FROM we long “ol las dei” ya laef i stap kam strong tumas, taswe yumi rili nidim blong gat longfala tingting. (2 Timoti 3:1-5) Tede, plante man oli nogat longfala tingting. Oli tingbaot olgeta nomo, oli raorao oltaem, mo oli no bos long tingting. Taswe, i gud blong askem se: ‘?Mi mi no moa gat longfala tingting olsem plante man tede? ?I minim wanem blong gat longfala tingting? ?Mi save mekem wanem blong gat longfala tingting?’

?Long Baebol tok ya “tingting we i longfala” i minim wanem? I no minim nomo se yumi no raorao. Man we i gat longfala tingting i stanap strong from wan risen, hem i hop se ol samting bambae oli kamgud. Hem i no tingbaot hem wan, be hem i tingbaot ol narafala, hemia olgeta tu we oli mekem hem i harem nogud. Hem i gohed blong gat hop se oli save fren gud bakegen. Yumi no sapraes from we Baebol i talem se longfala tingting i kamaot from lav. * (1 Korin 13:4) Mo tu, longfala tingting i frut blong “tabu spirit.” (Galesia 5:22, 23) Taswe, ?yumi mas mekem wanem blong gat longfala tingting?

Blong gat longfala tingting, yumi mas prea from tabu spirit blong Jehova, we hem i stap givim long olgeta we oli trastem hem. (Luk 11:13) Tabu spirit i gat paoa blong halpem yumi, be yet yumi mas wok folem ol prea blong yumi. (Ol Sam 86:10, 11) Hemia i min se evridei yumi mas traehad blong gat longfala tingting. Be samtaem yumi save mestem. ?Wanem i save givhan long yumi?

Yumi mas stadi mo folem gudfala eksampol blong Jisas. Taem aposol Pol i tokbaot “niufala fasin,” we i minim tu longfala tingting, hem i leftemap tingting blong yumi se: “Yufala i letem pis blong Kraes i kontrolem hat blong yufala.” (Kolosi 3:10, 12, 15, futnot) Blong mekem olsem, yumi mas folem eksampol blong Jisas mo trastem fulwan se long stret taem, God bambae i stretem ol samting. Sipos yumi trastem God, bambae yumi gohed blong gat longfala tingting, nomata wanem samting i hapen long yumi.—Jon 14:27; 16:33.

Yumi evriwan i wantem se niufala wol i kamtru kwik. Be yumi save lanem blong gat longfala tingting, taem yumi tingbaot olsem wanem Jehova i gat longfala tingting long yumi. Baebol i talem se: “Sam man oli ting se Jehova i slo blong mekem promes blong hem i kamtru, be i no olsem. Hem i gat longfala tingting long yufala, from we hem i no wantem se wan man i ded, hem i wantem se olgeta man oli tanem tingting blong olgeta.” (2 Pita 3:9) Taem yumi tingbaot olsem wanem Jehova i gat longfala tingting long yumi, bambae yumi tu yumi gat longfala tingting long ol narafala. (Rom 2:4)  ?Wanem ol samting we i mekem se samtaem yumi nidim longfala tingting?

Evri dei i gat plante samting we i mekem se yumi nidim blong gat longfala tingting. Eksampol, yumi nidim longfala tingting blong no stopem storian blong narafala, sipos yumi gat wan impoten samting blong talem. (Jemes 1:19) Mo yumi nidim longfala tingting taem wan man i mekem yumi harem nogud. I bitim we yumi kros, i gud blong tingbaot olsem wanem Jehova mo Jisas i soem longfala tingting long yumi, from ol slak fasin blong yumi. Tufala i no lukluk evri smosmol slak fasin blong yumi. Defren olgeta, tufala i luk ol gudfala fasin blong yumi mo tufala i gat longfala tingting from tufala i givim taem long yumi blong kamgud moa long ol fasin blong yumi.—1 Timoti 1:16; 1 Pita 3:12.

Yumi nidim longfala tingting tu taem narafala i talem se yumi mekem wan samting i rong. Maet hemia i save mekem yumi harem nogud mo yumi wantem soemaot se yumi no mekem wan rong samting. Be Baebol i talem se: “Man we i gat longfala tingting, hem i moa gud, i winim man we i stap flas. I nogud yu yu man blong kros kwik. Mo i nogud yu holem kros blong yu i stap longtaem, from we hemia i fasin blong man we i no gat hed.” (Prija 7:8, 9) Nating sipos yumi no mekem wan rong samting, be yet yumi nidim blong gat longfala tingting mo tingting gud bifo yumi tekem aksen. Hemia nao samting we Jisas i mekem taem ol narafala oli giaman se hem i mekem wan samting we i no stret.—Matiu 11:19.

