1. ?Ol Kristin we oli baptaes oli mas gohed blong mekem wanem?

?YU YU baptaes finis? Sipos yes, yu soemaot ya nao se yu bilif long Jehova, mo se yu rere blong wok wetem oganaesesen blong hem. * Be i tru se yu mas gohed blong mekem bilif blong yu long Jehova i gru. Mo yu mas gohed blong trastem se Jehova i stap yusum oganaesesen blong hem tede.

2-3. ?Olsem wanem Jehova i lidim oganaesesen blong hem tede? Talem sam eksampol.

² Tede, Jehova i stap lidim oganaesesen blong hem long wan wei we i soemaot ol fasin blong hem, bigfala tingting blong hem, mo ol rul blong hem. I gud yumi tokbaot tri fasin blong Jehova we oganaesesen blong hem i stap soemaot.

³ Faswan, “God i stap mekem i sem mak nomo long olgeta man.” (Wok 10:34) Lav i pulum Jehova blong i givim Pikinini blong hem olsem wan “ransom we i stret gud blong pemaot olgeta man.” (1 Tim. 2:6; Jon 3:16) Jehova i yusum ol man blong hem blong oli talemaot gud nius long olgeta we oli glad blong lesin, mo long rod ya, ransom ya i save givhan long plante moa man. Seken, Jehova i wan God blong oda mo pis. (1 Kor. 14:33, 40) Taswe, yumi mas ekspektem se ol man we oli wosipim hem tu oli joen gud blong mekem wok blong hem long oda mo pis. Namba 3, Jehova i Bigfala Tija. (Aes. 30:20, 21) From samting ya, oganaesesen blong hem i wok had blong tijim ol man long Baebol, insaed long kongregesen mo long wok blong prij. ?Olsem wanem ol trifala fasin ya blong Jehova oli stap long kongregesen blong ol fas Kristin? ?Olsem wanem oli stap tu  long taem blong yumi? ?Mo olsem wanem tabu spirit i save halpem yu taem yu stap joen blong wok wetem oganaesesen blong Jehova tede?

4. Folem Ol Wok 1:8, ?Jisas i talem long ol man blong hem blong oli mekem wanem, mo bambae oli kasem wanem help?

⁴ Long taem blong ol fas Kristin. Mesej we Jisas i talemaot, i givim hop long olgeta man. (Luk 4:43) Hem i talem long ol man blong hem blong oli gohed long wok ya we hem i statem, blong givim witnes “kasem olgeta ples long wol.” (Ridim Ol Wok 1:8.) I tru se oli no save mekem wok ya long paoa blong olgeta nomo. Oli nidim tabu spirit, hemia helpa we Jisas i promes blong givim long olgeta.—Jon 14:26; Sek. 4:6.

5-6. ?Olsem wanem tabu spirit i halpem ol man blong Jisas?

⁵ Ol man blong Jisas oli kasem tabu spirit long dei blong Pentekos, long yia 33 K.T. Spirit ya i halpem olgeta nao oli kwik blong prij, mo smoltaem biaen, plante taosen man oli akseptem gud nius. (Wok 2:41; 4:4) Taem ol man oli agensem olgeta, ol disaepol oli no letem fraet i winim olgeta, be oli askem long God blong i halpem olgeta. Oli prea se: “Givim strong tingting long mifala ol slef blong yu, blong mifala i gohed blong talemaot tok blong yu.” Nao tabu spirit i kam fulap long olgeta mo oli gohed blong “talemaot tok blong God we oli no fraet nating.”—Wok 4:18-20, 29, 31.

⁶ Ol disaepol blong Jisas oli fesem ol narafala jalens tu. Eksampol, i no gat plante kopi blong Baebol. Oli no gat ol tul blong stadi olsem we yumi gat tede. Mo ol disaepol oli mas prij long ol man we oli toktok plante defren lanwis. Be nating se i olsem, ol disaepol ya oli wok strong, oli mekem wan samting we i luk olsem se i no posibol: Blong sam yia nomo, oli talemaot gud nius “long olgeta ples long wol.”—Kol. 1:6, 23.

