WAN man blong talemaot weta i luk long kompiuta blong hem, se wan bigfala hariken i stap kam blong kilim wan ples we i gat plante man long hem. Hem i wari long laef blong ol man ya, taswe hem i givim plante woning bifo we i let tumas.

Long sem fasin, Jehova i stap givim woning long olgeta man tede from wan “hariken” we i nogud moa i bitim olgeta we yumi stap harem long radio. ?Olsem wanem hem i mekem samting ya? ?From wanem yumi sua se hem i stap givim naf taem long ol man blong oli tekem aksen? Blong ansa long tufala kwestin ya, bambae yumi tokbaot sam woning we Jehova i givim long taem bifo.

Long taem bifo, Jehova i givim woning blong sam “hariken,” hemia ol jajmen blong hem we oli kamtru long ol man we oli no obei long hem. (Prov. 10:25; Jer. 30:23) Evri taem, hem i talemaot woning longtaem bifo, mo i talem long ol man wanem we oli mas mekem. (2 King 17:12-15; Neh. 9:29, 30) Plante taem hem i yusum ol gudfala man blong hem long wol, blong talemaot jajmen blong hem mo pulum ol man blong oli tekem aksen kwiktaem.—Amos 3:7.

Noa i wan long ol man blong God we i givim woning. Plante yia hem i no fraet blong talemaot woning long ol man we oli mekem rabis fasin mo faet, se bigfala wota bambae i kavremap wol. (Jen. 6:9-13, 17) Mo tu, hem i talem samting we oli mas mekem blong stap laef. Taswe Baebol i singaot Noa se “prija blong stret fasin.”—2 Pita 2:5.

Nating se Noa i wok had blong talemaot woning blong God long ol man, be oli no lesin. Oli soemaot se oli no gat bilif nating. Taswe, oli ded taem bigfala wota i ron, “i tekemaot olgeta.” (Mat. 24:39; Hib. 11:7) Oli no save talem se God i no givim woning long olgeta.

Samtaem, Jehova i givim woning smoltaem nomo bifo we “hariken” o jajmen blong hem i kamtru. Be oltaem hem i meksua se ol man oli gat naf taem blong tekem aksen. Traem tingbaot woning we hem i givim blong Ten Panis long Ijip bifo. Long saed blong namba seven panis, hem i sanem Moses mo Eron i go long Fero mo ol man blong hem, blong givim woning se ol bigfala ston blong aes bambae oli folfoldaon mo spolem plante samting. Long nekis dei, samting ya i hapen. ?Olsem wanem? ?God i givim naf taem blong ol man oli faenem ples blong haed? Baebol i talem se: ‘Sam haeman oli stap tingbaot tok ya blong Hae God, mo oli fraet, nao oli go tekem ol animol blong olgeta wetem ol slef blong olgeta oli kam insaed long haos. Be sam, oli no tingbaot tok ya nating, nao oli livim ol slef mo ol animol blong olgeta oli stap nomo afsaed.’ (Eks. 9:18-21) I klia se Jehova i givim naf woning, taswe ol man we oli tekem aksen kwiktaem oli no safa tumas.

Long sem fasin, Fero mo ol man blong hem oli kasem woning bifo we namba ten panis i kamtru. Be oli no waes, oli no lesin long woning. (Eks. 4:22, 23) Taswe, ol fasbon boe blong olgeta oli ded. !Sore tumas! (Eks. 11:4-10; 12:29) ?Olsem wanem? ?Oli gat taem blong tekem aksen? !Yes! Moses i kwik blong givim woning blong namba ten panis ya, mo hem i talem wanem we oli mas  mekem blong sevem ol famle blong olgeta. (Eks. 12:21-28) ?Hamas man oli obei? I luk olsem se i gat tri milian man, hemia man Isrel wetem plante “narafala man” tu, oli aot long Ijip mo oli no kasem jajmen blong God.—Eks. 12:38.

Ol eksampol ya oli soemaot se oltaem Jehova i givim naf taem blong ol man oli obei long woning blong hem. (Dut. 32:4) ?From wanem hem i mekem olsem? Aposol Pita i eksplenem se Jehova “i no wantem se wan man i ded, hem i wantem se olgeta man oli tanem tingting blong olgeta.” (2 Pita 3:9) Yes, God i kea long ol man. Hem i wantem se oli tanem tingting blong olgeta mo folem ol advaes blong hem, bifo we jajmen blong hem i kamtru.—Aes. 48:17, 18; Rom 2:4.

Tede tu, ol man oli mas obei long wan impoten woning we i stap kasem olgeta man long wol. Taem Jisas i stap long wol, hem i givim woning se ol man nogud bambae oli lus long wan “bigfala trabol.” (Mat. 24:21) Hem i talemaot wan profet tok blong ol samting we ol man blong hem bambae oli luk mo oli fesem klosap long taem ya. Taswe Jisas i talemaot ol impoten samting we yumi stap luk tede.—Mat. 24:3-12; Luk 21:10-13.

Folem profet tok ya, Jehova i askem strong long ol man blong oli obei long hem olsem king, from we hem i wantem se oli kasem wan laef we i moa gud naoia mo ol nambawan blesing long niufala wol. (2 Pita 3:13) Blong pulum ol man blong oli bilif long ol promes ya, Jehova i stap talemaot ol tok we i save sevem laef blong olgeta, hemia ‘gud nius blong Kingdom.’ Jisas i talem se gud nius ya bambae i kasem ‘olgeta ples long wol, blong witnes long olgeta nesen.’ (Mat. 24:14) God i mekem se ol man blong hem oli “witnes” o talemaot ol tok blong hem, long samwe long 240 kantri. Jehova i wantem se plante man oli lesin long woning ya mo stap sef long taem blong hariken, hemia taem we hem i jajem ol man.—Sef. 1:14, 15; 2:2, 3.

Ol eksampol ya oli soemaot se oltaem Jehova i givim naf taem blong ol man oli obei long ol woning blong hem. Be impoten kwestin se: ?Ol man tede bambae oli obei long woning blong God bifo we i let tumas? Yumi mas gohed nomo blong talemaot woning ya, mo givhan long plante man blong oli stap laef, taem hem i spolem ol rabis man.