1. ?Wanem samting we yumi glad long hem?

!YUMI glad tumas we yumi joen long kongregesen blong Jehova! Yumi stap long wan paradaes long spirit we i fulap long ol man we oli gat pis mo oli hapi. ?Wanem wok blong yu long kongregesen?

2. ?Wanem pijatok we Pol i yusum long sam leta blong hem?

² Yumi save lanem plante samting long saed blong topik ya, long wan pijatok we aposol Pol i talem long sam leta blong hem. Long ol leta ya, Pol i talem se kongregesen i sem mak long bodi blong man. Mo tu, hem i talem se ol wanwan man long kongregesen oli sem mak long defdefren haf blong bodi ya.—Rom 12:4-8; 1 Kor. 12:12-27; Efes. 4:16.

3. ?Wanem tri lesen we bambae yumi tokbaot long stadi ya?

³ Long stadi ya, bambae yumi tokbaot tri impoten lesen long pijatok blong Pol. Faswan, bambae yumi lanem se yumi wanwan i gat wan wok * long kongregesen blong Jehova. Sekenwan, bambae yumi tokbaot samting we yumi save mekem sipos i had blong yumi luk prapa wok blong yumi long kongregesen. Mo namba 3, bambae yumi tokbaot from wanem yumi mas stap bisi blong mekem prapa wok blong yumi long kongregesen blong God.

4. ?Yumi lanem wanem long Rom 12:4, 5?

⁴ Faswan lesen we yumi save lanem long pijatok blong Pol, hemia se long famle blong Jehova, yumi wanwan i gat wan impoten wok. Pol i statem pijatok blong hem se: “Bodi blong yumi i gat plante haf blong hem, be ol haf ya oli no mekem sem wok. Long sem fasin, nating se yumi plante be yumi evriwan i joen long Kraes olsem wan bodi nomo, mo yumi wanwan yumi olsem ol haf blong bodi we yumi joen long yumi.” (Rom 12:4, 5) ?Pol i minim wanem? Yumi wanwan i gat defdefren wok long kongregesen, mo yumi wanwan i impoten.

5. ?Wanem “presen” we Jehova i givim long kongregesen?

⁵ Taem yu tingbaot olgeta we oli gat wok long kongregesen, maet kwiktaem nomo yu tingbaot olgeta we oli stap lidim ol wok. (1 Tes. 5:12; Hib. 13:17) I tru se Jehova i yusum Kraes blong givim “ol man i go olsem presen” long kongregesen blong Hem. (Efes. 4:8) “Ol man” ya, i gat ol memba blong Hed Kampani, ol brata we oli halpem Hed Kampani, ol memba blong Branj Komiti, ol eria elda, olgeta we oli tij long ol Baebol skul, ol elda mo ol man blong givhan. Tabu spirit i putumap evri brata ya blong oli lukaot long ol gudfala sipsip blong Jehova, mo mekem ol wok blong givhan long kongregesen.—1 Pita 5:2, 3.

6. Folem 1 Tesalonaeka 2:6-8, ?ol brata ya we tabu spirit i putumap olgeta, oli traehad blong mekem wanem?

⁶ Tabu spirit i putumap ol brata blong oli mekem ol defdefren wok. Ol brata ya oli wok had blong givhan long ful kongregesen, sem mak olsem we ol defdefren haf blong bodi, olsem han mo leg, oli wok blong givhan long ful bodi. Ol brata ya oli no wok blong ol narafala oli leftemap olgeta. Be oli traehad blong mekem ol brata mo sista blong olgeta oli strong. (Ridim 1 Tesalonaeka 2:6-8.) !Yumi talem tangkiu long Jehova from ol brata ya we oli nafgud blong wok mo oli no tingbaot olgeta nomo!

7. ?Wanem ol blesing we olgeta we oli prij fultaem, oli kasem?

⁷ Insaed long kongregesen, maet sam oli wok olsem ol misinari, ol spesel paenia, o ol fultaem paenia. I tru se i gat ol brata sista raon long wol we oli spenem fultaem blong olgeta blong prij mo mekem disaepol. Taem oli mekem olsem, oli givhan long plante man blong oli kam disaepol blong Kraes Jisas. Nating se ol fultaem evanjelis ya oli no gat plante samting, be Jehova i givim plante blesing long olgeta. (Mak 10:29, 30) !Yumi lavem tumas ol gudfala brata mo sista ya, mo yumi glad we oli joen long kongregesen!

