1. ?Hu i givhan blong stanemap kongregesen long Filipae?

TAEM aposol Pol, Saelas, Luk, mo Timoti i kasem taon ya Filipae we Rom i rul long hem, oli faenem plante man we oli wantem tumas blong save long gud nius blong Kingdom. Fofala brata ya oli givhan blong stanemap wan kongregesen, mo ol brata mo sista oli stat blong joen wanples, maet long haos blong wan gudfala sista, nem blong hem Lidia.—Ol Wok 16:40.

2. ?Wanem hadtaem we kongregesen ya i fesem?

² I no longtaem, niufala kongregesen ya i fesem hadtaem. Setan i pulum ol enemi blong trutok blong oli agensem wok blong prij we ol Kristin ya oli stap mekem. Oli arestem Pol mo Saelas, wipim tufala long stik, mo sakem tufala long prisen. Taem tufala i kamfri, tufala i go luk ol niufala disaepol blong leftemap tingting blong olgeta. Afta, Pol, Saelas, mo Timoti i lego taon ya, be i luk olsem se Luk i stap. ?Ol niufala brata mo sista oli mekem wanem? Jehova i yusum tabu spirit blong givhan long olgeta, mo oli gohed blong wok strong. (Fil. 2:12) !Pol i mas glad tumas long olgeta!

3. Folem Filipae 1:9-11, ?wanem prea blong Pol?

³ Samwe long ten yia biaen, Pol i raetem wan leta i go long kongregesen long Filipae. Sipos yu ridim leta ya, bambae yu kasem save bigfala lav we Pol i gat long ol brata mo sista ya. Hem i se: “Mi wantem tumas blong luk yufala, from we mi  lavem yufala tumas, olsem we Kraes Jisas i lavem yufala.” (Fil. 1:8) Hem i talem tu se hem i stap prea from olgeta. Hem i askem long Jehova blong i givhan long olgeta blong oli lavlavem olgeta moa, oli faenemaot ol samting we oli moa impoten, oli no gat poen, oli no mekem narafala i foldaon, mo oli mekem laef mo fasin blong olgeta i stret. Yumi tu yumi save lanem plante samting long ol advaes blong Pol. Fastaem bambae yumi ridim ol tok blong hem. (Ridim Filipae 1:9-11.) Afta, bambae yumi tokbaot ol samting we hem i talem, mo olsem wanem yumi save folem ol advaes ya.

4. (1) Folem 1 Jon 4:9, 10, ?olsem wanem Jehova i soemaot lav long yumi? (2) ?Lav we yumi gat long God i mas bigwan olsem wanem?

⁴ Jehova i soemaot bigfala lav taem hem i sanem Pikinini blong hem i kamdaon long wol, blong ded from ol sin blong yumi. (Ridim 1 Jon 4:9, 10.) Bigfala lav ya i pulum yumi blong lavem hem. (Rom 5:8) ?Lav blong yumi i mas bigwan olsem wanem? Jisas i ansa long kwestin ya taem hem i talem long wan Farisi se: “Yu mas lavem God blong yu Jehova long olgeta hat blong yu mo long olgeta laef blong yu mo long olgeta tingting blong yu.” (Mat. 22:36, 37) Yumi no wantem se lav blong yumi i hafhaf. Be yumi wantem se lav ya i kam bigwan moa evri dei. Pol i talem long ol Kristin long Filipae se lav blong olgeta i mas kam “bigwan we i bigwan moa yet.” ?Olsem wanem yumi save mekem lav we yumi gat long God i kam bigwan moa?

5. ?Olsem wanem lav blong yumi i save kam bigwan moa?

⁵ Blong lavem God, yumi mas save hem. Baebol i talem se: ‘Man we i no gat lav, hem i no save God, from we God hem i lav.’ (1 Jon 4:8) Aposol Pol i soemaot se lav we yumi gat long God i kam bigwan moa taem yumi kasem ‘stret save mo yumi naf gud blong luksave ol samting.’ (Fil. 1:9) Taem yumi stat blong stadi Baebol, smol save we yumi kasem long ol nambawan fasin blong Jehova God i mekem se yumi stat blong lavem hem. Taem yumi lanem moa, yumi lavem hem moa. !Taswe i impoten tumas blong stadi Baebol oltaem mo tingting dip long hem!—Fil. 2:16.

6. ?Fas Jon 4:11, 20, 21 i tijim yumi long wanem samting long saed blong lav?

⁶ Bigfala lav blong God bambae i pulum yumi blong lavem ol brata mo sista. (Ridim 1 Jon 4:11, 20, 21.) Maet yumi ting se lav ya bambae i kam isi nomo, from we yumi wosipim Jehova mo yumi traehad blong folem ol gudfala fasin blong hem. Mo tu, yumi folem eksampol blong Jisas, we bigfala lav blong hem i pulum hem blong ded from yumi. Be samtaem, maet i had blong obei long tok ya blong lavlavem yumi. Tingbaot samting we i hapen long kongregesen blong Filipae.

7. ?Advaes we Pol i givim long Yuodia mo Sintike i tijim yumi long wanem?

