MEXICO CITY i wan taon we i bisi we i bisi. Long Novemba 1932, i gat moa long wan milian man long taon ya. Long taem ya, oli jes putum ol red laet mo grin laet long ol rod long taon, blong soemaot wetaem ol trak oli mas stop mo go. Be wan wik biaen, ol man oli stap tokbaot wan defren samting. Ol man blong raetem stori long niuspepa oli tekem kamera blong olgeta, mo oli go wet long stesen blong tren. ?Oli stap wet long hu? Josef Ratafod, we i presiden blong Wajtaoa Sosaeti. Plante Witnes tu oli stap wet blong welkamem Brata Ratafod, we i kam blong joen long wan asembli blong tri dei.

Golden Age i talem se: “Ol man bambae oli no save fogetem asembli ya. Bambae hem i givhan bigwan” blong talemaot trutok long Meksiko. Be asembli ya bambae i smol nomo, samwe long 150 man nomo bambae oli kam long hem. ?Olsem wanem hem i save givhan bigwan?

Kam kasem taem ya, trutok i no go long plante ples long Meksiko. Stat long 1919, i gat sam asembli we oli smol, be afta long yia ya, namba blong ol kongregesen i godaon. Taem oli openem branj ofis long Mexico City long 1929, i luk olsem se bambae i kam gud, be i gat sam trabol yet blong winim. Ogenaesesen i talem long ol paenia, we long taem ya oli kolem olgeta se kolpota, se oli no mas joenem bisnes wetem wok blong prij. Wan long olgeta i kros tumas, nao i lego trutok, mo i mekem wan grup blong hem wan blong stadi Baebol. Mo tu, oli jenisim brata we i stap lukaot long branj ofis, from we hem i mekem fasin we i no stret. Taswe ol Witnes long Meksiko we oli stanap strong, oli nidim wan samting blong leftemap tingting blong olgeta.

Brata Ratafod i givim tu gudfala tok long asembli mo faef tok long radio. Hemia fastaem we ol brata long Meksiko oli yusum radio blong talemaot gud nius. Afta long asembli, oli putumap wan narafala brata blong lukaot long branj ofis mo wok blong prij. Ol Witnes oli gat strong tingting blong gohed blong prij, mo Jehova i blesem olgeta.

Long 1933, i gat tu asembli long Meksiko, wan long Veracruz mo narawan long Mexico City. Ol brata mo sista oli stap wok had blong prij, mo wok blong olgeta i karem frut. !Long 1931 i gat 82 pablisa nomo, be long 1941 i gat bitim 800! Long 1941, samwe long 1,000 man oli kam long Tiokratik Asembli long Mexico City.

Long 1943, ol Witnes oli singaot ol man oli kam long “Fri Neson” Tiokratik Asembli, we bambae oli mekem long 12 taon long Meksiko. * Blong singaot ol man, oli werem wan samting we oli kolem ‘sanwij saen.’ Hemia tu bigfala saen we oli putum long fran mo bak blong olgeta, oli fasem tufala long solda, mo oli wokbaot long ol rod long taon. Ol Witnes oli stat yusum ol saen ya long 1936.

Ol saen ya oli mekem olgeta man long Mexico City oli save long asembli ya. Wan niuspepa (La Nación) i tokbaot ol Witnes we oli kam long asembli ya, se: “Long fas dei, oli askem long olgeta blong oli singaot plante moa man. Long nekis dei, ples blong asembli i smol.” Katolik Jos i no glad se plante man oli kam long asembli, nao oli agensem ol Witnes. Be ol brata mo sista oli no fraet, oli gohed nomo blong tokbaot asembli. Sem niuspepa i talem se: “Olgeta man long taon oli luk ol Witnes.” Mo i talem tu se ol brata mo sista “oli kam ‘ol sanwij’ we oli tokbaot asembli.” I gat wan pija long niuspepa ya we i soemaot ol brata mo sista long ol rod long Mexico City, mo aninit long pija oli raetem se: “Oli fulap long rod.”

Long taem ya, i had blong ol Witnes oli go long ol asembli long Meksiko. Plante long olgeta oli stap long ol vilej longwe long rod blong tren mo rod blong trak tu. Wan kongregesen i raetem se: “Wan samting nomo we i pas klosap long ples blong mifala, hemia rop blong telefon.” Taswe ol brata mo sista oli mas raed long dongki o wokbaot blong plante dei, blong kasem tren we bambae i tekem olgeta oli go long asembli.

Bighaf blong ol Witnes oli pua, mo i hadwok blong oli pem rod blong go long asembli. Taem oli kasem taon ya we asembli i stap long hem, plante oli slip long haos blong ol Witnes we oli soemaot lav mo welkamem olgeta. Sam oli slip long ol Haos Kingdom. Long wan asembli, samwe long 90 brata oli slip long branj ofis, antap long ol katon we oli fulap long ol buk. Yearbook i talem se ol brata ya oli glad, from we ol katon “oli sofsof mo wom gud i bitim simen.”

From we ol Witnes oli glad tumas blong joen wetem ol brata mo sista blong olgeta, oli no tingbaot hadwok blong olgeta blong kam long ol asembli ya. Tede, i gat bitim 850,000 Witnes long Meksiko, we oli gat sem tingting ya yet. * 1949 Yearbook i talem se, nating we i had blong ol brata oli kam long asembli, hemia i no mekem olgeta oli kam slak long wosip blong Jehova. Taem wan asembli i finis, “oli gohed longtaem blong tokbaot.” Mo oli askem sem kwestin bakegen mo bakegen se: “?Wetaem bambae yumi gat wan narafala asembli?”—Wan stori blong bifo long Sentrol Amerika.