STADI 41
Stanap Strong Long Taem Blong “Bigfala Trabol”
“Yufala we tingting blong yufala i stap strong long [Jehova], yufala i mas lavem hem. [Jehova] i stap lukaot gud long ol man we tingting blong olgeta i stap strong long hem.”—SAM 31:23.
SINGSING 129 Mi Mas Gohed Blong Stanap Strong
BIGFALA TINGTING *
1-2. (1) ?I no longtaem bambae ol nesen oli talemaot wanem? (2) ?Wanem ol kwestin we yumi mas ansarem?
TINGBAOT se ol nesen oli jes talemaot “pis mo seftaem.” Maet oli tok flas se i neva gat wan taem bifo we wol i gat pis olsem. Bambae oli wantem mekem yumi ting se oli naf blong stretem evri problem long wol. !Be oli no save blokem samting we bambae i kamtru biaen! Profet tok blong Baebol i talem se “bambae oli sek we bigfala trabol i kam wantaem nomo blong spolem olgeta . . . oli no save ronwe nating.”—1 Tes. 5:3.
2 I gat sam impoten kwestin we yumi mas ansarem: ?Wanem bambae i hapen long taem blong “bigfala trabol”? ?Jehova i wantem se yumi mekem wanem long taem ya? ?Mo olsem wanem yumi save rere naoia blong stanap strong long taem blong bigfala trabol?—Mat. 24:21.
?WANEM BAMBAE I HAPEN LONG TAEM BLONG “BIGFALA TRABOL”?
3. Folem Revelesen 17:5, 15-18, ?God bambae i yusum hu blong spolem “Bigfala Babilon”?
3 Ridim Revelesen 17:5, 15-18. !“Bigfala Babilon” bambae i lus! ?From wanem? From we “God [bambae] i putum tingting ya long hat blong [ol nesen].” ?Wanem tingting? Tingting blong spolem ol giaman skul wetem ol giaman Kristin skul tu. God i putum tingting ya i go long hat blong “ol ten hon” blong ‘wael animol we i red we i red.’ Ol ten hon ya oli pija blong ol gavman we oli sapotem ‘wael animol ya,’ hemia Yunaeted Nesen. (Rev. 17:3, 11-13; 18:8) Taem ol gavman oli agensem ol giaman skul, hemia nao stat blong bigfala trabol. !Olgeta man long wol bambae oli sek!
4. (1) ?Maet ol nesen oli yusum wanem eskius blong agensem ol giaman skul? (2) ?Maet ol memba blong ol skul ya oli mekem wanem?
4 Yumi no save wanem eskius ol nesen bambae oli yusum blong spolem Bigfala Babilon. Maet oli talem se ol skul oli stap blokem pis, mo oltaem oli stap pusum nus blong olgeta i go long politik. Maet oli talem se ol skul ya oli gat tumas mane, graon, mo ol narafala samting. (Rev. 18:3, 7) I luk olsem se bambae ol nesen oli no spolem evri memba blong ol skul ya, be oli spolem ol skul. Taem oli lus, ol memba bambae oli luksave se ol lida blong skul oli no save mekem samting we oli promes blong mekem, mo maet oli go longwe long olgeta.
5. ?Wanem promes blong Jehova long saed blong bigfala trabol ya, mo from wanem hem i mekem promes ya?
5 Baebol i no talem stret se taem ya we Bigfala Babilon i lus bambae i longfala olsem wanem. Be yumi save se bambae i no longfala tumas. (Rev. 18:10, 21) Jehova i promes se bambae hem i “katem taem blong trabol ya,” blong ‘ol man we hem i jusumaot’ mo trufala skul i no lus. (Mak 13:19, 20) ?Be Jehova i wantem se yumi mekem wanem long stat blong bigfala trabol go kasem Amagedon?
GOHED BLONG MEKEM TRU WOSIP
6. ?From wanem i no naf blong lego ol giaman skul?
6 Olsem yumi tokbaot long las stadi, Jehova i wantem se ol man blong hem oli kamaot long Bigfala Babilon. Be i no naf blong lego ol giaman skul nomo. Yumi mas gat strong tingting tu blong sapotem trufala skul, mo mekem tru wosip long Jehova. Tingbaot tu rod blong mekem olsem.
Yumi neva mas lego ol miting, nating se yumi fesem hadtaem (Haf 7) *
7. (1) ?Olsem wanem blong gohed strong blong folem ol stret loa blong Jehova? (2) Folem Hibrus 10:24, 25, ?from wanem i impoten blong joen naoia wetem ol brata mo sista?
