1, 2. ?Wanem i hapen long Pol mo Saelas long Filipae? (Yu luk pija long stat blong stadi.)

TRAEM tingbaot. Tufala misinari ya Pol mo Saelas, tufala i stap long kalabus long taon ya Filipae. Hem i medel naet, mo kalabus i dak we i dak. Tufala i no save muv from we oli fasem leg blong tufala long wan wud we i olsem hankaf. Mo tu, bak blong tufala i soa bitim mak from we long dei ya, oli wipim tufala. (Ol Wok 16:23, 24) Wan bigfala grup blong man i bin girap agensem tufala, oli holem tufala, nao oli tekem tufala i go long ol lida blong taon long ples blong maket. Oli jajem tufala, oli teremaot klos blong tufala, mo oli wipim tufala. (Ol Wok 16:16-22) !Samting ya i no stret nating! Pol i wan sitisen blong Rom, mo hem i gat raet blong stanap long fored blong kot blong toktok. *

² Maet Pol i stap tingbaot samting we i hapen long dei ya, mo i tingbaot ol man we oli stap long taon ya Filipae. Long  plante narafala taon we Pol i go long olgeta, i gat wan haos prea, from we taem i gat ten man Jiu long wan ples, oli wokem wan haos prea. Be long Filipae i no gat. ?Hemia i min se i no gat ten man Jiu long taon ya? Yumi no save, be Baebol i talem se oli mekem wosip afsaed long taon, klosap long reva. (Ol Wok 16:13, 14) I klia se ol man Filipae oli praod blong stap olsem ol sitisen blong Rom. (Ol Wok 16:21) Maet from samting ya nao, oli ting se Pol mo Saelas we tufala i man Jiu nomo, tufala i no naf blong kam sitisen blong Rom. Yumi no save tingting blong olgeta, be yumi save se oli mekem i no stret taem oli sakem tufala long kalabus.

3. Taem Pol i stap kalabus, ?maet tingting blong hem i fasfas from wanem? ?Be hem i gat wanem fasin?

³ Ating Pol i stap tingbaot tu ol samting we i hapen bifo we hem i kam long Filipae. Sam manis bifo, hem i stap long Esia Maena, long narasaed long Aejin Si. Long taem ya, tabu spirit i blokem hem blong i no go prij long plante ples. I olsem we tabu spirit i wantem se hem i go long wan narafala ples. (Ol Wok 16:6, 7) ?Be wanem ples? Taem hem i stap long Troas, hem i luk wan vison, mo i harem tok ya se: “Yu kamkros long Masedonia.” !Saye, samting we Jehova i wantem i kam klia! Wantaem nomo, Pol i go long Masedonia. (Ridim Ol Wok 16:8-10.) ?Be wanem i hapen afta? !Smoltaem biaen, hem i go kalabus! ?From wanem Jehova i letem samting ya i hapen? ?Bambae hem i stap kalabus kasem wetaem? Maet tingting blong Pol i fasfas, be bilif blong hem i stap strong mo hem i glad. Hem mo Saelas i “stap prea mo tufala i stap singsing blong presem God.” (Ol Wok 16:25) Pis we God i givim i mekem tufala i harem gud, mo tingting blong tufala i stap kwaet.

4, 5. (1) ?Olsem wanem yu tu yu save fesem samting we Pol i fesem? (2) ?Olsem wanem trabol we Pol i kasem i jenis kwiktaem?

⁴ ?Samtaem yu bin harem olsem Pol? Maet yu askem long God blong i givhan long yu blong yu mekem wan desisen, nao yu ting se tabu spirit i stap lidim yu. Be afta, yu fesem hadtaem mo yu mas mekem plante bigfala jenis long laef blong yu. (Prija 9:11) Maet yu stap tingbaot se, ?from wanem Jehova i letem samting ya i hapen? Sipos i olsem, ?wanem i save givhan long yu blong yu stanap strong mo yu trastem Jehova fulwan? Blong faenem ansa, bambae yumi luk wanem i hapen long Pol mo Saelas.

