1, 2. (1) ?Yumi mas lanem blong mekem wanem, mo from wanem? (2) ?Bambae yumi tokbaot wanem long stadi ya?

YUMI evriwan i mas lanem blong faenemaot ol stret infomesen mo yusum blong talem samting we i tru. (Ol Proveb 3:21-23; 8:4, 5) Sipos no bambae i isi blong Setan i trikim yumi. (Efesas 5:6; Kolosi 2:8) Be blong talem samting we i tru, yumi mas gat ol stret infomesen. Ol Proveb 18:13 (NW) i talem se: “Man we i ansa long wan bisnes be i no lesingud long hem fastaem, hem i mekem krangke, mo bambae hem i mas sem from.”

² Long stadi ya, bambae yumi luk samting we i save mekem i had blong kasem ol stret infomesen mo talem samting we i tru. Mo tu, bambae yumi luk ol rul blong Baebol mo ol eksampol we oli save tijim yumi blong kasem ol stret infomesen.

3. ?From wanem yumi mas folem advaes blong Baebol long Ol Proveb 14:15? (Yu luk pija long stat blong stadi.)

³ Tede, yumi kasem infomesen long plante ples. Yumi kasem tru long Intenet, televisin, mo ol narafala samting. Mo  tu, maet yumi kasem tru long imel, teks mesej, mo ol stori we ol fren oli talem. Samtaem i luk olsem se i no gat en long ol infomesen. Taswe, yumi mas lukaotgud. Maet ol fren blong yumi oli talem samting we i tru, be i gat ol narafala man we oli jenisim stori o talem ol infomesen we i no tru. ?Wanem advaes blong Baebol we i save halpem yumi blong skelem gud ol samting we yumi harem? Ol Proveb 14:15 i talem se: “Man we i no gat hed, hem i save bilif long evri samting, be man we i gat hed, hem i stap lukluk gud long rod we bambae i folem.”

4. ?Olsem wanem Filipae 4:8, 9 i halpem yumi blong jusum gud samting we yumi ridim? ?From wanem i impoten blong gat stret infomesen? (Yu luk bokis ya, “ Ol Ples Blong Kasem Stret Infomesen.”)

⁴ Yumi nidim ol stret infomesen blong mekem ol gudfala desisen. Taswe, yumi mas lukaotgud taem yumi jusum ol samting we yumi ridim. (Ridim Filipae 4:8, 9.) Yumi no mas westem taem blong lukluk ol nius long Intenet we oli no tru o ridim ol imel we i tokbaot wan samting we i no gat pruf se i tru. I impoten blong no go long ol websaet we ol apostasi oli yusum blong talem ol tingting blong olgeta. Olgeta oli wantem spolem trutok mo bilif blong ol man blong God. Tingbaot se, infomesen we i no tru, i lidim man blong mekem ol nogud desisen. Yu mas tingbaot se ol giaman infomesen oli save spolem yu.—1 Timoti 6: 20, 21.

5. ?Wanem giaman stori we ol man Isrel oli harem? ?Samting ya i mekem oli harem olsem wanem?

⁵ Ol giaman stori oli save mekem trabol long man. Long taem blong Moses, oli sanem 12 spae i go long Promes Lan. Ten spae oli kambak mo oli talem ol samting we i no stret. (Namba 13:25-33) Oli ademap sam moa infomesen we oli no tru, nao ol man blong Jehova oli fraet mo tingting blong olgeta i foldaon. (Namba 14:1-4) ?From wanem oli harem olsem? Maet oli ting se stori ya i tru from we bighaf blong ol spae ya oli talem sem samting. Taswe oli no wantem lesin long tufala spae we oli talem ol gudfala samting long saed blong Promes Lan. (Namba 14:6-10) Ol man Isrel oli jusum blong bilivim wan giaman stori, i bitim we oli trastem Jehova mo save ol stret infomesen.

