasin we oli joen wetem longfala tingting? (2) ?Jemes i talem wanem pijatok blong eksplenem longfala tingting? (Yu luk pija long stat blong stadi.)

⁴ Baebol i talem se longfala tingting i wan long ol fasin we oli olsem frut blong tabu spirit. From we yumi sinman, i had blong gat longfala tingting taem yumi kasem trabol. Taswe, yumi nidim God blong i givhan long yumi. Longfala tingting i wan presen we hem i givim. Taem yumi gat fasin ya, hemia i soemaot se yumi lavem Jehova mo ol narafala. Be taem yumi no gat longfala tingting, lav we yumi gat long ol narafala, i stap godaon. (1 Korin 13:4; Galesia 5:22) I gat plante impoten fasin we oli joen wetem longfala tingting. Wan long olgeta, hemia fasin blong stanap strong mo holem gudfala tingting long taem blong trabol. (Kolosi 1:11; Jemes 1:3, 4) Wan narafala fasin se, yumi mas holemstrong long Jehova, nating se yumi kasem problem. Mo tu, yumi no traem givimbak nogud fasin we narafala i mekem long yumi, taem yumi stap harem nogud. Baebol i talem se yumi mas rere blong wet. Hemia wan impoten lesen we yumi lanem long Jemes 5:7, 8. (Ridim.)

⁵ ?From wanem yumi mas rere blong wet, blong luk ol promes blong Jehova oli kamtru? Disaepol Jemes i skelem yumi wetem wan man blong wokem garen. Nating se man ya i wok had blong planem kakae long garen, hem i no save kontrolem weta no ol kakae we hem i planem. Hem i mas gat longfala tingting blong wet kasem taem we “garen i karem ol gudfala kakae.” Long sem fasin, i gat plante samting we yumi no save kontrolem taem yumi stap wet blong Jehova i mekem ol promes blong hem oli kamtru. (Mak 13:32, 33; Ol Wok 1:7) Olsem man ya blong wokem garen, yumi mas wet wetem longfala tingting.

6. ?Yumi lanem wanem long eksampol blong profet Maeka?

⁶ Profet Maeka tu i fesem plante hadtaem long laef blong hem, olsem yumi tede. Hem i laef long taem we rabis King Ahas i stap rul. I gat plante kruked fasin, mo ol fasin nogud tu oli kam antap, taswe Baebol i talem se ol man oli kam “waes gud blong mekem ol rabis fasin.” (Ridim Maeka 7:1-3.) Maeka i no save jenisim ol samting we oli stap hapen. ?Ale, hem i mekem wanem? Hem i se: ‘Hae God i God blong mi, mo oltaem bambae mi putum tingting blong mi i stap strong long hem nomo, from we mi save se . . . bambae i harem mi. Bambae mi stap wet . . . from we hem nao bambae i kam sevem mi.’ (Maeka 7:7) Olsem Maeka, yumi tu, yumi mas “wet.”

7. ?From wanem yumi mas mekem moa i bitim we yumi wet nomo?

 ⁷ Sipos yumi gat bilif olsem Maeka, bambae yumi glad blong wet long Jehova. Yumi no olsem wan prisena we i stap wet long dei we bambae oli kilim hem i ded. Hem i no glad taem hem i stap wet, mo i no wantem se dei ya i kamtru. !Be yumi no sem mak! !Yumi glad blong wet long Jehova, from we yumi save se long stret taem, bambae hem i mekem promes blong hem i kamtru, blong givim laef we i no save finis long yumi! Taswe yumi wet wetem ‘longfala tingting mo . . . glad.’ (Kolosi 1:11, 12) Taem yumi stap wet long Jehova, yumi no mas komplen se hem i slo. Sipos yumi mekem olsem, bambae hem i no glad long yumi.—Kolosi 3:12.

8. ?I gud yumi tingbaot wanem, long saed blong ol gudfala man mo woman bifo?

⁸ ?Wanem bambae i givhan moa long yumi blong wet? Yumi save tingting dip long eksampol blong ol gudfala man mo woman bifo, we oli wet long Jehova blong i mekem ol promes blong hem oli kamtru. (Rom 15:4) I gud yumi tingbaot longfala taem we oli stap wet, from wanem oli glad blong wet, mo olsem wanem Jehova i blesem olgeta.

9, 10. ?Ebraham mo Sera i wet long Jehova blong hamas yia?

