LOA blong Moses i letem ol man blong oli mekem promes blong olgeta i strong taem oli talem ol tok olsem: “Mi talem tru long yu long nem blong God,” o “Long nem blong Jehova, mi talem tru.” Be long taem blong Jisas, ol man Jiu oli mekem fasin ya bitim mak, long saed blong enikaen samting nomo. Oli wantem se ol man oli tinghevi moa long tok blong olgeta. Be, tu taem Jisas i tok agensem fasin ya se i blong nating nomo. Hem i talem se: “‘Yes’ we yufala i talem i mas minim ‘yes’ nomo, mo ‘No’ we yufala i talem i mas minim ‘no’ nomo.”—Matiu 5:33-37; 23:16-22.

Wan buk (Theological Dictionary of the New Testament) i talem se, folem ol tok long Talmud, plante man Jiu oli mekem fasin ya blong mekem tok blong olgeta i strong. Talmud i eksplenem gud ol promes we oli mas holem mo ol promes we oli save brekem.

I no Jisas nomo we i agensem fasin ya blong talem nem blong God blong mekem promes i strong. Man Jiu ya we i raetem histri, Flavius Josephus, i tokbaot wan grup blong ol man Jiu we oli folem wan man, se oli no stap mekem fasin ya. Olgeta long grup ya oli ting se hemia i moa nogud i bitim fasin blong giaman. Oli ting se sipos man i mas mekem samting ya blong tok blong hem i strong, hemia i soemaot se man ya i wan man blong giaman. Wan buk blong ol man Jiu we nem blong hem Waes blong Sirach o Eklesiastikas, (23:11) i talem sem samting, i se: “Man we i talem nem blong God blong mekem tok blong hem i strong, hem i nogud we i nogud.” Jisas i agensem ol man we oli mekem fasin ya long ol samting we oli no impoten. Sipos yumi tok tru oltaem, yumi no nid blong mekem samting ya blong ol man oli tinghevi long tok blong yumi.