1. ?Pol i mekem ol Kristin oli tingbaot wanem?

OL KRISTIN oli stap long wan resis blong laef. Nating se yumi jes stat o yumi stap resis plante yia finis, yumi mas gohed go kasem en blong resis ya. Advaes we aposol Pol i givim long ol Kristin long Filipae, i save givim paoa long yumi blong finisim resis ya. Taem kongregesen i kasem leta ya, sam oli bin mekem wok blong Jehova plante yia finis. Oli stap resis strong, be Pol i mekem oli tingbaot se oli mas gohed go kasem en blong resis. Hem i wantem se oli folem eksampol blong hem blong ‘resis strong blong kasem mak.’—Fil. 3:14.

2. ?From wanem advaes blong Pol i kasem ol Kristin long Filipae long stret taem nomo?

² Ol Kristin long Filipae oli kasem advaes ya long stret taem nomo. Stat long taem we kongregesen ya i stanap, ol man oli agensem olgeta. Samwe long yia 50, Pol mo Saelas i kam long Filipae folem tok we God i talem long tufala blong “kamkros long Masedonia.” (Ol Wok 16:9) Tufala i mitim wan woman, nem blong hem Lidia, we i ‘lesin, nao Jehova i openem hat blong hem’ blong i bilif long gud nius. (Ol Wok 16:14) Hem wetem olgeta long haos blong hem oli baptaes. Be kwiktaem nomo, Setan i mekem trabol long olgeta. Ol man oli pulum Pol mo Saelas i go stanap fored long ol haeman, mo oli sakem ol giaman tok se tufala i stap mekem tumas trabol long taon ya. Ale, oli kilim tufala, sakem tufala long kalabus, mo biaen oli talem long tufala blong aot long taon ya. (Ol Wok 16:16-40) ?Olsem wanem? ?Tufala i kam slak? !Nogat! ?Mo olsem wanem long ol brata mo sista long niufala kongregesen ya? !I gud tumas se olgeta tu oli stanap strong! I sua se gudfala eksampol  blong Pol mo Saelas i leftemap tingting blong olgeta.

3. ?Pol i save wanem samting, mo wanem kwestin we bambae yumi tokbaot?

³ Pol i gat strong tingting blong no lego. (2 Kor. 4:16) Be hem i save gud se sipos hem i wantem finisim resis ya, hem i mas putum tingting blong hem nomo long praes we hem i wantem kasem. ?Yumi lanem wanem long eksampol blong Pol? ?Olsem wanem sam brata mo sista tede oli soemaot gudfala eksampol blong stanap strong nating se oli fesem plante problem? ?Olsem wanem gudfala hop blong fiuja i save mekem tingting blong yumi i strong blong no lego?

4. ?Olsem wanem Pol i stap bisi long wok blong God, nating se i fesem hadtaem?

⁴ Traem tingbaot ol samting we oli stap hapen long laef blong Pol, taem hem i raet long olgeta long Filipae. Oli holem hem i stap kalabus long wan haos long Rom. Hem i no save go afsaed blong prij. Nating se i olsem, hem i stap bisi. Hem i prij long ol man we oli kam luk hem, mo i raetem plante leta long ol kongregesen we oli stap farawe. Tede tu, plante Kristin we oli no save aot long haos from we oli sik o oli olfala, oli tekem evri janis blong talemaot gud nius long ol man we oli kam luk olgeta. Mo tu, oli raetem leta long olgeta we yumi no save go long haos blong olgeta.

