1. ?Jehova i save mekem wanem, blong stamba tingting blong hem i kamtru?

JEHOVA i save kam olsem hem i wantem, blong mekem stamba tingting blong hem i kamtru. Long taem bifo, Jehova i kam wan Tija, wan Papa we i leftemap tingting, wan Man blong talemaot gud nius, mo plante moa samting bakegen. (Aes. 48:17; 2 Kor. 7:6; Gal. 3:8) Be plante taem hem i stap yusum ol man, blong mekem tingting blong hem i kamtru. (Mat. 24:14; 28:19, 20; 2 Kor. 1:3, 4) Jehova i save givim waes mo paoa long eniwan blong mekem samting we hem i wantem, nao stamba tingting blong hem i save kamtru. Hemia nao mining blong nem blong Jehova, folem samting we plante man blong stadi dip oli talem.

2. (1) ?From wanem samtaem yumi ting se Jehova i no save yusum yumi? (2) ?Long stadi ya, bambae yumi tokbaot wanem?

² Yumi evriwan i wantem se Jehova i yusum yumi, be maet sam long yumi oli ting se Jehova i no save yusum olgeta. ?From wanem? From we oli harem se yia blong olgeta mo ol trabol long laef blong olgeta i blokem olgeta, o oli no naf. Be sam narafala oli ting se oli naf finis, mo i no nid blong oli traehad moa. Long stadi ya, bambae yumi tokbaot olsem wanem Jehova i save mekem eniwan long yumi i naf, blong mekem stamba tingting blong hem i kamtru. Afta, bambae yumi tokbaot olsem wanem Jehova i mekem se sam man mo woman long Baebol oli wantem wok mo oli gat paoa blong wok. Mo  biaen, bambae yumi tokbaot olsem wanem yumi save letem Jehova i yusum yumi.

3. Folem Filipae 2:13, ?olsem wanem Jehova i mekem se yumi wantem wok?

³ Ridim Filipae 2:13. * Jehova i save mekem se yumi wantem wok. ?Olsem wanem hem i mekem samting ya? Maet yumi faenemaot se wan brata o sista i nidim help, o i gat wan wok blong mekem long kongregesen. Sipos no, maet ol elda oli ridim wan leta we i kam long branj ofis, blong tokbaot wan ples afsaed long teritori blong kongregesen we i nidim moa man blong wok. Long taem olsem, maet yumi askem se: ‘?Mi save mekem wanem blong givhan?’ Sipos no, maet oli askem long yumi blong mekem wan wok we i had, nao yumi ting se yumi no naf. O yumi ridim sam vas long Baebol, nao yumi askem se: ‘?Olsem wanem mi save folem ol tok ya blong givhan long narafala?’ Jehova i no save fosem yumi blong mekem wan samting. Be taem hem i luk se yumi stap tingting olsem, hem i save mekem se yumi wantem wok.

4. ?Olsem wanem Jehova i save givim paoa blong wok?

⁴ Mo tu, Jehova i save givim paoa blong wok. (Aes. 40:29) Hem i save givim tabu spirit long yumi blong mekem wok blong yumi i kam gud moa, nating se yumi gat gudhan finis. (Eks. 35:30-35)Jehova i save yusum oganaesesen blong hem blong tijim yumi olsem wanem blong mekem sam wok. Sipos yu no sua olsem wanem blong mekem wan wok, i gud yu askem help. Mo tu, yu no mas fraet blong askem long Papa blong yumi long heven we i gat gladhat blong givim presen, blong i givim “paoa ya we i bigwan bitim mak.” (2 Kor. 4:7; Luk 11:13) Baebol i tokbaot plante man mo woman we Jehova i mekem se oli wantem wok mo oli gat paoa blong wok. Taem yumi tokbaot sam long olgeta, yu traem tingbaot olsem wanem Jehova i save yusum yu olsem we hem i yusum olgeta.

5. ?Stori blong Moses i tijim yumi long wanem?