7. Bitim 100 yia bifo, ?olsem wanem ol man blong Jehova oli save samting we Hem i wantem se oli mekem, mo oli mekem wanem?

⁷ Long taem blong yumi. Jehova i gohed blong lidim mo givim paoa long ol man blong hem. Hem i lidim olgeta tru long Tok blong hem we tabu spirit i givhan long ol man blong oli raetem. Long buk ya, yumi faenem stori blong minista wok blong Jisas, mo komanmen ya se ol man blong hem oli mas gohed long wok ya we hem i statem. (Mat. 28:19, 20) Bifo finis long Julae 1881, magasin ya i talem se: “God i no singaot mifala, o makemaot mifala blong kasem haenem mo kam rij, be blong spenem evri samting olsem olting blong mifala mo laef blong mifala, mo blong talemaot gud nius.” Wan buklet we oli wokem long 1919 (To Whom the Work Is Entrusted), i talem se: “I luk olsem se wok ya i bigwan tumas, be hemia wok blong Masta, mo bambae hem i givim paoa long yumi blong mekem.” Yes, olsem ol fas Kristin, ol brata ya oli gat strong tingting blong mekem wok ya wetem fulhat blong olgeta. Oli trastem se tabu spirit bambae i givhan long olgeta, blong prij long ol defdefren kaen man. Yumi gohed blong gat sem tingting ya tede.

8-9. ?Wanem ol rod we oganaesesen blong Jehova i yusum blong spredem gud nius?

⁸ Oganaesesen blong Jehova i bin yusum ol beswan tul we i stap, blong spredem gud nius. Long ol tul ya, i gat ol buk we oli printim, “Photo-Drama of Creation,” fonograf, trak we i gat spika long  hem, radio brodkas, mo i no longtaem i pas, dijital teknoloji. !Mo tu, oganaesesen blong God i transletem ol save i go long plante moa lanwis i bitim bifo! ?From wanem? Blong olgeta man oli save harem gud nius long prapa lanwis blong olgeta. Jehova i mekem i sem mak long olgeta man, hem i bin talem se bambae ol man oli talemaot gud nius “long olgeta laen, long olgeta lanwis, mo long olgeta grup blong man.” (Rev. 14:6, 7) Hem i wantem se mesej blong Kingdom i kasem evri man.

⁹ ?Olsem wanem long olgeta we i had blong kasem olgeta, maet from we oli laef long ol tol bilding we sekuriti i taet? Blong kasem plante long ol man ya, oganaesesen blong Jehova i faenem sam defren rod blong prij long pablik ples. Eksampol, long 2001, Hed Kampani i apruvum blong oli yusum ol troli mo ol narafala samting olsem long Franis, mo biaen oli mekem long ol narafala ples tu. Gudfala frut i kamaot from. Long 2011 oli statem wan niufala program olsem, long Yunaeted Stet, long wan bisi ples long New York City. Long faswan yia, oli givimaot 102,129 buk mo 68,911 magasin. !Mo tingbaot, 4,701 man oli askem blong stadi! I klia se tabu spirit i sapotem wok ya. Ale Hed Kampani i apruvum blong ol brata long fulwol oli yusum troli blong prij.

10. ?Yumi save mekem wanem blong kam gud moa long wok blong prij?

¹⁰ Samting we yu save mekem. Yusum gud trening we Jehova i givim long yumi tru long ol Kristin miting. Prij oltaem wetem grup blong yu. Long ples ya, yu save kasem help we yu nidim blong kam gud moa blong prij mo tij, mo tu gudfala eksampol blong ol narafala i save enkarenjem yu. Stanap strong long wok ya blong prij. Olsem stamba vas i talem, yumi mekem wil blong God, i no long paoa blong yumi, be long paoa blong tabu spirit. (Sek. 4:6) Tingbaot, yumi stap mekem wok blong God ya.