5. Folem Filipae 3:12-14, ?wanem i givhan long Pol blong i putum tingting blong hem long praes we hem i wantem kasem?

⁵ Pol i no letem ol gudfala wok we hem i mekem finis mo ol mastik blong hem, oli pulum tingting blong hem i gowe long wok blong Jehova. Hem i talem se yumi mas “fogetem ol samting we oli stap biaen” sipos yumi wantem “kasem ol samting we oli stap long fored,” hemia se, finisim resis ya blong laef. (Ridim Filipae 3:12-14.) ?Wanem sam samting we oli save pulum tingting blong Pol? Faswan: Bifo we hem i kam Kristin, hem i mekem bigfala wok long saed blong skul mo kastom blong ol man Jiu. Be hem i tingbaot samting ya “olsem doti nomo.” (Fil. 3:3-8) Sekenwan: Nating se hem i sem from we hem i mekem i nogud long ol Kristin bifo, be hem i no letem filing ya i mekem hem i kam slak long wok blong Jehova. Mo namba tri: Hem i no tingbaot se i mekem bigfala wok blong Jehova finis, i naf nao. Be hem i gohed strong, nating se hem i go kalabus, oli wipim mo stonem hem, i stap long sip we i rek, mo samtaem hem i no gat kakae mo klos. (2 Kor. 11:23-27) Hem i save se i mas gohed, nomata wanem wok we hem i bin mekem o wanem trabol we hem i kasem. Yumi mas mekem sem mak.

6. ?Wanem sam “samting we oli stap biaen,” we yumi mas fogetem?

⁶ ?Olsem wanem yumi save folem eksampol blong Pol blong “fogetem ol samting we oli stap biaen”? Maet sam long yumi oli mas winim filing blong sem from sam sin we oli bin mekem. Sipos i olsem, i gud oli stadi long ransom sakrefaes blong Jisas. Sipos oli stadi, tingting dip, mo prea, maet oli save sakemaot sem ya. Maet tingting blong olgeta i no moa stikim olgeta from ol sin we Jehova i fogivim finis. Tingbaot wan narafala samting we yumi lanem long eksampol blong Pol. Sam long yumi oli lego gudfala wok blong mekem wok blong Kingdom. Sipos i olsem, i gud oli fogetem ol samting we oli stap biaen. Oli no mas tingbaot se oli mestem gudfala janis ya blong kasem plante rij samting. (Nam. 11:4-6; Pri. 7:10) “Ol samting we oli stap biaen” i save minim tu, ol gudfala wok we yumi mekem blong Jehova, mo ol hadtaem we yumi winim. I tru, i gud blong tingting bak long ol blesing we  Jehova i givim, mo olsem wanem hem i bin givhan long yumi. Hemia i save pulum yumi i kam klosap moa long Papa blong yumi. Be yumi no mas ting se yumi mekem bigfala wok finis, i naf nao.—1 Kor. 15:58.

7. Folem 1 Korin 9:24-27, wanem samting we yumi mas mekem blong winim resis blong laef? Talem wan pijatok.

⁷ Pol i kasem save tok blong Jisas se: “Yufala i mas fosem yufala.” (Luk 13:23, 24) Pol i save se hem i mas fosem hem go kasem en, olsem Jisas. Taswe hem i talem se laef blong Kristin i olsem wan resis. (Ridim 1 Korin 9:24-27.) Wan man blong resis i stap lukluk i go fored nomo, i no letem wan samting i pulum ae blong hem. Tingbaot sam man blong resis tede. Maet oli ron long wan rod we i gat ol stoa long saed blong hem. ?Yu ting se bambae oli stop blong lukluk ol samting long windo blong ol stoa? !Sipos oli wantem win, bambae oli no mekem olsem! Long resis blong laef tu, yumi no mas letem wan samting i pulum ae blong yumi. !Sipos yumi stap lukluk i go fored nomo, putum tingting i stap long en blong resis ya, mo gohed strong olsem Pol, bambae yumi winim praes!

8. Bambae yumi tokbaot wanem trifala samting we oli save traem yumi?

⁸ Naoia, bambae yumi tokbaot tri samting we oli save mekem yumi kam slak: faswan, ol promes oli stap tektaem blong kamtru, sekenwan, yumi stap kam olfala, mo namba tri, ol trabol we oli gohed longtaem. Yumi save lanem plante samting long olgeta we oli winim trifala problem ya.—Fil. 3:17.

9. Taem ol promes oli tektaem blong kamtru, ?wanem i save hapen?

⁹ Ol promes oli stap tektaem blong kamtru. I stret nomo we yumi wantem tumas se ol gudfala promes blong Jehova oli kamtru. Taem profet Habakuk i talem se i wantem tumas we Jehova i finisim ol rabis fasin long Juda, Jehova i talem se hem i mas gohed nomo blong “wet long hem.” (Hab. 2:3) Be taem ol promes we yumi wet long olgeta oli stap tektaem, yumi save kam slak mo tingting blong yumi i save foldaon. (Prov. 13:12) Samting ya i hapen long sam brata long yia 1914. Plante tabu Kristin oli bin ting se bambae oli go long heven.  Be samting ya i no hapen. ?Olsem wanem ol tabu Kristin oli winim problem ya?

