1. ?Wanem lav we i hae moa, mo lav ya i olsem wanem? (Yu luk pija long stat blong stadi.)

JEHOVA i Stamba blong lav. (1 Jon 4:7) Baebol i yusum Grik tok ya a·gaʹpe blong tokbaot lav we i hae moa, hemia lav we i stanap long stret fasin. Maet i gat filing wetem, be lav ya i no wan filing nomo, i gat plante moa samting i joen wetem. Man we i gat lav ya i no tingbaot hem wan nomo, be i mekem ol gudfala samting blong givhan long narafala. Kaen lav ya i mekem yumi glad, mo yumi harem gud long laef blong yumi.

2, 3. ?Olsem wanem Jehova i soemaot se i tingbaot ol man mo i lavem olgeta?

² Bifo we Jehova i wokem Adam mo Iv, hem i soemaot lav blong hem. Hem i wokem wol wetem evri samting we man bambae i nidim blong laef. Mo tu, hem i mekem se wol i kam wan ples we yumi save harem gud tumas blong stap long hem. Jehova i no mekem ol samting ya blong hem wan, be hem i mekem blong yumi. Taem wol ya i rere, hem i wokem man, mo i givim janis long hem blong i laef olwe long paradaes.

³ Biaen, Jehova i mekem wan samting we i bigwan we i  bigwan, blong soemaot lav long ol man. Nating se Adam mo Iv i mekem stronghed, Jehova i sua se sam pikinini blong tufala bambae oli lavem hem. Taswe, hem i mekem plan se Pikinini blong hem bambae i ded olsem wan ransom sakrefaes, blong sevem ol man. (Jenesis 3:15; 1 Jon 4:10) Promes blong God i mekem se samting ya i sua blong kamtru. Be 4,000 yia i pas bakegen, bifo we Jehova i sanem Pikinini blong hem i kam long wol, blong i ded from ol man. (Jon 3:16) !Yumi talem tangkiu tumas long Jehova from lav blong hem!

4. ?Olsem wanem yumi save se ol sinman oli naf blong soemaot lav ya we oli tingbaot narafala fastaem?

⁴ ?Olsem wanem long yumi? ?Yumi naf blong soemaot lav ya we yumi tingbaot narafala fastaem, nating se yumi sinman? Yes. Jehova i wokem yumi we yumi olsem pija blong hem, i min se, yumi save folem fasin blong hem. Samtaem i no isi blong lavem narafala fastaem, be yumi naf blong mekem. Ebel i soemaot se hem i lavem Jehova taem hem i kilim anamol we i beswan, blong mekem sakrefaes long hem. (Jenesis 4:3, 4) Noa i soemaot se hem i lavem ol man, taem hem i gohed plante yia blong talemaot tok blong God long olgeta, nating se oli no lesin. (2 Pita 2:5) Mo Ebraham i soemaot se hem i lavem God moa i bitim ol narafala, taem hem i rere blong kilim pikinini blong hem Aesak olsem wan sakrefaes. (Jemes 2:21) Yumi mas gat sem fasin olsem ol gudfala man ya, we oli soemaot lav nating se i no isi.

5. ?Yumi save mekem wanem blong soemaot tru lav?

⁵ Baebol i talem se tru lav “i no mas kamaot long toktok no long maot nomo, be i mas kamaot long ol wok blong yumi tu.” (1 Jon 3:18) ?Hemia i min se yumi no save soemaot lav long ol tok blong yumi? No, i no minim olsem. (1 Tesalonaeka 4:18) Be i min se, i no naf blong talem nomo se, “Mi lavem yu.” Yumi mas soemaot tu long ol wok blong yumi. Traem tingbaot sipos sam brata mo sista oli no gat naf kakae mo klos. Ol gudfala toktok nomo bambae i no givhan long olgeta. (Jemes 2:15, 16) Long sem fasin, taem yumi lavem Jehova mo ol man raonabaot, yumi no prea nomo se bambae i gat plante moa man oli prij, be yumi tu yumi wok had blong prij.—Matiu 9:38.