8. ?From wanem evri pablisa blong gud nius oli impoten long Jehova?

⁸ ?Olsem wanem? ?Ol brata we oli putumap olgeta, mo olgeta ya we oli prij fultaem, olgeta nomo oli gat wok long kongregesen? !Nogat! Evri pablisa blong gud nius oli impoten long God mo long kongregesen. (Rom 10:15; 1 Kor. 3:6-9) Blong talem stret, wok ya blong pulum man i kam disaepol blong Masta blong yumi Jisas Kraes, i wan long ol impoten mak blong kongregesen. (Mat. 28:19, 20; 1 Tim. 2:4) Evriwan we oli joen long kongregesen, nomata se oli baptaes o oli pablisa we oli no baptaes yet, olgeta evriwan oli traem blong putum wok ya i stap fasples.—Mat. 24:14.

9. ?From wanem yumi tinghae long ol Kristin sista blong yumi?

⁹ Jehova i soemaot se hem i ona long ol Kristin sista, taem i givim wan impoten wok long olgeta long kongregesen. Hem i tinghae long ol waef ya, wetem ol mama, ol wido, mo ol singel sista we oli holemstrong long wok  blong hem. Plante taem Baebol i tokbaot ol gudfala woman we oli mekem God i glad. Ol woman ya oli waes, oli bilif, oli gat strong tingting blong wok, oli no fraet, oli givim samting long narafala, mo oli mekem ol gudfala wok. Mo Baebol i leftemap gudfala fasin ya blong olgeta olsem ol eksampol blong yumi. (Luk 8:2, 3; Wok 16:14, 15; Rom 16:3, 6; Fil. 4:3; Hib. 11:11, 31, 35) !Yumi talem tangkiu long Jehova from ol Kristin woman long kongregesen blong yumi, olgeta oli gat ol gudfala fasin ya tu!

10. ?From wanem yumi tinghae long ol olfala blong yumi?

¹⁰ Yumi glad tu we yumi gat plante olfala long kongregesen. Long sam kongregesen, i gat ol olfala brata mo sista blong yumi we oli mekem wok blong Jehova long ful laef blong olgeta. Sam narafala olfala, maet oli kasem trutok i no longtaem. Nomata se i olsem, maet oli stap siksik from we oli olfala. Ol sik ya oli mekem se oli no moa save mekem plante wok long kongregesen mo long wok blong prij. !Be yet, ol olfala ya oli mekem bes blong olgeta long wok blong prij! !Mo oli yusum paoa we oli gat blong leftemap tingting blong ol narafala mo trenem olgeta! Mo ekspiriens blong olgeta i givhan long yumi. Yumi mo Jehova, yumi luk olgeta se oli naes tumas.—Prov. 16:31.

11-12. ?Wanem samting we ol yangfala oli mekem we yu haremgud long hem?

¹¹ Tingbaot ol yangfala tu. Oli fesem plante hadtaem, taem oli stap gruap long wol ya we Devel Setan i kontrolem wetem ol tijing blong hem. (1 Jon 5:19) Nating se i olsem, yumi evriwan i haremgud taem yumi luk ol yangfala oli ansa long ol miting, oli joen long wok blong prij, mo oli no fraet blong difendem bilif blong olgeta. !Yes, yufala ol yangfala, yufala i gat wan impoten wok long kongregesen blong Jehova!—Sam. 8:2.

¹² Be sam brata mo sista blong yumi oli faenem i had blong bilivim se oli rili gat wan impoten wok long kongregesen. ?Wanem i save givhan long yumi blong harem se yumi wanwan i gat wan wok insaed long kongregesen? Bambae yumi luk.

13-14. ?From wanem samfala oli no luksave se oli impoten long kongregesen?