10. ?Wan brata mo waef blong hem i mekem wanem, taem samting we tufala i wantem tumas i no kamtru?

¹⁰ Tingbaot tu gudfala Kristin we tufala i fesem problem ya. Long 1908, Brata Royal Spats we i gat 20 yia, i baptaes. Hem i sua se i no longtaem bambae hem i go long heven. Taswe, long 1911, taem hem i askem long Perel blong i maredem hem, hem i talem se: “Yu save finis wanem bae i hapen long 1914. !I moagud yumitu mared hareap!” ?Olsem wanem? ?Tufala i lego resis blong laef taem tufala i no go long heven long 1914? Nogat. Tingting blong tufala i stap long wok we God i wantem tufala blong mekem, i no long praes we bambae tufala i kasem. Tufala i gat strong tingting blong gohed long resis blong laef. Mo tufala i stanap strong go kasem taem we laef blong tufala i finis long wol ya. I tru, yumi wantem tumas blong luk taem ya we Jehova bambae i tekemaot doti we ol man oli sakem long nem blong hem, pruvum se rul blong hem i stret, mo mekem ol promes blong hem oli kamtru. Yumi save sua se Jehova bambae i mekem ol samting ya oli kamtru long stret taem. Go kasem taem ya, i gud yumi bisi long wok blong God, yumi no letem tingting i foldaon mo yumi no kam slak from we ol promes oli tektaem blong kamtru.

11-12. ?Olsem wanem yu save gohed blong mekem Jehova i glad, nating se yu sik? Talem wan eksampol.

¹¹ Yumi stap kam olfala. Man blong resis i mas gat wan strong bodi. Be yumi no nidim strong bodi blong gat strong bilif long Jehova mo gohed strong long wok blong hem. Blong talem stret, plante we oli no moa gat paoa, oli gat strong tingting yet blong mekem bes blong olgeta long wok blong Jehova. Traem tingbaot Brata Ata Seko * we hem i wok long Betel blong 55 yia. Taem hem i gat 88 yia, hem i sik mo bodi blong hem i slak. Wan nes we i lukaot long hem i kam klosap long bed blong hem, i lukluk hem, i smael, mo i se: “Brata Seko, bodi ya i mekem plante bigfala samting long wok blong Jehova.” Be Ata i no stap tingbaot ol samting we hem i mekem finis. Hem i lukluk stret long fes blong sista ya, i smael, mo i se: “Yes, i tru. Be samting we yumi mekem finis i nating nomo. I moa impoten we yumi holemstrong long Jehova naoia mo long fiuja.”

¹² Ating yu mekem wok blong Jehova plante yia finis, mo naoia yu sik mo yu no moa save mekem olsem bifo. Sipos i olsem, yu no letem tingting blong yu i foldaon. Yu save sua se Jehova i stap tingbaot mo i glad long bigfala wok we yu mekem finis. (Hib. 6:10) Naoia, i no ol bigfala wok we oli soemaot se yu ona long Jehova long olgeta laef blong yu. Yu soemaot se yu lavem Jehova taem yu holem wan gudfala tingting mo yu mekem bes blong yu. (Kol. 3: 23) Jehova i kasem save se yu no naf blong mekem plante samting, mo hem i askem nomo samting we yu yu naf blong mekem.—Mak 12:43, 44.

13. ?Olsem wanem stori blong Anatoli mo Lidia i pulum yumi blong stanap strong, nating se yumi fesem fasin agens?