⁵ Taem Pol mo Saelas i stap singsing, tufala i sek long sam samting we i hapen. Fastaem, graon i seksek bigwan nao doa blong kalabus i open. Biaen, ol jen blong ol presina oli brok, mo Pol i blokem gad blong i no kilim hem wan i ded. Nao gad ya wetem ful famle blong hem oli baptaes. Long nekis moning, ol haeman oli sanem sam man blong olgeta blong oli tekemaot Pol mo Saelas long kalabus. Oli askem long tufala blong tufala i aot long taon long kwaet fasin nomo. Be taem ol haeman oli harem se tufala i sitisen blong Rom, oli luksave bigfala mastik blong olgeta, nao olgeta nomo oli kam blong tekem tufala i goaot long taon. Be bifo we tufala i aot, tufala i wantem go luk wan sista we i jes baptaes, Lidia, blong talem tata long hem. Mo  tufala i tekem janis ya tu blong leftemap tingting blong ol narafala brata mo sista long Filipae. (Ol Wok 16:26-40) !Ol samting i jenis kwiktaem nomo!

6. Long stadi ya, ?bambae yumi tokbaot wanem?

⁶ ?Yumi lanem wanem? Yumi lanem se, taem yumi kasem trabol, i no nid blong yumi wari, from we Jehova i save mekem samting we yumi no tingbaot. Pol i neva fogetem samting ya, from we biaen, hem i raetem wan leta long ol brata long Filipae, mo i tokbaot pis we God i save givim taem yumi wari. Long stadi ya, bambae yumi tokbaot Filipae 4:6, 7. (Ridim.) Afta, bambae yumi tokbaot sam narafala stori long Baebol, we Jehova i mekem samting we ol man oli no tingbaot. Biaen bakegen, bambae yumi tokbaot olsem wanem “pis ya blong God” i save givhan long yumi, blong yumi trastem Jehova fulwan taem yumi kasem trabol.

7. ?Leta we Pol i raetem long ol brata long Filipae i tijim olgeta long wanem? ?Yumi lanem wanem?

⁷ Taem ol brata long Filipae oli ridim leta blong Pol, ?oli tingbaot wanem? Ating plante oli tingbaot samting we i bin hapen long Pol mo Saelas, mo samting we Jehova i mekem we tufala i sek long hem. ?Leta blong Pol i tijim olgeta long wanem samting? I tijim olgeta se: Yufala i no mas wari. Yufala i prea, nao bambae yufala i kasem ‘pis ya blong God we i bitim olgeta save blong yumi.’ ?Hem i minim wanem? Sam Baebol oli talem se, “i bitim ol samting we yumi drim long hem,” o “i moagud i winim ol plan blong man.” Ale, Pol i stap talem se “pis ya blong God” i moa gud i bitim eni samting we yumi save tingbaot. Plante taem, yumi no save rod blong winim problem blong yumi, be Jehova i save. Mo hem i save mekem samting we yumi no tingbaot nating.—Ridim 2 Pita 2:9.

8, 9. (1) ?Wanem gudfala samting i kamaot from trabol we Pol i kasem long Filipae? (2) ?From wanem ol brata long Filipae oli trastem ol tok we Pol i raetem?

⁸ Leta blong Pol i mas mekem ol brata long Filipae oli strong. Jehova i mekem plante samting long olgeta long ol ten yia we i pas. I tru, Jehova i letem Pol mo Saelas i safa, be hemia i givim janis long tufala blong “yusum loa blong soemaot raet” blong tufala blong talemaot gud nius. (Filipae 1:7) From samting ya, ol haeman long Filipae oli no save spolem niufala Kristin kongregesen. Mo tu, Pol i bin talemaot se hem i wan sitisen blong Rom, maet hemia i mekem se oli letem disaepol Luk i stap long Filipae afta we Pol mo Saelas i aot. Luk i save gohed blong givhan long ol niufala Kristin long ples ya.

