STADI 33
Jehova i Lukaot Gud Long Ol Man Blong Hem
“Ae blong Jehova i wajem olgeta we oli fraet long hem.”—SAM 33:18.
SINGSING 4 “Jehova i Lukaot Long Mi”
BIGFALA TINGTING *
1. ?From wanem Jisas i askem Jehova blong i protektem ol man blong hem?
LONG naet bifo we Jisas i ded, hem i askem wan spesel samting long Papa blong hem long heven. Hem i askem long Jehova blong i protektem ol man blong hem. (Jon 17:15, 20) I tru, oltaem Jehova i lukaot gud long ol man blong hem, i kea, mo i protektem olgeta. Be Jisas i save se Setan bambae i agensem olgeta long wan fasin we oli neva fesem bifo. Mo hem i luksave tu se oli nidim we Jehova i halpem olgeta blong stanap strong agensem Devel we i stap atakem olgeta.
2. Folem Ol Sam 33:18-20, ?from wanem yumi no nid blong fraet taem yumi fesem trabol?
2 Tede, wol ya we Setan i kontrolem, i stap mekem plante trabol long ol tru Kristin. Yumi fesem hadtaem we i mekem tingting blong yumi i foldaon, mo i traem tu fasin blong yumi blong holemstrong long Jehova. Be bambae yumi luk long stadi ya se yumi no nid blong fraet. Jehova i stap wajem yumi, hem i luk ol trabol blong yumi, mo i rere blong halpem yumi blong dil wetem ol trabol ya. Naoia bambae yumi tokbaot tu eksampol long Baebol we i soemaot se Jehova i stap “wajem olgeta we oli fraet long hem.”—Ridim Ol Sam 33:18-20.
TAEM YUMI HAREM SE YUMI STAP YUMI WAN
3. ?Wetaem maet yumi save harem se yumi stap yumi wan?
3 Nating se yumi pat blong wan bigfala famle we oli wosipim Jehova, be samtaem yumi harem se yumi stap yumi wan. Eksampol, ol yangfala oli harem se oli stap olgeta wan, taem oli stap eksplenem bilif blong olgeta long skul, o taem oli muv i go long wan niufala kongregesen. Sam long yumi, maet yumi harem nogud o tingting i foldaon, mo yumi ting se yumi stap dil wetem ol filing ya yumi wan nomo. Maet yumi fraet blong tokbaot filing blong yumi long narafala from yumi ting se bambae oli no kasemsave. Mo samtaem, maet yumi ting se i no gat man i kea long yumi. Nomata wanem risen i mekem yumi gat filing ya, be hemia i save mekem yumi wari mo yumi harem se yumi no naf blong winim filing ya. Be Jehova i no wantem nating se yumi gat filing olsem. ?From wanem?
4. ?From wanem profet Elaejah i talem se: “Mi wan nomo mi stap”?
4 Tingbaot eksampol blong gudfala man ya Elaejah. Jesebel i promes blong kilim hem i ded, taswe blong bitim 40 dei, hem i stap ronwe blong sevem laef blong hem. (1 King 19:1-9) Mo taem hem i stap hem wan long hol blong ston, hem i krae i go long Jehova se: “Mi wan [profet] nomo mi stap.” (1 King 19:10) Be i gat sam narafala profet tu oli stap, Obadaea i haedem 100 profet blong Jesebel i no kilim ded olgeta. (1 King 18:7, 13) ?So from wanem Elaejah i harem se hem i stap hem wan? Maet from we hem i ting se ol profet we Obadaea i haedem olgeta oli ded evriwan. O maet from i no gat wan long olgeta i joenem hem blong mekem wok blong Jehova, afta we Jehova i pruvum long Hil Ya Kamel se hem i nomo i tru God, be i no Bal. Maet hem i ting se i no gat man i save se laef blong hem i stap long denja, mo se i no gat man i kea long hem. Baebol i no eksplenem evri filing we Elaejah i gat, be yumi sua se Jehova i kasemsave gud from wanem Elaejah i harem olsem, mo hem i save olsem wanem blong halpem hem.
?Olsem wanem fasin blong Jehova blong halpem Elaejah, i leftemap tingting blong yumi taem yumi harem se yumi stap yumi wan? (Haf 5-6)
5. ?Olsem wanem Jehova i mekem Elaejah i harem se hem i no stap hem wan?