11. ?Olsem wanem hed kampani bifo i wok tugeta blong mekem se pis mo oda i stap?

¹¹ Long taem blong ol fas Kristin. Hed  kampani long Jerusalem i wok tugeta blong mekem se i gat oda mo pis bitwin ol man blong God. (Wok 2:42) Eksampol, samwe long yia 49 K.T., taem kwestin blong sakomsaes i kamaot, tabu spirit i lidim hed kampani blong i tokbaot bisnes ya. Sipos kongregesen i seraot from kwestin ya, bambae oli no save gohed blong prij. Nating se ol aposol mo ol elda oli man Jiu, be oli no letem kastom blong ol man Jiu mo tingting blong ol narafala i gat paoa long olgeta. Be oli letem Tok blong God mo tabu spirit i lidim olgeta. (Wok 15:1, 2, 5-20, 28) ?Wanem i kamaot from? Jehova i blesem desisen blong olgeta, pis i stap, oli joen gud, mo oli gohed moa blong prij.—Wok 15:30, 31; 16:4, 5.

12. ?Wanem i soem se i gat oda mo pis long oganaesesen blong Jehova tede?

¹² Long taem blong yumi. Oganaesesen blong Jehova i wok blong mekem se i gat oda mo pis bitwin ol man blong Jehova. Bifo finis long 1895, long magasin ya Zion’s Watch Tower and Herald of Christ’s Presence blong 15 Novemba, i gat wan atikol we nem blong hem “Long Fasin We i Stret Mo Oda,” we i stanap long 1 Korin 14:40. Atikol ya i talem se: “Ol aposol oli gat plante samting blong talem long faswan Jos long saed blong oda . . . I impoten blong yumi lesing gud long ‘ol tok we oli raetem bifo blong tijim yumi.’” (Rom 15:4) Yes, semfala tingting blong gat oda mo pis we i stap long taem blong ol fas Kristin, i stap yet long oganaesesen blong Jehova tede. Eksampol: Sipos yu mas joen long Wajtaoa Stadi long wan narafala kongregesen, o wan narafala kantri, yu save finis se bambae oli mekem stadi ya olsem wanem, mo bambae oli stadi long wanem haf. !Bambae yu harem olsem se yu stap long ples blong yu nomo! !Spirit blong God nao i mekem se yumi joen gud olsem!—Sef. 3:9, fut, NW.

13. Folem Jemes 3:17, ?wanem ol kwestin we yumi mas askem yumi wan?

¹³ Samting we yu save mekem. Jehova i wantem se ol man blong hem oli “gat pis nao [oli] kam wan, taswe oltaem [oli] mas traehad blong holemtaet fasin ya.”  (Efes. 4:1-3) So askem yu wan se: ‘?Mi mi stap mekem se i gat pis mo yuniti long kongregesen? ?Mi mi stap obei long olgeta we oli lidim wok? ?Ol narafala oli save dipen long mi, speseli sipos mi gat wok long kongregesen? ?Mi mi no kam let, mi givhan, mo mi rere blong wok?’ (Ridim Jemes 3:17.) Sipos yu luk se yu mas kam gud moa long sam samting, yu prea from tabu spirit. Moa we yu letem tabu spirit i jenisim fasin blong yu, mo i gat paoa long ol aksen blong yu, bambae ol brata sista oli lavem yu moa, mo oli tinghae long yu.