6, 7. (1) ?Wanem ya lav we ‘i tru’? (2) Tokbaot samfala we lav blong olgeta i giaman.

⁶ Aposol Jon i talem se yumi mas soemaot lav “long ol wok blong yumi,” mo tu, lav ya “i mas tru.” Yumi ‘no mas giaman.’ (Rom 12:9; 2 Korin 6:6) Samtaem wan man i save mekem olsem se hem i lavem narafala. ?Be lav ya i tru? ?Wanem tingting i pusum hem? Giaman lav i no tru, mo i blong nating nomo.

⁷ Traem tingbaot samfala we lav blong olgeta i giaman. Long garen blong Iden, Setan i toktok gud long Iv, olsem se i wantem mekem i gud long hem. Be ol aksen blong hem oli soemaot se i no olsem. (Jenesis 3:4, 5) Mo tu, Ahitofel, fren blong King Deved, i joen wetem ol enemi blong Deved blong kasem samting  we hem i wantem. Ol wok ya blong hem i soemaot se hem i wan giaman fren. (2 Samuel 15:31) Tede, ol man blong apostasi mo sam narafala we oli “tok swit” mo oli talem ol gudfala toktok blong pulum narafala, oli mekem kongregesen i seraot. (Rom 16:17, 18) Oli mekem olsem se oli kea long ol narafala, be i no tru, oli stap tingbaot olgeta nomo.

8. ?Yumi wanwan i mas askem wanem kwestin?

⁸ Giaman lav i nogud tumas, from we i trikim narafala. Maet yumi save trikim ol man, be yumi no save trikim Jehova. Jisas i talem se ol man we oli gat tu fes bambae oli kasem “bigfala panis.” (Matiu 24:51) Yumi ol man blong Jehova, yumi neva mas gat tu fes. I gud yumi wanwan i askem se: ‘?Lav blong mi i tru, o mi mi stap tingbaot mi wan nomo, mo mi stap giaman?’ Bambae yumi tokbaot naen rod blong soemaot lav we i “no giaman.”

9. ?Lav we i tru i pulum yumi blong mekem wanem?

⁹ Yu glad blong mekem wok blong narafala, nating se i no gat man i luksave. Yumi mas rere blong mekem samting we i kaen mo i soemaot lav long narafala, nating se i no gat man i save. (Ridim Matiu 6:1-4.) Ananaeas mo Safaera i defren. Taem tufala i givim presen mane, tufala i wantem se ol narafala oli save. Ale tufala i giaman se tufala i givim moa mane i bitim wanem we tufala i givim, nao tufala i kasem panis from giaman fasin ya. (Ol Wok 5:1-10) Sipos yumi gat lav we i tru, bambae yumi glad blong mekem wok blong ol brata, mo yumi no wantem se narafala i save. Traem tingbaot ol brata we oli givhan long Hed Kampani blong rerem ol save blong Baebol we yumi kasem oltaem. Oli no pulum ol man blong oli leftemap olgeta, mo oli no talemaot long ol narafala ol projek we oli wok long olgeta.

10. ?Olsem wanem yumi save ona long narafala?

¹⁰ Ona long narafala. (Ridim Rom 12:10.) Jisas i ona long ol aposol blong hem taem hem i wasem leg blong olgeta. (Jon 13:3-5, 12-15) Yumi mas traehad blong mekem tingting blong yumi i stap daon olsem Jisas, mo mekem wok blong narafala. Taem tabu spirit i kamdaon long ol aposol, long taem ya nomo, oli jes kasem save fulwan long mining blong samting we Jisas i mekem. (Jon 13:7) Yumi ona long ol narafala taem yumi no ting se yumi moa gud i bitim olgeta, from we yumi skul gud, yumi gat mane, o yumi mekem sam spesel wok. (Rom 12:3) Yumi no jalus taem narafala i kasem ol gudfala tok blong presem hem, be yumi glad wetem hem, nating sipos yumi harem se yumi tu yumi sud kasem gudfala tok ya.

11. ?From wanem ol tok blong presem narafala i mas kamaot long hat?

