1, 2. (1) ?Jisas i luk wanem wok se i moa impoten? (2) ?Olsem wanem blong kam wan nambawan “man blong wok blong God”?

JISAS KRAES i wan kapenta mo biaen hem i kam man blong talemaot gud nius. (Mak 6:3; Rom 15:8) Hem i mekemgud tufala wok ya. Olsem wan kapenta, hem i lanem olsem wanem blong yusum ol tul blong kapenta blong wokem sam gudfala samting long wud. Olsem man blong talemaot gud nius, hem i yusum dip save blong hem long Baebol, blong halpem ol man blong oli kasemsave long trutok blong God. (Matiu 7:28; Luk 24:32, 45) Taem Jisas i gat 30 yia, hem i stop blong mekem wok blong kapenta mo hem i kam man blong talemaot gud nius, from we hem i save se wok ya nao i moa impoten blong mekem. Hem i talem se wan risen from wanem God i sanem hem i kam long wol, hemia blong talemaot gud nius blong Kingdom blong God. (Matiu 20:28; Luk 3:23; 4:43) Impoten samting long laef blong Jisas, hemia blong talemaot gud nius, mo hem i wantem se ol narafala oli mekem sem mak.—Matiu 9:35-38.

² Maet yumi no wan kapenta, be yumi evriwan i gat  wok ya blong talemaot gud nius. God i joen wetem yumi long wok ya, taswe hemia wan impoten wok. Yes, yumi “ol man blong wok blong God.” (1 Korin 3:9; 2 Korin 6:4) Ating yumi agri wetem tok blong man blong raetem sam we i se: “Stamba blong ol tok blong yu, hem i trutok.” (Ol Sam 119:159, 160) Tok blong Jehova hem i trutok. Taswe taem yumi prij, yumi mas ‘tijim trutok long fasin we i stret.’ (Ridim 2 Timoti 2:15.) Mo yumi mas traehad blong yusumgud nambawan tul ya Baebol, blong tijim ol man long saed blong Jehova, Jisas, mo Kingdom. Mo tu ogenaesesen blong Jehova i givim sam gudfala tul we yumi save yusum long wok blong prij, mo yumi mas save olsem wanem blong yusum ol tul ya, we oli stap long Ol Tul Blong Tijim Man.

3. ?Wanem mak blong yumi taem yumi prij? ?Olsem wanem Ol Wok 13:48 i halpem yumi blong mekem samting ya?

³ Maet yu stap tingting se, ?from wanem yumi talem Ol Tul Blong Tijim Man be i no Ol Tul Blong Prij? Hemia from we tok ya “prij,” i min se yumi talemaot wan mesej, be tok ya “tijim,” i min se yumi eksplenem mesej ya blong man i kasemsave, nao hem i save folem samting we hem i lanem. Naoia we en i klosap tumas, mak blong yumi hemia blong faenem moa Baebol stadi mo tijim trutok long ol man. Hemia i min se yumi mas wok strong blong faenem “olgeta we oli stret blong kasem laef we i no save finis,” mo halpem olgeta tu blong oli mekem wok blong Jehova.—Ridim Ol Wok 13:44-48.

4. ?Olsem wanem blong faenem “olgeta we oli stret blong kasem laef we i no save finis”?

⁴ ?Olsem wanem blong faenem “olgeta we oli stret blong kasem laef we i no save finis”? Long taem bifo, ol fas Kristin oli mas prij blong faenem ol gudfala man. Jisas i talem long ol disaepol blong hem se: “Taem yufala i go long wan taon no long wan vilej, yufala i mas faenem wan gudfala man we i glad blong lesin long yufala.” (Matiu 10:11) Tede yumi mas mekem sem mak. Be sipos man i no tok tru, i praod, o i no kea long God, maet bambae hem i no lesin long gud nius. Taswe yumi wantem lukaot ol man we oli tok tru, oli gat tingting daon, mo oli wantem save trutok. Wok blong faenem ol gudfala man, i sem mak long wok we Jisas i bin mekem olsem wan kapenta. Taem hem i wantem wokem wan doa, wan yok, o wan narafala samting, fastaem hem i mas lukaot wan gudfala wud. Taem hem i faenem, hem i tekem ol tul blong hem mo i wokem samting we hem i wantem. Long sem fasin, fastaem yumi mas lukaot ol gudfala man, biaen yumi save yusum ol tul blong yumi blong pulum olgeta oli kam disaepol.—Matiu 28:19, 20.