¹³ Makem seken lesen we yumi lanem long pijatok blong Pol. Hem i pulum tingting i go long wan problem we plante man oli gat tede, hemia se oli faenem i had blong bilivim se oli rili gat wan impoten wok long kongregesen. Pol i raetem se: “Sipos leg i talem se: ‘Mi mi no han, taswe mi mi no wan haf blong bodi,’ tok ya i no mekem se leg ya i no moa wan haf blong bodi. Mo sipos sora i talem se: ‘Mi mi no ae, taswe mi mi no wan haf blong bodi,’ tok ya i no mekem se sora ya i no moa wan haf blong bodi.” (1 Kor. 12:15, 16) ?Pol i wantem tijim wanem long yumi?

¹⁴ Sipos yu stap komperem yu wetem ol narafala long kongregesen, maet bambae yu no luksave impoten wok we yu wan yu save mekem. Maet sam long kongregesen oli gat gudhan blong tij, blong oganaesem wok, o oli gat gudhan blong lukaot long ol sipsip. Maet yu harem se yu no gat gudhan olsem olgeta. Hemia i gud from we i soem se yu putum tingting blong yu i stap daon mo yu gat tingting daon. (Fil. 2:3) Be yu mas lukaot. Sipos yu stap komperem yu oltaem wetem ol narafala, bambae tingting blong yu i foldaon. Mo olsem we Pol i tokbaot, maet bambae yu harem se yu no gat wok nating, mo yu no haf blong kongregesen. ?Wanem i save givhan long yu blong winim tingting ya?

15. Folem 1 Korin 12:4-11, ?yumi wanwan i mas mekem wanem blong luksave presen we maet yumi gat?

¹⁵ Tingbaot poen ya: Long faswan handred yia, Jehova i mekem merikel, nao tabu spirit i mekem se sam Kristin oli kasem ol presen, be i no evri Kristin we oli kasem sem presen. (Ridim 1 Korin 12:4-11.) Jehova i givim defdefren presen long olgeta mo i mekem we oli naf blong mekem sam samting, be nomata se i olsem, Jehova i luk evri Kristin wanwan se oli impoten. Tede, i no moa gat merikel we i kamaot long tabu spirit, blong givim ol spesel presen long yumi. Be sem rul i stap yet. Maet yumi evriwan i no gat gudhan long sem samting, be Jehova i luk se yumi evriwan i impoten.

16. ?Wanem advaes blong aposol Pol we yumi mas folem?

 ¹⁶ Yumi no mas komperem yumi wetem ol narafala Kristin, be i gud yumi folem advaes blong aposol Pol, we i talem se: “I gud man i jekem wok we hem nomo i mekem, blong faenemaot se wok ya i olsem wanem. Olsem nao, hem i save glad from wok we hem nomo i mekem, be i no from we hem i skelem wok blong hem wetem wok blong narafala.”—Gal. 6:4.

17. Sipos yumi folem advaes blong Pol, ?hemia bambae i givhan long yumi olsem wanem?

¹⁷ Sipos yumi folem advaes blong Pol, mo yumi lukluk wok we yumi nomo i mekem, maet yumi save luk se yumi gat ol presen we ol narafala oli no gat, o yumi naf blong mekem sam samting we olgeta oli no naf blong mekem. Eksampol, ating wan elda i no tij gud long fored blong kongregesen, be maet hem i gat gudhan blong pulum man i kam disaepol. O ating hem i no save oganaesem gud ol wok olsem ol nara elda, be maet ol man oli save se hem i wan elda we i gat lav, mo ol pablisa oli no fraet blong askem advaes blong Baebol long hem. O maet hem i gat fasin ya blong tekem ol man oli kam long haos. (Hib. 13:2, 16) Taem yumi luksave samting we yumi naf blong mekem mo ol presen we yumi gat, bambae yumi haremgud se yumi save givhan long kongregesen. Nao bambae yumi no jalus long ol brata we oli gat ol presen we oli defren long hemia blong yumi.

18. ?Olsem wanem blong kam gud moa long wok we yumi stap mekem?

¹⁸ Nomata wanem wok yumi mekem long kongregesen, yumi evriwan i mas wantem blong mekem gud wok blong yumi mo blong kam gud moa long wok we yumi stap mekem. Jehova i yusum oganaesesen blong hem blong trenem yumi, blong yumi kam gud moa. Eksampol, long miting blong wik, yumi kasem ol advaes blong yumi kam gud moa long wok blong prij. ?Yu yu stap yusum gud trening we yu kasem long ol program ya?

