MI MI bon long yia 1934. Papa mo mama blong mi, hemia Fred mo Edna Molohan. Tufala i stap olsem ol Baebol Studen (Witnes Blong Jehova) blong 20 yia finis. Mi mi glad tumas se tufala i tijim mi blong lavem Jehova. Mifala i stap long Parsons, wan smol taon long Saotis blong Kansas. Klosap evriwan long kongregesen blong mi, oli ol tabu Kristin. Famle blong mi i go oltaem long ol miting mo long wok blong prij. Plante taem long Sarede aftenun mifala i prij long rod, naoia yumi singaot se prij long pablik ples. Samtaem mifala i taed, be oltaem Papa i pem aeskrim blong mifala.

Kongregesen blong mifala i lukaot long wan bigfala teritori, we i gat plante smol taon mo plante fam long hem. Sam fama oli givim ol vejtebol, ol eg, o faol long mifala, olsem pei blong ol buk we mifala i givim long olgeta. Papa i givim mane blong ol buk ya finis, taswe ol kakae ya oli blong mifala.

Papa mo mama i gat wan gramafon blong yusum long wok blong prij. Mi mi smol long taem ya, mekem se mi no save yusum, be mi glad blong halpem papa mo mama blong plei ol rikoding blong Brata Rutherford, long ol visit mo Baebol stadi blong tufala.

Papa i putum wan bigfala laodspika antap long trak blong mifala, wan Fod blong yia 1936. I gud tumas blong prij wetem wan trak olsem. Oltaem, mifala i plei long wan miusik fastaem, blong pulum tingting blong ol man, biaen mifala i plei long wan tok we i stanap long Baebol. Afta mifala i givimaot buk long ol man we oli intres.

Papa i draevem trak i go long ples blong spel long smol taon ya Cherryvale, Kansas, we plante man oli kam spel long hem long ol Sande. Biaen polis i kam talem long hem blong i no putum trak insaed long eria blong spel. Ale papa i muvum trak ya i go long rod we i stap narasaed long  ples ya, blong ol man oli save harem ol tok ya klia. Mi mi haremgud tumas blong stap wetem papa mo bigfala brata blong mi, Jerry.

Long ol yia ya, mifala i mekem ol spesel kampen long ol teritori we ol man oli agens bigwan. Olsem we mi talem finis long stat, mifala i wekap long medel naet mo mifala i go kwaet nomo long ol haos wanwan mo mifala i putum ol traket aninit long doa blong ol haos. Biaen mifala evriwan i mit aotsaed long taon, blong luk sipos polis i bin arestem wan long mifala o nogat.

Wan narafala rod blong prij we mi laekem tumas, hemia blong maj long rod. Mifala i werem ol bigfala saen mo maj long taon. Mi tingbaot wan taem, ol brata oli kam maj long taon blong mifala wetem wan saen we i se “Skul i Wan Trap Mo Wan Kruked Bisnes.” Oli stat long haos blong mifala, oli wokbaot samwe long wan kilometa haf (1 mael) tru long taon, mo kambak bakegen long haos blong mifala. I nogat wan man we i stopem olgeta, be plante man oli wantem tumas blong save se wanem i stap hapen.

Oltaem famle blong mi i travel i go long Texas blong go long ol asembli. Papa i wok blong wan kampani blong rod, taswe mifala i save travel fri nomo long tren blong go long ol asembli o go visitim ol famle blong mifala. Bigfala brata blong mama, Fred Wismar, mo waef blong hem Eulalie, i stap long Temple, Texas. Angkel Fred i lanem trutok long ol yia 1900, taem hem i yangfala. Afta we hem i baptaes, hem i tokbaot trutok long ol brata mo sista blong hem, hemia mama blong mi tu. Ol brata long sentrol Texas oli savegud angkel Fred from we hem i bin mekem wok olsem elda we i stap visitim ol kongregesen. Hem i kaen, i glad oltaem, i strong long trutok, mo i soem gudfala eksampol long mi.

Long 1941, mifala i go long wan bigfala asembli long St. Louis, Missouri. Long asembli ya, oli askem ol yangfala blong go sidaon klosap long platfom blong oli save lesin long tok blong Brata Rutherford we i se “Ol Pikinini Blong King.” Long en blong tok ya, ol 15,000 yangfala we i stap, oli sapraes tumas. Brata Rutherford mo ol man we oli givhan long hem, oli givimaot niufala buk ya Children.

Long Eprel 1943, mifala i go long Coffeyville Kansas, long wan Asembli we i se “Call to Action.” Asembli ya i spesel, from we mi wetem sam narafala i tekem baptaes long taem ya, long wan smol pul we i stap long wan fam klosap. Long asembli ya, oli talemaot se evri kongregesen bambae oli gat wan niufala skul, hemia Tiokratik Ministri Skul. Mo tu, mifala i kasem wan buklet we i gat 52 lesen blong yusum long skul ya. Afta long yia ya, mi givim faswan tok blong mi long skul ya.