6. ?From wanem yumi no mas sapraes taem yumi harem ol stori long saed blong ol man blong Jehova?

⁶ Yumi mas lukaotgud taem yumi harem ol stori long saed blong ol Witnes blong Jehova. From we Baebol i singaot enemi blong yumi Setan se: “Man ya we i stap talemaot ol poen agensem ol brata  blong yumi.” (Revelesen 12:10) Taswe Jisas i givim woning se, ol enemi bambae oli “giaman, oli stap talem enikaen rabis tok” blong agensem yumi. (Matiu 5:11) Sipos yumi tingting gud long woning ya, bambae yumi no sek taem yumi harem ol giaman stori long saed blong ol man blong Jehova.

7. Bifo we yumi sanem wan imel o teks mesej, ?i gud yumi askem wanem kwestin?

⁷ ?Yu yu laekem blong sanem imel o teks mesej long ol fren blong yu? Taem yu luk wan interesting stori long nius o yu harem wan ekspiriens, ?yu yu wantem blong serem nius ya kwiktaem olsem man blong radio? Bifo we yu sanem imel o teks, i gud yu askem yu wan se: ‘?Mi mi sua se stori ya i tru? ?Mi mi gat ol stret infomesen?’ Sipos yu no sua, maet bambae yu spredem ol giaman nius. Taswe, sipos yu no save se stori ya i tru o nogat, i moa gud yu no talem long narafala. !Yu dilitim!

8. Long sam kantri, ?ol enemi oli mekem wanem? ?Olsem wanem yumi save blokem samting ya?

⁸ I gat wan narafala risen from wanem i denja blong fowodem ol imel o teks mesej i go long narafala. Long sam kantri, gavman i blokem wok blong yumi. Maet ol enemi long ol kantri ya oli talem ol giaman stori, blong mekem yumi fraet mo blong yumi no trastem ol brata mo sista. Traem tingbaot wanem we i hapen long Soviet Yunion, we naoia hem i Rasia. Ol sikret polis, we oli singaot olgeta se KGB, oli giaman se sam man blong Jehova oli spolem ol narafala brata. * Sore tumas, plante brata mo sista oli bilivim ol giaman stori ya mo oli lego ogenaesesen blong Jehova. Biaen plante oli kambak,  be samfala oli neva kambak. Oli letem ol giaman stori ya i spolem bilif blong olgeta. (1 Timoti 1:19) ?Olsem wanem yumi save blokem ol samting olsem? No spredem ol stori we oli no tru. No bilivim evri samting we yu harem. Be yu mas sua se yu gat ol stret infomesen.

9. ?From wanem maet i had blong talem se wan stori i tru?

⁹ Samtaem yumi harem ol wansaed stori nomo, yumi no save ful infomesen long saed blong stori ya. Hemia i save mekem se i had blong talem se stori ya i tru. !Yumi no save trastem wan stori we haf blong hem nomo i tru! ?Wanem i save givhan long yumi blong ol stori olsem oli no trikim yumi?—Efesas 4:14.

10. ?From wanem klosap sam man Isrel oli faet agensem ol brata blong olgeta? ?Wanem i mekem se oli no faet?

¹⁰ Yumi save lanem lesen from samting we i hapen long ol laen blong Isrel long taem blong Josua, we oli stap long wes saed blong Jodan Reva. (Josua 22:9-34) Olgeta ya oli harem se ol laen blong Isrel we oli stap long is saed blong Jodan Reva, oli wokem wan bigfala olta klosap long reva. Stori ya i tru, be oli nogat evri infomesen. Nao ol laen blong Isrel long wes saed oli ting se ol brata blong olgeta long is saed oli rebel agensem Jehova, ale oli wantem go mekem faet long olgeta. (Ridim Josua 22:9-12.) Be bifo we oli go, oli sanem sam man blong oli go tekem sam infomesen. ?Wanem infomesen we oli kasem? Ol laen blong Isrel long is saed oli no wokem wan olta blong mekem sakrefaes long giaman god. Oli wokem olta ya olsem wan memoriol blong letem evriwan oli save se, olgeta oli wosipim Jehova. Yes, ol laen blong Isrel oli glad se oli no faet agensem ol brata blong olgeta, from we oli tektaem blong faenemaot ol stret infomesen.