⁵ Jehova i mekem se Moses i kam wan man blong sevem ol man Isrel. ?Be wetaem Jehova i yusum Moses? ?Afta we oli tijim hem “long olgeta waes blong ol man Ijip” mo hem i ting se hem i naf? (Wok 7:22-25) Nogat. Fastaem Jehova i givhan long hem blong i gat tingting daon mo i kam wan kwaet man, nao biaen hem i jes yusum hem. (Wok 7:30, 34-36) Jehova i mekem se Moses i no fraet blong stanap long fored blong king ya we i gat moa paoa i bitim ol narafala rula long Ijip. (Eks. 9:13-19) ?Yumi lanem wanem? Yumi lanem se Jehova i yusum olgeta we oli traehad blong folem ol gudfala fasin blong hem, mo oli dipen long hem blong i givim paoa.—Fil. 4:13.

6. ?Stori blong Basilae i tijim yumi long wanem?

⁶ Plante handred yia biaen, Jehova i yusum Basilae blong halpem King Deved. Taem Deved mo ol man blong hem oli stap ronwe long Absalom, boe blong Deved, “oli hanggri, mo oli tosta mo oli taed.” Basilae, we i olfala finis, wetem sam narafala man, oli putum laef blong olgeta long denja blong givim ol samting we Deved mo ol man blong hem oli nidim. Basilae i no ting se hem i olfala tumas blong Jehova i yusum hem. Be hem i glad blong yusum samting we hem i gat blong halpem ol man blong God. (2 Saml. 17:27-29) ?Yumi lanem wanem? Nating se yumi olfala, Jehova i save yusum yumi yet blong givhan long ol brata mo sista we oli sot long sam samting, long ples  blong yumi o long narafala kantri. (Prov. 3:27, 28; 19:17) Maet yumi no save go luk olgeta blong givhan, be yumi save givim presen mane blong sapotem wok we i gohed long fulwol, nao oganaesesen i save yusum long ples mo long taem we i nidim.—2 Kor. 8:14, 15; 9:11.

7. ?Olsem wanem Jehova i yusum Simeon? ?Olsem wanem samting ya i save leftemap tingting blong yumi?

⁷ Jehova i promes long Simeon, wan olfala man long Jerusalem we i holemstrong long hem, se bambae hem i luk Mesaea bifo we hem i ded. Yumi save se promes ya i mas leftemap tingting blong Simeon bigwan, from we hem i stap wet plante yia blong luk Mesaea. Jehova i blesem hem from bilif blong hem mo from we hem i stanap strong longtaem. Wan dei, “tabu spirit i lidim hem” i go insaed long tempol. Nao hem i luk bebi Jisas, mo Jehova i yusum hem blong talem wan profet tok long saed blong pikinini ya we bambae i kam Kraes. (Luk 2:25-35) Nating se maet Simeon i no luk ol wok we Jisas i mekem long wol, be hem i glad long blesing we hem i kasem. !Mo bambae hem i kasem blesing we i gud moa long fiuja! Long niufala wol, gudfala man ya bambae i luk olsem wanem rul blong Jisas i blesem olgeta famle long wol. (Jen. 12:3) Yumi tu, yumi save glad long enikaen blesing we Jehova i givim, taem yumi mekem wok blong hem.

8. ?Olsem wanem Jehova i save yusum yumi olsem we hem i yusum Banabas?

⁸ Long taem blong ol fas Kristin, gudfala man ya Josef i glad we Jehova i yusum hem. (Wok 4:36, 37) Josef i gat nambawan fasin ya blong leftemap tingting blong ol narafala, taswe ol aposol oli singaotem hem se Banabas we i minim “Man Blong Leftemap Tingting.” Afta we Sol i kam Kristin, plante brata oli fraet long hem, from we hem i bin mekem i nogud long ol kongregesen. Be Banabas i leftemap tingting blong Sol, mo yumi save se Sol i mas glad long kaen fasin blong hem. (Wok 9:21, 26-28) Biaen, ol elda long Jerusalem oli luk se ol brata long Antiok long Siria oli nidim narafala blong leftemap tingting blong olgeta. ?Ale, oli sanem hu? !Banabas! Hemia wan gudfala desisen. Baebol i talem se Banabas “i talem ol gudfala toktok blong pulum olgeta evriwan blong oli gohed blong mekem wok blong Masta wetem strong tingting.” (Wok 11:22-24) Tede tu, Jehova i save mekem yumi i kam “Man Blong Leftemap Tingting” blong ol narafala Kristin. Maet hem i yusum yumi blong leftemap tingting blong olgeta we wan famle blong olgeta i ded. Maet hem i pulum yumi blong visitim o telefon long wan brata o sista we i sik o tingting i foldaon. ?Yu yu glad sipos Jehova i yusum yu olsem we hem i yusum Banabas?—1 Tes. 5:14.

