STADI 41
?Olsem Wanem Blong Lidim Wan Baebol Stadi Go Kasem Baptaes?—Pat Wan
“Yufala ya, yufala i leta we i kam long Kraes, we mifala ol minista blong hem, mifala i raetem.”—2 KOR. 3:3.
SINGSING 78 “Tijim Ol Man Long Tok Blong God”
BIGFALA TINGTING *
?Wanem i gud moa long ful kongregesen i bitim we oli luk wan Baebol studen we oli lavem tumas, i baptaes? (Yu luk haf 1)
1. ?Olsem wanem 2 Korin 3:1-3 i halpem yumi blong glad long privilej ya blong lidim wan Baebol stadi go kasem baptaes? (Luk pija long fran pej.)
?WANEM filing blong yu taem yu luk wan Baebol studen long kongregesen blong yu, i baptaes? I sua se yu yu glad tumas. (Mat. 28:19) Mo sipos yu nao yu stadi wetem niufala disaepol ya, !i sua se yu glad we yu glad bitim mak! (1 Tes. 2:19, 20) Ol niufala disaepol we oli baptaes, oli olsem leta we oli raetem blong soemaot olgeta we oli stadi wetem olgeta, mo ful kongregesen.—Ridim 2 Korin 3:1-3.
2. (1) ?Wanem impoten kwestin we yumi mas tingbaot, mo from wanem? (2) ?Wanem ya Baebol stadi? (Yu luk futnot.)
2 I gud tumas blong luk se long ol las fo yia, ripot blong fulwol i soem se i gat samwe 10,000,000 Baebol stadi * evri manis. Mo long ol yia ya, bitim 280,000 Baebol stadi i baptaes evri yia, blong kam Witnes Blong Jehova mo kam niufala disaepol blong Jisas Kraes. ?Olsem wanem yumi save givhan long ol milian Baebol studen ya blong oli baptaes? Jehova i stil givim taem long ol man blong oli kam disaepol blong Kraes. Taswe yumi wantem mekem bes blong yumi blong halpem olgeta, blong oli gohed kwik kasem we oli baptaes. !Naoia taem i stap kam sot moa!—1 Kor. 7:29a; 1 Pita 4:7.
3. ?Bambae yumi tokbaot wanem long stadi ya?
3 From we i impoten tumas blong pulum ol man i kam disaepol naoia, Hed Kampani i askem long ol branj ofis blong oli talem sam samting we yumi save mekem, blong ol Baebol stadi oli gohed gud kasem baptaes. Long stadi ya wetem nekis wan, bambae yumi luk samting we yumi save lanem long ekspiriens blong ol paenia, misinari, mo eria elda. * (Prov. 11:14; 15:22) Oli soemaot samting we ol Baebol tija wetem ol studen blong olgeta oli save mekem, blong stadi blong olgeta i karem frut. Long stadi ya, bambae yumi tokbaot faef samting we evri studen oli mas mekem blong oli save gohed gud kasem baptaes.
STADI EVRI WIK
Askem studen sipos yutufala i save sidaon mo tokbaot Baebol (Haf 4-6)
4. ?Yumi mas tingbaot wanem long ol Baebol stadi we yumi mekem long doa nomo?
4 Plante brata mo sista oli stap stadi wetem man long doa nomo. Rod ya i gud blong mekem man i intres long Baebol, be plante taem storian i sot nomo mo oli no mekem evri wik. Blong mekem se man i intres moa, samfala oli askem fon namba blong man blong haos, mo afta we oli go visitim olgeta, oli ring o sanem wan teks blong tokbaot wan poen long Baebol. Kaen storian olsem i save gohed blong plante manis, be i no save givhan long man blong i gohed gud. ?Yu ting se wan studen bambae i gohed gud kasem we i givim laef blong hem long God mo i baptaes, sipos hem i no spenem moa taem mo i no traehad blong stadi moa? Maet nogat.
5. Folem Luk 14:27-33, ?Jisas i makem wanem poen we i save halpem yumi long wok ya blong mekem disaepol?
5 Wan dei, Jisas i talem pijatok blong soemaot samting we wan man i mas mekem blong i kam disaepol blong hem. Hem i tokbaot wan man we i wantem bildim wan taoa mo wan king we i wantem go mekem faet. Jisas i talem se bilda ya i mas “sidaon fastaem blong kaontem praes blong ol samting we hem i nidim,” blong i finisim taoa ya, mo king i mas “go sidaon fastaem mo i lesin long ol advaes blong ol narafala” blong luk sipos ami blong hem i naf blong winim faet ya. (Ridim Luk 14:27-33.) Long sem fasin, Jisas i save se man we i wantem kam disaepol blong hem, i mas skelemgud fastaem se i minim wanem blong folem hem. From risen ya, yumi mas pulum ol fiuja disaepol blong oli stadi wetem yumi evri wik. ?Olsem wanem blong mekem?