Ol papa mo mama tu oli mas gat longfala tingting taem oli givhan long pikinini blong i gat ol gudfala fasin, o blong i no mekem ol nogud samting. Traem tingbaot Matias, we i stap long Betel blong Skandinavia. Taem Matias i wan yangfala, ol fren long skul blong hem oli stap jikim hem from bilif blong hem. Papa mo mama blong hem i no bin save samting ya. Be biaen, tufala i luksave se hem i stap gat tu tingting long bilif blong hem. Papa mo mama blong Matias i rili nidim longfala tingting. Matias i askem ol kwestin olsem: “?God hem i hu? ?Olsem wanem sipos Baebol i no Tok blong God? ?Olsem wanem yumi save se God nao i wantem se yumi mekem olsem o no mekem olsem?” Hem i askem long papa blong hem Gillis se: “?From wanem narafala i mas jajem mi sipos mi no wantem gat bilif olsem yu?”

 Gillis i talem se: “Samtaem ol kwestin we Matias i askem i soem se hem i kros, i no kros long mitufala, be i kros from trutok, we hem i harem se i mekem laef blong hem i had tumas.” ?Olsem wanem Gillis i halpem boe blong hem? Hem i se: “Mi mo boe blong mi i sidaon mo toktok blong plante aoa.” Oltaem, Gillis i jes lesin long Matias mo i askem kwestin blong kasemsave ol filing mo tingting blong hem. Samtaem Gillis i eksplenem wan samting long Matias mo i askem hem blong i tingting long samting fastaem, bifo we tufala i tokbaot bakegen. Gillis i se samtaem hem tu i nidim sam dei blong tingting long ol samting we boe blong hem i talem. Storian blong tufala i mekem se Matias i stat blong kasemsave mining blong ransom, mo i kasemsave se Jehova i lavem yumi mo hem i gat raet blong rulum yumi. Gillis i se: “I no isi, be sloslo, lav we Matias i gat long Jehova i gru long hat blong hem. Mi mo waef blong mi, i glad tumas se traehad blong mitufala blong gat longfala tingting blong halpem boe blong mitufala taem hem i yangfala, i gat gudfala frut mo i mekem trutok i kasem hat blong hem.”

Taem Gillis mo waef blong hem i stap givhan long Matias, tufala i trastem fulwan se Jehova bambae i halpem tufala. Gillis i se: “Oltaem mi talem long Matias se, from we mitufala i lavem hem bigwan, samting ya i pusum mitufala blong prea strong moa long Jehova blong i halpem hem blong i kasemsave samting.” !Yes, papa mo mama ya i glad tumas se tufala i gat longfala tingting mo tufala i no lego!

Yumi nidim longfala tingting tu taem yumi stap lukaot long wan famle o fren we i sik blong longtaem. Wan eksampol, hemia eksampol blong Ellen *, we hem tu i laef long Skandinavia.

Samwe long 8 yia bifo, hasban blong Ellen i kasem tu strok we i spolem bren blong hem. From sik ya, hem i no moa save filim se hem i hapi, harem nogud, o i sore. Samting ya i mekem se i had tumas long Ellen. Hem i se: “Mi rili nidim blong gat longfala tingting mo blong prea plante. Wan vas we i leftemap tingting blong mi, hemia Filipae 4:13, we i talem se: “Mi mi gat paoa blong fesem olgeta samting from God ya we i givim paoa long mi.”” Ellen i gat longfala tingting blong gotru long hadtaem ya, from paoa we Jehova i givim long hem.—Ol Sam 62:5, 6.

Yes, Jehova nao i beswan eksampol we yumi save folem blong gat longfala tingting. (2 Pita 3:15) Long Baebol, plante taem yumi ridim ol stori we oli soemaot se Jehova i gat longfala tingting. (Nehemaea 9:30; Aesea 30:18) ?Yu tingbaot samting we Jehova i mekem taem Ebraham i askem ol kwestin long saed blong desisen we Jehova i mekem blong spolem Sodom? Jehova i no stopem Ebraham. Hem i gat longfala tingting, mo i soemaot se hem i lesingud long ol kwestin we Ebraham i askem. Biaen, Jehova i talem long Ebraham se bambae hem i no spolem Sodom, nating sipos i gat 10 stret man nomo long taon ya. (Jenesis 18:22-33) !Oltaem Jehova i gat longfala tingting blong lesin, mo hem i neva mekem wan samting we i no stret!

Longfala tingting i wan impoten haf blong niufala fasin we ol Kristin oli mas gat. Sipos yumi rili traehad blong gat longfala tingting, yumi stap ona long Papa blong yumi, Jehova, we hem i kea mo i gat longfala tingting, mo bambae yumi stap wetem “olgeta ya we oli kasem ol samting we God i promes blong givim, from we oli bilif mo oli gat longfala tingting.”—Hibrus 6:10-12.