1. ?From wanem i stret blong wosipim Jehova nomo?

I STRET blong wosipim Jehova nomo, from we hem i wokem yumi mo i givim laef long yumi. (Rev. 4:11) Be i gat wan denja. Nating se yumi lavem Jehova mo respektem hem, sloslo sam narafala samting oli save pulum yumi i gowe long hem, nao yumi no moa wosipim hem nomo. Yumi mas save olsem wanem samting ya i save hapen. Be fastaem, bambae yumi tokbaot se i minim wanem blong wosipim Jehova nomo.

2. Folem Eksodas 34:14, ?yumi mas mekem wanem blong wosipim Jehova nomo?

² Baebol i soemaot se blong wosipim Jehova nomo, yumi mas lavem hem tumas. Yumi no save letem wan narafala man o wan narafala samting i tekem ples blong hem long hat blong yumi.—Ridim Eksodas 34:14.

3. ?Wanem ol gudfala risen blong lavem Jehova?

³ I gat plante gudfala risen blong lavem Jehova. Lav blong yumi i stanap long ol trutok we yumi lanem long saed blong hem. Yumi laekem tumas ol nambawan fasin blong hem. Yumi save samting we Jehova i laekem mo samting we hem i no laekem, mo yumi gat sem tingting olsem hem. Yumi kasem save long stamba tingting blong hem mo yumi wok folem. Yumi harem se i wan bigfala ona blong kam fren blong hem. (Sam 25:14) Evri samting we yumi lanem long saed blong Jehova i pulum yumi i kam klosap moa long hem.—Jem. 4:8.

4. (1) ?Setan i yusum wanem blong mekem se yumi no lavem Jehova? (2) ?Bambae yumi tokbaot wanem long stadi ya?

 ⁴ Setan i bos long wol ya, mo hem i yusum wol blong mekem yumi ting se samting we yumi wantem i moa impoten, mo blong mekem i had blong yumi blokem ol nogud fasin. (Efes. 2:1-3; 1 Jon 5:19) Hem i wantem se yumi laekem ol samting blong wol nao bambae yumi no moa lavem Jehova. Bambae yumi tokbaot tu rod we Setan i yusum. Faswan, hem i pulum yumi blong ronem ol sas samting. Sekenwan, hem i traem mekem se yumi jusum ol pleplei we oli nogud.

5. ?From wanem yumi mas lukaot se yumi no stat blong laekem mane tumas?

⁵ I stret nomo we yumi wantem gat i naf kakae mo klos, mo wan gudfala ples blong slip. Be yumi mas lukaot se yumi no stat blong laekem mane tumas. Plante man tede oli “laekem mane tumas” mo ol samting we mane i save pem. (2 Tim. 3:2) Jisas i save se ol man blong hem tu oli save foldaon long trap ya, i se: “I no gat man we i save kam slef blong tu masta wantaem, from we bambae hem i agensem wan mo i laekem narawan, no bambae hem i fren gud long wan be i stap tok nogud long narawan. Yufala i no save kam slef blong God mo long semtaem yufala i slef blong mane.” (Mat. 6:24) Sipos yumi wosipim Jehova mo long semtaem yumi spenem plante taem blong traehad blong kam rijman, i olsem we yumi wok blong tu masta wantaem. Yumi no stap wosipim Jehova nomo.

6. ?Yumi lanem wanem long ol tok we Jisas i talem long kongregesen blong Laodisia?

⁶ Klosap long yia 100, kongregesen blong Laodisia i tokflas, i se: “Mi mi rij mo mi gat plante rij samting, mo mi no nidim wan samting nating.” Be long tingting blong Jehova  mo Jisas, kongregesen ya i ‘pua, i trabol gud, we ol man oli sore tumas long hem, mo i blaen, mo i neked.’ Jisas i stretem olgeta long kongregesen ya, i no from we oli rijman, be from we oli laekem tumas ol rij samting ya, nao oli no moa fren gud wetem Jehova. (Rev. 3:14-17) Sipos yumi luksave se yumi wantem tumas ol rij samting long hat blong yumi, yumi mas kwik blong stretem. (1 Tim. 6:7, 8) Sipos no, lav we yumi gat long Jehova bambae i hafhaf, nao hem i no moa glad long wosip blong yumi. Hem i no wantem we yumi “mekem wosip long narafala god bakegen.” (Dut. 4:24) ?Olsem wanem mane i save kam impoten moa long ol narafala samting long laef blong yumi?

7-9. ?Yu lanem wanem long stori blong Deved we i wan elda?

⁷ Traem tingbaot Deved, wan gudfala elda long Yunaeted Stet we i stap wok had blong winim mane. Hem i kasem wan hae posisen long kampani we hem i wok blong hem, mo ol man oli luk se i no gat narafala man long kantri we i save mekem wok ya olsem hem. Deved i talem se: “Long taem ya, mi ting se Jehova i stap blesem mi.” ?Be samting ya i tru?