7 Fas samting se yumi mas gohed strong blong folem ol stret loa blong Jehova. Yumi neva mas agri long ol rabis tingting mo fasin blong wol, olsem ol rabis fasin blong seks. Hemia i minim tu, rabis fasin ya blong man i mared wetem man mo woman i mared wetem woman. (Mat. 19:4, 5; Rom 1:26, 27) Seken samting se yumi mas gohed blong wosipim Jehova wetem ol brata mo sista. Yumi save mekem olsem long eniples, nating se long Haos Kingdom, long haos blong ol brata mo sista, o long wan ples we i haed. Nomata wanem i hapen, yumi no mas lego program blong yumi blong joen wanples blong mekem wosip. Blong talem stret, yumi mas “mekem samting ya moa, taem [yumi] luk we dei ya i stap kam klosap.”—Ridim Hibrus 10:24, 25.
8. ?Olsem wanem ol tok we yumi talemaot bambae i jenis?
8 Long taem blong bigfala trabol, ating ol tok we yumi stap talemaot bambae i jenis. Naoia, yumi talemaot gud nius blong Kingdom, mo yumi traem pulum ol man oli kam disaepol. Be long taem blong bigfala trabol, ating bambae yumi talemaot ol tok we i mekem ol man oli harem nogud, olsem ol bigfala ston blong aes. (Rev. 16:21) Maet yumi talem se naoia wol blong Setan bambae i lus. Bifo long taem ya, bambae yumi faenemaot wanem tok stret yumi talemaot, mo olsem wanem blong talem. ?Bambae yumi yusum ol semfala rod blong prij we yumi bin yusum bitim handred yia finis, o yumi yusum sam narafala rod? Yumi mas wet blong faenemaot. !Nomata se yumi yusum wanem rod, i luk olsem se yumi gat blesing ya blong talemaot jajmen blong Jehova!—Esik. 2:3-5.
9. ?Ol tok we yumi talemaot bambae i pulum ol nesen blong mekem wanem? ?Be yumi save wanem?
9 Ating ol tok we yumi talemaot bambae i pulum ol nesen blong oli traem finisim wok blong prij blong olwe. Bambae yumi dipen long Jehova, olsem we yumi mas dipen long hem naoia long wok blong prij. Yumi save se God blong yumi bambae i givim paoa we yumi nidim blong finisim wok blong hem.—Maeka 3:8.
RERE FROM TAEM YA WE OLI AGENSEM YUMI
10. Folem Luk 21:25-28, ?plante man bambae oli mekem wanem long taem blong bigfala trabol?
10 Ridim Luk 21:25-28. Ol man bambae oli sek taem ol samting long wol, we oli ting se i strong, oli stat blong lus long bigfala trabol. Bambae oli “harem nogud tumas,” mo oli fraet blong lusum laef blong olgeta, long taem ya we i nogud moa i bitim ol narafala taem bifo. (Sef. 1:14, 15) Ating laef blong ol man blong wol, mo ol man blong Jehova tu, bambae i had moa. From we yumi no joen long wol, bambae yumi fesem hadtaem. Mo tu, maet yumi no save kasem sam samting we yumi nidim.
11. (1) ?From wanem ol man mo ol lida bambae oli putum tingting long ol Witnes blong Jehova nomo? (2) ?From wanem yumi no nid blong fraet long bigfala trabol ya?
11 Ating ol man we skul blong olgeta i lus bambae oli kros from we ol Witnes blong Jehova oli gohed yet blong mekem wosip. Maet oli mekem bigfala toktok from, mo putum plante toktok long Intenet tu. Ol nesen mo rula blong olgeta Setan, bambae oli no laekem yumi nating, from we skul blong yumi nomo i stap. Oli no kasem mak we oli finisim evri skul long wol, olsem oli wantem. Taswe bambae oli putum tingting blong olgeta long yumi nomo. Long taem ya nao, ol nesen oli kam King Gogo blong Magog. * Bambae oli gat wan tingting nomo, blong agensem ol man blong Jehova wetem fulpaoa blong olgeta. (Esik. 38:2, 14-16) Maet yumi wari long ol samting we i save hapen, from we yumi no save stret evri samting. Be yumi no nid blong fraet long taem blong bigfala trabol ya. Yumi sua se Jehova bambae i talem ol samting we yumi mas mekem blong sevem laef blong yumi. (Sam 34:19) Bambae yumi ‘stanap stret mo leftemap hed blong yumi,’ from we yumi save se ‘klosap nao yumi fri.’ *
12. ?Olsem wanem “gudfala slef we i waes” i stap rerem yumi from ol samting we bambae i hapen?