Mi finis skul long 1951 mo mi mas mekem desisen se, bambae mi mekem wanem wetem laef blong mi. Bigfala brata blong mi, Jerry, i wok long Betel. Mi wantem tumas blong wok long Betel, ale mi fulumap fom. Smoltaem afta, oli singaot mi blong stat wok long Betel long 10 Maj 1952. Hemia wan gudfala desisen we i givhan long mi blong mekem moa long wok blong Jehova.

Mi wantem tumas blong wok long ples blong printim ol magasin mo ol narafala buk blong yumi. Be mi neva gat janis blong mekem wok ya. Mi mi wok olsem man blong karem kakae i go long tebol mo biaen mi wok insaed long kijin. Mi laekem wok ya mo mi lanem plante samting. Mifala i wok long ol defdefren taem, mo samtaem mi no wok long dei. Plante taem mi go mekem prapa stadi blong mi long laebri blong Betel. Hemia i givhan blong mekem bilif blong mi i strong mo blong mi frengud wetem Jehova. Mi gat strong tingting blong gohed blong mekem wok blong Jehova long Betel. Jerry i aot long Betel long 1949 mo i mared wetem Patricia, mo tufala i stap klosap long Brooklyn. Tufala i sapotem gud mi taem mi stat blong wok long Betel.

Smoltaem afta we mi kam long Betel, ol brata oli stap lukaot sam brata long Betel blong oli save mekem ol pablik tok. Oli sanem ol brata ya blong visitim sam kongregesen we oli stap 320 kilometa (200 mael) longwe long Brooklyn. Taem oli go, bambae oli mekem wan pablik tok mo oli prij wetem kongregesen ya. Mi mi wan long ol brata ya we oli jusum. Taem mi  stat blong mekem wok ya, mi harem se mi fraet smol. Long ol taem ya, pablik tok i wan aoa. Plante taem mi go long tren blong visitim ol kongregesen ya. Mi tingbaot wan Sande aftenun long yia 1954, mi jam long wan tren we i gobak long Niu Yok, mo mi mas kasem Betel long aftenun ya. Be taem mifala stap go, i gat strong win mo plante sno. Nao tren i stop, enjin i no moa wok, ale mi go long wan nara tren we i pas aninit long graon, mekem se mi jes kasem Niu Yok long 5 klok long Mande moning. Taem mi kasem Betel, mi go stret long wok. Mi let smol mo mi taet tumas from we mi no slip long naet. Be glad we mi kasem taem mi givhan long ol kongregesen ya, i bigwan moa i bitim ol sakrefaes we mi mekem.

Mo tu, long ol faswan yia blong mi long Betel, mi stat blong joen long wan program blong Baebol stadi we i stap kamaot evri wik long radio stesen blong yumi, WBBR. Radio stesen ya i stap long seken floa blong bilding blong 124 Columbia Heights. Brata Alexander H. Macmillan, we i wok long Betel blong plante yia, i joen oltaem long ol program ya. Mifala i stap singaotem hem se Brata Mac. Hem i wan gudfala eksampol long ol yangfala brata long Betel, from we hem i stanap strong nating se hem i kasem plante hadtaem.

Long 1958, wok blong mi i jenis. Mi stat blong wok wetem olgeta we oli finis long Skul blong Gilead. Mi stap halpem olgeta blong kasem visa blong ol kantri we bambae oli go prij long hem, mo mi rerem rod blong olgeta tu blong go long ol kantri ya. Plen i sas long taem ya, so plante long ol misinari we oli go long ol ples olsem Afrika mo Esia, oli travel long sip blong kago nomo. Long ol yia biaen, taem plen i no moa sas tumas, plante misinari oli travel long plen.

Long 1960, mi mekem rod blong ol brata mo sista long Amerika blong oli save travel long plen blong go long wan Intenasenal asembli long Yurop, long yia 1961. Mi mi go from asembli ya long Hamburg, Jemani. Afta long asembli, mi wetem tri brata blong Betel, i rentem wan trak mo mifala i go long Itali mo visit branj ofis blong Rom. Afta mifala i go long Franis, mifala i krosem ol hil blong Pyrenees, mo go long Spen, we long taem ya oli putum tabu long wok blong yumi. Mifala i gat janis blong givim sam buk long ol brata blong Baselona. Mifala i kavremap ol buk ya blong mekem i luk olsem wan presen. !Mifala i glad tumas blong mitim olgeta! Ale mifala i draev i go long Amstedam, mo long ples ya mifala i go long plen mo gobak long Niu Yok.

Long 1962, oli askem mi blong mekem rod blong 583 brata mo sista we bambae oli go long ol defren Intenasenal asembli raon long wol. Hemia wan asembli blong 1963 we i se “Gud Nius Blong Olwe.” Ol brata mo sista ya bambae oli go long asembli ya long Yurop, Esia, Saot Pasifik, mo biaen long Honolulu, Hawai, mo laswan long  Pasadena, Kalifonia. Mo tu bambae oli go long Lebanon mo Jodan blong visitim ples we Baebol i kamaot long hem. Dipatmen blong mifala i lukluk long ol tikit blong plen, ol hotel we bambae oli slip long hem, mo ol visa.