19. ?Olsem wanem yu save kam naf blong joen long Skul Blong Ol Man Blong Talemaot Kingdom?

¹⁹ Wan narafala nambawan program blong trening, hemia Skul Blong Ol Man Blong Talemaot Kingdom. Skul ya i blong ol brata mo sista we oli prij fultaem mo we oli gat 23 kasem 65 yia. Maet yu harem se bambae yu neva naf blong go long skul ya. Be bitim we yu mekem lis blong ol risen se from wanem yu no naf blong go long skul ya, i moagud yu mekem wan lis blong ol risen we i soem se from wanem yu wantem go long skul ya. Biaen yu mekem wan plan we bambae i givhan long yu blong yu naf blong go. Wetem help blong Jehova, mo wetem traehad blong yu, bambae yu naf blong mekem samting we fastaem yu ting se i no posibol nating.

20. ?Yumi lanem wanem long Rom 12:6-8?

²⁰ Namba 3 lesen we yumi save lanem long pijatok blong Pol, i stap long Rom 12:6-8. (Ridim.) Long vas ya, Pol i soemaot bakegen se olgeta man long kongregesen oli gat defdefren presen. Be naoia hem i makem poen ya se yumi mas yusum eni presen we yumi gat, blong mekem kongregesen i kam strong.

21-22. ?Yumi lanem wanem long stori blong Robet mo Felis?

²¹ Tingbaot eksampol blong wan brata we yumi save singaot hem se Robet. Hem i bin kasem wok ya blong prij fultaem long wan narafala kantri, be biaen, oli askem hem blong i gobak long kantri blong hem, blong wok long Betel. Plante taem ol brata oli talem long hem se oli jenisim wok blong hem, i no from we hem i no mekemgud wok blong hem. Nating se i olsem, Robet i talem se: “Mi gat nogud tingting long saed blong mi wan, mi harem se mi  no naf blong mekemgud wan wok, mo tingting ya i stap long mi blong plante manis. Samtaem mi wantem lego wok blong Betel nomo.” ?Olsem wanem hem i kasembak glad blong hem? Wan narafala elda i rimaenem hem se Jehova i trenem yumi long ol wok we yumi mekem finis, blong hem i save yusum yumi long ol wok we yumi stap mekem naoia. Robet i luksave se hem i mas stop blong tingbaot ol samting we oli pas finis, mo i mas putum tingting blong hem long ol samting we hem i save mekem naoia.

²² Brata Felis Episcopo i fesem wan traem we i sem mak. Long 1956, hem mo waef blong hem, tufala i graduet long Gilead, mo hem i mekem wok blong eria elda long Bolivia. Long 1964, tufala i gat wan pikinini. Felis i talem se: “Mitufala i luk se i had blong lego nambawan wok blong mitufala. Blong talem stret, mi westem wan fulyia blong sore nomo. Be Jehova i givhan long mi blong jenisim tingting blong mi, mo mi mekem wok blong papa, we hemia niufala wok blong mi.” ?Yu yu gat sem ekspiriens olsem Robet o Felis? ?Tingting blong yu i foldaon from we yu no moa mekem sem wok olsem bifo? Sipos yes, bambae yu glad moa sipos yu jenisim tingting blong yu, mo yu tingbaot samting we yu save mekem naoia blong Jehova mo ol brata blong yu. Stap bisi, yusum presen we yu gat mo samting we yu naf blong mekem blong givhan long ol narafala, nao bambae yu kasem glad taem yu stap mekem kongregesen i kam strong.

23. ?Yumi mas tekem taem blong mekem wanem, mo bambae yumi tokbaot wanem long nekis stadi?

²³ Yumi wanwan i impoten long ae blong Jehova. Hem i wantem se yumi joen long famle blong hem. I gud yumi tekem taem blong tingting dip long ol samting we yumi naf blong mekem, blong mekem ol brata mo sista blong yumi oli kam strong, mo yumi traehad blong mekemgud wok ya. !Olsemia, bambae yumi no harem se yumi no gat wok long kongregesen! ?Be yumi gat wanem tingting long ol narafala long kongregesen? ?Olsem wanem yumi save soem se yumi tinghae long olgeta? Bambae yumi tokbaot impoten poen ya long nekis stadi.