⁹ Ol brata long Filipae oli save se, long leta we Pol i raetem, hem i no stap  tokbaot samting we hem i neva fesem. Hem i bin kasem bigfala trabol. Mo taem hem i raetem leta ya, hem i stap kalabus long haos blong hem long Rom. Nating se i olsem, i klia se hem i gat “pis ya blong God.”—Filipae 1:12-14; 4:7, 11, 22.

10, 11. ?Taem yu wari, yu mas mekem wanem? ?Yu save trastem Jehova se bambae hem i mekem wanem?

¹⁰ ?Wanem i save givhan long yu, blong yu ‘no letem tingting i trabol,’ be yu gat “pis ya blong God”? Ol tok we Pol i raetem long ol Kristin long Filipae, oli soemaot se taem yu wari, yu mas prea blong talemaot ol wari ya. (Ridim 1 Pita 5:6, 7.) Taem yu prea, yu mas bilif strong se Jehova i lavem yu mo i wantem givhan long yu. Yu mas talem tangkiu long hem from evri blesing we yu kasem. Mo yu no mas fogetem se, Jehova i save “mekem plante moa samting i bitim olgeta samting we yumi askem no yumi tingbaot.”—Efesas 3:20.

¹¹ Olsem Pol mo Saelas, maet yu sek long samting we Jehova i mekem blong givhan long yu. Maet i no wan bigfala samting, be oltaem hem i givhan olsem we yu nidim. (1 Korin 10:13) Hemia i no min se yu no mekem wan samting, yu wet nomo blong Jehova i stretem ol problem blong yu, nogat. Yu mas wok folem ol prea blong yu. (Rom 12:11) Samting ya bambae i soemaot long Jehova se ol tok long prea blong yu i tru, nao bambae hem i blesem yu. Yu no mas fogetem se, Jehova i save mekem plante moa samting i bitim samting we yu askem mo yu wantem. Samtaem yu save sek se hem i mekem samting we yu no tingbaot nating. Bambae yumi tokbaot sam stori we oli save mekem se yumi trastem Jehova moa, blong i mekem samting we yumi no tingbaot.

12. (1) Taem King Senakerib i stap kam blong agensem Jerusalem, ?King Hesekia i mekem wanem? (2) ?Samting we Jehova i mekem i tijim yumi long wanem?

¹² Baebol i tokbaot plante samting we Jehova i mekem we ol man oli no tingbaot. Wan long ol samting ya, hemia taem King Senakerib blong Asiria i agensem King Hesekia blong Juda, nao i winim olgeta taon long Juda be Jerusalem nomo i stap. (2 King 18:1-3, 13) ?Taem Senakerib i stap kam blong agensem Jerusalem, Hesekia i mekem wanem? Fastaem, hem i prea blong askem help long Jehova, mo tu, hem i askem advaes long profet Aesea. (2 King 19:5, 15-20) Biaen, Hesekia i pem faen we Senakerib i askem. Long rod ya, hem i soemaot se fasin blong hem i no strong tumas. (2 King 18:14, 15) Namba tri samting, Hesekia i meksua se ol man oli gat evri samting we oli nidim sipos ol ami oli raonem taon ya. (2 Kronikel 32:2-4) ?Trabol ya i finis olsem wanem? Jehova i sanem wan enjel blong i kilim i ded 185,000 soldia blong Senakerib long wan naet nomo. !Hemia samting we Hesekia i no tingbaot nating!—2 King 19:35.

13. (1) ?Samting we i hapen long Josef i tijim yumi long wanem? (2) ?Wanem samting i hapen long Sera we i moa gud i bitim eni samting we hem i save tingbaot?

¹³ Traem tingbaot yangfala man ya  Josef. Taem hem i stap long kalabus long Ijip, hem i no tingbaot nating se bambae hem i kam nambatu haeman blong Ijip. Mo hem i no tingbaot se Jehova bambae i yusum hem blong sevem famle blong hem long taem we kakae i sot. (Jenesis 40:15; 41:39-43; 50:20) Samting we Jehova i mekem i bitim samting we Josef i tingbaot. Mo tu, traem tingbaot Sera we i bubu blong papa blong Josef. Sera i no tingbaot nating se, Jehova bambae i letem hem i bonem prapa pikinini boe blong hem, be i no woman slef blong hem nomo we bambae i bonem wan pikinini blong hem. Taem Sera i bonem Aesak, hemia samting we i moagud i bitim eni samting we hem i save tingbaot.—Jenesis 21:1-3, 6, 7.