5. ?Yumi mas save wanem long saed blong ol tul we oli stap long Tul Blong Tijim Man? Talem wan eksampol. (Yu luk pija long stat blong stadi.)

⁵ Evri tul oli gat prapa wok blong olgeta. Traem tingbaot ol tul we Jisas i yusum blong mekem wok blong kapenta. * Hem i nidim ol tul blong makem wud, katem, stretem, drilim, levelem,  mo joenem ol pis wud tugeta. Long sem fasin, ol tul blong prij we oli stap long Tul Blong Tijim Man, oli gat prapa wok blong olgeta. I gud yumi luk olsem wanem blong yusum olgeta.

6, 7. (1) ?Yu yu yusum ol kad blong jw.org olsem wanem? (2) ?From wanem yumi stap yusum ol invetesen blong ol miting?

⁶ Ol Kad Blong jw.org. Hemia ol smol kad we oli talemaot se yumi Ol Witnes Blong Jehova, mo oli pulum man i go long websaet blong yumi. Taem man i go long websaet, hem i faenem moa save long saed blong yumi, mo i save askem blong stadi Baebol. I gat bitim 400,000 man we oli bin go long jw.org blong askem Baebol stadi, mo evridei moa long wan handred man oli askem blong stadi Baebol. Taswe i gud we oltaem yu holem ol kad ya, mo givimaot long ol man we yu toktok long olgeta.

⁷ Ol Invetesen. Ol tok we i stap long invetesen blong miting, i talem se: “Yu yu welkam blong kam stadi Baebol wetem Ol Witnes Blong Jehova.” Mo i gohed i se, stadi ya yu save kasem “long ol miting blong mifala” o “narafala i save mekem wetem yu.” Taswe, ol invetesen oli talemaot se yumi hu, mo oli pulum ‘man we i nidim God,’ blong i stadi Baebol. (Matiu 5:3) Be eni man i welkam blong kam long miting, nating sipos hem i no stadi Baebol. Taem oli kam long miting, bambae oli luk se oli save lanem plante samting long Baebol.

8. ?From wanem i gud sipos man i save kam long wan miting blong yumi? Talem wan stori.

⁸ I impoten we yumi gohed blong invaetem man i kam long miting. Taem man i kam long miting, bambae hem i luksave se yumi stap tijim trutok mo yumi halpem man blong i save God. (Aesea 65:13) Eksampol, Rei mo Linda, wan kapol long Yunaeted Stet, oli wantem blong savegud God. Ale tufala i plan blong visitim evri jos long taon blong tufala, mo tufala i wantem pruvum tu samting. Faswan, tufala i mas lanem wan samting long jos. Sekenwan, tufala i wantem luk se ol memba blong jos oli werem ol klos we i soem ona long God. I gat fulap jos, taswe i tekem plante yia blong visitim evri jos. Be tufala i no glad nating, from we tufala i no lanem wan samting, mo klos blong ol memba blong ol jos ya i no soem respek. Wan dei, afta we tufala i visitim laswan jos, Linda i go long wok mo Rei i stap ron long trak blong gobak long haos. Be hem i luk wan Haos Kingdom, nao i stap tingting se: ‘Bae mi traem go luk se wanem i hapen insaed.’ Hem i luk se evriwan oli joengud, oli kaen, mo oli werem ol klos we i soem respek. !Rei i go sidaon long fored mo i laekem samting we hem i lanem! Aposol Pol i tokbaot wan man olsem, mo man ya i talem se: “I tru se God i stap wetem yufala.” (1 Korin 14:23-25) Yes, Rei i gohed blong kam long miting evri Sande, mo biaen long ol miting blong wik. Linda tu i kam long olgeta miting, mo nating se tufala i gat bitim 70 yia, be tufala i stadi Baebol mo tufala i baptaes.

9, 10. (1) ?From wanem ol traket ya oli isi blong yusum? (2) Tokbaot olsem wanem blong yusum traket ya ?Kingdom Blong God Hem i Wanem?

⁹ Ol Traket. Yumi gat eit traket we oli stap long ol tul blong tijim man. I isi blong yusum olgeta, mo oli pulum man blong i save storian. !Faswan long ol traket ya i kamaot long 2013, mo oli printim samwe long 5 bilian kopi! Oli wokem evri traket ya long sem fasin nomo. Sipos yu save olsem wanem blong yusum wan long olgeta, bambae yu naf blong yusum evriwan. ?Olsem wanem blong yusum wan traket blong statem storian?