⁷ Tu gudfala sista ya Yuodia mo Sintike, tufala i “wok had” wetem aposol Pol. Be i luk olsem se tufala i raorao smol, nao tufala i kam badfren. Long leta we Pol i raetem long kongregesen blong Filipae, hem i talem stret long tufala se tufala i mas “gat wan tingting nomo.” (Fil. 4:2, 3) Pol i talem long ful kongregesen se: “Yufala i mas gohed blong mekem olgeta samting long fasin we yufala i no toktok smosmol mo yufala i no rao.” (Fil. 2:14) I sua se advaes blong Pol i givhan long evriwan long kongregesen blong oli lavlavem olgeta moa, i no givhan long tufala sista ya nomo.

8. ?Wanem i save spolem lav we yumi gat long ol brata mo sista, mo olsem wanem blong winim samting ya?

⁸ Olsem Yuodia mo Sintike, maet yumi luk  ol mastik blong ol brata mo sista, nao i had blong yumi lavem olgeta. Evri dei, yumi evriwan i mekem mastik. Sipos yumi tingbaot nomo ol mastik blong ol narafala, bambae yumi no moa lavem olgeta. Olsem nao, sipos wan brata i fogetem se hem i mas givhan blong klinim Haos Kingdom, yu save kam kros. Sipos yu gohed blong tingbaot ol narafala mastik blong hem, bambae yu kam kros moa nao yu no moa lavem hem. Long taem olsem, i gud yu tingbaot samting ya: Jehova i luk ol mastik blong yu mo ol mastik blong brata blong yu tu. Be hem i lavem yet brata ya mo i lavem yu tu. Taswe, yu mas folem lav blong Jehova, mo lukluk ol gudfala fasin blong ol brata mo sista. Taem yu wok had blong lavem olgeta, yu joen gud moa wetem olgeta.—Fil. 2:1, 2.

9. ?Wanem “ol samting we oli moa impoten” we Pol i tokbaot long leta blong Filipae?

⁹ Tabu spirit i pulum Pol blong talem long ol Kristin long Filipae, mo long ol Kristin tede tu, se oli mas “faenemaot ol samting we oli moa impoten.” (Fil. 1:10) Ol impoten samting hemia: mekem nem blong Jehova i tabu, stamba tingting blong hem i kamtru, kongregesen i gat pis mo i joen gud. (Mat. 6:9, 10; Jon 13:35) Taem yumi mekem ol samting ya oli kam impoten moa long laef blong yumi, yumi soemaot se yumi lavem Jehova.

10. ?Yumi mas mekem wanem blong yumi no gat poen?

¹⁰ Pol i talem tu se yumi ‘no mas gat poen long yumi.’ Hemia i no min se yumi mas kam stret gud olgeta. Yumi no save mekem i stret sem mak olsem Jehova. Be sipos yumi traehad blong mekem lav blong yumi i kam bigwan moa, mo faenemaot ol samting we oli moa impoten, bambae Jehova i no faenem poen long yumi. Wan rod blong soemaot lav, hemia taem yumi lukaot gud blong no mekem narafala i foldaon.

11. ?From wanem yumi no mas mekem narafala i foldaon?

¹¹ Advaes ya se yumi no mas mekem narafala i foldaon, i wan strong woning. ?Olsem wanem yumi save mekem narafala i foldaon? Maet long ol samting we yumi mekem blong pleplei mo spel, klos we yumi werem, o wok we yumi mekem. Maet samting we yumi mekem i no rong. Be sipos ol jus blong yumi oli spolem tingting blong narafala nao hem i foldaon, hemia i nogud we i nogud. !Jisas i talem se i moa gud we oli fasem wan bigfala ston long nek blong yumi, mo oli draonem yumi long medel solwota!—Mat. 18:6.

12. ?Hasban mo waef we tufala i paenia, i soemaot wanem gudfala eksampol?

¹² Tingbaot olsem wanem wan hasban mo waef we tufala i paenia, i folem woning blong Jisas. Long kongregesen blong tufala, i gat wan hasban mo waef we tufala i jes baptaes mo tufala i gruap long wan famle we i putum tabu long plante samting. Tufala ya i ting se ol Kristin oli no mas wajem muvi, nating se wan muvi we i gud nomo. Tufala i sek taem tufala i harem se tufala paenia ya i bin go luk wan muvi. Afta long samting ya, tufala paenia i no moa go long muvi, gogo tufala niu disaepol ya i trenem tingting blong tufala blong skelem gud ol samting. (Hib. 5:14) Tufala paenia i no tingbaot samting we tufala nomo i wantem. Hemia i soemaot se tufala i lavem niufala brata mo sista ya, i no long ol toktok nomo be long aksen tu.—Rom 14:19-21; 1 Jon 3:18.

13. ?Olsem wanem yumi save pulum narafala blong mekem sin?

