1. ?Wanem profet tok we Aesea i talem long saed blong Jisas? ?From wanem profet tok ya i leftemap tingting blong yumi?

PROFET tok blong Aesea long saed blong Jisas Kraes i leftemap tingting blong yumi mo i givim hop long yumi. Aesea i talemaot se taem Jisas i jajem man, “bambae hem i no save luk long ol samting ya nomo we ol man oli save luk long ae blong olgeta, bambae hem i no save tingbaot ol samting ya nomo we ol man oli stap talem long hem,” mo ‘bambae hem i stretem ol man we trabol i kasem olgeta, long fasin we i stret.’ (Aesea 11:3, 4) ?From wanem samting ya i leftemap tingting blong yumi? From we yumi laef long wan wol we i fulap long fasin blong no laekem narafala, mo jajem narafala folem samting we man i luk. !Taswe yumi nidim wan jaj we i stret gud, hemia Jisas, from we bambae hem i no jajem yumi from samting we hem i luk!

2. ?Jisas i talem se yumi mas mekem wanem? ?Bambae yumi tokbaot wanem long stadi ya?

² Evri dei yumi gat defren tingting long ol narafala. Be from we yumi sinman, ol tingting blong yumi tu oli no stret. Ol samting we yumi luk oli save mekem yumi gat wan defren tingting. Taswe, Jisas i talem se: “Yufala i stop blong jajem ol man from  samting we yufala i luk, be yufala i mas jajem man long fasin we i stret.” (Jon 7:24) Jisas i wantem se yumi mekem olsem hem, mo no jajem narafala from samting we yumi luk. Long stadi ya, bambae yumi tokbaot tri samting we i save spolem tingting we yumi gat long narafala. Hemia ol trifala samting ya, man blong defren kantri o kala blong skin, man we i rij o i pua, mo wan yangfala o wan olfala. Long ol trifala samting ya wanwan, bambae yumi tokbaot olsem wanem yumi save obei long Jisas mo no jajem narafala from samting we yu luk.

3, 4. (1) ?Wanem i mekem se Pita i jenisim rong tingting we hem i gat? (Yu luk pija long stat blong stadi.) (2) ?Wanem niufala save we Pita i kasem?

³ !Traem tingbaot filing blong Pita taem oli askem hem blong go long Sisaria, long haos blong Konilias we i no wan man Jiu! (Ol Wok 10:17-29) Pita i gruap wetem tingting ya se ol man we oli no man Jiu oli no klin long fes blong God. Be i gat sam samting i hapen we i jenisim tingting blong Pita. Eksampol, God i mekem hem i luk wan vison. (Ol Wok 10:9-16) Hem i luk wan samting olsem wan bigfala kaliko i aot long heven i kamdaon, mo i fulap long ol anamol we oli no klin long fes blong God. Nao hem i harem wan voes i se: “!Pita, yu girap! !Yu kilim ol anamol ya mo yu kakae!” Pita i no wantem nating blong mekem samting ya. Be voes ya i talem se: “Ol samting we God i mekem oli klin finis, yu stop blong talem se oli doti.” Afta we Pita i luk vison ya, hem i no kasemsave samting we voes ya i wantem talem long hem. Long taem ya, ol mesenja blong Konilias oli kamtru long Pita, mo tabu spirit i lidim Pita blong i folem olgeta i go long haos blong Konilias.

⁴ Sipos Pita i jajem Konilias ‘from samting we hem i luk,’ bambae hem i neva go long haos blong Konilias. Bifo, ol man Jiu oli neva go long haos blong ol man we oli no man Jiu. ?Be from wanem Pita i go? From vison we hem i luk mo tabu spirit we hem i kasem, i jenisim rong tingting we hem i gat. Afta we Pita i lesin long Konilias, hem i se: “Naoia mi kasem save gud se God i stap mekem i sem mak nomo long olgeta man. Sipos wan man i fraet gud long God mo i mekem samting we i stret, God i glad long hem nating se hem i blong defren neson.” (Ol Wok 10:34, 35) Pita i glad long niufala save we hem i kasem. ?Olsem wanem samting ya i givhan long evri Kristin?

5. (1) ?Jehova i wantem se evri Kristin oli kasemsave wanem? (2) Nating se yumi save trutok, ?wanem filing we maet yumi save gat?

