1. ?From wanem plante man oli konfius?

TEDE, i gat plante relijen we oli talem se oli Kristin mo se God i glad long wosip blong olgeta. Hemia i mekem plante man oli konfius, mo oli stap askem se: “?I gat wan tru relijen nomo, o God i glad long olgeta relijen?” Be olsem wanem long yumi, ?yumi bilif strong se ol Witnes blong Jehova oli stap tijim trutok mo se fasin blong wosip blong olgeta i laenap wetem tingting blong Jehova? ?I gat rod blong pruvum ol samting ya? Bambae yumi faenemaot.

2. Folem 1 Tesalonaeka 1:5, ?from wanem aposol Pol i bilif strong long trutok?

² Aposol Pol i bilif strong long trutok. (Ridim 1 Tesalonaeka 1:5.) Bilif blong hem i no stanap long ol filing nomo. Pol i stadi gud long Tok blong God. Hem i bilif se “olgeta tok blong Baebol oli kamaot long God fastaem.” (2 Tim. 3:16) ?Hem i lanem wanem? Pol i faenemaot long Baebol se Jisas i Mesaea we God i promes blong sanem i kam, hemia wan pruf we ol lida blong skul blong ol man Jiu oli no wantem luksave. Oli talem se oli stap tijim ol man long ol trutok long saed blong God, be oli stap mekem ol samting we hem i no laekem. (Taetas 1:16) Pol i no olsem ol man ya, hem i bilivim olgeta samting we i stap long Tok blong God. Hem i rere blong tijim mo folem “olgeta samting we God i wantem.”—Wok 20:27.

3. Blong bilif se yumi gat trutok, ?yumi mas save ansa blong olgeta kwestin? (Yu luk bokis ya tu “ Ol Wok Mo Tingting Blong Jehova—‘Oli Plante Tumas Blong Tokbaot.’”)

³ Samfala oli ting se trufala relijen i naf blong ansarem  olgeta kwestin, iven ol kwestin we Baebol i no givim stret ansa blong olgeta. ?Hemia i tru? Tingbaot eksampol blong Pol. Hem i enkarejem ol Kristin long taem blong hem se oli “mas traem olgeta samting fastaem,” be hem i talem tu se i gat plante samting we hem wan i no kasemsave long olgeta. (1 Tes. 5:21) Pol i se: “Save ya we yumi gat, hem i haf nomo . . . Naoia yumi stap luk ol samting oli no klia, i olsem we yumi stap lukluk olgeta long wan aean mira.” (1 Kor. 13:9, 12) Pol i no kasemsave long evri samting, sem mak olsem yumi. Be hem i kasemsave long ol stamba trutok long saed blong Jehova. !Hem i gat naf save we i pruvum long hem se hem i gat trutok!

4. ?Yumi mas mekem wanem blong sua se yumi faenem trutok? ?Bambae yumi tokbaot wanem long saed blong ol tru Kristin?

⁴ Wan rod blong mekem yumi sua se yumi faenem trutok, hemia taem yumi komperem fasin blong wosip we Jisas i stanemap, wetem hemia we ol Witnes blong Jehova oli stap folem tede. Long stadi ya, bambae yumi luk se ol tru Kristin (1) oli no wosipim aedol, (2) oli respektem nem blong Jehova, (3) oli lavem trutok, mo (4) oli lavlavem olgeta tumas.

5. ?Yumi lanem wanem long fasin blong Jisas blong wosipim God? ?Mo olsem wanem yumi save mekem sem mak?

⁵ Jisas i lavem Jehova tumas mo hem i wosipim Jehova nomo, taem hem i stap long heven mo long wol. (Luk 4:8) Mo hem i tijim ol disaepol blong hem blong oli mekem sem mak. Jisas mo ol disaepol oli neva yusum ol pija long wosip blong olgeta. From we God i spirit, i no gat man i save wokem wan samting we i luk olsem God. (Aes. 46:5) ?Be olsem  wanem sipos man i mekem pija blong ol tabu man (saint) mo i prea long olgeta? Seken loa long Ten Komanmen, Jehova i talem se: “Yu no mas katem pija mo sep blong eni samting we i stap antap long heven, no long wol . . . Yu no mas bodaon long olgeta.” (Eks. 20:4, 5) Ol tok ya oli klia gud long ol man we oli wantem mekem God i glad.

6. ?Ol Witnes blong Jehova oli stap folem wanem fasin blong wosip tede?

⁶ Ol man blong stadi long histri oli talem se long taem blong ol aposol, ol Kristin oli wosipim God nomo. Eksampol, buk ya History of the Christian Church i talem se ol faswan Kristin oli “no laekem nating” tingting ya blong gat ol pija long ol ples blong wosip. Tede, ol Witnes blong Jehova oli gat sem tingting olsem ol faswan Kristin ya. Yumi no stap prea long pija blong ol “saint” o ol enjel, mo yumi no stap prea tu long Jisas. Mo yumi no salut long flag o mekem eni samting blong givim wosip long gavman o kantri blong yumi. Nating sipos ol man oli traem fosem yumi blong mekem ol samting ya, be yumi gat strong tingting blong obei long ol tok blong Jisas we i se: “Yu mas mekem wosip long Jehova nomo we i God blong yu.”—Mat. 4:10.