¹³ Wan moa rod blong mekem narafala i foldaon, i blong pulum hem blong mekem sin. ?Samting ya i save hapen olsem wanem?  Traem tingbaot wan Baebol stadi we i traehad longtaem blong lego dring. Hem i luksave se hem i no mas dring nating. Ale hem i gohed gud mo i baptaes. Smoltaem i pas, nao wan brata i invaetem hem wetem sam narafala oli kam kakae long haos blong hem. Brata ya i traem fosem niufala brata ya blong i tekem wan dring, i se: “Yu yu wan Kristin nao, tabu spirit i stap wetem yu. Wan fasin we i kamaot long tabu spirit, hemia bos long tingting. Sipos yu bos long tingting blong yu, yu yu naf blong stop afta we yu dring smol.” !Traem tingbaot nogud frut we i save kamaot, sipos niufala brata i lesin long advaes ya!

14. ?Olsem wanem ol miting oli halpem yumi blong folem advaes long Filipae 1:10?

¹⁴ Ol miting oli halpem yumi blong folem advaes long Filipae 1:10, long plante defren fasin. Faswan: Ol save blong Baebol we yumi tokbaot long miting, i soemaot ol samting we Jehova i ting se i moa impoten. Namba tu: Yumi lanem blong folem ol save ya, nao yumi no gat poen long yumi. Namba tri: Ol miting oli pulum yumi blong ‘lavem ol narafala, mo mekem ol gudfala wok.’ (Hib. 10:24, 25) Taem ol brata mo sista oli leftemap tingting blong yumi, yumi lavem moa olgeta mo God blong yumi tu. Sipos yumi gat lav olsem, bambae yumi no mekem narafala i foldaon.

15. ?Olsem wanem yumi ‘mekem laef mo fasin blong yumi i stret’?

¹⁵ Pol i prea wetem fulhat blong hem se ol Kristin long Filipae bambae oli ‘mekem laef  mo fasin blong olgeta i stret.’ (Fil. 1:11) ‘Fasin we i stret’ hemia se oli lavem Jehova mo ol man blong hem, mo oli tokbaot bilif long Jisas mo gudfala hop blong olgeta long ol narafala. Filipae 2:15 i yusum wan narafala pijatok, i talem se oli mas “saenaot olsem ol laet long wol.” Hemia i mekem yumi tingbaot tok blong Jisas se ol disaepol oli olsem “laet blong wol.” (Mat. 5:14-16) Hem i talem tu se ol man blong hem oli mas ‘pulum ol man oli kam disaepol blong hem,’ mo oli mas ‘witnes blong hem long olgeta ples long wol.’ (Mat. 28:18-20; Ol Wok 1:8) Taem yumi joen fulwan long impoten wok ya, yumi ‘mekem laef mo fasin blong yumi i stret.’

16. ?Olsem wanem Filipae 1:12-14 i soemaot se yumi save saenaot olsem ol laet, nomata se yumi stap wea? (Yu luk pija long fran pej.)

¹⁶ Nomata se yumi stap wea, yumi save saenaot olsem laet blong wol. Samtaem, samting we yumi ting se bambae i blokem yumi blong prij, i save kam wan janis blong prij. Tingbaot aposol Pol we hem i stap kalabus long wan haos taem hem i raetem leta long ol Kristin long Filipae. Ol jen oli no blokem hem blong prij long ol gad mo ol man we oli kam luk hem. Pol i tekem evri janis blong prij, mo samting ya i mekem tingting blong ol brata i strong, nao ‘oli no moa fraet blong talemaot tok blong God.’—Ridim Filipae 1:12-14; 4:22.

17. ?Olsem wanem sam brata mo sista oli gohed blong prij, nating se i had?

¹⁷ Plante brata mo sista oli soemaot strong tingting olsem Pol. Oli stap long ol kantri we i tabu blong prij long ol haos wanwan, taswe oli mas faenem ol narafala rod blong talemaot gud nius. (Mat. 10:16-20) Long wan kantri olsem, eria elda i askem sipos evri pablisa i save traem prij long “prapa” teritori blong hem, i min se, prij long ol famle, ol neba, ol yangfala long skul, ol man long wok, mo ol  narafala we oli save olgeta. Afta we tu yia i pas, namba blong ol kongregesen long eria ya i kam antap bigwan. Maet yu stap long wan kantri we yu fri blong prij. Nating se i olsem, yu save lanem wan impoten lesen long eksampol blong ol brata mo sista long ol kantri we wok i tabu: Oltaem yu mas lukaot rod blong joen fulwan long wok blong prij, wetem strong tingting se Jehova bambae i givim paoa we yu nidim blong winim ol samting we i had.—Fil. 2:13.

18. ?Yumi mas gat strong tingting blong mekem wanem?

¹⁸ Long impoten taem ya we yumi laef long hem, i gud yumi gat strong tingting blong folem advaes we tabu spirit i pulum Pol blong raetem i go long ol Kristin long Filipae. I gud yumi faenemaot ol samting we oli moa impoten, yumi no gat poen long yumi, yumi no mekem narafala i foldaon, mo yumi gohed blong mekem laef mo fasin blong yumi i stret. Sipos yumi mekem olsem, bambae lav blong yumi i bigwan we i bigwan, mo bambae yumi onagud long Papa blong yumi Jehova.