9. ?Stori blong Vasily i tijim yumi long wanem?

⁹ Jehova i givhan long wan brata we nem blong hem Vasily, blong i kam wan gudfala man blong lukaot long ol sipsip long kongregesen. Taem hem i gat 26 yia, hem i kam wan elda, be hem i fraet se hem i no naf blong givhan long ol brata mo sista, antap moa olgeta we oli fesem hadtaem. Be ol brata we oli elda longtaem finis oli trenem hem, mo hem i joen tu long Kingdom Ministri Skul. Hem i wok had blong kam gud moa. Hem i mekem wan lis, mo taem hem i kam gud long ol smosmol samting ya, hem i no moa fraet. Hem i talem se: “Samting we mi fraet long hem bifo, naoia i givim bigfala glad long mi. Taem Jehova i givhan long mi blong mi faenem stret vas blong leftemap tingting blong wan brata o sista, mi mi harem gud tumas.” Ol brata, sipos yufala i glad we Jehova i yusum yufala olsem Vasily, hem i save mekem yufala i naf blong lukaot long ol bigfala wok long kongregesen.

10. ?Abigel i mekem wanem, mo yumi lanem wanem from?

¹⁰ Deved mo ol man blong hem oli nidim help, from we King Sol i stap ronem olgeta. Ol man blong Deved oli askem long Nabal, wan rijman long Isrel, blong i givim smol kakae. Oli harem se i no rong blong askem, from we oli stap lukaot long ol sipsip blong Nabal long draeples. Be Nabal i no wantem givim. Deved i kros we i kros mo i wantem go kilim i ded Nabal wetem ol man long famle blong hem, ol woman nomo oli stap. (1 Saml. 25:3-13, 22) Be Abigel, naesfala waef blong Nabal, i waes mo hem i no fraet blong go luk Deved. Hem i foldaon long graon long fored blong hem, mo i plis long hem blong i no givimbak nogud fasin blong Nabal, we i save mekem se Deved i gat fol long fes blong God. Long kaen fasin, hem i talem long Deved se i moa gud we hem i lego bisnes ya i stap long han blong Jehova. Waes fasin blong Abigel mo toktok blong hem we i soemaot tingting daon, i tajem hat blong Deved. Hem i luksave se Jehova i sanem Abigel. (1 Saml. 25:23-28, 32-34) Abigel i wokem ol gudfala fasin we oli mekem se Jehova i save yusum hem. Tede tu, Jehova i save yusum ol sista we oli kaen mo oli waes, blong oli mekem famle blong olgeta mo ol narafala long kongregesen, oli kam strong moa.—Prov. 24:3; Taet. 2:3-5.

11. ?Ol gel blong Salum oli mekem wanem? ?Hu i folem fasin blong olgeta tede?

¹¹ Plante handred yia biaen, Jehova i yusum ol gel blong Salum wetem sam narafala, blong oli wokem bakegen stonwol blong Jerusalem. (Neh. 2:20; 3:12) Nating se papa blong olgeta i pikinini blong king, be oli glad blong mekem wok ya we i had mo i denja. (Neh. 4:15-18) !Oli defren olgeta long ol haeman blong Tekoa, we “oli no wantem” wok had! (Neh. 3:5) !Traem tingbaot olsem wanem ol gel blong Salum oli glad taem stonwol ya i finis long 52 dei nomo! (Neh. 6:15) Tede tu, plante gudfala sista oli glad blong joen long spesel wok ya blong bildim mo fiksimap ol haos wosip. Yumi nidim ol sista ya we oli gat gudhan, oli glad blong wok, mo oli holemstrong long God, blong oli givhan long ol bigfala wok ya.

