Evri yia, plante gudfala sipsip oli stap kambak long Kristin kongregesen. !Traem tingbaot, “olgeta long heven oli glad” tumas taem ol man ya oli kambak! (Luk 15:7, 10) Sipos yu yu wan we i jes kambak, yu save sua se Jisas, ol enjel, mo Jehova, oli glad tumas se yu kam pat blong kongregesen bakegen. Be taem yu stap bildim bak frensip blong yu wetem Jehova, bambae yu fesem sam traem. ?Wanem sam long ol traem ya, mo wanem i save givhan long yu?

Plante brata mo sista oli harem nogud yet afta we oli kambak long kongregesen. Maet hemia i mekem yu kasemsave long filing blong King Deved. Nating se God i fogivim ol sin blong hem, be hem i talem se: “Ol mastik blong mi . . . oli kavremap mi.” (Sam 40:12; 65:3) Afta we wan man i kambak long Jehova, filing ya se hem i gilti o i sem, i save stap long hem blong plante yia. Isabelle, we i bin disfelosip bitim 20 yia, i talem se: “Mi harem se i had blong bilivim se Jehova i save fogivim mi.” * Sipos tingting blong yu i foldaon, hemia i save mekem yu kam slak bakegen. (Prov. 24:10) Be yu no mas letem samting ya i hapen.

Samfala, oli ting se maet oli no naf blong mekem evri samting blong oli save frengud wetem Jehova bakegen. Afta we Antoine i kambak long kongregesen, hem i talem se: “Mi harem se mi fogetem evri samting we mi bin mekem olsem wan Witnes bifo.” Ol kaen tingting olsem oli save blokem samfala blong oli no traehad blong mekem bes blong olgeta long wok blong Jehova.

Eksampol, sipos hariken i spolem gud haos blong wan man, i sua se bambae hem i harem nogud, taem hem i tingbaot se i mas traehad mo bambae i tekem taem blong bildim bak haos ya. Long sem fasin, sipos yu bin mekem wan bigfala sin we i spolem frensip blong yu wetem Jehova,  maet yu harem se hemia wan bigfala wok blong bildim bak frensip ya wetem hem. Be yu no stap yu wan.

Jehova i invaetem yumi se: “Yufala i kam, naoia i gud yumi toktok gud wanples blong stretem ol samting ya.” (Aes. 1:18) Yu yu wok had finis blong “stretem ol samting ya.” Mo Jehova i lavem yu from yu traehad blong mekem olsem. Traem tingbaot: From we yu yu kambak, Jehova i yusum janis ya blong pruvum long Setan se hem i man blong giaman.—Prov. 27:11.

Taem yu mekem olsem, yu kam klosap finis long Jehova, mo hem i promes se bambae hem i kam klosap long yu. (Jem. 4:8) Nating se ol narafala oli luk se yu kambak long kongregesen, be yu mas mekem sam moa samting. Yu mas gohed blong mekem lav we yu gat long Papa mo Fren blong yu Jehova, i kam strong. ?Olsem wanem blong mekem?

Traem blong putum sam mak we yu save kasem. Maet yu stap tingbaot yet ol trutok long saed blong Jehova mo ol promes blong fiuja. Be yu nidim blong gat wan gudfala program bakegen, olsem blong prij oltaem, go long ol miting, mo joen wetem ol brata mo sista. Hemia sam mak we yu save putum.

Prea long Jehova oltaem. Papa blong yu i kasemsave se sipos yu gohed blong harem nogud from samting we yu mekem, bambae i had blong yu prea long hem. (Rom 8:26) Be yu mas “prea oltaem,” yu talemaot long Jehova se yu wantem tumas blong kam fren blong hem. (Rom 12:12) Andrej i tingtingbak mo i talem se: “Mi mi harem se mi gilti mo mi sem bitim mak, be evritaem we mi prea, mi harem gud bakegen. Mi harem se mi gat pis long tingting.” Sipos yu no save wanem blong prea from, yu save ridim ol prea blong King Deved long Ol Sam 51 mo 65, we hem i mekem afta we hem i tanem tingting blong hem.

Stadi Baebol oltaem. Hemia bambae i halpem yu blong mekem se bilif mo lav blong yu long Jehova i kam strong. (Sam 19:7-11) Felipe i talem se: “Bifo, from we mi no gat wan gudfala program blong mekem prapa stadi blong mi, mi kam slak mo mi lego Jehova. Be mi no wantem foldaon long sem mastik ya bakegen, taswe mi mekem desisen blong mekem prapa stadi blong mi oltaem.” Yu tu yu save mekem sem mak. Sipos yu no save wanem blong stadi long hem, i gud yu askem wan fren we i strong long spirit blong i halpem yu.

Bildim bak frensip blong yu wetem ol brata mo sista. Samfala we oli kambak long kongregesen, oli wari se maet ol narafala oli gat nogud tingting long saed blong olgeta. Larissa i talem se: “Mi mi sem tumas, mo mi harem se mi spolem kongregesen. Ol filing ya oli stap longtaem long mi.” Be yu save sua se ol elda mo ol narafala we oli bigman long spirit, oli wantem tumas blong halpem yu blong frengud bakegen wetem Jehova. (Yu luk bokis ya “ ?Ol Elda Oli Save Mekem Wanem?”) !Olgeta oli glad we yu kambak mo oli wantem se yu hapi!—Prov. 17:17.

?Wanem i save halpem yu blong frengud moa wetem kongregesen? Joen long evri samting we ol brata mo sista oli stap mekem, olsem wok blong prij mo ol miting. ?Hemia bambae i givhan olsem wanem? Felix i talem se: “Kongregesen i luk fowod blong mi kambak, hemia i mekem mi harem se oli tinghae long mi. Olgeta evriwan oli givhan long mi blong mi harem se mi pat blong kongregesen bakegen, mo se Jehova i fogivim mi, mo blong mi gohed blong wosipim Jehova.”—Yu luk bokis ya “ ?Yu Save Mekem Wanem?”

Setan bambae i gohed blong sanem sam moa “hariken” i kam blong traem spolem frensip blong yu wetem Jehova. (Luk 4:13) Be yu rere naoia, taem yu mekem haos blong yu long saed blong spirit, hemia frensip blong yu wetem Jehova i kam strong.

Jehova i mekem promes ya long saed long ol sipsip blong hem se: “Sipsip we i lus, bambae mi go lukaotem hem, mo sipsip we i lusum rod, bambae mi tekem hem i kambak, mo bambae mi putum bandej long sipsip we i kasem kil, mo sipsip we i slak bambae mi mekem hem i strong.” (Esik. 34:16) Jehova i bin halpem plante brata mo sista blong oli frengud bakegen wetem hem. Mo i sua se hem i wantem tumas blong halpem yu, blong yu gohed blong bildim bak frensip blong yu wetem hem.