6. ?Yumi save mekem wanem blong studen i gohed gud?
6 Fastaem, yu save mekem storian i longfala moa taem yu stadi wetem man long doa. Maet evri taem we yu visitim hem, yu save tokbaot wan moa poen blong Baebol. Taem man blong haos i lan blong storian longtaem moa, askem long hem sipos i gat wan ples we yutufala i save sidaon mo gohed blong storian. Ansa blong hem bambae i soemaot sipos hem i tinghevi long stadi blong hem o nogat. Sloslo, blong mekem se hem i gohed kwik moa, yu save askem sipos hem i glad blong stadi tu taem long wan wik. Be i gat sam moa samting blong mekem, i bitim we hem i stadi wan o tu taem evri wik.
REREGUD BIFO WE YU MEKEM BAEBOL STADI
Rerem gud stadi blong yu, mo soem long studen olsem wanem blong rerem stadi blong hem (Haf 7-9)
7. ?Olsem wanem tija i save rerem gud wan stadi?
7 Yu we yu tija, yu mas reregud bifo we yu mekem wan Baebol stadi. Blong stat, yu save ridim ol haf wetem ol vas. Tingbaot ol men poen. Tingbaot taetel blong lesen, smol stamba tok, ol kwestin blong haf, ol vas blong “ridim,” ol pija, mo eni video we i save givhan blong eksplenem topik ya. Biaen yu tingbaot studen blong yu, mo yu tingting dip long fasin we bambae yu givim ol infomesen ya long wan klia mo simpol wei, blong hem i kasemsave mo folem.—Neh. 8:8; Prov. 15:28a.
8. ?Olsem wanem Kolosi 1:9, 10 i tijim yumi blong prea from ol Baebol studen blong yumi?
8 Wan narafala haf blong rerem gud wan Baebol stadi, hemia blong prea long Jehova from studen mo ol nid blong hem. Askem long Jehova blong i halpem yu blong tijim Baebol long wan wei we bambae i kasem hat blong studen. (Ridim Kolosi 1:9, 10.) Traem tingbaot eni samting we maet i had blong studen i kasemsave long hem o akseptem. No fogetem se mak blong yu i blong halpem hem blong i gohed kasem baptaes.
9. ?Olsem wanem tija i save halpem studen blong i rerem stadi blong hem? Eksplenem.
9 Taem studen i gohed oltaem blong stadi long Baebol, yumi hop se bambae hem i tinghae moa long samting we Jehova mo Jisas i mekem, nao bambae i wantem lanem moa. (Mat. 5:3, 6) Blong stadi i givhan fulwan long studen, hem i mas konsentret long samting we hem i stap lanem. Blong givhan long hem, eksplenem long hem se i impoten tumas blong hem i rerem gud stadi, hemia taem i ridim ol haf fastaem mo i tingbaot olsem wanem blong folem samting we hem i lanem. ?Tija i save givhan olsem wanem? Hem i save rerem wan lesen wetem studen ya, blong soem olsem wanem blong mekem. * Eksplenem olsem wanem blong faenem ol stret ansa blong ol kwestin, mo soem olsem wanem blong putum laen aninit long ol men toktok o sentens nomo, we bambae i halpem hem blong tingbaot ansa. Biaen askem hem blong i ansa long prapa tok blong hem. Taem hem i mekem olsem, bambae yu naf blong luksave sipos hem i kasemsave lesen o nogat. Be i gat wan moa samting we yu save pulum studen blong yu blong i mekem.
TIJIM HEM BLONG TOKTOK LONG JEHOVA EVRI DEI
Tijim Baebol studen blong i toktok wetem Jehova (Haf 10-11)
10. ?From wanem i impoten blong ridim Baebol evri dei, mo hem i mas mekem wanem blong Baebol riding i givhan moa long hem?
