Ol Man Isrel Bifo Oli Joen Long Faet—?From Wanem Yumi No Mekem Olsem?
LONG Wol Wo Tu, wan lida blong ol Nasi i singaot strong long wan grup blong ol Witnes blong Jehova se: “!Sipos eniwan long yufala i no wantem faet agensem Franis o Inglan, bambae yufala evriwan i ded!” Nating se ol Nasi soldia oli stap klosap wetem masket blong olgeta, be i no gat wan long ol brata we i lego bilif blong hem. !Oli no fraet nating! Stori ya i soemaot tingting blong ol Witnes blong Jehova long saed blong wo. Yumi no joen long ol faet blong ol nesen. Nating se oli wantem kilim yumi i ded, be yumi no save tekem saed long ol faet blong wol.
Be plante we oli talem se oli Kristin, oli no agri long samting ya. Oli bilif se wan Kristin i mas faet from kantri blong hem. Maet oli talem se: ‘Ol man Isrel bifo oli man blong God be oli joen long ol faet, ?taswe from wanem ol Kristin tede oli no faet?’ ?Bambae yu yu ansa olsem wanem? Yu save eksplenem se ol man Isrel bifo oli defren olgeta long ol man blong God tede. Bambae yumi tokbaot faef samting we i mekem olgeta oli defren.
1. OL MAN BLONG GOD OLI BLONG WAN NESEN NOMO
Long taem bifo, Jehova i jusum wan nesen nomo blong oli kam ol man blong hem, hemia nesen blong Isrel. Hem i talem se ol man Isrel oli ‘spesel propeti blong hem i winim ol narafala man.’ (Eks. 19:5) Mo tu, God i makemaot wan spesel ples blong olgeta. Taswe taem God i talem long ol man Isrel blong go faet agensem ol narafala nesen, oli no stap faet agensem o kilim ol narafala man blong Jehova. *
Tede, ol man blong Jehova oli kamaot long ‘olgeta kantri, olgeta traeb, olgeta grup blong man, mo olgeta lanwis.’ (Rev. 7:9) Taswe, sipos ol man blong God oli joen long ol faet, maet oli stap faet agensem o kilim i ded ol brata mo sista blong olgeta long saed blong bilif.
2. JEHOVA I GIVIM ODA LONG OL MAN ISREL BLONG OLI GO FAET
Long taem bifo, Jehova nao i mekem desisen long wetaem mo from wanem ol man Isrel oli mas faet. Olsem nao, God i givim oda blong mekem jajmen blong hem i kamtru long ol man Kenan, we oli stap mekem ol rabis fasin olsem, wosipim ol dimon, ol doti fasin blong seks, mo kilim pikinini olsem sakrefaes. Jehova i talem long ol man Isrel blong oli kilim i ded ol rabis man ya, we oli stap spolem kantri we hem i promes blong givim long Isrel. (Lev. 18:24, 25) Taem oli go stap long Promes Lan, sam samtaem God i talem long olgeta blong go faet blong protektem Isrel long ol enemi. (2 Saml. 5:17-25) Be Jehova i neva letem ol man Isrel oli mekem prapa desisen blong olgeta blong go faet. Taem oli no obei long hem, bigfala trabol i kamaot.—Nam. 14:41-45; 2 Kron. 35:20-24.
Tede, Jehova i no stap talem long ol man blong oli go faet. Ol nesen oli stap faet from samting we olgeta nomo oli wantem, i no from samting we God i wantem. Maet oli statem wan faet from we oli wantem kasem graon, winim mane, o from politik. ?Be olsem wanem long olgeta we oli stap talem se oli faet long nem blong God blong protektem wosip blong olgeta, o blong kilim i ded ol enemi blong God? Long fiuja nomo, Jehova bambae i protektem ol man blong hem mo kilim i ded ol enemi blong hem, hemia long faet ya Amagedon. (Rev. 16:14, 16) Long faet ya, ami blong God, hemia ol spirit man long heven, be i no ol man blong hem long wol.—Rev. 19:11-15.
3. OL MAN ISREL OLI NO KILIM I DED OL MAN WE OLI BILIF LONG JEHOVA
?God i faet long bihaf blong sam nesen tede, olsem hem i mekem taem Isrel i winim Jeriko?
Plante taem, ami blong Isrel bifo i sore long olgeta we oli soemaot bilif long God, mo i kilim i ded olgeta nomo we Jehova i jajem. Traem tingbaot tufala eksampol ya: Nating se Jehova i talem long ol man Isrel blong spolem Jeriko, be from bilif blong Rehab, oli no kilim i ded hem mo famle blong hem. (Jos. 2:9-16; 6:16, 17) Samtaem biaen, oli no spolem taon ya Gibeon, from we ol man blong hem oli soemaot respek long God.—Jos. 9:3-9, 17-19.
