LONG yia 1923, mi mi bon long taon ya Hemsworth long Yorkshire, Inglan. Mi gat wan bigfala brata we nem blong hem Bob. Taem mi gat naen yia, papa blong mi i karem sam buk we oli eksplenem olsem wanem ol giaman skul oli stap trikim ol man. Papa i laekem tumas samting we hem i ridim. Hem i no laekem nating ol lida blong skul we oli tijim wan samting, be oli mekem defren samting. Sam yia biaen, Bob Atkinson i kam long haos, mo i plei wan rikoding blong wan tok blong Brata Rutherford. Mifala i luksave se tok ya i kamaot long sem grup we oli wokem buk we Papa i ridim. Papa mo Mama i singaot Brata Atkinson blong i kam kakae wetem mifala evri naet, mo hem i ansarem plante kwestin we mifala i gat long Baebol. Hem i invaetem mifala blong go long miting, long haos blong wan brata we i no longwe. Mifala i stat blong go long ol miting, nao wan smol kongregesen i stat long Hemsworth. I no longtaem, ol son elda (naoia eria elda) oli kam stap wetem mifala, mo ol paenia blong ol kongregesen raonabaot, oli stap kam kakae wetem mifala. Olgeta ya oli givhan bigwan long mi.

Famle blong mifala i gat wan bisnes. Be papa i talem long brata blong mi se: “Sipos yu wantem go paenia, bambae yumi lego bisnes ya.” Bob i agri, ale taem hem i gat 21 yia, hem i aot long haos blong go paenia. Tu yia biaen, taem mi mi gat 16 yia, mi tu mi kam wan paenia. Long ol wiken, mi prij wetem ol brata mo sista, be long ol dei blong wik, plante taem mi prij mi wan. Mi yusum wan gramafon mo wan smol kad we i gat sam tok blong Baebol long hem. Jehova i blesem mi taem wan Baebol stadi blong mi i gohed gud, mo biaen, plante famle blong hem tu oli kam long trutok. Long nekis yia, mi kam wan spesel paenia, mo mi wok wetem Sista Meri Hensal. Oli sanem mitufala i go long ples ya Cheshire, we i no gat pablisa.

Long Wol Wo Tu, ol woman oli mas mekem wok blong sapotem faet. Gavman i agri se ol lida blong  ol narafala jos oli no nid blong go faet. Taswe mifala i ting se bambae i sem mak long mifala ol spesel paenia. Be kot i no agri, mo oli sakem mi long presin blong 31 dei. Long nekis yia, taem mi gat 19 yia, mi mas go tu taem bakegen long kot from we mi no sapotem faet. Be long tufala taem ya, oli letem mi mi go fri. Taem mi gotru long trabol ya, mi harem save se tabu spirit i stap givhan long mi, mo Jehova i stap mekem bilif blong mi i strong.—Aesea 41:10, 13.

Long 1946, mi mitim Ata Matiu. Oli sakem hem long presin blong tri manis from we hem i no wantem joen long faet. Taem hem i kamaot, hem i joenem brata blong hem Denis, we i wan spesel paenia long Hemsworth. Taem tufala i smol, papa blong tufala i tijim tufala long Jehova, mo tufala i baptaes taem tufala i yangfala. Tufala i stap paenia wanples, nao oli sanem Denis i go long Aealan, mo Ata i no moa gat fren. Papa mo mama i glad long gudfala fasin blong hem, nao tufala i singaot hem i kam stap wetem tufala. Taem mi go visitim tufala, mi mo Ata i wasem plet mo storian. Biaen, mitufala i raetem leta long mitufala. Long 1948, Ata i go long presin blong tri manis bakegen. Long Jenuware 1949, mitufala i mared, mo mitufala i wantem gohed nomo long wok blong paenia. Mitufala i no westem mane, mo mitufala i yusum spel blong mitufala blong salem frut. From we Jehova i blesem mitufala, mitufala i naf blong gohed blong paenia.