7. ?Olsem wanem ol Witnes blong Jehova oli defren long ol narafala relijen?

⁷ Tede, plante man oli stap folem ol lida blong jos we oli popiula. Oli tinghae tumas long ol lida ya we i olsem se oli wantem wosipim olgeta. Plante man oli stap go long ol jos blong olgeta, pem ol buk blong olgeta, mo givim plante mane long ol lida ya. Mo samfala oli bilivim evri samting we oli talem. Oli glad tumas long ol lida ya, olsem we oli luk Jisas. Be olgeta we oli wosip God long fasin we i stret, oli no folem man. Nating se yumi respektem olgeta we oli stap lidim yumi, be yumi akseptem klia tijing blong Jisas we i se: “Yufala evriwan i brata.” (Mat. 23:8-10) Yumi no wosipim man, nating se oli ol lida blong jos o politik. Yumi no sapotem ol wok blong olgeta mo yumi seraot long wol. Long rod ya, yumi soem se yumi defren long ol narafala relijen we oli talem se oli Kristin.—Jon 18:36.

8. ?Olsem wanem yumi save se Jehova i wantem we yumi leftemap nem blong hem mo talemaot long ol narafala?

⁸ Wan taem Jisas i prea, i se: “Papa, yu leftemap nem blong yu.” Jehova hem wan i ansa long prea ya long wan bigfala voes long heven, mo i promes se bambae hem i leftemap nem blong hem. (Jon 12:28) Taem Jisas i stap long wol, hem i leftemap nem blong Papa blong hem. (Jon 17:26) From samting ya, i stret nomo we ol tru Kristin oli praod blong yusum nem blong God mo talemaot long ol narafala.

9. ?Olsem wanem ol fas Kristin oli pruvum se oli respektem nem blong God?

⁹ Long taem blong ol fas Kristin, smoltaem afta we Kristin kongregesen i stanap, Jehova “i lukluk i go long ol man blong ol nesen, blong hem i tekemaot sam long olgeta blong oli karem nem blong hem.” (Wok 15:14) Ol Kristin ya oli praod blong yusum nem blong God mo blong talemaot nem ya long ol narafala. Oli yusum nem ya taem oli prij mo raetem ol buk blong Baebol. * Long rod ya, oli soem se olgeta nomo oli stap talemaot nem blong God long ol man.—Wok 2:14, 21.

10. ?Wanem i pruvum se ol Witnes blong Jehova nomo oli stap talemaot nem blong Jehova?

 ¹⁰ Ol Witnes blong Jehova oli karem nem blong Jehova. Bambae yumi luk sam pruf. Tede, plante lida blong jos oli mekem bes blong olgeta blong haedem se God i gat prapa nem blong hem. Oli tekemaot nem ya long ol translesen blong Baebol blong olgeta, mo long sam ples oli putum tabu blong no yusum nem ya long ol jos sevis blong olgeta. * Taswe i klia se ol Witnes blong Jehova nomo oli respektem mo ona long nem blong God. !Yumi stap givhan long plante man blong oli save long nem blong God, i bitim ol narafala jos! !Long rod ya, yumi stap wok folem nem we yumi karem, hemia ol Witnes blong Jehova! (Aes. 43:10-12) Yumi wokem bitim 240 milian kopi blong Baebol Long Niu Wol Translesen, we i yusum nem blong Jehova long ol ples we ol narafala Baebol oli tekemaot. Mo yumi wokem ol buk mo magasin we oli leftemap nem blong Jehova long bitim 1,000 lanwis.

11. ?Olsem wanem ol fas Kristin oli soemaot se oli lavem trutok?

¹¹ Jisas i lavem trutok, hemia trutok long saed blong God mo ol plan blong Hem. Jisas i laef folem trutok, mo hem i tijim ol narafala long trutok ya. (Jon 18:37) Ol trufala man blong Jisas oli lavem trutok tumas. (Jon 4: 23, 24) Pita i tokbaot bilif blong ol Kristin se i olsem “rod blong trutok.” (2 Pita 2:2) From we ol fas Kristin oli lavem trutok tumas, oli sakemaot ol tingting blong ol relijen, ol kastom, mo prapa tingting blong olgeta we oli no laenap wetem trutok. (Kol. 2:8) Long sem fasin, ol tru Kristin tede oli traehad blong “gohed blong wokbaot long trutok,” taem oli mekem ol bilif mo fasin blong laef blong olgeta i laenap wetem Tok blong Jehova.—3 Jon 3, 4.

12. ?Hed Kampani i mekem wanem taem i luksave se sam save blong yumi long trutok i mas jenis, mo from wanem hem i mekem olsem?

