1. ?Yumi evriwan i wantem se ol famle blong yumi oli mekem wanem?

WAN sista, nem blong Polin, * i talem se: “Taem mi kasem save long trutok, mi wantem se olgeta famle blong mi, antap moa hasban blong mi Wein, mo smol boe blong mitufala, bambae oli wosipim Jehova mo stap long Paradaes wetem mi.” ?I gat sam famle blong yu we oli no lavem Jehova yet? Ating yu gat sem tingting olsem Polin.

2. ?Wanem ol kwestin we bambae yumi tokbaot?

² Yu no save fosem ol famle blong yu blong bilif long gud nius. Be yu save givhan long olgeta blong oli openem tingting mo hat blong olgeta, blong lesin long ol tok blong Baebol. (2 Tim. 3:14, 15) ?From wanem i gud yu prij long ol famle? ?From wanem yu mas kasem save filing blong olgeta? ?Yu save mekem wanem blong givhan long ol famle blong oli lavem Jehova olsem yu? ?Mo olsem wanem ol brata mo sista oli save givhan?

3. Folem 2 Pita 3:9, ?from wanem i gud yumi prij long ol famle?

³ I no longtaem, Jehova bambae i finisim ol rabis fasin long wol ya. Bambae hem i sevem olgeta nomo we “oli stret blong kasem laef we i no save finis.” (Ol Wok 13:48) Yumi yusum plante taem mo paoa blong prij long ol strenja, taswe i stret  nomo we yumi wantem se ol famle blong yumi tu, oli wosipim Jehova wetem yumi. Papa blong yumi Jehova i lavem ol man, mo “hem i no wantem se wan man i ded, hem i wantem se olgeta man oli tanem tingting blong olgeta.”—Ridim 2 Pita 3:9.

4. ?Maet yumi mekem wanem mastik taem yumi prij long ol famle?

⁴ Yumi mas tingbaot se i gat tu rod blong talemaot ol tok we bambae i sevem man, hemia rod we i stret mo rod we i no stret. Maet yumi toktok kaen taem yumi prij long wan strenja, be yumi tok strong tumas taem yumi prij long ol famle.

5. ?Yumi mas tingbaot wanem taem yumi wantem prij long ol famle?

⁵ Plante long yumi oli tingbaot fastaem we oli bin prij long ol famle, mo oli sore se oli bin tok strong tumas long olgeta. Aposol Pol i givim advaes long ol Kristin se: “Ol tok blong yufala i mas kaen oltaem, olsem we yufala i putum sol long hem, nao bambae yufala i save olsem wanem blong givim ansa long evri man.” (Kol. 4:5, 6) I gud yumi tingbaot advaes ya taem yumi prij long ol famle blong yumi. Sipos no, maet yumi no pulum olgeta blong lesin, be yumi mekem olgeta oli kam kros.

6-7. Talem wan stori we i soemaot se yumi mas kasem save filing blong hasban o waef we i no stap long trutok.

⁶ Kasem save filing blong olgeta. Polin, we yumi tokbaot finis, i talem se: “Fastaem, mi tokbaot Baebol nomo long hasban blong mi. Mitufala i no storian long ol narafala samting.” Trabol se, Wein, hasban blong Polin, i gat smol save nomo long Baebol. Hem i no kasem save samting we Polin i stap tokbaot. Hem i luk se Polin i stap tingbaot skul blong hem nomo, mo hem i wari se i joenem wan krangke skul we i stap giaman long hem.

 ⁷ Fastaem Polin i spenem plante taem wetem ol brata mo sista long naet mo wiken, long ol miting, wok blong prij, mo taem i go visitim olgeta. Hem i se: “Samtaem i no gat man long haos taem Wein i kamhom. Hem i harem nogud blong stap hem wan.” I stret nomo we Wein i wantem se waef mo boe blong hem i stap. Hem i no save ol niufala fren blong tufala, mo long tingting blong hem, Polin i luk ol niufala fren ya se oli moa impoten bitim hem. Ale, Wein i kam kros mo i wantem divosem Polin. ?Yu ting se i gat sam samting we Polin i save mekem blong kasem save moa long filing blong Wein?