¹¹ Talem ol tok we i kamaot long hat, blong presem narafala. Yumi mas lukaot janis blong talem ol gudfala tok blong presem narafala. Yumi evriwan i save se ol tok olsem, i mekem “man i kam strong moa.” (Efesas 4:29) Yumi no mas tok  swit, be ol tok blong yumi i mas kamaot long hat. Yumi no mas talem ol tok we yumi no minim, o ronwe long wok ya blong givim advaes blong stretem narafala. (Ol Proveb 29:5) Sipos yumi presem narafala nao biaen yumi toktok smol agensem hem, yumi gat tu fes ya. Aposol Pol i no olsem, hem i gat lav we i tru. Taem hem i raetem leta long ol Kristin long Korin, hem i talem gudfala tok blong presem olgeta from ol gudfala wok blong olgeta. (1 Korin 11:2) Be taem hem i mas stretem olgeta, hem i eksplenem long kaen mo klia fasin, from wanem hem i mekem olsem.—1 Korin 11:20-22.

12. ?Olsem wanem yumi save soemaot tru lav taem yumi singaot narafala i kam long haos?

¹² Singaot narafala i kam long haos. Jehova i talem se yumi mas gat gladhat blong givim samting long ol brata mo sista. (Ridim 1 Jon 3:17.) Be yumi mas gat stret tingting taem yumi singaot olgeta oli kam long haos blong yumi. Yumi save askem se: ‘?Mi mi invaetem ol besfren blong mi nomo, o olgeta we mi ting se oli impoten long kongregesen? ?Mi invaetem olgeta nomo we mi save se oli save mekem i gud long mi bakegen? ?O mi invaetem ol narafala brata mo sista, olgeta we mi no save gud olgeta, mo olgeta we oli no save mekem i gud long mi?’ (Luk 14:12-14) Traem tingbaot: ?Yu glad blong invaetem wan brata we i sot long plante samting from we hem i bin mekem sam nogud desisen? ?Olsem wanem sipos wan man we yu invaetem hem i neva talem tangkiu? Jehova i talem se: “Yufala i mas welkamem yufala we yufala i no toktok smosmol from.” (1 Pita 4:9) Sipos yumi gat stret tingting taem yumi givim samting long narafala, bambae yumi glad.—Ol Wok 20:35.

13. (1) ?Wetaem yumi nidim longfala tingting? (2) ?Yumi save mekem wanem blong givhan long olgeta we oli slak?

¹³ Givhan long olgeta we oli no strong. Baebol i talem se: “Yufala i mas givhan long olgeta we oli no strong, mo yufala i mas gat longfala tingting long evriwan.” Samting ya bambae i soemaot sipos lav blong yumi i tru. (1 Tesalonaeka 5:14) Plante brata we bilif blong olgeta i slak, oli kam strong bakegen kwiktaem, be sam narafala, yumi mas gohed longtaem blong soemaot longfala tingting mo lav long olgeta. ?Yumi save mekem wanem? Yumi save yusum Baebol blong leftemap tingting blong olgeta, mekem plan blong prij wetem olgeta, mo lesin taem oli tokbaot ol trabol blong olgeta. Mo tu, yumi no mas tingbaot ol brata mo sista se oli “strong” o oli “slak,” be yumi mas luksave se yumi evriwan, yumi strong long  sam samting, mo yumi slak long sam samting. Aposol Pol tu i talem se i gat sam samting we hem i no naf blong mekem. (2 Korin 12:9, 10) Taswe, yumi evriwan yumi nidim we narafala i givhan long yumi, mo i leftemap tingting blong yumi.

14. ?Olsem wanem blong mekem pis wetem ol brata mo sista?