¹³ Trabol we i gohed longtaem. Sam man blong Jehova oli stanap strong blong plante yia, tru long ol hadtaem mo fasin agens. Wan long olgeta, Anatoli Melnik, * i gat 12 yia nomo taem oli arestem papa blong hem, sakem hem long kalabus, mo sanem hem i go long Saebiria, hemia 7,000 kilometa longwe long famle blong hem long Moldova. Wan yia biaen, oli sanem Anatoli, mama blong hem, mo abu man mo woman blong hem tu, oli go long Saebiria. Ples i kolkol bitim mak, mo oli mas wokbaot 30 kilometa long sno, blong go long miting long narafala vilej. Afta we Brata Melnik i mared, hem i stap tri yia bakegen long prisen, longwe long waef blong hem Lidia, mo smol gel blong tufala we i gat wan yia nomo. Nating se Anatoli mo famle blong hem oli fesem fasin agens blong plante yia, be oli gohed nomo long wok blong Jehova. Naoia hem i gat 82 yia, mo i wok long wan Branj Komiti long Sentrol Esia. I gud yumi folem eksampol blong Anatoli mo Lidia. Yumi mekem bes blong yumi long wok blong Jehova, mo gohed blong stanap strong.—Gal. 6:9.

14. ?Pol i save se hem i mas mekem wanem blong kasem praes?

¹⁴ Pol i gat strong tingting blong finisim resis blong laef mo kasem praes. From we hem i wan tabu Kristin, hem i stap wet long taem ya we ‘God bambae i singaot hem i go antap.’ Be blong kasem praes ya, hem i save se hem i mas gohed blong “resis strong.” (Fil. 3:14) Pol i yusum wan pijatok blong givhan long ol Kristin long Filipae, blong oli putum tingting blong olgeta i stap strong long praes we oli wantem kasem.

15. ?Wanem pijatok we Pol i yusum blong pulum ol Kristin long Filipae blong oli “resis strong”?

¹⁵ Pol i mekem ol Kristin long Filipae oli tingbaot se oli sitisen blong heven. (Fil. 3:20) ?From wanem samting ya i impoten? Long taem ya, ol man oli wantem tumas blong kam sitisen blong Rom, from we gavman blong Rom i givim plante gudfala samting. * Be ol  tabu Kristin oli kasem samting we i moa gud, hemia se oli sitisen blong heven. !Samting we ol sitisen blong Rom oli kasem i nating nomo taem oli skelem wetem samting we ol sitisen blong heven oli kasem! From samting ya, Pol i pulum ol Kristin long Filipae blong oli ‘mekem fasin blong laef blong olgeta evri dei, i stret gud long mak blong gud nius blong Kraes.’ (Fil. 1:27) Long olfala lanwis, tok ya ‘fasin blong laef evri dei’ i minim “olsem ol sitisen.” Tede ol tabu Kristin oli soemaot gudfala eksampol, taem oli resis strong blong kasem mak blong olgeta blong laef olwe long heven.

16. ?Nomata se yumi gat hop blong laef long heven o long wol, ?yumi mas mekem wanem folem Filipae 4:6, 7?

¹⁶ Nomata se yumi gat hop blong laef olwe long heven o long wol, be yumi mas gohed blong resis strong kasem mak. Nomata wanem samting i traem yumi, yumi no mas tingbaot samting we i pas finis, mo yumi no mas letem wan samting i stopem yumi long wok blong Jehova. (Fil. 3:16) Maet yumi wet longtaem blong luk ol promes blong Jehova oli kamtru, yumi stap kam olfala, o yumi fesem ol hadtaem mo fasin agens blong plante yia. Nating se i olsem, yumi ‘no mas letem tingting blong yumi i trabol from eni samting.’ Be yumi mas talemaot evri samting long Jehova, nao bambae hem i givim pis we i bigwan moa i bitim samting we yumi save tingbaot.—Ridim Filipae 4:6, 7.

17. ?Nekis stadi bambae i tokbaot wanem?

¹⁷ Olsem wan man we i resis strong moa taem hem i kam klosap long en blong resis, yumi tu yumi mas mekem tingting blong yumi i strong blong finisim resis blong laef. Nating se yumi fesem wanem problem, be yumi wantem mekem bes blong yumi blong kasem ol nambawan blesing long fored blong yumi. ?Yumi mas mekem wanem blong gohed blong stanap strong? Nekis stadi bambae i tokbaot ol samting we yumi mas putum long fasples long laef blong yumi, mo olsem wanem blong “faenemaot ol samting we oli moa impoten.”—Fil. 1:9, 10.