Wan yia biaen, oli sanem mitufala i go long taon ya Armagh long Not Aealan, mo biaen long Newry. Ol man long ples ya oli Katolik, mo oli agensem mifala bigwan, taswe mitufala i mas lukaotgud long ol fasin blong mitufala taem mitufala i prij. Mifala i mekem miting long haos blong wan brata, we i stap 16 kilometa longwe long mitufala. Samwe long eit man oli stap kam long ol miting. Samtaem, afta we miting i finis long naet, mitufala i no gobak long haos. Mitufala i slip nomo long floa mo long nekis moning, mitufala i harem gud long bigfala kakae we oli rerem. Mi glad tumas se naoia i gat plante Witnes long ol ples ya.

Brata blong mi mo woman blong hem, Loti, tufala i stap mekem wok blong spesel paenia long Not Aealan, mo long 1952, mifala fo i go long distrik asembli long Belfast. Wan brata we i kaen tumas, i singaot mifala fo, wetem Brata Praes Hius, we i lukaot long Betel long Inglan, blong mifala i go stap wetem hem. Wan naet, mifala i stap tokbaot niufala buklet ya God’s Way Is Love, we oli wokem blong ol man Aealan. Brata Hius i talem se i had blong prij long ol Katolik long Aealan. Oli ronemaot ol brata, mo pris i stap talem long ol man blong oli kilim ol brata. Nao Brata Hius i talem se: “Mifala i nidim sam man mo woman blong olgeta we oli gat trak, blong oli go joen long wan spesel wok blong seremaot buklet ya long ful kantri.” * Long taem ya nao, mifala i talem se: “!Bambae mifala i mekem!”

 Wan sista long Dublin we i holemstrong long Jehova plante yia, Mama Rutlan, i letem ol paenia oli go stap wetem hem. Ale mifala i go stap wetem hem blong smoltaem. Mifala i salem sam samting, nao mifala i go wetem Bob long moto blong hem we i gat wan smol kat long saed blong hem, blong lukaotem wan trak. Mifala i faenem wan gudfala sekenhan trak, mo mifala i askem long man we i salem blong i draevem i kam long haos, from we i no gat wan long mifala we i save draev. Klosap fulnaet, Ata i sidaon long bed mo i mekem olsem se i stap draev. Long nekis moning, taem hem i stap traehad blong draevem trak i kamaot long garaj, wan misinari, Mildred Wilet (we biaen i maredem Jon Bar) i kam. !Hem i save draev! Hem i tijim mifala blong draev, ale mifala i rere nao blong go prij.

Naoia, mifala i nidim ples blong slip. Ol brata oli talem se mifala i no mas stap long wan smol haos we trak i pulum, from we ol man oli save bonem. Ale mifala i lukaotem wan haos, be mifala i no save faenem wan. Long naet ya, mifala fo i slip insaed long trak. Long nekis dei, mifala i save faenem nomo wan smol haos we trak i pulum, we i gat tu bed long hem, wan daon, wan antap. Samting we mifala i sapraes long hem, se ol fama oli glad blong letem mifala i putum smol haos ya long fam blong olgeta. Mifala i stap draevem trak 16 kasem 24 kilometa blong go prij. Taem mifala i muv i go long wan narafala eria, mifala i gobak blong prij long ol man we mifala i bin putum smol haos ya long ples blong olgeta.

Mifala i go long evri haos long saot is Aealan, mo i no gat tumas man we oli agens. Mifala i givimaot bitim 20,000 buklet, mo mifala i sanem nem blong ol man we oli intres i go long branj ofis long Inglan. !I wan bigfala blesing blong luk se naoia, i gat plante handred Witnes long eria ya!

Sam yia afta, oli sanem mitufala i go long saot London. !Sam wik afta we mitufala i muv, ol brata long branj ofis blong Inglan oli ringim Ata mo oli askem long hem blong i statem wok blong eria elda long nekis dei! Oli trenem mitufala blong wan wik nao mitufala i go long Skotlan, taswe Ata i no gat plante taem blong rerem ol tok blong hem. Be hem i glad blong mekem eni wok we hem i kasem long ogenaesesen. Gudfala eksampol blong hem i leftemap tingting blong mi. Mitufala i glad blong mekem wok blong eria elda. From we mitufala i bin wok sam yia long ples we i no gat pablisa, i gud tumas blong stap wetem plante brata mo sista.