12 “Gudfala slef we i waes” i stap rerem yumi blong stanap strong long taem blong bigfala trabol. (Mat. 24:45) Hem i yusum plante samting blong mekem olsem, be yumi traem tingbaot wan nomo: ol save we oli kamaot long ol bigfala asembli long ol yia 2016-2018. Ol asembli ya oli pulum yumi blong traehad blong kamgud moa long ol fasin we bambae yumi nidim, taem yumi kam klosap moa long dei blong Jehova. Bambae yumi tokbaot ol fasin ya blong smoltaem.
HOLEMSTRONG, STANAP STRONG, MO GAT STRONG TINGTING
Rere naoia blong pastru long “bigfala trabol” (Haf 3-16) *
13. ?Olsem wanem blong holemstrong long Jehova naoia, mo from wanem yumi mas mekem olsem?
13 Holemstrong: Stamba tok blong bigfala asembli long 2016, se “!Gohed Blong Holemstrong Long Jehova!” Asembli ya i tijim yumi se sipos yumi fren gud wetem Jehova mo stap klosap long hem oltaem, bambae yumi holemstrong long hem. Yumi lanem se yumi save kam klosap long Jehova taem yumi prea wetem fulhat mo stadi gud long Tok blong hem. Taem yumi mekem olsem, yumi gat paoa blong stanap strong, nating se yumi fesem ol bigfala trabol. Taem yumi kam klosap moa long en blong wol blong Setan, bambae yumi fesem ol samting we oli traem moa, fasin blong yumi blong holemstrong long God mo Kingdom blong hem. Ating ol man bambae oli gohed blong jikim yumi, antap moa, taem yumi no joen nating long wol blong Setan. (2 Pita 3:3, 4) Taswe yumi mas holemstrong long God naoia, blong yumi save gohed olsem long taem blong bigfala trabol.
14. (1) ?Wanem jenis bambae i kamaot long saed blong ol brata we oli stap lidim yumi? (2) ?From wanem yumi mas holemstrong long Jehova long taem ya?
14 Long taem blong bigfala trabol, bambae i gat wan jenis long saed blong ol brata we oli stap lidim yumi long wol. I gat wan taem we ol tabu brata we oli stap yet long wol, bambae oli go long heven blong joen long faet blong Amagedon. (Mat. 24:31; Rev. 2:26, 27) Hemia i min se Hed Kampani bambae i no moa stap wetem yumi long wol. Be bigfala hip blong ol man bambae i wok folem plan yet. Ol gudfala brata blong ol narafala sipsip bambae oli gohed blong lidim yumi. Blong soemaot se yumi stap holemstrong long Jehova, yumi mas sapotem ol brata ya mo folem ol tok we God i givim long olgeta. !Laef blong yumi bambae i dipen long samting ya!
15. ?Olsem wanem blong kamgud moa blong stanap strong, mo from wanem i impoten blong mekem olsem naoia?
15 Stanap Strong: Stamba tok blong bigfala asembli long 2017, se “!Yu No Kam Slak!” Asembli ya i halpem yumi blong kam gud moa blong stanap strong taem ol samting i traem yumi. Yumi lanem se, yumi no stanap strong nomo taem ol samting i rongud. Nating se i rongud o nogat, yumi stanap strong from we yumi dipen long Jehova. (Rom 12:12) Yumi no mas fogetem promes ya blong Jisas se: “Man we i stanap strong gogo kasem en, God bambae i sevem hem.” (Mat. 24:13) Promes ya bambae i kamtru sipos yumi stanap strong nomata wanem trabol yumi fesem. Sipos yumi stanap strong naoia taem yumi kasem trabol, bambae yumi kam strong moa bifo we bigfala trabol ya i stat.
16. ?Olsem wanem blong gat strong tingting? ?Yumi mas mekem wanem naoia blong gat strong tingting?
16 Strong Tingting: Stamba tok blong bigfala asembli long 2018 se “!Yu Mas Gat Strong Tingting!” Asembli ya i tijim yumi se i no prapa fasin blong yumi we i mekem tingting i strong. Olsem fasin blong stanap strong, yumi save gat strong tingting taem yumi dipen long Jehova. ?Olsem wanem blong dipen moa long Jehova? Yumi mas ridim Tok blong hem evri dei mo tingting dip long ol samting we hem i mekem blong sevem ol man blong hem bifo. (Sam 68:20; 2 Pita 2:9) Taem ol nesen oli agensem yumi long bigfala trabol, bambae yumi mas gat strong tingting mo trastem Jehova moa i bitim olgeta taem bifo. (Sam 112:7, 8; Hib. 13:6) Sipos yumi dipen long Jehova naoia, bambae yumi gat strong tingting long taem ya we King Gogo i agensem yumi. *
TINGBAOT TAEM YA WE BAMBAE YUMI FRI
!I no longtaem Jisas mo ol ami blong hem long heven bambae oli ron long hos blong spolem ol enemi blong God long faet blong Amagedon! (Haf 17)
17. ?From wanem yumi no nid blong fraet long Amagedon? (Yu luk pija long fran pej.)