⁹ Tingbaot Ebraham mo Sera. From we tufala i ‘bilif mo tufala i gat longfala tingting,’ tufala i kasem ol “promes ya.” Baebol i talem se “from we Ebraham i gat longfala tingting,” Jehova i promes  se bambae i blesem hem mo mekem hem i kam papa blong wan bigfala neson. (Hibrus 6:12, 15) ?From wanem Ebraham i mas gat longfala tingting? From we bambae i tekem taem blong promes ya i kamtru. Long Nisan 14 long yia 1943 bifo Kraes, Ebraham mo Sera mo evri man we oli stap wetem tufala, oli krosem Yufretes Reva mo oli go insaed long Promes Lan. Be Ebraham i mas wet 25 yia blong i luk pikinini boe blong hem, Aesak, i bon, mo hem i wet 60 yia bakegen blong i luk tufala bubu blong hem, Esao mo Jekob i bon, long yia 1858 bifo Kraes.—Hibrus 11:9.

¹⁰ ?Ebraham i kasem graon long Promes Lan? Baebol i talem se Jehova “i no givim wan graon long kantri ya long hem, i no givim wan smol pis nating we i naf blong hem i putum leg blong hem long hem. Be hem i promes blong givim kantri ya long hem . . . wetem pikinini blong hem, nating se long taem ya, hem i no gat pikinini yet.” (Ol Wok 7:5) Fo handred toti yia afta we Ebraham i krosem Yufretes Reva, ol bubu blong hem oli kam neson ya we bambae i kasem graon ya.—Eksodas 12:40-42; Galesia 3:17.

11. ?From wanem Ebraham i glad blong wet, mo bambae hem i kasem wanem blesing from?

¹¹ Ebraham i glad blong wet, from we hem i sua se Jehova bambae i holem ol promes blong hem. Hem i bilif long Jehova. (Ridim Hibrus 11:8-12.) Nating we hem i no luk ol promes blong God oli kamtru bifo we hem i ded, hem i glad nomo blong wet. Be traem tingbaot glad blong hem taem bambae hem i laef bakegen long paradaes long wol. Bambae hem i sapraes blong ridim stori blong hem mo famle blong hem long ol defdefren haf blong Baebol. * !Tingbaot olsem wanem bambae hem i glad blong save se, ol samting we hem i mekem bifo, oli givhan blong mekem ol promes blong Jehova long saed blong Mesaea oli kamtru! Ebraham bambae i harem se hem i no wet blong nating nomo.

12, 13. ?From wanem Josef i mas gat longfala tingting, mo wanem gudfala tingting we hem i gat?

¹² Josef we i nambatu smol bubu blong Ebraham, i mas gat longfala tingting blong wet. Hem i harem nogud long sam rabis fasin we ol narafala oli mekem long hem. Taem hem i gat 17 yia, ol brata blong hem oli salem hem olsem wan slef. Biaen, hem i go kalabus from giaman toktok ya se hem i traem repem woman blong masta blong hem. (Jenesis 39:11-20; Ol Sam 105:17, 18) Nating se Josef i wan gudfala man blong God, be i luk olsem se hem i stap kasem panis, i bitim we hem i kasem blesing. Be 13 yia biaen, ol samting oli jenis. Josef i kamaot long kalabus, mo hem i kam nambatu haeman blong Ijip.—Jenesis 41:14, 37-43; Ol Wok 7:9, 10.

¹³ ?Olsem wanem? ?Tingting blong Josef i kam nogud from ol rabis samting we oli mekem long hem? ?Hem i harem se Jehova i lego hem? Nogat. Josef i gat longfala tingting blong wet. ?Wanem i givhan long hem? Hem i bilif long Jehova. Hem i kasem save se Jehova i stap kontrolem ol samting. Ol tok we hem i talem long ol brata blong hem oli  soemaot tingting we hem i gat, hem i se: “Yufala i no fraet. Mi mi no save mekem mi mi olsem God. Yufala i mekem plan blong mekem i nogud long mi, be God i kafsaedem plan ya blong yufala, i mekem we gudfala samting i kamaot long hem. Hem i yusum plan ya blong yufala blong mekem plante man oli stap laef. Olgeta ya oli stap laef tede.” (Jenesis 50:19, 20) Josef i save se hem i no wet blong nating nomo, from we Jehova bambae i blesem hem.

14, 15. (1) ?From wanem yumi sapraes long longfala tingting blong Deved? (2) ?Wanem i givhan long hem blong i gat longfala tingting blong wet?

