?From wanem i no stret blong wan man i postem ol video o ol buk blong ol Witnes blong Jehova, long ol narafala websaet o long sosial media?

Yumi no salem ol video mo ol buk blong yumi, taswe sam man oli ting se i oraet nomo blong postem ol samting ya long ol narafala websaet o long sosial media. Be hemia i wan denja mo i go agensem Ligal Notis * blong websaet blong yumi. Terms of Use i talem klia se “ol pija, video, buk, logo, miusik, foto, mo ol atikol we oli stap long jw.org, man i nogat raet blong postem olgeta long ol narafala websaet.” ?From wanem ol rul ya oli impoten?

Evri samting long websaet blong yumi oli copyright, i min se loa i protektem olgeta. Hemia i blokem man blong i no yusum ol samting ya olbaot. Samtaem ol apostasi mo ol man we oli wantem spolem wok blong yumi, oli postem ol buk mo video blong yumi long ol websaet blong olgeta. Hemia i blong pulum ol Witnes mo ol narafala, blong oli go long ol long websaet ya. Mo tu, oli putum ol samting we i save spolem tingting blong man. (Ol Sam 26:4; Ol Proveb 22:5) Samfala oli yusum logo blong yumi long ol advataesmen, ol app blong mobaelfon, mo ol narafala samting we oli salem. Be from we loa i protektem ol buk, ol video, mo logo blong yumi, yumi save go long kot mo stopem olgeta blong no mekem samting ya. (Ol Proveb 27:12) Be bambae kot i no save sapotem yumi sipos yumi letem sam man, we i save minim ol brata mo sista, blong oli postem ol buk mo video blong yumi long ol narafala websaet, o yusum logo blong jw.org blong salem olting blong olgeta.

Sipos yumi daonlodem ol video mo ol buk blong yumi long wan narafala websaet, be i no long jw.org, hemia i wan denja. Jehova i yusum nomo “gudfala slef we i waes,” blong givim kakae long saed blong spirit long yumi. (Matiu 24:45) “Slef” ya i yusum nomo ol websaet ya www.pr418.com, tv.pr418.com, mo wol.pr418.com, blong givimaot ol kakae long saed blong spirit. Mo oli wokem tri app nomo we man i save yusum, hemia JW Language^®, JW Library^®, mo JW Library Sign Language^®. Long ol websaet mo ol app ya, bambae yumi no save luk eni advataesmen blong wol. Be i denja blong daonlodem ol video mo ol buk blong yumi long wan narafala websaet o app, from we maet oli save jenisim sam samting.—Ol Sam 18:26; 19:8.

Mo tu, sipos yumi postem ol video o ol buk blong yumi long ol websaet we man i save komen long hem, hemia i givim janis long ol apostasi blong oli tok nogud long ogenaesesen blong Jehova. Sam brata mo sista oli rao wetem ol man olsem, be hemia i no soem respek nating long nem blong Jehova. Fasin blong toktok long intenet, i no wan stret rod blong stretem tingting blong wan man, mo traem givhan long hem blong i kasemsave trutok. (1 Timoti 6:3-5; 2 Timoti 2:23-25) Mo tu, sam man oli wokem ol websaet o sosial media akaon, we i luk olsem se i blong ogenaesesen o blong wan memba blong Hed Kampani. Be hemia i no tru. I nogat wan memba blong Hed Kampani we i gat wan web pej o wan akaon blong sosial media.

Taem yumi pulum man i go long jw.org, yumi stap sapotem wok blong talemaot “gud nius.” (Matiu 24:14) Ol websaet mo ol app we ogenaesesen i wokem, oli stap kamgud moa oltaem. Yumi wantem se ol narafala tu oli kasem ol gudfala samting tru long ol tul ya. Taswe, yumi save sanem video o buk tru long imel o sanem wan link blong websaet blong yumi long narafala. Long fasin ya, yumi stap pulum man i go nomo long rod we Jehova i yusum blong givimaot ol kakae long saed blong spirit, hemia “gudfala slef we i waes.”