11. (1) ?Olsem wanem Mefiboset i lusum ol samting blong hem? (2) ?Deved i sud mekem wanem blong Mefiboset i no kasem problem?

¹¹ Samtaem yumi harem nogud from sam stori we narafala i talem long saed blong yumi, be maet sam haf blong stori ya i no tru. Hemia nao samting we i hapen long Mefiboset. King Deved i givim evri graon blong Sol, i go long Mefiboset we i smol bubu blong Sol. (2 Samuel 9:6, 7) Be biaen Deved i harem wan stori we i no tru long saed blong Mefiboset. Deved i no traem blong faenemaot sipos stori ya i tru o nogat, be hem i girap i tekemaot evri samting blong Mefiboset. (2 Samuel 16:1-4) Biaen taem Deved i toktok wetem Mefiboset, hem i kasemsave se hem i mekem wan mastik. Ale, hem i givimbak sam samting blong Mefiboset. (2 Samuel 19:24-29) Sipos Deved i tekem taem blong kasem ol stret infomesen, maet bambae hem i no spolem Mefiboset.

12, 13. (1) ?Jisas i mekem wanem taem ol man oli talem giaman tok long saed blong hem? (2) ?Bambae yumi mekem wanem taem narafala i giaman long saed blong yumi?

¹² ?Bambae yu mekem wanem sipos wan man i stap talem ol giaman toktok long saed blong yu? Hemia samting we i hapen long Jisas mo Jon Baptaes. (Ridim Matiu 11:18, 19.) ?Jisas i mekem wanem? Hem i no traem blong spenem taem blong pruvum se stori ya i giaman. Be hem i leftemap tingting blong ol man blong oli lukaot ol infomesen we oli tru. Hem i wantem se ol man oli tingbaot samting we hem i mekem mo i tijim. Jisas  i talem se: “Ol gudfala wok blong man we i waes, oli soemaot se waes ya i tru.”—Matiu 11:19.

¹³ Yumi save lanem wan gudfala lesen long eksampol blong Jisas. Samtaem ol man oli save talem sam giaman tok long saed blong yumi, mo maet yumi wari se hemia i save spolem gudfala fasin blong yumi. Be yumi mas soemaot long laef blong yumi se yumi defren. Olsem Jisas, ol gudfala fasin blong yumi oli save pruvum se toktok we narafala i talem i no tru.

14, 15. ?From wanem yumi no mas dipen long prapa save blong yumi?

¹⁴ Yumi luk se samtaem i had blong kasem ol stret infomesen. Wan narafala problem hemia from we yumi sinman. Maet yumi mekem wok blong Jehova blong plante yia mo maet yumi gat save long sam samting. Maet ol narafala oli respektem yumi from yumi gat gudfala tingting. ?Olsem wanem? ?Hemia i save mekem problem long yumi?

¹⁵ Yes. Maet yumi stat blong dipen long prapa save blong yumi. Maet yumi letem ol filing oli kontrolem tingting blong yumi. Nao taem i gat wan samting i hapen, maet yumi ting se yumi save evri samting finis. !Be hemia i denja tumas! Baebol i givim woning long yumi se yumi no mas dipen long prapa save blong yumi.—Ol Proveb 3:5, 6; 28:26.

16. ?Tom i luk wanem long wan restoron, mo hem i gat wanem tingting?