10 I gat sam samting we studen i mas mekem evri wik we i save halpem hem, antap long stadi blong hem. Hem i mas toktok wetem Jehova. ?Olsem wanem hem i mekem? Taem hem i lesin mo i toktok long Jehova. Hem i save lesin long God taem i ridim Baebol evri dei. (Jos. 1:8; Sam 1:1-3) Yu save printim “Program Blong Ridim Baebol” we i stap long jw.org, * mo soem long hem olsem wanem blong yusum. I tru, blong Baebol riding i givhan moa long hem, i gud blong pulum hem blong i tingting dip long samting we Baebol i tijim long saed blong Jehova, mo olsem wanem hem i save folem samting we hem i lanem.—Wok 17:11; Jem. 1:25.
11. ?Olsem wanem wan studen i save lanem blong kam gud moa long prea, mo from wanem i impoten blong i prea oltaem?
11 Pulum studen blong yu blong i prea evri dei, blong toktok long Jehova. Yu prea wetem fulhat blong yu long stat mo long en blong evri stadi, yu prea wetem hem mo yu prea from hem. Taem hem i lesin long ol prea blong yu, bambae hem i lanem olsem wanem blong prea long Jehova God wetem fulhat blong hem, long nem blong Jisas Kraes. (Mat. 6:9; Jon 15:16) Tingbaot, sipos hem i ridim Baebol evri dei (lesin long Jehova) mo i prea (toktok long Jehova), !bambae studen blong yu i kam klosap moa long God! (Jem. 4:8) Taem studen blong yu i lan blong mekem olsem, hem i kasem wan narafala samting tu we i save lidim hem blong i givim laef long God mo baptaes.
HALPEM HEM BLONG I FRENGUD WETEM JEHOVA
12. ?Olsem wanem wan tija i save halpem wan studen blong i frengud wetem Jehova?
12 Samting we wan studen i lanem long Baebol stadi, i mas pulum tingting blong hem, mo i mas tajem hat blong hem tu. ?From wanem? Hat blong yumi, we i minim samting we yumi wantem mo ol filing blong yumi, oli pulum yumi blong tekem aksen. Jisas i tijim ol man long wan fasin we i pulum tingting blong olgeta. Be ol man oli biaen long hem from we tijing blong hem i tajem hat blong olgeta tu. (Luk 24:15, 27, 32) Studen blong yu i mas luk Jehova olsem wan trufala Man we i save fren wetem hem, mo i luk Hem olsem Papa blong hem, God blong hem, mo Fren blong hem. (Sam 25:4, 5) Long taem blong stadi, yu mekem ol fasin blong God i kam laef long tingting blong hem. (Eks. 34:5, 6; 1 Pita 5:6, 7) Nomata wanem topik yutufala i stap stadi long hem, i gud yu pulum tingting blong studen blong i save se Jehova i wanem kaen God. Halpem hem blong i laekem ol gudfala fasin ya blong Jehova, hemia lav, kaen fasin, mo sore blong hem. Jisas i talem se ‘komanmen we i hae moa mo i faswan,’ hemia blong “lavem Jehova we i God blong yu.” (Mat. 22:37, 38) Traem halpem studen blong i lavem Jehova long fulhat blong hem.
13. Tokbaot wan eksampol we i soem olsem wanem blong tijim wan studen long ol fasin blong Jehova.
13 Taem yu stap storian wetem studen blong yu, talemaot olsem wanem yu yu lavem Jehova tumas. Hemia i save halpem studen blong yu blong i luksave se hem tu i mas traehad blong frengud wetem Jehova. (Sam 73:28) Eksampol, ?i gat wan toktok long stadi buk o long wan vas we i tokbaot wan samting long saed blong Jehova, olsem lav, waes, jastis, o paoa blong hem, we i tajem hat blong yu? I gud yu tokbaot long studen blong yu, mo talem long hem se hemia wan long ol risen from wanem yu lavem tumas Papa blong yumi long heven. Be i gat wan moa samting we evri Baebol studen oli mas mekem, blong oli save gohed gud kasem baptaes.
PULUM HEM BLONG JOEN LONG OL MITING BLONG KONGREGESEN
!Yu mas kwik blong enkarejem studen blong i joen long ol miting! (Haf 14-15)
14. ?Hibru 10:24, 25 i tokbaot wanem long saed blong ol miting we i save halpem wan Baebol studen blong i gohed gud?