Yia 1963 i wan impoten yia, from we long 29 Jun, mi mared long Lila Rogers, we hem i blong Missouri. Hem i kam wok long Betel long yia 1960. Wan wik afta we mitufala i mared, Lila i folem mi blong travel i go long Gris, Ijip, mo Lebanon. Long ples ya, mitufala i gat janis blong visitim Jodan. Long ples ya oli putum tabu long wok blong yumi mo ol haeman oli no givim visa long ol Witnes blong Jehova. Taswe mitufala i no sua se wanem bambae i hapen taem mitufala i kasem ples ya. !Mitufala i glad mo sapraes tumas taem mitufala i luk se long epot, i gat sam brata mo sista oli stanap wetem wan bigfala saen we i se “Welkam Ol Witnes Blong Jehova”! I gud tumas blong visitim ples we Baebol i kamaot long hem, mo luk ol ples we Ebraham, Aesak, mo Jekob oli laef long hem, mo ples we Jisas mo ol aposol oli prij long hem, mo ples we wok blong ol Kristin i stat long hem mo i go kasem “olgeta ples long wol.”—Ol Wok 13:47.

Lila i sapotemgud mi blong 55 yia. Plante taem mitufala i go long Spen mo Potugal nating se oli putum tabu long wok blong yumi. Mitufala i stap leftemap tingting blong ol brata mo sista mo karem ol buk blong olgeta mo ol nara samting we oli nidim. Mitufala i gat janis tu blong visitim sam brata we oli stap kalabus long Cádiz, Spen. Mi mi glad tumas blong mekem wan tok blong leftemap tingting blong olgeta.

Stat long 1963, mi mekem rod blong ol brata oli save go long ol Intenasenal asembli long ol ples olsem, Afrika, Ostrelia, Sentrol mo Saot Amerika, Yurop, Hawai, Niusilan, Puerto Rico mo sam nara kantri bakegen. Mi mo Lila i go tu long sam asembli we mitufala i no save fogetem, olsem hemia long Warsaw, Poland, long yia 1989. Plante brata mo sista blong Rasia oli kam long bigfala asembli ya. !Hemia wan long ol faswan asembli blong olgeta! Long ples ya, mitufala i mitim sam brata mo sista we oli bin go long kalabus from bilif blong olgeta long Soviet Yunion blong plante yia.

Wan narafala wok we mi laekem tumas, hemia blong visitim mo leftemap tingting blong olgeta long Betel mo ol misinari raon long fulwol. Laswan visit blong mitufala hemia long Saot Koria. Mitufala i go luk ol 50 brata we oli stap kalabus long Suwon. Olgeta evriwan oli gat strong tingting mo oli stap wet long taem ya we bambae i no moa gat wan samting i blokem olgeta blong mekem wok blong Jehova. !Visit ya long kalabus i leftemap tingting blong mitufala bigwan!—Rom 1:11, 12.

Mi luk olsem wanem Jehova i blesem ol man blong hem long ol yia we i pas. Taem mi baptaes long 1943, i gat samwe long 100,000 pablisa nomo. Naoia i gat moa long 8 milian Witnes long  240 kantri. Ol brata mo sista we oli finis long Skul blong Gilead, oli givhan bigwan blong mekem namba ya i go antap. Mi harem gud tumas blong wok klosap wetem ol misinari ya mo halpem olgeta blong oli go long ol ples we oli mas prij long hem.

Mi mi glad tumas se taem mi yangfala yet, mi mekem desisen blong yusum laef blong mi long wok blong Jehova, mo mi aplae blong go wok long Betel. Jehova i blesem mi long ol yia ya. Antap long ol samting we mitufala i harem gud long hem long Betel, mi mo Lila i glad tu blong prij wetem 50 defren kongregesen long Brooklyn, mo mitufala i faenem sam gudfala fren.

Evridei Lila i halpem mi blong gohed blong wok long Betel. Nating se naoia mi gat bitim 84 yia, mi glad yet se mi save mekem sam gudfala wok mo givhan long sam wok blong branj ofis.

I wan bigfala blesing blong stap long ogenaesesen blong Jehova mo blong luk olsem wanem tok blong Malakae 3:18 (NW) i kamtru, we i se: “Bambae yufala i save luk bakegen wanem nao i stap mekem stret man i defren long rabis man, mo wanem nao i stap mekem man blong wok blong God i defren long man we i no wok blong God.” Evridei yumi luk se ol samting blong wol oli stap kam moa nogud, ol man oli no gat hop mo oli no glad tumas long laef. Be ol man we oli lavem Jehova mo oli mekem wok blong hem, oli harem gud tumas long laef, mo oli gat wan gudfala hop long fiuja. !I wan bigfala blesing blong talemaot gud nius long ol narafala! (Matiu 24:14) I no longtaem, Kingdom blong God bambae i mekem se wol ya i kam paradaes. !Yumi wantem tumas se dei ya i kam! Long taem ya, evriwan bambae oli helti, oli glad, mo bambae oli laef olwe.