¹⁶ Yu traem tingbaot, long wan sapa, Tom, wan elda we i gat plante ekspiriens i go long wan restoron mo i luk wan narafala elda nem blong hem Jon, we i sidaon long tebol wetem wan woman we i no waef blong hem. I luk olsem se tufala  i gat gud taem tugeta. Tom i luk we tufala i glad blong luk tufala. Hem i wari mo i stap tingting se: ‘?Bambae Jon mo waef blong hem i divos? ?Olsem wanem long ol pikinini blong tufala?’ Tom i bin luk wan samting olsem i hapen finis. Sipos yu yu Tom, ?bambae yu mekem wanem?

17. ?Tom i faenemaot wanem, mo yumi lanem wanem long stori ya?

¹⁷ Tom i gat tingting se Jon i no stap tru long waef blong hem. ?Be yu ting se Tom i gat evri infomesen long saed ya? Long sem sapa ya, Tom i ringim Jon mo i faenemaot se woman ya hem i sista blong Jon, we i stap longwe mo i jes kam visitim olgeta. Jon mo sista blong hem tufala i no luk tufala blong plante yia. Mo hem i gat smoltaem nomo blong luk Jon, mekem se Jon i mas go long wan restoron blong kakae smol wetem hem. Waef blong Jon i wok mekem se hem i no save joen wetem tufala. !Tom i glad se hem i no talemaot tingting blong hem long ol narafala! ?Yumi lanem wanem long stori ya? Nomata se yumi stap long trutok blong plante yia, be yet yumi mas gat stret infomesen bifo we yumi talem wan toktok.

18. ?Wanem i save pulum yumi blong bilivim wan nogud samting long saed blong wan brata?

¹⁸ Ating i had tu blong gat stret tingting long wan brata we yumi no fren gud tumas wetem hem. Sipos yumi gohed blong gat rong tingting olsem, maet bambae yumi no moa trastem brata ya. Ale sipos yumi harem wan nogud stori long saed blong brata ya, maet bambae yumi wantem bilivim stori ya, nating se i nogat pruf se stori ya i tru. ?Yumi lanem wanem? Sipos yumi letem ol nogud filing we yumi gat long ol brata i kontrolem yumi, bambae yumi talem samting we i no gat pruf blong hem. (1 Timoti 6:4, 5) Yumi no mas letem ol rabis filing olsem jalus, i stap long hat blong yumi. Yumi no mas fogetem se Jehova i wantem se yumi lavem ol brata mo sista mo yumi fogivim olgeta fulwan.—Ridim Kolosi 3:12-14.

19, 20. (1) ?Wanem ol rul blong Baebol we oli save givhan long yumi blong faenemaot ol stret infomesen? (2) ?Bambae yumi tokbaot wanem long nekis stadi?

¹⁹ Tede, i had blong kasem ol stret infomesen mo faenemaot sipos oli tru o nogat. ?From wanem? From we yumi sinman, mo plante long ol infomesen oli hafhaf nomo, oli no givim ful save. ?Wanem i save givhan long yumi? !Hemia ol rul blong Baebol! Eksampol, wan rul blong Baebol i talem se i no waes blong givim ansa, bifo we yu gat ol stret infomesen. (Ol Proveb 18:13, NW) Wan narawan i halpem yumi blong no bilivim evri samting we yumi harem. (Ol Proveb 14:15) Nating se yumi stap longtaem long trutok, be yumi no mas trastem prapa save blong yumi. (Ol Proveb 3:5, 6) Ol rul blong Baebol bambae oli protektem yumi sipos yumi kasem ol stret infomesen mo talem tok we i tru mo mekem ol waes desisen.

²⁰ Be i gat wan narafala risen we maet i mekem se i had blong yumi faenem stret infomesen long saed blong wan samting. Yumi ol man, yumi kwik blong jajem wan samting folem wanem we yumi luk. Long nekis stadi, bambae yumi tokbaot ol samting we oli save pulum yumi blong yumi mekem mastik ya mo lanem olsem wanem blong no mekem samting ya.