17 Olsem yumi tokbaot long las stadi, bighaf blong yumi i spenem ful laef blong yumi long ol las dei. Be yumi gat janis tu blong pastru long taem blong bigfala trabol. Faet blong Amagedon bambae i finisim ol las dei blong rabis wol ya. Be yumi no nid blong fraet. ?From wanem? From we hemia faet blong God. (Prov. 1:33; Esik. 38:18-20; Sek. 14:3) Long stret taem we Jehova i talem, Jisas Kraes bambae i lidim ol ami blong Jehova oli go blong faet. Ol tabu man we oli laef bakegen mo plante milian enjel bambae oli joen wetem hem, blong faet agensem Setan, ol rabis enjel, mo ol rabis man long wol.—Dan. 12:1; Rev. 6:2; 17:14.
18. (1) ?Wanem promes we Jehova i mekem? (2) ?Olsem wanem Revelesen 7:9, 13-17 i mekem bilif blong yu i strong long saed blong fiuja?
18 Jehova i promes se: “Ol samting ya blong mekem faet bambae oli no save mekem yufala i karekil.” (Aes. 54:17) !“Wan bigfala hip blong ol man” blong Jehova bambae i “pastru long bigfala trabol”! Bambae oli gohed blong wosipim Jehova nomo. (Ridim Revelesen 7:9, 13-17.) !Baebol i mekem bilif blong yumi i strong long saed blong fiuja! Yumi save se Jehova i “stap lukaot gud long ol man we tingting blong olgeta i stap strong long hem.” (Sam 31:23) Ol man we oli lavem mo wosipim Jehova, bambae oli glad tumas blong luk taem ya we Jehova i tekemaot ol doti we ol man oli sakem long tabu nem blong hem.—Esik. 38:23.
19. ?I no longtaem yumi save kasem wanem blesing?
19 Traem tingbaot ol tok blong 2 Timoti 3:2-5, sipos ol vas ya oli stap tokbaot ol man long niufala wol, we Setan i no moa gat paoa long olgeta. (Yu luk bokis ya “Fasin Blong Ol Man Long Niufala Wol.”) Brata George Gangas, * we i bin wok long Hed Kampani, i eksplenem olsem: “!Traem tingbaot se wol bambae i olsem wanem taem evriwan oli brata mo sista! I no longtaem bambae yu gat bigfala blesing blong laef long niufala wol. Bambae yu laef olwe olsem Jehova. Laef blong yumi bambae i no save finis.” !Wan nambawan hop!
SINGSING 122 Yumi Mas Stanap Strong
^ par. 5 Yumi save se i no longtaem wan “bigfala trabol” bambae i kasem olgeta man long wol. ?Wanem bambae i hapen long ol man blong Jehova? ?Jehova i wantem se yumi mekem wanem long taem ya? ?Wanem ol fasin we yumi mas kamgud moa long olgeta, blong yumi save stanap strong? Long stadi ya, bambae yumi faenem ansa blong ol kwestin ya.
^ par. 11 MINING BLONG TOKTOK: King Gogo blong Magog (o King Gogo nomo) i minim grup blong ol nesen we bambae oli faet agensem tru wosip klosap long en blong bigfala trabol.
^ par. 11 Blong save moa long samting we bambae i hapen bifo long Amagedon, yu luk japta 21 blong buk ya !Kingdom Blong God i Rul! Blong save olsem wanem King Gogo bambae i agensem ol man blong Jehova mo faet blong Amagedon, yu luk buk ya long Inglis Pure Worship of Jehovah—Restored At Last! mo w15 7/15, pej 9-15.
^ par. 16 Bigfala asembli blong 2019 we stamba tok blong hem !“Lav i No Save Finis Samtaem”! i mekem bilif blong yumi i strong se Jehova we i lavem yumi, bambae i protektem yumi mo mekem yumi stap sef blong olwe.—1 Kor. 13:8.
^ par. 19 Yu luk haf ya “Ol Wok Blong Hem Oli Folem Hem,” long Wajtaoa blong 1 Disemba 1994.