¹⁴ King Deved tu i harem nogud long ol rabis fasin we ol narafala oli mekem long hem. Taem hem i yangfala, Jehova i jusumaot hem blong i kam king blong Isrel. Be Deved i wet 15 yia blong i kam king blong laen blong hem nomo. (2 Samuel 2:3, 4) Long ol yia ya, hem i mas ronwe blong haed long King Sol we i stap traem blong kilim hem i ded. * Deved i no gat wan haos blong hem. Hem i mas go stap long wan narafala kantri o insaed long hol blong ston long draeples. Biaen, Sol i ded long wan faet. Be Deved i mas wet 7 yia bakegen blong i kam king blong ful neson blong Isrel.—2 Samuel 5:4, 5.

¹⁵ ?From wanem Deved i gat longfala tingting blong wet? Hem i givim ansa long semfala Sam ya we i askem fo taem se: “?Gogo kasem wetaem?” Hem i se: “Mi mi trastem yu from fasin ya blong yu we oltaem yu yu lavem man tumas. Mi bambae mi glad, from we yu bambae yu sevem mi. Hae God, mi bambae mi sing long yu, from we yu bin mekem i gud tumas long mi.” (Ol Sam 13:5, 6) Deved i save se Jehova i lavem hem mo bambae i no lego hem. Hem i tingbaot ol taem ya we Jehova i bin givhan long hem, mo hem i wet blong Jehova i finisim ol trabol blong hem. Deved i save se hem i no wet blong nating nomo, from we Jehova bambae i blesem hem.

16, 17. ?Olsem wanem Jehova mo Jisas i soemaot nambawan eksampol blong wet?

¹⁶ Jehova i no save askem wan samting long yumi we hem wan i no save mekem. Hem i soemaot nambawan eksampol blong wet. (Ridim 2 Pita 3:9.) Traem tingbaot long garen blong Iden bifo, Setan i talem se Jehova i mekem i no stret. Be Jehova i “rere” blong wet, blong bambae hem i mekem nem blong hem i tabu. Long taem ya, olgeta we oli “glad blong wet long hem” bambae oli kasem ol nambawan blesing.—Aesea 30:18, futnot NW.

¹⁷ Jisas tu i rere blong wet. Taem hem i stap long wol, hem i stanap strong go kasem ded. Taem hem i gobak long  heven long yia 33, hem i givim sakrefaes blong hem long Jehova. Be hem i mas wet kasem 1914 blong i rul olsem King. (Ol Wok 2:33-35; Hibrus 10:12, 13) Mo Jisas i mas wet yet go kasem en blong wan taosen yia rul blong hem, blong i finisim gud ol enemi blong hem. (1 Korin 15:25) Hemia wan longfala taem blong wet. Be long en blong hem, bambae i gat bigfala blesing.

18, 19. ?Wanem i save givhan long yumi blong yumi gat longfala tingting blong wet?

¹⁸ Jehova i wantem se yumi gat longfala tingting mo yumi wet. ?Wanem i save givhan long yumi? Yumi mas prea from tabu spirit. Tingbaot se longfala tingting i wan long ol fasin we oli olsem frut blong tabu spirit. (Efesas 3:16; 6:18; 1 Tesalonaeka 5:17-19) !Taswe i gud yu askem strong long Jehova blong i givhan long yu, blong yu stanap strong wetem longfala tingting!

¹⁹ I gud yumi tingbaot Ebraham, Josef, Deved, mo samting we i givhan long trifala blong oli gat longfala tingting blong wet long ol promes blong Jehova. Hemia from we oli gat bilif mo oli trastem Jehova. Oli no tingbaot olgeta nomo mo ol samting we olgeta nomo i wantem. Taem yumi tingbaot ol blesing we oli kasem, bambae yumi tu yumi wantem gat longfala tingting blong wet.

20. ?Yumi gat strong tingting blong mekem wanem?

²⁰ Nating se yumi stap kasem plante trabol, be yumi gat strong tingting blong “wet.” Maet samtaem yumi askem se: “O Jehova, ?Gogo kasem wetaem?” (Aesea 6:11) Be, wetem help blong tabu spirit, yumi save talem olsem profet Jeremaea, se: “Jehova nomo i stap givim laef long mi,” mo “from samting ya, mi mi stap wet long hem.”—Ol Krae 3:21, 24, NW.