14. Folem Kolosi 1:9, 10, ?olsem wanem Jehova i tijim ol man blong hem long taem blong ol fas Kristin?

¹⁴ Long taem blong ol fas Kristin. Jehova i glad tumas blong tijim ol man blong hem. (Sam 32:8) Hem i wantem se oli save hem, oli lavem hem, mo oli laef olwe olsem ol pikinini we hem i lavem tumas. Sipos hem i no tijim olgeta, bambae oli no save kasem olgeta samting ya. (Jon 17:3) Jehova i yusum faswan Kristin kongregesen blong tijim ol man blong hem. (Ridim Kolosi 1:9, 10.) Tabu spirit, hemia helpa we Jisas i promes blong givim, i givhan bigwan long olgeta. (Jon 14:16) Hem i givhan long ol disaepol blong oli kasemsave long Baebol, mo i mekem oli rimemba ol samting we Jisas i talem mo i mekem, nao biaen oli raetemdaon long ol Gospel. Ol save ya we ol fas Kristin oli kasem, i mekem bilif blong olgeta i kam strong. Mo lav we oli gat long God wetem Pikinini blong hem, mo bitwin olgeta, i kam bigwan moa.

15. ?Yu luk promes blong Jehova long Aesea 2:2, 3, i kamtru olsem wanem?

¹⁵ Long taem blong yumi. Jehova i bin talemaot se long lashaf blong ol dei, plante man blong olgeta nesen bambae oli  kam antap long bigfala hil ya blong hem blong i tijim olgeta. (Ridim Aesea 2:2, 3.) Yumi stap luk profet tok ya i kamtru tede. Tru wosip i kam hae moa long enikaen giaman wosip. !Man, hemia wan bigfala lafet we Jehova i mekem! (Aes. 25:6) Tru long “gudfala slef we i waes,” hem i givim plante kakae, be i no hemia nomo, ol kakae ya oli gud tumas mo oli defdefren, olsem ol defdefren atikol mo tok, mo ol defdefren katun mo video. (Mat. 24:45) Yumi gat sem filing olsem Elihu we i fren blong Job, we i se: “?I gat wan tija we i olsem [God]?”—Job 36:22, NW.

16. ?Yu save mekem wanem blong tijing blong Jehova i halpem yu?

¹⁶ Samting we yu save mekem. Spirit blong God bambae i halpem yu blong folem ol samting we yu ridim long Tok blong God. Yu prea olsem man blong raetem sam, we i se: “O Jehova, yu tijim mi long rod blong yu, bambae mi wokbaot folem trutok blong yu. Yu mekem hat blong mi i kam wan nomo blong mi fraet long nem blong yu.” (Sam 86:11, NW) Taswe, i gud yu gohed blong tekem ol kakae long spirit, we Jehova i stap givim tru long Tok blong hem mo oganaesesen blong hem. I tru, mak blong yu i no blong lanem samting nomo. Yu wantem se trutok i stap long hat blong yu, mo yu folem long laef blong yu. Spirit blong Jehova i save halpem yu blong mekem samting ya. Mo tu, yu wantem enkarejem ol brata sista blong yu. (Hib. 10:24, 25) ?From wanem? From we oli famle blong yu long spirit. Yu prea blong spirit blong God i halpem yu blong givim ol gudfala komen long ol miting, mo blong yu mekem bes blong yu taem yu gat wan haf long miting. Long rod ya, yu soem long Jehova mo long Jisas se yu lavem ol “sipsip” ya we oli sas long ae blong tufala.—Jon 21:15-17.

17. ?Olsem wanem blong soem se yu sapotem oganaesesen blong Jehova?

¹⁷ Klosap nao, wan oganaesesen nomo bambae i stap long wol, hemia oganaesesen we spirit blong God i lidim. Taswe yu mas wok strong wetem oganaesesen blong Jehova. Soemaot fasin ya blong God blong mekem i sem mak long olgeta man, taem yu talemaot gud nius long ol man we yu mitim. Lavem oda mo pis olsem Jehova, taem yu mekem se kongregesen i joen gud. Mo blong lesin long Bigfala Tija blong yu, i gud yu tekem evri kakae we hem i givim long bigfala lafet blong hem. Nao taem wol blong Setan i kasem en blong hem, bambae yu no fraet. Be bambae yu gat strong tingting blong stanap wetem olgeta ya we oli gohed blong wok wetem oganaesesen blong Jehova.