Stori blong Matiu i defren long stori blong Luk from we Matiu i tokbaot ol samting long saed blong Josef, be Luk i tokbaot ol samting long saed blong Meri.

Matiu i tokbaot samting we Josef i mekem taem hem i harem se Meri i gat bel, mo drim blong Josef we wan enjel i eksplenem samting ya, mo olsem wanem Josef i folem ol tok blong enjel ya. (Matiu 1:19-25) Mo tu, Matiu i tokbaot woning we enjel i givim long Josef long wan drim, taem i talem long hem blong i tekem famle blong hem i go long Ijip, nao Josef i obei. Biaen, Matiu i talem se Josef i luk wan narafala drim bakegen, we wan enjel i talem long hem blong i kambak long kantri ya Isrel, nao hem i tekem famle blong hem i kam stap long Nasaret. (Matiu 2:13, 14, 19-23) Long ol olfala hanraet, long japta wan mo tu blong buk blong Matiu, i gat nem blong Josef eit taem, be i gat nem blong Meri fo taem nomo.

Be Luk i tokbaot Meri, mo samting we enjel Gabriel i talem long hem, mo taem ya we Meri i visitim Elisabet, mo ol tok blong Meri blong presem Jehova. (Luk 1:26-56) Luk i talem ol tok we Simeon i talem long Meri long saed blong taem ya we bambae Jisas i safa. Mo Luk i tokbaot taem ya we Jisas i gat 12 yia, nao hem i go long haos blong God wetem papa mo mama blong hem. Luk i raetem ol tok we Meri i talem long taem ya, be i no ol tok blong Josef, mo i tokbaot olsem wanem Meri i tingting dip long samting we i hapen. (Luk 2:19, 34, 35, 48, 51) Long ol olfala hanraet, long japta wan mo tu long buk blong Luk, i gat nem blong Meri 12 taem, be i gat nem blong Josef tri taem nomo. Taswe Matiu i tokbaot ol samting we Josef i tingbaot mo i mekem, be Luk i tokbaot ol tingting mo aksen blong Meri.

Long buk blong Matiu mo Luk, laen blong Jisas i defdefren. Matiu i tokbaot famle laen blong Josef, mo i soemaot se Jisas i gat raet blong rul from we Josef we i adoptem hem, i kamaot long laen blong King Deved. Josef i wan laen blong King Deved tru long Solomon, we i pikinini blong Deved. (Matiu 1:6, 16) Be Luk i tokbaot famle laen blong Meri, mo i soemaot se Jisas i gat raet blong rul from we “hem i bon long laen blong Deved.” (Rom 1:3, BLB) Meri i kamaot long laen blong King Deved tru long Natan we i pikinini blong Deved. (Luk 3:31) ?Be from wanem Luk i no talem se Meri i pikinini blong Heli, we i stret papa blong hem? From we long taem ya, oli stap putum nem blong ol man nomo long lis blong ol famle laen we oli raetemdaon. Taswe taem Luk i talem se Josef i pikinini blong Heli, ol man oli kasem save se woman blong Josef nao i pikinini blong Heli.—Luk 3:23.

Famle laen blong Jisas long buk blong Matiu mo Luk i pruvum se Jisas i Mesaea we God i promes blong sanem. Ol man oli save gud se Jisas i kamaot long laen blong King Deved, ol Farisi mo ol Sadusi tu oli no agensem samting ya. Ol save ya we Matiu mo Luk i givim i mekem bilif blong yumi i strong se ol narafala promes blong God tu bambae oli kamtru.