¹² Tede ol Witnes blong Jehova oli no stap talem se oli kasem save fulwan long trutok blong Baebol. Samtaem oli mekem mastik long fasin blong eksplenem wan tijing blong Baebol o blong lidim kongregesen. Yumi no sapraes long samting ya, from we Baebol i talem klia se ol man blong hem bambae oli kasemsave long trutok taem ol yia oli pas. (Kol. 1:9, 10) Jehova i soemaot trutok sloslo, mo yumi mas glad blong wet wetem longfala tingting blong laet blong trutok i kam klia moa. (Prov. 4:18) Taem Hed Kampani i luksave se sam save blong trutok i mas jenis, oli no fraet blong mekem ol jenis ya. Plante jos tede oli jenisim ol tijing blong olgeta, jes blong mekem ol memba blong olgeta i glad, o blong wol i leftemap olgeta. Be ol Witnes blong Jehova oli mekem ol jenis from we oli wantem kam klosap moa long God, mo wosipim hem olsem we Jisas i mekem. (Jem. 4:4) !Yumi no mekem ol jenis folem tingting blong ol man blong wol we i jenis, be hemia from we save blong yumi long Baebol i kam klia moa. !Yumi lavem trutok tumas!—1 Tes. 2:3, 4.

13. ?Wanem impoten fasin we ol tru Kristin oli soemaot, mo olsem wanem yumi luk fasin ya long ol Witnes blong Jehova tede?

¹³ Long taem blong ol fas Kristin, i gat plante gudfala fasin we i makemaot Kristin kongregesen, be wan we i moa impoten hemia lav. Jisas i talem se: “Sipos yufala i lavlavem yufala, bambae olgeta man oli save se yufala i disaepol blong mi.” (Jon 13:34, 35) Tede, ol Witnes blong Jehova long olgeta ples long wol oli stap soemaot lav mo oli joen gud. Yumi defren long ol narafala relijen, from we yumi olsem wan famle, nating se yumi kamaot long ol defren kantri mo yumi gat defren kalja. Mo yumi luksave samting ya taem yumi stap long ol miting, ol asembli, mo ol bigfala asembli. Hemia i mekem yumi bilif strong moa se yumi stap wosipim Jehova long rod we hem i wantem.

14. Folem Kolosi 3:12-14, ?wanem wan impoten rod blong soemaot se yumi lavlavem yumi?

¹⁴ Baebol i talem se yumi ‘mas lavlavem yumi mo lav ya i mas strong gud.’ (1 Pita 4:8) Wan rod blong soemaot lav ya, hemia taem yumi fofogivim yumi mo yumi no hareap blong kros. Mo tu, yumi wantem tekem evri janis blong givim samting long olgeta long kongregesen mo invaetem olgeta i kam long haos blong yumi, iven olgeta ya tu we maet oli mekem yumi harem nogud. (Ridim Kolosi 3:12-14.) Taem yumi soemaot lav ya, yumi stap pruvum se yumi ol tru Kristin.

15. ?Olsem wanem yumi stap folem sem fasin blong wosip olsem ol faswan Kristin?

¹⁵ I gat sam narafala rod tu we i soemaot se yumi stap folem sem fasin blong wosip olsem Kristin kongregesen long taem blong ol fas  Kristin. Eksampol, arenjmen we oganaesesen blong yumi i folem blong gat ol eria elda, ol elda mo ol man blong givhan, i folem gud arenjmen we ol aposol long taem blong ol faswan Kristin oli folem. (Fil. 1:1; Taet. 1:5) Olsem ol faswan Kristin ya, yumi respektem ol loa blong Jehova long saed blong seks mo mared, fasin blong yusum blad, mo yumi protektem kongregesen long olgeta we oli no wantem folem ol loa blong God.—Wok 15:28, 29; 1 Kor. 5:11-13; 6:9, 10; Hib. 13:4.

16. ?Yumi lanem wanem long ol tok blong Efesas 4:4-6?

¹⁶ Jisas i talem se plante man bambae oli talem se oli ol disaepol blong hem, be i no evriwan we i tru. (Mat. 7:21-23) Baebol i talem tu se long ol las dei, plante man “bambae oli mekem olsem se oli ona long God.” (2 Tim. 3:1, 5) Be Baebol i talem klia long yumi se i gat “wan bilif” nomo we God i glad long hem.—Ridim Efesas 4:4-6.

17. ?Tede, hu i stap folem Jisas mo wan bilif ya we i tru?

¹⁷ ?Tede, hu ya i stap folem wan bilif ya we i tru? Yumi luk ol pruf finis. Yumi bin luk fasin blong wosip we Jisas i bin stanemap, we ol faswan Kristin oli bin folem. I gat wan ansa nomo, hemia ol Witnes blong Jehova. !I wan blesing blong stap olsem wan man blong Jehova, mo blong save trutok long saed blong Jehova mo ol plan blong hem! Taswe, yumi wantem gohed blong bilif strong mo holemtaet trutok.