⁵ Jehova i yusum Pita blong halpem evri Kristin blong oli kasemsave se, Hem i mekem sem mak long olgeta man. Jehova i no stap skelem yumi from kala blong skin, kantri, laen o lanwis. Samting we i mekem hem i glad, hemia taem yumi ona long hem mo mekem samting we i stret. (Galesia 3:26-28; Revelesen 7:9, 10) Ating yu savegud samting ya. ?Be olsem wanem sipos yu gruap long wan kantri o wan famle we i gat fasin ya blong mekem i gud long sam man  nomo? Maet yu ting se yu no olsem, be yet yu save gat filing blong no laekem sam man. Nating se Pita i givhan long sam man blong oli save se God i mekem sem mak long olgeta man, be yet Pita i no laekem sam man from we oli no sem mak long hem. (Galesia 2:11-14) Taswe, ?olsem wanem yumi save obei long Jisas mo stop blong jajem narafala from samting we yumi luk?

6. (1) ?Wanem i save halpem yumi blong sakemaot filing ya blong no laekem narafala? (2) ?Ripot we wan brata i raetem i soemaot se hem i gat wanem fasin?

⁶ I gud yumi skelem fasin blong yumi wetem wanem we yumi lanem long Baebol, blong faenemaot sipos yumi gat filing ya blong no laekem sam man from we oli defren long yumi. (Ol Sam 119:105) Mo tu, maet yumi save askem wan gudfala fren blong talem long yumi sipos yumi gat fasin ya, from we yumi wanwan i no save luk. (Galesia 2:11, 14) !Maet ol filing olsem i nomol long yumi, nao yumi no luksave se yumi gat fasin blong no laekem sam man! Hemia nao samting we wan brata we i mekem sam impoten wok, i mekem. Brata ya i raetem wan ripot long saed blong wan hasban mo waef we oli wok fultaem long wok blong Jehova. Hasban i blong wan ples we plante man oli luk olgeta se oli no impoten. Brata ya we i mekem sam impoten wok i raetem plante gudfala samting long saed blong hasban ya, mo hem i ademap smol se: “Nating se hem i blong [kantri ya], be ol fasin blong hem i soemaot se [grup blong ol man ya] oli no rabis, o laef blong olgeta i no impoten, olsem we plante man long [grup ya] oli mekem.” ?Yumi lanem wanem? Nating se yumi gat wanem wok long ogenaesesen blong Jehova, yumi mas jekem yumi wan mo glad blong folem ol advaes we oli halpem yumi blong luksave eni nogud filing we maet yumi save gat long ol narafala. ?Wanem narafala samting we yumi save mekem?

7. ?Olsem wanem blong soemaot se yumi lavem olgeta man?

⁷ Sipos yumi soemaot “samting we i stap long hat” blong yumi, bambae yumi lavem evriwan. (2 Korin 6:11-13) ?Yu yu spenem taem nomo wetem ol man ples, laen mo lanwis blong yu? Sipos yes, i gud yu traem spenem taem wetem ol narafala we oli no sem mak long yu. Maet yu save askem ol defdefren brata mo sista blong oli prij wetem yu. O yu invaetem olgeta blong oli kam kakae wetem yu long haos. (Ol Wok 16:14, 15) Nao sloslo bambae yu gat fasin ya blong lavem olgeta man. I gud yumi tokbaot wan narafala samting we maet i mekem se yumi jajem narafala, ‘from samting we yumi luk.’

8. Folem Levitikas 19:15, ?yumi mas gat wanem tingting long rijman o puaman?

⁸ Yumi save gat rong tingting long narafala maet from we oli rij o oli pua. Levitikas 19:15 i talem se: “Sipos puaman i pas long kot, yufala i no givhan long hem tumas from we hem i pua, mo sipos rijman i pas long kot, yufala i no mas ona tumas long  hem from we hem i rijman. Yufala i mas jajem tufala long sem mak nomo.” ?Olsem wanem laef blong wan rijman o puaman i save afektem lukluk we yumi gat long olgeta?

9. ?Wanem trutok we Solomon i raetem? ?Mo hemia i tijim yumi long wanem?