¹⁰ Sipos yu wantem yusum traket ya ?Kingdom Blong God Hem i Wanem? Yu soem kwestin long fran pej mo yu askem long man se: “?Samtaem yu stap tingbaot se Kingdom blong God hem i wanem? Yu ting se . . . ” Biaen yu askem hem blong i jusum wan long ol trifala ansa we i stap. Afta we hem i ansa, yu openem traket long haf ya “Samting We Baebol i Talem” mo yu ridim Daniel 2:44 mo Aesea 9:6. Long en blong storian, yu askem kwestin we i stap long las pej aninit long haf ya “Yu Traem Tingbaot”: “Taem Kingdom blong God i rul, ?laef blong ol man bambae i olsem wanem?” Yu save ansarem kwestin ya nekis taem we yu kam. Taem yu kambak, yu save tokbaot lesen 7 blong buklet ya !Gud Nius We i Kamaot Long God!, we i wan tul blong statem Baebol stadi.

11. ?Taetel blong magasin i blong mekem wanem mo yumi mas save wanem?

¹¹ Ol Magasin. Magasin we oli printim mo givimaot moa long olgeta ples long wol, hemia Wajtaoa mo !Wekap! Plante man oli ridim tufala magasin ya, taswe oli wokem ol taetel mo pija long fran pej, blong pulum intres blong ol man long evri ples. Yumi mas yusum ol magasin ya, blong halpem man blong i luksave samting we i moa impoten blong mekem. Be fastaem, yumi mas save se oli wokem ol magasin ya blong givimaot long weswan man.

12. (1) ?Oli wokem !Wekap! blong givhan long hu? (2) Tokbaot wan ekspiriens blong yu taem yu yusum tul ya.

¹² !Wekap! Oli wokem blong givhan long ol man we oli gat smol save long Baebol o oli no save nating. Maet oli neva harem ol tijing blong Kraes, oli no trastem ol jos, o maet oli no bilif se Baebol i save halpem olgeta. Wan impoten samting we !Wekap! i mekem, hemia blong pruvum se i gat wan God we i laef. (Rom 1:20; Hibrus 11:6) Mo tu, !Wekap! i halpem man blong i trastem Baebol se “i tok blong God.” (1 Tesalonaeka 2:13) Hemia ol taetel blong trifala !Wekap! blong 2018: “?Olsem Wanem Yu Save Glad?” “12 Rod Blong Gat Wan Hapi Famle,” mo “?Wanem i Save Givhan Taem Wan Famle i Ded?”

13. (1) ?Wajtaoa blong seremaot i blong givhan long hu? (2) Tokbaot wan ekspiriens blong yu taem yu yusum tul ya.

¹³ Wajtaoa blong seremaot. Oli wokem magasin ya blong eksplenem ol tijing  blong Baebol long ol man we oli gat save lelebet long saed blong God mo Baebol. Maet oli save sam samting long Baebol, be oli no kasem stret save. (Rom 10:2; 1 Timoti 2:3, 4) Ol trifala Wajtaoa blong 2018, oli ansa long ol kwestin ya: “?Baebol i Blong Bifo Nomo?” “?Wanem Fiuja Blong Yu?” mo “?God i Kea Long Yu?”

14. (1) ?Ol video we oli stap long Tul Blong Tijim Man oli blong mekem wanem? (2) Tokbaot sam ekspiriens blong yu taem yu yusum ol video ya.

¹⁴ Ol Video. Long taem blong Jisas, ol kapenta oli no yusum ol elektrik tul. Be tede, ol kapenta oli gat ol elektrik tul olsem, ol so, ol dril, mo ol masin blong mekem wud i smut. Long sem fasin, tede yumi gat ol naesfala video blong soem long ol man. Fo long ol video ya oli stap long tul blong tijim man: : ?From Wanem Yu Mas Stadi Baebol?, ?Oli Mekem Baebol Stadi Olsem Wanem?, ?Wanem i Stap Hapen Insaed Long Haos Kingdom?, mo Ol Witnes Blong Jehova—?Oli Hu? Ol video we oli sot, oli no plei kasem 2 minit mo i isi blong yusum olgeta taem yumi prij. Be ol video we oli longfala, yumi save yusum olgeta taem yumi mekem visit o taem man i intres. Ol video ya oli naes tumas, from we oli pulum man blong i stadi Baebol mo i kam long miting.

15. ?Wanem i hapen taem man i wajem video long prapa lanwis blong hem? Tokbaot sam eksampol.