⁸ Deved i luk sam nogud saen se wok ya i mekem hem i no moa fren gud wetem Jehova, i se: “Long ol miting mo long wok blong prij tu, mi stap tingbaot ol problem long wok. Mi stap winim bigfala mane, be mi wari, mi harem nogud, mo mi stat blong raorao wetem waef blong mi.”

⁹ Deved i luksave se hem i mas jekem samting we i moa impoten long laef blong hem, i se: “Mi mekem wan strong desisen blong stretem problem blong mi.” Ale Deved i askem long bos blong hem sipos hem i save jenisim program blong wok. ?Wanem i hapen? !Hem i  lusum wok ya! ?Hem i mekem wanem? Hem i se: “Long nekis dei, mi fulumap pepa blong kam haftaem paenia evri manis.” Blong winim mane, Deved mo waef blong hem i klinim ol bigfala stori haos. Smoltaem biaen, hem i kam fultaem paenia, mo waef blong hem tu i joenem hem. Tufala i jus blong mekem wok we plante man oli ting nating long hem, be wok blong winim mane i no impoten samting long laef blong tufala. Nating se mane we tufala i kasem evri manis i wan smol haf nomo long mane we tufala i kasem bifo, be hem i naf blong pem ol samting we tufala i nidim. Tufala i wantem putum Jehova long fasples, mo tufala i luk se Jehova i lukaot gud long olgeta we oli mekem wok blong Kingdom fastaem.—Mat. 6:31-33.

10. ?Olsem wanem blong lukaot gud long hat blong yumi?

¹⁰ Nating se yumi gat plante samting o yumi gat smol nomo, be yumi mas lukaot gud long hat blong yumi. ?Olsem wanem blong mekem samting ya? Yumi no mas laekem tumas ol sas samting. Mo yumi no mas letem wok blong winim mane i kam moa impoten i bitim wok blong Jehova. ?Olsem wanem blong save sipos samting ya i stap hapen? I gud yu askem se: ‘?Taem mi stap long miting o long wok blong prij, mi stap tingbaot wok blong mi blong winim mane? ?Mi stap wari oltaem se bambae mi no gat naf mane long fiuja? ?Mi mo waef blong mi i stap raorao from mane mo ol sas samting? ?Mi mi glad blong mekem wan wok we ol man oli ting nating long hem, blong mi save spenem moa taem long wok blong Jehova?’ (1 Tim. 6:9-12) Taem yu stap skelem ol samting ya, i gud yu tingbaot se Jehova i lavem yu, mo i mekem wan promes long olgeta we oli lavem hem, i se: “Bambae mi mi neva lego yu, mo bambae mi neva livim yu yu stap yu wan.” Taswe aposol Pol i raetem se: “I nogud yufala i gat fasin ya blong laekem mane tumas.”—Hib. 13:5, 6.

11. ?Pleplei i save mekem wanem long yumi?

¹¹ Jehova i wantem se yumi harem gud long laef, mo ol pleplei oli save givhan long yumi blong harem gud. Blong talem stret, Baebol i talem se i gud “yumi stap kakae, yumi stap dring mo yumi stap glad” long ol hadwok blong yumi. (Pri. 2:24) Be plante pleplei blong wol oli save spolem yumi. Oli save spolem ol gudfala fasin blong yumi mo mekem yumi ting se i oraet nomo blong mekem samting we Baebol i agensem, nao yumi stat blong laekem ol nogud fasin ya.

12. Folem 1 Korin 10:21, 22, ?from wanem yumi mas jusum gud ol pleplei?

 ¹² Yumi mas wosipim Jehova nomo, taswe yumi no save kakae long “tebol blong Jehova,” mo long semtaem, long “tebol blong ol rabis spirit.” (Ridim 1 Korin 10:21, 22.) Taem yumi kakae wetem wan man, plante taem hemia i soemaot se yumi wan fren blong hem. Sipos yumi jusum ol pleplei we oli joen wetem faet, ol rabis spirit, ol doti fasin blong seks, mo ol narafala nogud fasin mo tingting, i olsem we yumi stap kakae wetem ol enemi blong God. Samting ya bambae i spolem yumi, mo bambae i mekem se yumi no moa fren gud wetem Jehova.

13-14. (1) Olsem wanem pleplei i olsem kakae? (2) Folem Jemes 1:14, 15, ?from wanem ol pleplei we oli nogud oli save spolem yumi?

¹³ Tingbaot olsem wanem ol pleplei oli olsem kakae. Yumi save jusum samting we yumi kakae. Be taem yumi solemdaon, bodi blong yumi i mekem wok blong hem nao yumi no save bos long samting we kakae ya i mekem long bodi. Gudfala kakae i save mekem bodi blong yumi i strong, rabis kakae i save mekem bodi i slak. Maet samting ya i no hapen kwiktaem, be sloslo bambae i kam klia.