⁹ Tabu spirit i givhan long Solomon blong raetem trutok ya: “Man we i pua, hem i no gat fren blong hem. Nating we plante man oli stap raonabaot long hem, be olgeta tu oli no wantem hem. Be man we i rij, hem i gat plante fren blong hem.” (Ol Proveb 14:20) ?Waestok ya i tijim yumi long wanem? Sipos yumi no lukaotgud, maet yumi wantem fren nomo wetem ol brata mo sista we oli rij be i no olgeta we oli pua. ?From wanem i denja blong jajem man from samting we hem i gat o samting we hem i nogat?

10. ?From wanem Jemes i givim woning long ol Kristin bifo?

¹⁰ Sipos yumi jajem ol brata mo sista from we oli rij o oli pua, bambae i gat fasin seraot long kongregesen. Samting ya i hapen long samfala long Kristin kongregesen bifo, mo Jemes i givim woning long olgeta from fasin ya. (Ridim Jemes 2:1-4.) I no mas gat fasin seraot long kongregesen. ?Olsem wanem yumi save blokem fasin ya blong jajem man folem samting we hem i gat?

11. ?Ol samting we man i gat i save givhan long man blong frengud wetem Jehova? Yu eksplenem.

¹¹ Yumi mas luk ol brata mo sista, olsem we Jehova i luk olgeta. Jehova i luk rijman  mo puaman se tufala i semak nomo. I no mane o olting blong yumi we i mekem se yumi frengud wetem Jehova. Tok ya i tru from we Jisas i talem se, “bambae i had blong wan rijman i go insaed long Kingdom blong heven,” be Jisas i no talem se rijman bambae i neva go long Kingdom. (Matiu 19:23) Mo tu, Jisas i talem se: “Yufala we i pua, yufala i glad from we Kingdom blong God i blong yufala.” (Luk 6:20) Be tok ya i no min se evri puaman bambae oli lesin long Jisas mo kasem sam spesel blesing. I gat plante pua man we oli no folem Jisas. Be trutok hemia se, yumi no save jajem fasin blong wan man blong frengud wetem Jehova, from ol samting we man ya i gat.

12. ?Baebol i talem wanem long saed blong rijman mo puaman?

¹² I gat sam brata mo sista we oli rij mo i gat samfala we oli pua. Be olgeta evriwan oli lavem Jehova mo oli mekem wok blong hem long fulhat blong olgeta. Baebol i talem long ol rijman blong “oli no putum tingting blong olgeta long ol rij samting we oli save lus, be oli mas putum tingting blong olgeta long God.” (Ridim 1 Timoti 6:17-19.) Mo tu, tok blong God i givim woning long ol man blong Jehova, nating se oli rij o oli pua, blong oli no laekem mane tumas. (1 Timoti 6:9, 10) Taem yumi luk ol brata mo sista olsem we Jehova i luk olgeta, bambae yumi no jajem olgeta folem ol samting we oli gat. ?Be olsem wanem sipos wan man i yangfala o i olfala? ?I stret blong jajem narafala folem yia blong hem?

13. ?Olsem wanem Baebol i tijim yumi blong soemaot sore long ol olfala?

¹³ Plante taem Baebol i talem se yumi mas respektem ol olfala. Levitikas 19:32 i talem se: “Yufala i mas ona gud long mi. Mo yufala i mas bodaon long ol olfala, mo yufala i mas ona gud long olgeta.” Ol Proveb 16:31 talem se “waet hea, hemia i olsem wan gudfala hat blong king we ol man oli putum long hed blong man blong ona long hem.” Pol i talem long Timoti blong i no tok strong long ol olfala, be i toktok kaen long olgeta olsem we oli papa blong hem. (1 Timoti 5:1, 2) Nating se Timoti i gat raet blong mekem sam samting i bitim ol olfala brata, be oltaem hem i gat sore mo i respektem olgeta.

14. ?Wetaem i stret blong stretem wan we i olfala moa long yumi?