Long ol wo blong ol nesen tede, oli no sore long olgeta we oli bilif long God. Mo plante taem ol soldia oli kilim i ded ol man we oli no mekem wan rong nating.
4. OL MAN ISREL OLI MAS FOLEM OL RUL BLONG GOD LONG OL WO
Ol soldia blong Isrel bifo oli mas folem ol rul blong Jehova long ol wo. Samtaem, God i askem long olgeta blong toktok wetem ol enemi blong traem faenem “rod blong mekem pis.” (Dut. 20:10) Mo tu, Jehova i wantem se ol soldia blong Isrel oli stap klin long bodi mo kamp blong olgeta, mo long fasin blong olgeta. (Dut. 23:9-14) Taem ol narafala ami oli winim wan taon, plante taem oli repem ol woman blong taon ya. Be Jehova i no letem ol man Isrel oli mekem olsem. Loa blong Jehova i talem se taem oli winim wan taon, oli mas wet wan manis bifo we oli mared long wan woman blong taon ya.—Dut. 21:10-13.
Tede, plante kantri oli mekem kontrak blong agri long ol rul blong folem long ol wo. Hemia i blong protektem ol man. Be sore tumas, plante taem oli no folem ol rul ya.
5. GOD I SAPOTEM NESEN BLONG HEM LONG OL FAET
Taem Jehova i winim Jeriko, hem i sevem Rehab mo famle blong hem. Long ol wo tede, ?ol nesen oli sore long olgeta we oli bilif long Jehova?
Plante taem Jehova i faet long bihaf blong ol man Isrel bifo, taem hem i mekem wan merikel blong oli win. Tingbaot olsem wanem Jehova i halpem ol ami blong Isrel blong winim taon ya Jeriko. Jehova i talem long olgeta blong “oli singaot bigwan . . . [nao] wol blong taon ya i folfoldaon.” Hemia i mekem i isi blong oli winim taon ya. (Jos. 6:20) ?Mo olsem wanem long faet we oli mekem agensem ol man Amoro? Baebol i talem se: “Jehova i mekem ol bigfala ston blong aes oli folfoldaon long olgeta . . . oli kilim plante moa man, i bitim we ol man Isrel oli kilim olgeta i ded long naef blong faet.”—Jos. 10:6-11.
Tede, Jehova i no faet long bihaf blong eni nesen long wol. Kingdom blong hem, we Jisas i King blong hem, “i no blong wol ya.” (Jon 18:36) Setan nao i bos long ol gavman blong man. Ol rabis wo we ol nesen oli mekem, oli soemaot fasin blong Setan.—Luk 4:5, 6; 1 Jon 5:19.
OL TRU KRISTIN OLI TRAEHAD BLONG MEKEM PIS
Olsem we yumi luk finis, tede yumi no stap long sem situesen olsem Isrel bifo. Be i gat sam narafala risen tu from wanem yumi no joen long ol wo. God i talemaot finis se long ol las dei, ol man blong hem “bambae oli no moa lanem blong faet.” Hemia i min se bambae oli no moa joen long ol wo. (Aes. 2:2-4) Mo tu, Kraes i talem se ol disaepol blong hem bambae oli no man “blong wol ya,” taswe oli no tekem saed nating long ol wo.—Jon 15:19.
Mo tu, Kraes i talem long ol man blong hem se oli mas sakemaot ol tingting we oli save lidim olgeta blong kros long narafala mo faet. (Mat. 5:21, 22) Hem i talem se oli mas “man blong mekem pis,” mo oli mas lavem ol enemi blong olgeta.—Mat. 5:9, 44.
?Olsem wanem yumi wanwan i save mekem olsem? Ating yumi no wantem faet long wan wo, be maet yumi gat sam nogud filing long hat blong yumi, we oli save mekem rao i kamaot insaed long kongregesen. Yumi mas gohed blong traehad blong sakemaot ol filing olsem.—Jem. 4:1, 11.
Yes, yumi no joen long ol wo blong ol nesen, be yumi wok had blong gat pis wetem ol brata mo sista mo lavem olgeta. (Jon 13:34, 35) I gud yumi gat strong tingting blong no joen nating long ol faet, taem yumi stap wet long dei blong Jehova blong finisim wo blong olwe.—Sam 46:9.
^ Samtaem ol laen blong Isrel oli faet agensem olgeta nomo, be Jehova i no glad long ol wo olsem. (1 King 12:24) Wanwan taem nomo hem i agri long ol faet ya, from we sam laen oli lego hem o oli mekem bigfala sin.—Jaj. 20:3-35; 2 Kron. 13:3-18; 25:14-22; 28:1-8.
Maet Yu Laekem Hemia Tu
KWESTIN WE PLANTE MAN OLI STAP ASKEM
?From Wanem Ol Witnes Blong Jehova Oli No Joen Long Ol Faet?
Long evri ples long wol, ol Witnes oli no joen long faet. Faenemaot from wanem mifala i mekem olsem.