8. Folem 1 Pita 3:1, 2, ?wanem i gat bigfala paoa blong pulum ol famle?

⁸ Letem fasin blong yu i pulum olgeta. (Ridim 1 Pita 3:1, 2.) Sloslo Polin i luksave wan impoten samting. Hem i se: “Mi save se Wein i lavem mitufala mo i no rili wantem divosem mi. Be taem hem i talem se bae i divosem mi, mi luksave se mi mas stat blong mekem ol samting long fasin we Jehova i wantem. Mi no mas toktok tumas, be mi mas mekem ol gudfala fasin we hem i save luk.”Ale Polin i no moa fosem Wein blong tokbaot Baebol, be hem i storian wetem hem long ol narafala samting long laef blong tufala. Nao Wein i luksave se Polin i stap traehad blong mekem pis, mo i luk we boe blong hem tu i obei gud mo i gat respek. (Prov. 31:18, 27, 28) Taem Wein i luk olsem wanem Baebol i stap givhan long famle blong hem, hem i openem tingting mo hat blong hem mo i lesin long Tok blong God.—1 Kor. 7:12-14, 16.

9. ?From wanem yumi mas gohed nomo blong traem halpem ol famle?

⁹ Gohed nomo blong traem halpem ol famle  blong yu. Jehova i soemaot nambawan eksampol long yumi. Hem i gohed “oltaem” blong givim janis long ol man, blong oli lesin long gud nius mo kasem laef. (Jer. 44:4) Aposol Pol tu i talem long Timoti se hem i mas gohed nomo blong givhan long ol narafala. ?From wanem? From we sipos hem i mekem olsem, hem i save sevem hem wan mo olgeta we oli lesin long hem. (1 Tim. 4:16) Yumi lavem ol famle blong yumi, taswe yumi wantem se oli save trutok blong Baebol. Sloslo ol tok mo aksen blong Polin oli pulum hasban blong hem, nao hem i joenem Polin long wosip blong Jehova. Naoia, tufala tugeta i paenia, mo Wein i wan elda.

10. ?From wanem yumi mas soemaot longfala tingting?

¹⁰ Soemaot longfala tingting. Taem yumi mekem laef blong yumi i laenap wetem ol stret fasin blong God, maet ol famle oli no glad long ol jenis ya. Plante taem, fas samting we oli makem, hemia se yumi no moa joen wetem olgeta blong mekem lafet long ol spesel dei we jos i stanemap, mo yumi no moa joen long politik. Maet oli kros long yumi. (Mat. 10:35, 36) Be yumi no mas ting se oli no save jenis. Sipos yumi no moa wantem givhan long olgeta blong kasem save long bilif blong yumi, i olsem we yumi jajem olgeta se oli no naf blong kasem laef. Jehova i no givim wok ya blong jajem ol man long yumi, be hem i givim long Jisas. (Jon 5:22) Sipos yumi soemaot longfala tingting, maet bambae sam famle blong yumi oli lesin long gud nius.—Yu luk bokis ya “Yusum Websaet Blong Yumi.”

11-13. ?Fasin we Alis i mekem long papa mo mama blong hem, i tijim yu long wanem?

¹¹ Yu kaen be yu stanap strong tu. (Prov. 15:2) Taem Alis i kasem save trutok, hem i stap longwe long papa mo mama blong hem, we tufala i man blong politik. Be hem i save se i mas talemaot kwiktaem ol gudfala samting we hem i stap lanem. Hem i se: “Sipos yu wet longtaem blong talemaot ol jenis we yu mekem long bilif mo fasin blong yu, ol famle bae oli sek nogud mo oli save kros moa.” Alis i raetem sam leta long papa mo mama blong hem, blong askem tingting blong tufala long sam tijing blong Baebol olsem lav, we hem i ting se tufala bambae i intres long olgeta. (1 Kor. 13:1-13) Hem i talem tangkiu long tufala from we tufala i lukaot gud long hem taem hem i stap gruap, mo hem i sanem sam presen long tufala. Taem hem i go luk tufala, hem i mekem sam wok long haos blong givhan long mama blong hem. Fastaem, tufala i no glad long niufala bilif blong Alis.

¹² Taem Alis i stap long haos blong papa mo mama blong hem, hem i gohed evri dei blong folem program blong ridim Baebol. Hem i se: “Samting ya i givhan long Mama blong i kasem save se long tingting blong mi, Baebol i impoten tumas.” Papa blong Alis i wantem lanem sam samting long saed blong Baebol, blong kasem save long jenis we gel blong hem i mekem, mo tu, blong faenem poen long Baebol. Alis i talem se: “Mi givim wan Baebol long hem, mo mi raetem wan not insaed.” ?Wanem i kamaot from? Papa blong Alis i no moa wantem faenem poen long Baebol, be ol tok blong God we hem i ridim i tajem hat blong hem.