14 Yumi evriwan i wantem se ol studen blong yumi oli gohed gud kasem baptaes. Wan impoten rod blong halpem olgeta, hemia blong enkarejem olgeta blong joen long ol miting blong kongregesen. Ol tija we oli gat ekspiriens, oli talem se ol studen we oli kwik blong joen long ol miting, oli gohed gud kwiktaem. (Sam 111:1) Sam tija oli eksplenem long ol studen se, haf blong ol save blong olgeta long saed blong Baebol i kamaot long stadi blong olgeta, mo haf i kamaot long ol miting. Ridim Hibru 10:24, 25 wetem studen blong yu, mo eksplenem long hem ol gudfala samting we hem i save kasem taem i joen long ol miting. Soem video ya ?Wanem i Stap Hapen Insaed Long Haos Kingdom? * Halpem studen blong yu blong i tinghae long ol miting mo i mas joen evri wik.
15. ?Yumi save mekem wanem blong enkarejem wan studen blong i joen oltaem long ol miting?
15 ?Yu save mekem wanem sipos studen blong yu i no joen yet long wan miting, o i no stap joen oltaem long ol miting? Wetem glad, tokbaot wan samting we yu lanem long wan miting we i jes pas. Hemia bambae i pulum hem moa i bitim we yu jes invaetem hem. Givim Wajtaoa o Miting Wokbuk we yumi stap stadi long hem naoia long miting. Soem samting we bambae yumi tokbaot long nekis miting, mo askem sipos i gat wan haf we hem i intres moa long hem. Samting we studen blong yu bambae i luk o harem long faswan miting blong hem, bambae i gud moa i bitim eni jos sevis we hem i go long hem bifo. (1 Kor. 14:24, 25) Bambae hem i mitim ol narafala we hem i save folem gudfala eksampol blong olgeta, mo we oli save halpem hem blong gohed gud kasem baptaes.
16. ?I nidim wanem blong lidim ol Baebol stadi i go kasem baptaes, mo bambae yumi lanem wanem long nekis stadi?
16 ?Olsem wanem yumi save lidim ol Baebol stadi i go kasem baptaes? Yumi save halpem wanwan studen blong i tinghae long stadi blong hem, taem yumi enkarejem hem blong i stadi evri wik mo i rerem gud stadi blong hem. Mo tu, yumi wantem enkarejem hem blong i toktok wetem Jehova evri dei mo i traehad blong frengud wetem Hem. Yumi wantem pulum studen blong i kam long ol miting blong kongregesen. (Yu luk bokis long pej 12, “ ?Studen i Mas Mekem Wanem Blong Gohed Gud Kasem Baptaes?”) Be i gat faef moa samting we ol Baebol tija oli mas mekem blong lidim ol studen i go kasem baptaes. Nekis stadi bambae i tokbaot ol samting ya.
SINGSING 76 ?Wanem Tingting Blong Yu?
^ par. 5 Blong tijim wan man, i minim se yumi halpem hem blong “tingting, filim, o mekem samting long wan niufala wei o defren fasin.” Matiu 28:19 we i vas blong yia 2020, i rimaenem yumi se i impoten blong stadi Baebol wetem ol man, mo tijim olgeta olsem wanem blong kam ol disaepol blong Jisas Kraes, we oli baptaes. Long stadi ya mo nekis wan blong hem, bambae yumi luk olsem wanem yumi save kam gud moa long impoten wok ya.
^ par. 2 MINING BLONG TOKTOK: Sipos yu yusum Baebol oltaem blong storian wetem wan man evri wik, yu stap lidim wan Baebol stadi. Sipos yu soem long studen olsem wanem blong stadi, mo yu mekem stadi wetem hem tu taem finis, mo sipos yu sua se bambae hem i gohed, yu save raetemdaon stadi ya long ripot.
^ par. 3 Long tufala stadi ya, i gat sam tingting we i kamaot long ol haf ya “Givhan Long Ol Baebol Stadi Blong Oli Gohed Gud,” we i stap kamaot oltaem long Kingdom Wok Blong Yumi blong Julae 2004 kasem Mei 2005.
^ par. 9 Wajem fo minit video ya Tijim Studen Blong Rerem Baebol Stadi. Long JW.ORG, go long LAEBRI > OL VIDEO > OL MITING MO WOK BLONG PRIJ > TRAEM KAMGUD MOA.
^ par. 10 Yu go long OL BAEBOL TIJING > OL TUL BLONG STADI BAEBOL.
^ par. 14 Long JW.ORG, go long LAEBRI > OL VIDEO > OL MTING MO WOK BLONG PRIJ > OL TUL BLONG PRIJ.