12. ?Olsem wanem Jehova i save yusum yumi, olsem we hem i yusum Tabita?

¹² Jehova i pulum Tabita blong i ‘mekem ol gudfala wok mo i givim presen long ol puaman,’ speseli long ol wido. (Wok 9:36) From we hem i kaen olsem mo i gat gladhat blong givim presen, taem hem i ded, plante oli krae we oli krae. Be oli glad tumas taem aposol Pita i mekem Tabita i laef bakegen. (Wok 9:39-41) ?Yumi lanem wanem? Yumi lanem se nating we yumi yangfala o olfala, man o woman, be yumi save mekem plante samting blong givhan long ol brata mo sista.—Hib. 13:16.

13. ?Olsem wanem Jehova i yusum Rut, mo Rut i talem wanem?

¹³ Rut i wan sista we i stap sem. Taem hem i yang, hem i wok strong blong givimaot ol traket long ol haos wanwan. Hem i laekem wok ya mo i wantem kam wan misinari. Be i had blong hem i tokbaot Kingdom blong God long ol man. Nating se i olsem, taem hem i gat 18 yia, hem i kam fultaem paenia. Long 1946, hem i go long Skul blong Gilead, mo biaen hem i go prij long Hawai mo Japan. Jehova i yusum Rut long bigfala fasin, blong i talemaot gud nius long tufala kantri ya. Klosap long 80 yia afta we hem i stat long wok blong prij, hem i talem se: “Jehova i mekem mi mi strong. Hem i halpem mi blong mi winim fasin blong sem. Mi bilif strong se Jehova i save yusum eniwan we i trastem hem.”

14. Folem Kolosi 1:29, ?yu mas mekem wanem sipos yu wantem we Jehova i yusum yu?

¹⁴ Long taem bifo, Jehova i yusum ol man blong hem blong oli mekem plante defren wok. ?Bambae hem i yusum yu blong mekem wanem? Plante samting i dipen long yu. Yu mas glad blong wok had. (Ridim Kolosi 1:29.) Sipos yu letem Jehova i yusum yu, hem i save mekem yu yu kam wan man blong talemaot gud nius, wan gudfala tija, wan man blong leftemap tingting, wan wokman we i gat gudhan, wan gudfala fren, o eni samting we hem i wantem.

15. Folem 1 Timoti 4:12, 15, ?i gud ol yangfala brata oli askem wanem long Jehova?

¹⁵ ?Olsem wanem long ol yangfala brata? I gat bigfala nid blong ol brata we oli rere blong wok had. Yufala i save kam man blong givhan mo mekem bigfala wok long kongregesen. Long plante kongregesen, i gat moa elda i bitim ol man blong givhan. ?Olsem wanem? ?Yufala i save wokem tingting ya blong wantem mekem moa long kongregesen? Sam brata oli talem se: “Mi mi glad blong gohed olsem pablisa nomo.” Sipos yu gat tingting olsem, prea long Jehova blong i halpem yu blong yu wantem kam wan man blong givhan. Askem long hem blong i givim paoa long yu blong mekem evri samting we yu naf blong mekem long wok blong hem. (Pri. 12:1) !Kongregesen i nidim help blong yufala!—Ridim 1 Timoti 4:12, 15.

16. ?Yumi mas askem wanem long Jehova? ?From wanem?

¹⁶ Jehova i save yusum yumi blong mekem eni samting we hem i wantem. Taswe yu mas askem long hem blong i mekem se yu wantem wok, mo i givim paoa blong wok. Nating se yu yangfala o yu olfala, yu save yusum taem, paoa, mo ol narafala samting blong yu, blong ona long Jehova. (Pri. 9:10) Yu no mas letem fraet i winim yu, mo yu no mas harem se yu no naf. Olsem nao, bambae yu no save mestem gudfala janis blong mekem bes blong yu long wok blong Jehova. !Yumi evriwan i gat blesing blong givim bigfala ona long Papa blong yumi we i lavem yumi, sipos yumi mekem evri samting we yumi naf blong mekem!