¹⁴ ?Olsem wanem sipos wan olfala i minim blong mekem sin o mekem wan samting we Jehova i no glad long hem? Jehova i no save tekem saed wetem man we i minim nomo blong mekem sin, nating sipos man ya i olfala o oli respektem hem. Tingbaot rul blong Baebol we i stap long Aesea 65:20 (NW) we i se: “Man we i mekem sin, nating we hem i kasem wan handred yia blong hem, be ol man bambae oli singaot trabol i kam long hem.” Yumi luk semfala rul olsem long vison blong Esikel. (Esikel 9:5-7) Samting we i moa impoten hemia blong respektem Jehova, we hem nao i Olfala We i Stap Fastaem Bifo Olgeta. (Daniel 7:9, 10, 13, 14) Sipos yumi respektem Jehova, bambae yumi gat strong tingting blong stretem narafala we i nidim help, nomata se hem i yangfala o i olfala.—Galesia 6:1.

15. ?Yumi lanem wanem long fasin blong aposol Pol blong soem respek long ol yangfala brata?

¹⁵ ?Olsem wanem long wan yangfala brata? ?Narafala i mas soem respek long hem? Yes. Aposol Pol i talem long Timoti se: “Yu no mas letem man i luklukdaon long yu from we yu yu yangfala. Be long fes blong ol man we oli holemstrong long God, yu mas soemaot gudfala eksampol long ol  toktok blong yu, mo long samting we yu mekem, mo long fasin blong yu blong lavem ol man, mo long bilif blong yu, mo long fasin blong yu blong stap klin.” (1 Timoti 4:12) Timoti i gat samwe long 30 yia taem Pol i raetem tok ya long hem. Be yet Pol i givim ol impoten wok long Timoti. ?Yumi lanem wanem? Yumi no mas jajem ol brata we oli yangfala moa long yumi folem yia blong olgeta. !Traem tingbaot ol samting we Jisas i mekem taem hem i gat 33 yia nomo!

16, 17. (1) ?Olsem wanem ol elda oli mekem desisen blong putumap wan man blong givhan o wan elda? (2) ?Olsem wanem prapa tingting o kastom blong ples i save agensem wanem we Baebol i talem?

¹⁶ Long kalja blong sam ples, ol man oli no respektem ol yangfala. From samting ya, maet sam elda oli no putumap wan yangfala blong i kam wan man blong givhan o wan elda, nating sipos hem i naf blong mekem wok ya. Be Baebol i no talem hamas yia we wan brata i mas gat, blong hem i save kam wan man blong givhan o wan elda. (1 Timoti 3:1-10, 12, 13; Taetas 1:5-9) Sipos wan elda i putum wan rul long saed ya folem kalja blong hem, hem i no stap folem Tok blong God. Ol elda oli no mas jajem ol yangfala brata folem prapa tingting blong olgeta, mo kastom blong olgeta, be oli mas folem ol rul we i stap long Baebol.—2 Timoti 3: 16, 17.

¹⁷ Sipos ol elda oli no folem ol rul blong Baebol blong putumap ol man blong givhan o ol elda, bambae oli blokem ol brata we oli naf finis blong mekem ol wok ya. Long wan kantri, wan man blong givhan i mekem gud ol impoten wok long kongregesen, mo ol elda oli agri se hem i kasem ol mak blong kam wan elda. Be i gat sam elda we oli talem se hem i yang tumas blong kam wan elda, ale oli no putumap hem. Sore tumas, brata ya i no kam wan elda, from we oli se hem i yang tumas. Mo i luk olsem se kaen tingting olsem i stap long plante kantri long wol. Taswe i impoten blong folem wanem we Baebol i talem, i bitim we yumi folem prapa tingting o kastom blong yumi. Nao bambae yumi obei long Jisas mo stop blong jajem narafala from samting we yumi luk.

18, 19. ?Wanem i save halpem yumi blong luk ol brata mo sista olsem we Jehova i luk olgeta?

¹⁸ Yumi evriwan i sinman, be yet yumi save lanem blong mekem i sem mak long olgeta man, olsem we Jehova i mekem. (Ol Wok 10:34, 35) Taswe yumi mas gohed blong obei long ol advaes blong Jehova. Taem yumi folem ol advaes ya long laef blong yumi, yumi stap obei long tok blong Jisas we i talem se: “Yufala i stop blong jajem ol man from samting we yufala i luk.”—Jon 7:24.

¹⁹ I no longtaem, King blong yumi, Jisas Kraes, bambae i jajem olgeta man. Jisas bambae i jajem ol man folem ol stret rul blong Jehova, i no from ol samting we hem i luk o harem. (Aesea 11:3, 4) !Yumi wantem tumas blong luk we gudfala taem ya i kam!