Long 1962, oli singaot Ata i go long Skul blong Gilead. Mitufala i mas mekem wan bigfala desisen, from we skul ya i blong ten manis, be oli no singaot mi. Ale, mitufala i mekem desisen se i gud we Ata i go. From we mi no moa gat wan fren blong wok wetem, branj ofis i sanem mi mi gobak long Hemsworth olsem wan spesel paenia. Wan yia biaen, taem Ata i kambak, mitufala i mekem wok blong distrik elda long Skotlan, not Inglan, mo not Aealan.

Long 1964, oli jusum Ata blong i lukaot long Betel long Aealan. Mi no wantem go long Betel, from we mi laekem tumas wok ya blong visitim ol kongregesen. Be naoia, mi glad tumas se mi bin gat janis blong wok long Betel. Mi mi sua se sipos yu rere blong mekem wan wok we ogenaesesen i givim, nating we yu no wantem mekem, be bambae Jehova i blesem yu. Long Betel, mi wok long ofis, mi putum ol buk long katon blong sanem, mi kuk, mo mi klinap. Sam samtaem mitufala i gat janis blong luk ol brata mo sista raon long kantri ya, taem mitufala i mekem wok blong distrik elda. Taem mitufala i mekem wok ya, mo luk olsem wanem ol Baebol stadi we mitufala i bin mekem long Aealan oli gohed gud, mitufala i kam klosap moa long ol brata mo sista. !Hemia wan bigfala blesing!

Long 1965, i gat wan intenasnal asembli long taon ya Dublin, hemia faswan long Aealan. * Nating se plante man oli agensem mifala bigwan, be i gat 3,948 man oli kam long asembli ya, mo 65 oli baptaes. Ol 3,500 brata mo sista we oli kam long ol narafala kantri, oli stap long haos blong ol man Dublin. Biaen, ol brata mo sista ya oli raetem ol leta blong talem tangkiu long ol man ya, mo ol man ya oli presem ol brata ya tu from gudfala fasin blong olgeta. Samting ya i jenisim kantri ya bigwan.

Long yia 1966, branj ofis long Dublin i stat blong lukaot long not mo saot Aealan tugeta. Fasin ya blong joen gud i defren long samting we i stap hapen long Aealan, we ol man oli stap seraot long ol defdefren pati blong politik, mo ol defdefren jos. Be mifala i glad tumas blong luk se, i gat plante man we bifo oli Katolik, oli kam long trutok, mo oli stap wosipim Jehova wanples wetem ol brata we bifo oli Protestan.

Long 2011, branj ofis blong Inglan mo Aealan i joen, nao laef blong mitufala i jenis bigwan. Oli sanem mitufala i go long Betel long London. Long taem ya, mi stat blong wari from helt blong Ata. Hem i kasem wan sik we oli kolem Pakinson. Nao long 20 Mei 2015, taem mitufala i mared 66 yia, Ata i ded.

Long ol yia we oli jes pas, mi harem nogud tumas. !Mi sore we Ata i no moa stap blong givhan long mi! Be taem yumi fesem ol samting olsem, yumi kam klosap moa long Jehova. Mi mi glad blong save se plante man oli laekem Ata. Mi kasem plante leta long ol brata mo sista long Aealan, Inglan, mo Amerika. Taem mi ridim ol leta ya, mo mi harem ol gudfala toktok blong Denis, brata blong Ata, wetem woman blong hem, Mavis, mo tufala gel blong tufala, Rut mo Judi, samting ya i leftemap tingting blong mi bigwan.

Aesea 30:18 i leftemap tingting blong mi bigwan, i se: ‘Hae God i stap sore long yufala, mo hem i wantem mekem i gud long yufala. Hem i stap rere blong i kaen long yufala, from we oltaem hem i stap mekem i stret. Olgeta we oli stap trastem hem, oli save harem gud.’ Jehova i stap wet wetem longfala tingting blong finisim olgeta trabol we yumi stap gotru long hem, mo blong givim ol nambawan wok long niufala wol. Samting ya i mekem mi mi harem gud.

!Taem mi tingbaot laef blong mitufala, mi luksave olsem wanem Jehova i lidim mo blesem wok blong prij long Aealan! Mi harem se i wan bigfala ona blong joen wetem ol narafala long wok ya. I tru tumas se yumi kasem blesing taem yumi mekem samting we Jehova i askem.