14. ?Yumi save trastem Jehova blong i mekem wanem?

¹⁴ Yumi save se, bifo long niufala wol, Jehova bambae i no mekem wan merikel blong tekemaot ol problem blong yumi. Mo yumi no askem long hem blong i mekem ol merikel long laef blong yumi. Be yumi save se Jehova i mekem plante nambawan samting blong givhan long ol man blong hem bifo. Tede, fasin blong hem i no jenis. (Ridim Malakae 3:6.) Taswe yumi trastem hem se bambae i  givim paoa we yumi nidim, blong mekem samting we hem i wantem. (2 Korin 4:7-9) ?Ol stori blong Hesekia, Josef, mo Sera, oli tijim yumi long wanem? Oli tijim yumi se, sipos yumi gohed blong trastem Jehova, bambae hem i givhan long yumi long olgeta trabol, nating se oli bigwan tumas.

15. ?Olsem wanem yumi save gat “pis ya blong God” taem yumi kasem ol bigfala trabol? ?Wanem i mekem rod blong yumi save gat pis ya?

¹⁵ ?Olsem wanem yumi save gat “pis ya blong God,” taem yumi kasem ol bigfala trabol? Yumi mas meksua se yumi fren gud oltaem wetem Jehova. Taem Jisas i givim laef blong hem olsem wan ransom sakrefaes, hem i mekem rod blong yumi save fren gud wetem Jehova. Ransom ya i wan long ol bigbigfala wok blong Jehova, from we i mekem se Jehova i save fogivim sin blong yumi, tingting blong yumi i no moa stikim yumi, nao yumi save kam klosap long hem.—Jon 14:6; Jemes 4:8; 1 Pita 3:21.

16. ?Wanem i hapen taem yumi kasem “pis ya blong God”? Talem wan eksampol.

¹⁶ ?Wanem i hapen taem yumi kasem “pis ya blong God we i bigwan tumas i bitim olgeta save blong yumi”? Baebol i talem se pis ya bambae i “lukaot gud” long hat mo tingting blong yumi. (Filipae 4:7) Long olfala lanwis, oli yusum tok ya “lukaot gud” blong tokbaot wan grup blong ol soldia we oli protektem wan taon. Wan grup olsem i protektem taon ya Filipae. Ol man oli save slip gud long naet from we oli save se ol soldia oli stap lukaot gud long taon blong olgeta. Long sem fasin, taem yumi gat “pis ya blong God,” yumi no wari, be tingting blong yumi i spel gud. Yumi save se Jehova i stap lukaot gud long yumi mo i wantem se yumi win. (1 Pita 5:10) Hemia i protektem tingting mo hat blong yumi, i mekem se yumi no wari tumas mo tingting i no foldaon.

17. ?Wanem bambae i givhan long yumi, blong yumi trastem Jehova long taem blong bigfala trabol?

¹⁷ I no longtaem, bigfala trabol bambae i kasem olgeta man. (Matiu 24:21, 22) Yumi no save stret, wanem bambae i hapen long yumi wanwan. Be yumi no nid blong wari bitim mak. I tru, yumi no save evri samting we Jehova bambae i mekem, be yumi save God ya blong yumi. Yumi save ol samting we hem i mekem long ol man blong hem bifo, mo yumi save se nomata wanem i hapen, hem bambae i mekem samting we hem i wantem i kamtru. !Maet hem i mekem long wan fasin we yumi no tingbaot nating! Taswe, long evri samting we Jehova i mekem blong yumi naoia, yumi gat janis blong haremsave “pis ya blong God we i bigwan tumas i bitim olgeta save blong yumi.”