¹⁴ Mekem pis. Pis we yumi gat wetem ol brata mo sista i sas tumas. Samtaem yumi harem se oli no kasem save long yumi, no oli mekem i no stret long yumi, be yumi traem bes blong yumi blong mekem pis. (Ridim Rom 12:17, 18.) Taem yumi mekem narafala i harem nogud, yumi mas talem sore, mo ol tok ya i mas kamaot long hat blong yumi. I moagud yumi talemaot fol blong yumi i bitim we yumi talem nomo se, “Mi sore we yu harem nogud.” Yumi save talem se: “Mi sore we ol tok blong mi i mekem yu yu harem nogud.” Pis i impoten tu insaed long mared. I no stret we wan man mo woman i mekem olsem se tufala i lavlavem tufala taem tufala i stap wetem ol narafala, be taem tufala i stap tufala nomo, tufala i no wantem toktok, wan i talem ol tok blong spolem narawan, o tufala i faet.

15. ?Yumi soemaot olsem wanem se yumi fogivim narafala fulwan mo yumi no stap giaman?

¹⁵ Fogivim narafala. Sipos wan man i mekem yumi harem nogud, yumi mas fogivim hem mo lego kros. Yumi mekem sem mak taem hem i no luksave se hem i mekem yumi harem nogud. Yumi ‘no rao long hem. Tabu spirit i mekem se yumi gat pis nao yumi kam wan, taswe oltaem yumi mas traehad blong holemtaet fasin ya.’ (Efesas 4:2, 3) Blong fogivim narafala fulwan, yumi mas fogetem samting we hem i mekem long yumi. Man we i gat lav, hem “i no tingbaot rong we ol narafala oli mekem long hem.” (1 Korin 13:4, 5) Blong talem stret, sipos yumi gohed blong stap kros long wan brata o sista, bambae yumi no moa fren wetem  hem mo wetem Jehova tu. (Matiu 6:14, 15) Taem yumi prea from hem, yumi soemaot se yumi fogivim hem fulwan, mo yumi no stap giaman.—Luk 6:27, 28.

16. ?Yumi mas mekem wanem taem yumi gat spesel wok long ogenaesesen?

¹⁶ Lego samting we yu yu wantem. Taem yumi gat spesel wok long ogenaesesen, yumi save pruvum se lav we yumi gat i tru, taem yumi no ‘lukaot rod we i save givhan long yumi nomo, be yumi lukaot rod blong givhan long ol narafala.’ (1 Korin 10:24) Traem tingbaot ol asembli. Ol man blong welkam we oli go fastaem long ples blong asembli, oli save blokem ol jea we i beswan, blong olgeta mo famle blong olgeta. Be plante long olgeta oli jusum nomo blong sidaon long ol jea long ples we oli stap wok long hem. Taem oli mekem olsem, oli soemaot lav ya we oli no tingbaot olgeta nomo. ?Olsem wanem yu save folem gudfala eksampol blong olgeta?

17. Sipos wan Kristin i mekem bigfala sin, ?tru lav bambae i pusum hem blong i mekem wanem?

¹⁷ Talemaot ol sin we yu haedem mo gowe long olgeta. Sam Kristin we oli mekem ol bigfala sin oli traem blong haedem olgeta, maet from we oli sem o oli no wantem mekem narafala i harem nogud. (Ol Proveb 28:13) Be fasin ya blong haedem wan sin i no soemaot lav, from we i spolem man we i mekem sin mo ol narafala tu. ?Olsem wanem i spolem ol narafala? Maet Jehova i no moa blesem kongregesen mo givim tabu spirit long hem, nao kongregesen i no gat pis. (Efesas 4:30) Taswe, sipos wan Kristin i mekem bigfala sin, tru lav bambae i pusum hem blong i go storian wetem ol elda mo kasem help we hem i nidim.—Jemes 5:14, 15.

18. ?Tru lav i impoten olsem wanem?

¹⁸ Lav i impoten moa i bitim ol narafala fasin. (1 Korin 13:13) Lav i makemaot ol trufala man blong Jisas, mo i mekem se ol narafala oli luksave ol man we oli folemgud eksampol blong Jehova, Stamba blong lav. (Efesas 5:1, 2) Pol i talem se sipos hem i no gat lav, hem i nating nomo. (1 Korin 13:2) I gud yumi wanwan i gohed blong soemaot lav, i no long “toktok nomo” be “long ol wok blong yumi tu.”