5 Jehova i mekem plante samting blong halpem Elaejah. Hem i pulum Elaejah blong toktok. Tu taem hem i askem Elaejah se: “?Yu stap mekem wanem long ples ya?” (1 King 19:9, 13) Long tufala taem ya, Jehova i lesin gud taem Elaejah i talemaot filing blong hem. Blong ansa long Elaejah, Jehova i mekem sam samting blong soemaot se hem i stap, mo se hem i gat bigfala paoa. Mo tu Jehova i talem long Elaejah se i gat plante narafala man Isrel yet we oli stap wosipim hem. (1 King 19:11, 12, 18) I sua se Elaejah i harem gud afta we hem i talemaot ol filing blong hem, mo Jehova i ansarem hem. Jehova i givim sam impoten wok long Elaejah. Hem i askem hem blong i putumap Hasael blong i kam king blong Siria, Jehu blong i kam king blong Isrel, mo Elisa blong i kam profet. (1 King 19:15, 16) Taem Jehova i givim ol wok ya long Elaejah, Hem i halpem hem blong i putum tingting blong hem long ol gudfala samting. Mo tu, God i givim wan gudfala fren long hem, hemia Elisa. ?Olsem wanem yu save kasem help long Jehova taem yu harem se yu stap yu wan?
6. ?Yu save tokbaot wanem long ol prea blong yu, taem yu harem se yu stap yu wan? (Ol Sam 62:8)
6 Jehova i wantem se yu prea long hem. Hem i luk ol trabol we yu fesem, mo hem i promes se bambae hem i lesin enitaem long ol prea blong yu. (1 Tes. 5:17) Hem i glad tumas blong lesin long ol man blong hem. (Prov. 15:8) ?Yu save tokbaot wanem long ol prea blong yu, taem yu harem se yu stap yu wan? Olsem Elaejah, yu talemaot olgeta filing blong yu long Jehova. (Ridim Ol Sam 62:8.) Tokbaot ol wari blong yu long hem mo se yu harem olsem wanem, mo askem hem blong i halpem yu blong winim nogud filing ya. Eksampol, sipos yu harem se yu stap yu wan mo yu fraet blong eksplenem bilif blong yu long skul, i gud yu askem Jehova blong i givim strong tingting we yu nidim. Mo tu, yu save askem hem blong i givim waes long yu blong yu naf blong eksplenem bilif blong yu long wan fasin we i kaen. (Luk 21:14, 15) Sipos tingting blong yu i foldaon, i gud yu askem Jehova blong i halpem yu blong talemaot ol filing blong yu long wan Kristin we i bigman. Yu save askem Jehova tu blong i halpem Kristin ya blong i lesin gud mo i kasemsave long yu. Yu save talemaot ol filing blong yu mo luk olsem wanem Jehova i ansa long ol prea blong yu, mo yu akseptem help blong ol narafala. Long rod ya, bambae yu no harem se yu stap yu wan.
?Yu yu faenem rod blong joen moa wetem ol narafala long wok blong prij? (Haf 7)
7. ?Yu lanem wanem long eksampol blong Mauricio?
7 Jehova i givim sam impoten wok long yumi evriwan. Yu save sua se hem i luk mo i tinghae long evri wok we yu mekem long kongregesen mo long wok blong prij. (Sam 110:3) ?Olsem wanem wok ya i halpem yu, taem yu harem se yu stap yu wan? Tingbaot eksampol blong wan yangfala brata we nem blong hem Mauricio. * Smoltaem afta we hem i baptaes, wan long ol gudfala fren blong hem i stat blong lego trutok. Mauricio i talem se: “Taem mi luk se hem i stat blong kam slak long trutok, mi no moa gat strong tingting. Mi stap tingbaot sipos mi naf blong holemtaet promes we mi mekem long Jehova, mo gohed blong stap long famle blong Hem. Mi harem se mi stap mi wan, mo mi ting se i no gat man bambae i kasemsave long filing blong mi.” ?Wanem i halpem Mauricio? Hem i talem se: “Mi joen moa long wok blong prij, mo hemia i halpem mi blong mi no tingbaot mi wan nomo, mo nogud filing we mi gat. Taem mi joen wetem ol narafala long wok blong prij, mi glad mo mi no harem se mi stap mi wan.” I tru, nomata se yumi no save joen wanples wetem ol narafala blong prij, be yumi save kam strong taem yumi joen wetem olgeta blong prij long leta o long telefon. ?Wanem moa i givhan long Mauricio? Hem i gohed se: “Mi bisi tu long ol wok blong kongregesen. Mi traem bes blong mi blong rere gud mo givim ol tok blong mi long ol miting. Ol tok ya oli mekem mi harem se Jehova mo ol narafala oli tinghae long mi.”
TAEM YUMI FESEM OL BIGFALA PROBLEM
8. ?Ol bigfala problem oli save mekem wanem long yumi?
8 Yumi save se bambae yumi fesem plante trabol long ol las dei ya. (2 Tim. 3:1) Be maet yumi sek taem yumi fesem wan trabol we yumi no bin tingbaot. Maet yumi fesem problem long saed blong mane, o dokta i talem se yumi kasem wan bigfala sik, o yumi lusum wan famle long ded. Long taem olsem, yumi save harem nogud bitim mak mo ting se yumi no save winim, speseli sipos yumi fesem ol trabol ya wan afta narawan, o yumi fesem plante trabol long semtaem. Be i gud blong tingbaot se Jehova i save ol trabol blong yumi, mo wetem help blong hem, yumi naf blong gat strong tingting blong fesem ol problem ya.
