LONG las yia, plante taosen brata oli kam ol elda mo ol man blong givhan. Sipos yu yu wan long olgeta, i sua se yu glad blong mekem wok blong Jehova mo blong givhan long ol brata mo sista.

Sipos yu harem se yu fraet smol, yu no wari, hemia i nomol. Jason, wan yangfala elda i talem se: “Taem mi kam elda, mi wari smol long saed blong ol wok we mi kasem.” Taem Jehova i givim niufala wok long Moses mo Jeremaea, tufala i harem olsem se tufala i no naf blong mekem ol wok ya. (Eksodas 4:10; Jeremaea 1:6) Sipos yu yu harem olsem tufala ya, ?wanem i save givhan long yu blong gohed nomo blong mekem ol wok blong yu? Yes, eksampol blong Timoti i save givhan long yu.—Ol Wok 16:1-3.

Timoti i gat samwe long 20 yia taem hem i stat blong folem aposol Pol. Taem Pol i askem Timoti blong i wok wetem hem, maet Timoti i harem se hem i no naf blong tij mo givim advaes long ol narafala, from we hem i yang tumas. (1 Timoti 4:11, 12; 2 Timoti 1:1, 2, 7) Be hem i gohed nomo blong mekem wok ya, mo ten yia biaen, Pol i talem long ol Kristin long Filipae se: “Mi mi tingbaot se bambae i no longtaem mi save sanem Timoti i go long yufala, sipos Masta blong yumi Jisas, i wantem.” ?From wanem Pol i talem olsem? Hem i eksplenem se: “I no gat narafala man long ples ya we i gat sem tingting we hem i gat.”—Filipae 2:19, 20.

?From wanem Timoti i wan gudfala eksampol we ol elda oli save folem? Tingbaot ol sikis poen ya.

1. Hem tingbaot narafala fastaem. Pol i talem long ol Kristin long Filipae se Timoti i “stap tingbaot yufala tumas.” (Filipae 2:20) Timoti i wantem se ol brata mo sista oli gohed blong frengud wetem Jehova, mo hem i glad blong yusum taem mo paoa blong hem blong halpem olgeta.

Wiliam, we i mekem wok blong elda blong bitim 20 yia, i talem oltaem long ol niufala elda se: “Yu mas lavem ol brata mo sista. Tingbaot nid blong olgeta, i bitim samting we oli naf blong mekem.” Yu no mekem olsem wan bas draeva we i kwik blong go long wan ples, be i no tingbaot blong stop mo letem ol man oli kam long bas.

2. Hem i putum wok blong Jehova fasples. Pol i talem se Timoti i no olsem ol man we “oli stap tingbaot ol wok blong olgeta nomo, oli no tingbaot wok blong Jisas Kraes.” (Filipae 2:21) Pol i stap luk se ol brata we oli stap raonabaot long hem, oli tingbaot wok blong olgeta nomo. Samtaem oli putum wok blong olgeta fasples long wok blong Jehova. !Be Timoti i defren! Taem hem i gat janis blong mekem moa long wok blong God, hem i mekem olsem Aesea, we i talem se: “!Mi ya, mi save go! !Yu sanem mi!”—Aesea 6:8.

?Olsem wanem blong skelemgud nid blong yu mo nid blong kongregesen? Faswan samting, i gud we yu folem advaes blong Pol, we i se: “Faenemaot ol samting we oli moa impoten.” (Filipae 1:10) Putum wok blong Jehova fasples. Seken samting, blokem ol samting we oli save kakae taem mo paoa blong yu. Pol i talem long Timoti se: “Yu mas ronwe long ol samting we ol yangfala oli stap wantem tumas. Be yu mas traehad blong gat stret fasin, bilif, lav, mo pis.”—2 Timoti 2:22.