¹⁵ Eksampol, wan sista i mitim wan woman Maekronesia we i toktok lanwis Yapese. Sista ya i soem video ya ?From Wanem Yu Mas Stadi Baebol? long lanwis Yapese. Taem video ya i stat blong plei, woman ya i talem se: “!Tru ya! !Lanwis blong mi ya! !Man ya i toktok long lanwis blong mi stret!” Biaen, woman ya i talem se bambae hem i ridim mo wajem evri samting we i stap long lanwis blong hem long jw.org. (Skelem wetem Ol Wok 2:8, 11.) Wan narafala eksampol hemia wan sista long Yunaeted Stet, we i yusum sem video ya, be long wan defren lanwis. Sista ya i sanem link blong video ya i go long boe blong brata blong hem. Boe ya i stap long wan narafala kantri mo i wajem video ya, biaen hem i sanem imel long sista ya mo i se: “Haf we i pulum tingting blong mi, hemia haf we i soem Setan we i kontrolem wol. Saye, mi askem finis blong stadi Baebol.” Hemia i rili naes from we boe ya i stap long wan kantri we oli putum tabu long wok blong yumi.

16. Eksplenem wok blong ol buklet ya: (1) Yu Mas Lesin Long God Nao Bambae Yu Laef Olwe. (2) !Gud Nius We i Kamaot Long God! (3) ?Hu i Stap Mekem Samting We Jehova i Wantem?

¹⁶ Ol Buklet ?Olsem wanem blong tijim trutok long wan man we i no save ridgud o we i nogat eni buk long lanwis blong hem? Yumi save yusum buklet ya Yu Mas Lesin Long God Nao Bambae Yu Laef Olwe. Wan nambawan tul blong statem stadi hemia buklet ya, !Gud Nius We i Kamaot Long God! Yu save soem ol 14 kwestin we oli stap long las pej mo yu askem man blong i jusum kwestin we hem i laekem. Biaen,  yu openem buklet long kwestin ya mo yu statem stadi blong hem. ?Yu bin traem samting ya finis taem yu mekem visit long wan man? Namba tri buklet we i stap long ol tul blong tijim man hemia, ?Hu i Stap Mekem Samting We Jehova i Wantem? Oli wokem buklet ya blong tijim ol Baebol stadi long saed blong ogenaesesen blong yumi. Blong save olsem wanem blong yusum buklet ya, yu luk Kristin Wok Mo Laef-Buk Blong Miting blong Maj 2017.

17. (1) ?Wanem mak blong ol buk we yumi yusum blong mekem stadi? (2) ?Nating se wan man i baptaes finis, be hem i mas mekem wanem? ?From wanem?

¹⁷ Ol Buk. Afta we yu statem stadi wetem wan man long buklet, yu save jenis enitaem i go long buk ya ?Baebol i Tijim Wanem? Buk ya i halpem man blong i kasem save ol stamba tijing blong Baebol. Sipos Baebol stadi blong yu i gohedgud mo i finisim buk ya, yu save gohed long buk ya Stap Long Laef Ya We God i Lavem Yu. Buk ya bambae i halpem hem blong folem ol samting we hem i lanem. Yu mas tingbaot se, nating sipos hem i baptaes finis, be hem i mas gohed blong stadi kasem we hem i finisim tufala buk ya. Hemia bambae i givhan long hem blong gat strong bilif long Jehova mo holemstrong long hem.—Ridim Kolosi 2:6, 7.

18. (1) ?1 Timoti 4:16 i leftemap tingting blong yumi blong mekem wanem, mo wanem frut i kamaot from? (2) ?Wanem mak blong yumi taem yumi yusum Ol Tul Blong Tijim Man?

¹⁸ Yumi Ol Witnes Blong Jehova, yumi gat wok ya blong tijim ol man long “trutok blong gud nius,” we i lidim man blong kasem laef we i no save finis. (Kolosi 1:5; ridim 1 Timoti 4:16.) Yumi gat Ol Tul Blong Tijim Man we oli givhan long yumi blong mekemgud wok ya. (Yu luk bokis ya “ Ol Tul Blong Tijim Man.”) I gud yumi yusumgud ol tul ya. Yumi save jusum weswan tul blong yusum, mo wetaem blong yusum. Be yumi no mas seremaot magasin olbaot nomo, mo yumi no mas givimaot long man we i no intres. Mak blong yumi, hemia blong pulum man we i tok tru, i gat tingting daon, mo i rili wantem save moa long saed blong God, blong i kam disaepol. Hemia nao man we i “stret blong kasem laef we i no save finis.”—Ol Wok 13:48; Matiu 28:19, 20.