9. Tokbaot ol trabol we Job i fesem.
9 Traem tingbaot olsem wanem Jehova i bin halpem gudfala man ya Job. Long wan sot taem nomo, hem i kasem plante trabol. Long wan dei nomo, Job i kasem ol rabis nius we i mekem hem i sek, hemia se ol man oli stilim ol animol blong hem, ol man blong wok blong hem oli ded, mo antap moa ol pikinini blong hem tu oli ded. (Job 1:13-19) Smoltaem afta, taem hem i stap harem nogud yet, hem i kasem wan bigfala sik we i mekem bodi blong hem i soa bitim mak. (Job 2:7) Hem i harem nogud tumas, nao i talem se: “Mi no laekem nating laef blong mi. Mi no moa wantem gohed blong laef.”—Job 7:16.
Jehova i toktok long Job mo i tokbaot plante defren samting we hem i mekem blong soemaot se hem i kea long ol kriesen blong hem. Hem i mekem olsem blong soemaot long Job se Hem i lavem hem mo i kea long hem (Haf 10)
10. ?Jehova i givim wanem long Job, we i mekem se hem i naf blong stanap strong? (Yu luk pija long fran pej.)
10 Jehova i lukaot gud long Job. From we Job i lavem Jehova, Jehova i givim samting we hem i nidim blong i save stanap strong. Jehova i tokbaot bigfala waes blong hem long Job, mo olsem wanem hem i lukaot gud long ol samting we hem i krietem. Hem i tokbaot plante animol we i mekem Job i sapraes. (Job 38:1, 2; 39:9, 13, 19, 27; 40:15; 41:1, 2) Mo tu, Jehova i yusum wan gudfala yang man we nem blong hem Elihu, blong i leftemap tingting blong Job mo mekem hem i strong. Elihu i talem long Job se oltaem Jehova i blesem ol man blong Hem we oli stanap strong. Mo Jehova i pulum Elihu tu blong i givim ol gudfala advaes long Job. Elihu i halpem Job blong i no tingbaot hem wan, taem i rimaenem Job se yumi smol we yumi smol, taem yumi skelem yumi wetem Jehova we i Krieta blong yunives. (Job 37:14) Mo tu, Jehova i givim wan wok long Job, hemia blong i prea from trifala fren blong hem we oli mekem sin. (Job 42:8-10) ?Olsem wanem Jehova i sapotem yumi tede, taem yumi fesem ol bigfala problem?
11. ?Olsem wanem Baebol i halpem yumi taem yumi fesem ol trabol?
11 Jehova i no toktok stret long yumi olsem we i mekem long Job, be Hem i toktok long yumi tru long Baebol. (Rom 15:4) Hem i leftemap tingting blong yumi, taem hem i givim wan hop blong fiuja long yumi. Tingbaot sam tingting long Baebol we i save leftemap tingting blong yumi taem yumi fesem ol trabol. Long Baebol, Jehova i promes se i no gat wan samting, iven ol bigfala trabol we oli “save tekemaot yumi long lav ya blong God.” (Rom 8:38, 39) Mo tu, Jehova i promes se bambae hem “i stap klosap long olgeta we oli stap singaot i go long hem” tru long prea. (Sam 145:18) Jehova i talem tu se sipos yumi dipen long hem, yumi naf blong stanap strong long eni trabol mo glad nating se yumi safa. (1 Kor. 10:13; Jem. 1:2, 12) Baebol i rimaenem yumi tu se ol trabol we yumi stap fesem, oli blong smoltaem nomo taem yumi komperem wetem ol blesing we bambae hem i givim long yumi gogo i no save finis. (2 Kor. 4:16-18) Jehova i givim wan hop we yumi save trastem, hemia se bambae hem i distroem ol man we oli stap mekem trabol long yumi, hemia Devel Setan mo olgeta we oli olsem hem. (Sam 37:10) ?Yu yu lanem baehat sam vas blong Baebol we oli save halpem yu blong stanap strong taem yu fesem ol trabol long fiuja?
12. ?Jehova i wantem se yumi mekem wanem, blong Tok blong hem i givhan long yumi?
12 Jehova i wantem se yumi makemaot taem blong stadi Baebol oltaem, mo tingting dip long ol samting we yumi ridim. Taem yumi folem ol samting we yumi lanem, bilif blong yumi i kam strong moa, mo yumi kam klosap moa long Papa blong yumi long heven. Nao yumi naf blong stanap strong, taem yumi fesem ol trabol. Mo tu, Jehova i save givim tabu spirit long olgeta we oli dipen long Tok blong hem. Mo spirit ya i save givim “paoa ya we i bigwan bitim mak” long yumi, blong yumi save stanap strong long eni trabol.—2 Kor. 4:7-10.