3. Hem i wokhad long wok blong prij. Pol i talem long Timoti se: “Olsem wan pikinini we i wok wetem papa blong hem. Yes, hem i wok strong wetem mi olsem wan slef,  blong mekem se gud nius i goaot moa.” (Filipae 2:22) Timoti i no les, hem i wokhad wetem Pol, mo hemia i mekem fasin fren blong tufala i strong moa.

Tede long ogenaesesen blong Jehova, i gat plante wok blong mekem. Ol wok ya oli gud tumas mo bambae oli halpem yu blong kam klosap long ol brata mo sista. Taswe, i gud we oltaem yu gat “plante wok blong mekem long wok blong Masta.”—1 Korin 15:58.

4. Hem i folem wanem we hem i bin lanem. Pol i talem long Timoti se: “Yu yu folemgud tijing blong mi, mo laef blong mi, mo ol mak we mi wantem kasem, mo yu folemgud bilif blong mi, mo longfala tingting blong mi, lav blong mi, mo fasin blong mi blong stanap strong.” (2 Timoti 3:10) Timoti i folemgud ol samting we hem i lanem, taswe hem i kasem plante wok.—1 Korin 4:17.

?Yu yu luk wan elda we i gat ekspiriens mo yu wantem folem eksampol blong hem? Tom, we i mekem wok blong elda blong plante yia, i tingbaot se wan elda we i gat ekspiriens i glad blong trenem hem. Hem i se: “Oltaem mi askem advaes long hem mo mi folem advaes we hem i givim. Hemia i givhan bigwan long mi.”

5. Hem i gohed blong trenem hem wan. Pol i givim advaes long Timoti se: “Yu mas trenem yu blong yu kasem mak ya, hemia blong yu holemstrong long God.” (1 Timoti 4:7) Sipos wan spot man i gat wan trena, be yet hem wan i mas tren. Pol i talem long Timoti se: ‘Yu gohed blong ridim Baebol long ol man, givim advaes, mo tijim olgeta. . . . Yu mas tingting plante long ol samting ya, mo yu putum tingting blong yu fulwan long hem, nao ol man bambae oli luk klia se yu stap gohed gud.’—1 Timoti 4:13-15.

Yu nidim blong kamgud moa long wok blong yu. Yu mas stadi gud long Baebol, mo folemgud ol niufala save we ogenaesesen i givim. Yu no mas trastem yu wan tumas. I no stret blong ting se yu gat plante ekspiriens mo yu save dil wetem eni problem, be yu no mekem risej. Olsem Timoti, “yu mas lukaot gud long fasin blong yu, mo long ol tok we yu stap tijim ol man long hem.”—1 Timoti 4:16.

6. Hem i dipen long tabu spirit blong Jehova. Pol i tokbaot wok we Timoti i mekem, hem i talem long hem se: “Yu protektem gudfala samting ya we yu kasem wetem help blong tabu spirit we i stap insaed long yumi.” (2 Timoti 1:14) Timoti i mas dipen long tabu spirit blong God.

Donal, we i bin mekem wok blong elda blong plante yia, i talem se: “Ol man blong givhan mo ol elda oli mas lukaot gud long fasin fren blong olgeta wetem God. Olgeta we oli mekem olsem, bambae oli ‘stap kam strong moa.’ Sipos oli askem tabu spirit blong God mo oli wokem ol fasin we i frut blong tabu spirit, bambae ol brata sista oli glad tumas long olgeta.”—Ol Sam 84:7; 1 Pita 4:11.

I naes tumas blong luk ol niufala man blong givhan mo ol elda we oli olsem yu, we oli gohed blong mekem moa long wok blong Jehova. Jason, we yumi tokbaot hem finis, i talem se: “Long taem we mi mekem wok blong elda, mi lanem plante samting mo mi trastem Jehova moa. !Mi mi glad tumas long wok ya mo mi luk wok ya olsem wan nambawan blesing!”

?Yu yu wantem mekem moa wok? Sipos yu folem eksampol blong Timoti, bambae yu olsem wan blesing long ol brata mo sista.