¹⁴ I sem mak taem yumi jusum ol pleplei. Yumi save bos long samting we yumi putum long tingting blong yumi. Be afta, yumi no moa bos long samting we pleplei ya i mekem long tingting mo hat blong yumi. Gudfala pleplei i save mekem se yumi harem gud mo kasembak paoa, be rabis pleplei bambae i spolem yumi. (Ridim Jemes 1:14, 15.) Maet yumi no luk samting ya kwiktaem, be sloslo bambae i kam klia. Taswe Baebol i givim woning ya se: “Yufala i no go krangke: I no gat man i save trikim God. Wanem sid we man i planem, be frut blong hem nomo, man ya bambae i kakae. Sipos man i planem samting we tingting blong hem nomo i wantem, bambae hem i kasem frut we i lidim hem i go long ded nomo.” (Gal. 6:7, 8) !I impoten tumas blong sakemaot ol pleplei we oli joen wetem samting we Jehova i no laekem!—Sam 97:10.

15. ?Jehova i givim wanem gudfala presen long yumi?

¹⁵ Plante man blong Jehova oli laekem tumas blong wajem JW Brodkasting^®, gudfala stesen blong TV blong yumi. Wan sista, nem blong hem Merilin, i talem se: “JW Brodkasting i givhan long mi blong mi gat gudfala tingting oltaem, mo mi no nid blong skelem samting we mi wajem se i gud o i nogud. Taem mi harem nogud blong stap mi wan o tingting i foldaon, mi lukaotem wan Moning Wosip we i save leftemap tingting blong mi, mo mi wajem. Hemia i mekem mi mi harem se mi klosap long Jehova mo oganaesesen blong hem. JW Brodkasting i jenisim laef blong mi.” ?Olsem wanem? ?Yu tu yu stap harem gud long presen ya we Jehova i givim? I gat wan niufala program evri manis long JW Brodkasting, mo antap long hemia, i gat plante video, rikoding, mo ol gudfala singsing, we yumi save wajem mo lesin long olgeta enitaem.

16-17. ?From wanem yumi mas bos long hamas taem we yumi spenem long ol pleplei? ?Olsem wanem blong bos long ol pleplei?

¹⁶ I no naf blong bos long wanem kaen pleplei we yumi jusum, be yumi mas tingbaot tu, hamas taem we yumi spenem long pleplei ya. Sipos no, yumi save spenem moa taem long pleplei i bitim we yumi spenem long wok blong Jehova. Plante oli luk se i had blong bos long hamas taem oli spenem long ol pleplei. Abigel, wan sista we i gat 18 yia, i talem se: “Long en blong wan bisi dei, mi wajem TV blong spel. Be sipos mi no lukaot gud, mi save stap plante aoa long fored blong skrin ya.” Yangfala brata ya, Samuel, i talem se: “Samtaem  mi wajem plante sot video long Intenet. Mi gat tingting blong wajem wan nomo, be afta, mi gohed gogo mi sek se mi spenem tri o fo aoa long olgeta.”

¹⁷ ?Olsem wanem blong bos long hamas taem we yu spenem long ol pleplei? Fas samting se, yu mas jekem hamas taem yu spenem long olgeta. I gud yu raetemdaon blong wan wik. Raetem long kalenda hamas aoa yu wajem TV, lukluk Intenet, plei ol gem long tablet o mobaelfon, mo mekem lafet. Sipos yu luk se yu stap spenem tumas taem long olgeta, traem mekem wan program. Makemaot taem blong ol impoten samting fastaem, mo makemaot smol taem blong pleplei tu. Nao askem long Jehova blong i halpem yu blong folem program ya. Olsem nao, bambae yu gat taem mo paoa we yu nidim blong stadi yu wan, mekem famle wosip, go long ol miting, mo go long wok blong prij. Mo tu, ating tingting blong yu bambae i no stikim yu from we yu spenem tumas taem long ol pleplei.

18-19. ?Olsem wanem blong soemaot se yumi stap wosipim Jehova nomo?

¹⁸ Long leta blong aposol Pita, hem i tokbaot en blong rabis wol ya mo niufala wol, nao biaen hem i talem se: “Ol gudfala fren, taem yufala i stap wet long ol samting ya, yufala i mas mekem bes blong yufala blong bambae [God] i luk we i no gat doti long yufala, mo yufala i no gat rong, mo yufala i gat pis.” (2 Pita 3:14) Taem yumi obei long advaes ya mo traehad blong mekem laef mo wosip blong yumi i klin long fes blong Jehova, yumi soemaot se yumi stap wosipim hem nomo.

¹⁹ Setan mo wol blong hem bambae i gohed blong pulum yumi, blong yumi putum narafala samting long ples blong Jehova. (Luk 4:13) Be bambae yumi no letem wan narafala man o wan narafala samting i tekem ples blong Jehova long hat blong yumi, nating se samtaem i no isi. !Yumi mas gat strong tingting blong mekem samting we i stret mo wosipim Jehova nomo!