¹³ Yumi mas kaen be yumi mas stanap strong tu, nating se yumi fesem hadtaem. (1 Kor. 4:12) Mama blong Alis i agensem hem bigwan. Alis i talem se: “Taem mi mi baptaes, mama blong mi i talem se mi wan ‘rabis gel.’” ?Alis i mekem wanem? Hem i se: “Mi luk se i nogud blong stap kwaet, ale mi eksplenem wetem respek se mi mekem desisen finis blong kam wan Witnes blong Jehova, mo mi no save jenisim desisen ya. Be mi traem blong mekem hem i luksave se mi lavem hem tumas. Mitufala tugeta i krae, mo mi kukum wan gudfala  kakae blong hem. Stat long taem ya, Mama i luksave se Baebol i stap mekem fasin blong mi i kam gud moa.”

14. ?From wanem yu no mas letem ol famle oli jenisim desisen blong yu?

¹⁴ Maet i tektaem blong ol famle oli kasem save fulwan se yu tinghevi long wosip blong Jehova. Taem Alis i mekem desisen blong paenia i bitim we hem i mekem wok we papa mo mama blong hem i jusum blong hem, mama blong hem i krae bakegen. Be Alis i stanap strong, hem i se: “Sipos yu letem famle blong yu i jenisim tingting blong yu long sam samting, bambae oli traem jenisim long ol narafala samting tu. Be sipos yu kaen mo yu stanap strong, maet oli lesin long yu.” Hemia nao samting we i hapen long Alis. Naoia, papa mo mama blong hem i paenia, mo papa blong hem i wan elda.

15 Folem Matiu 5:14-16 mo 1 Pita 2:12, ?olsem wanem “ol gudfala wok” oli save givhan long ol famle?

¹⁵ Jehova i yusum “ol gudfala wok” blong olgeta long kongregesen blong pulum sam man oli kam long hem. (Ridim Matiu 5:14-16; 1 Pita 2:12.) ?Olsem wanem? ?Hasban o waef blong yu we i no wan Witnes blong Jehova, i mitim finis sam brata mo sista long kongregesen? Polin i singaot sam brata mo sista oli kam long haos, blong Wein i save mitim olgeta. Wein i tingbaot yet olsem wanem wan brata i givhan long hem blong i kasem save long ol Witnes, i se: “Hem i tekem spel long wok, blong wajem spot wetem mi. Tingting blong mi se: ‘!Hem i oraet nomo!’”

16. ?From wanem i gud yu singaot ol famle oli kam long miting?

¹⁶ Wan gudfala rod blong halpem ol famle, i  blong singaot olgeta oli folem yu i go long miting. (1 Kor. 14:24, 25) Wein i agri blong go long Memoriol from we miting ya i sot, mo hem i long naet afta we Wein i finis long wok. Hem i talem se: “Mi no kasem save long miting, be mi makem fasin blong ol man. Oli kam sekhan mo welkamem mi. Mi luksave se i kamaot long hat blong olgeta.” Wan brata mo waef blong hem i bin givhan bigwan long Polin mo boe blong hem, blong tufala i save joen long miting mo wok blong prij. Taswe, taem Wein i mekem desisen blong faenemaot moa long saed blong niufala bilif blong Polin, hem i askem long brata ya blong i mekem Baebol stadi wetem hem.

17. ?Wanem samting we yu no mas blemem yu wan from? ?From wanem yu mas gohed nomo blong traem halpem ol famle?

¹⁷ Yumi wantem tumas se ol famle oli joenem yumi blong wosipim Jehova. Be nating se yumi traehad, maet oli no kam long trutok. Sipos i hapen olsem long yu, yu no mas blemem yu wan. Hemia desisen blong olgeta, mo yu no save fosem olgeta blong oli bilif long trutok. Be taem oli luk we yu yu glad tumas, hemia i save pulum olgeta. Yu mas prea from olgeta, mo toktok kaen long olgeta. !Gohed nomo blong traem halpem olgeta! (Ol Wok 20:20) Yu mas gat strong tingting se Jehova bambae i blesem hadwok blong yu. !Mo bambae yu sevem olgeta sipos oli jus blong lesin long yu!