13. ?Olsem wanem ol kakae long saed blong spirit we “gudfala slef we i waes” i givim, oli halpem yumi blong stanap strong?
13 Wetem help blong Jehova, “gudfala slef we i waes” i wokem plante buk, video, mo miusik, we oli save halpem yumi blong gat strong bilif mo blong stap wekap long saed blong spirit. (Mat. 24:45) Be yumi mas yusum gud evri samting we Jehova i givim long yumi. I no longtaem i pas, wan sista long Yunaeted Stet i glad tumas from ol gudfala kakae ya long saed blong spirit. Hem i talem se: “Long ol 40 yia we mi mekem wok blong Jehova, mi fesem plante problem we i traem fasin blong mi blong holemstrong long Jehova.” Hem i fesem plante trabol, bubu man blong hem i ded taem wan draeva we i drong i sperem hem, perens blong hem i sik tumas mo tufala i ded, mo hem i kasem kansa tu taem finis. ?Wanem i halpem hem blong i stanap strong? Hem i talem se: “Oltaem Jehova i lukaot gud long mi. Ol kakae ya long saed blong spirit we Jehova i givim tru long gudfala slef we i waes, oli halpem mi blong mi stanap strong. Ol samting ya oli mekem mi harem olsem Job, we i talem se: ‘!Go kasem we mi ded, bambae mi no lego fasin blong mi blong holemstrong long God!’”—Job 27:5.
?Olsem wanem yumi save halpem ol narafala long kongregesen? (Haf 14)
14. ?Olsem wanem Jehova i yusum ol brata sista blong sapotem yumi, taem yumi fesem ol trabol? (1 Tesalonaeka 4:9)
14 Jehova i bin trenem ol man blong hem blong oli lavem mo leftemap tingting blong ol narafala long taem blong trabol. (2 Kor. 1:3, 4; ridim 1 Tesalonaeka 4:9.) Olsem Elihu, ol brata mo sista oli wantem tumas blong halpem yumi blong yumi gohed blong stanap strong taem yumi fesem ol hadtaem. (Wok 14:22) Eksampol, traem tingbaot olsem wanem kongregesen blong Diane i enkarejem hem mo i halpem hem blong i stap klosap long Jehova, taem hasban blong hem i kasem wan bigfala sik. Hem i talem se: “I tru se i had. Be mitufala i harem save se Jehova i lavem mitufala mo i halpem mitufala long ol manis ya we i no isi. Kongregesen blong mitufala i mekem plante samting blong sapotem mitufala. Oli visitim mitufala, hagem mitufala, mo ring long mitufala, mo hemia i halpem mitufala blong stanap strong. From we mi no save draev, ol brata sista oli meksua se mi stap oltaem long ol miting mo long wok blong prij, sipos mi naf.” !Hemia i wan nambawan blesing blong stap wetem ol brata mo sista we oli gat lav!
TALEM TANGKIU LONG JEHOVA FROM LAV WE HEM I SOEMAOT
15. ?From wanem yumi sua se yumi naf blong stanap strong taem yumi fesem ol trabol?
15 Yumi evriwan bambae i fesem sam kaen trabol. Be olsem we yumi lanem, bambae yumi neva fesem ol trabol ya yumi wan. Olsem wan papa we i gat lav, oltaem Jehova i lukaot gud long yumi. Hem i stap klosap long yumi, i rere blong lesin taem yumi krae from help, mo i wantem tumas blong sapotem yumi. (Aes. 43:2) Yumi sua se yumi save winim ol trabol ya from we Jehova i glad tumas blong givim evri samting we yumi nidim blong stanap strong. Hem i givim presen ya prea, Baebol, mo ol kakae long saed blong spirit, mo ol brata sista we oli lavem yumi, blong oli halpem yumi taem yumi nidim.
16. ?Yumi mas mekem wanem blong Jehova i gohed blong soemaot lav long yumi?
16 !Yumi glad tumas blong gat wan Papa long heven we i lukaot gud long yumi! “Hat blong yumi i glad tumas from hem.” (Sam 33:21) Blong talem tangkiu long Jehova from lav we hem i soemaot, yumi mas yusum gud evri samting we hem i givim blong halpem yumi. Be long saed blong yumi, yumi mas gohed oltaem blong stap klosap long hem. !Sipos yumi gohed blong mekem bes blong yumi blong obei long Jehova, mo mekem samting we i stret long ae blong hem, bambae hem i lukaot gud long yumi olwe!—1 Pita 3:12.
SINGSING 30 Papa Blong Mi, God Blong Mi, Fren Blong Mi