1. ?From wanem yumi glad taem yumi ‘haremsave se yumi nidim God’?

 TRUFALA glad i no wan filing we yumi gat blong smoltaem nomo, afta i lus. Hem i save stap long ful laef blong wan man. ?Olsem wanem samting ya i save hapen? Jisas i eksplenem long Bigfala Toktok Blong Hem Antap Long Hil se: “Olgeta we oli haremsave se oli nidim God long laef blong olgeta, oli glad.” (Mat. 5:3) Jisas i save se Krieta blong yumi, Jehova God, i wokem yumi wetem wan filing we yumi wantem save hem mo wosipim hem. Mo from we Jehova hem i “hapi God ya,” olgeta we oli wosipim hem oli hapi tu.—1 Tim. 1:11.

2-3. (1) ?Jisas i talem se hu bakegen i save glad? (2) ?Bambae yumi tokbaot wanem long stadi ya, mo from wanem yumi nidim blong tokbaot?

² ?Yumi save glad nomo sipos yumi no gat problem long laef blong yumi? I no olsem. Jisas i talem samting we yumi sapraes long hem. Hem i talem se “olgeta we oli harem nogud,” maet from we oli mekem bigfala sin o oli gat plante problem long laef blong olgeta, oli save glad. Jisas i talem sem samting long saed blong “olgeta we oli stap mekem stret fasin be ol man oli ronem mo kilim olgeta,” mo olgeta we ol man oli “spolem” olgeta from we oli folem Kraes. (Mat. 5:4, 10, 11) ?Be olsem wanem yumi save glad taem ol samting ya i hapen long yumi?

³ Jisas i tijim se yumi glad from we yumi haremsave se yumi nidim God mo yumi kam klosap long hem, be i no from  we yumi no gat trabol long laef blong yumi. (Jem. 4:8) ?Yumi mas mekem wanem blong kasem trufala glad? Long stadi ya, bambae yumi tokbaot tri samting.

4. ?Wanem fas samting we yumi mas mekem blong faenem trufala glad? (Ol Sam 1:1-3)

⁴ 1: Blong faenem trufala glad, yumi mas ridim Baebol mo stadi long hem. Ol man mo ol animol tu oli nidim prapa kakae blong stap laef. Be ol man nomo oli save ridim Baebol we i olsem kakae we God i givim. Taswe Jisas i talem se: “Man i mas laef, i no long bred nomo, be long evri tok we i kamaot long maot blong Jehova.” (Mat. 4:4) Yumi no mas mestem blong ridim Tok blong God evri dei. Man blong raetem Ol Sam i talem se, man i glad taem hem i laekem “loa blong Jehova, mo hem i stap ridim loa blong Hem . . . long dei mo long naet.”—Ridim Ol Sam 1:1-3.

5-6. (1) Long Baebol, ?Jehova i talem wanem long yumi? (2) ?Olsem wanem Baebol riding i save givhan long yumi?

⁵ From we Jehova i lavem yumi, hem i talem long Baebol wanem we yumi mas mekem, blong yumi save glad long laef blong yumi. Hem i talem wanem we hem i wantem se yumi mekem. Hem i talem olsem wanem blong kam klosap long hem, mo kasem fogif from ol sin blong yumi. Mo hem i talem tu ol nambawan promes long saed blong fiuja. (Jer. 29:11) !Ol trutok ya we yumi lanem taem yumi stadi Baebol, oli mekem yumi glad tumas!

⁶ Mo tu, Baebol i fulap long ol gudfala advaes we yumi save folem evri dei long laef blong yumi. Sipos yumi folem ol advaes ya, bambae yumi glad. Taem yu harem nogud  from ol problem long laef blong yu, i gud yu spenem moa taem blong ridim Tok blong Jehova mo tingting dip long hem. Jisas i talem se: “!Ol man we oli harem tok blong God mo oli stap obei long hem, olgeta ya nao oli glad!”—Luk 11:28.

7. ?Olsem wanem blong kasem ol gudfala samting long Baebol riding blong yu?

⁷ Taem yu ridim Tok blong God, i gud yu tekem taem blong harem gud long hem. Wan pijatok: ?Samtaem yu bisi o yu stap tingbaot wan samting, nao yu hariap tumas blong kakae wan gudfala samting? Maet yu solemdaon kwiktaem mo yu no testem gud. Afta, yu tingbaot se yu kakae kwik tumas, mo i moa gud sipos yu bin slodaon mo enjoem kakae ya. I sem mak taem yu ridim Baebol. Samtaem maet yu ridim kwik tumas, mo yu no rili enjoem samting we Jehova i stap talem. I moa gud yu tekem taem blong ridim Tok blong God, pijarem ol samting we i hapen, harem saon blong ol voes, mo tingbaot samting we yu stap ridim. Sipos yu mekem olsem, bambae yu glad moa.

8. ?Wanem wok we “gudfala slef we i waes” i stap mekem? (Yu luk futnot tu.)

⁸ Jisas i putumap “gudfala slef we i waes” blong givim kakae long stret taem, mo yumi stap kakae gud. * (Mat. 24:45) Evri save we gudfala slef ya i givim long yumi i stanap long Baebol. (1 Tes. 2:13) Taswe kakae ya i halpem yumi blong save tingting blong Jehova we i stap long Baebol. Hemia nao from wanem yumi ridim ol Wajtaoa mo Wekap! mo ol atikol long jw.org, yumi rerem ol haf blong miting long medel wik mo long wiken, mo yumi wajem JW Brodkasting^® evri manis. Sipos yumi gohed oltaem blong ridim Baebol mo stadi long hem, bambae yumi naf blong mekem seken samting we i givim trufala glad.

9. ?Wanem seken samting we i givim trufala glad?

⁹ 2: Blong faenem trufala glad, yumi mas folem ol loa blong Jehova. Man we i raetem Sam i talem se: “Evri man we oli fraet long Jehova, oli glad, olgeta oli stap wokbaot folem ol rod blong Hem.” (Sam 128:1) Fraet long Jehova i min se yumi respektem hem, mo yumi no wantem mekem eni samting we hem i no laekem. (Prov. 16:6) Taswe yumi traehad blong gohed blong folem ol samting we Jehova i talem long Baebol se oli stret mo oli no stret. (2 Kor. 7:1) Bambae yumi glad sipos yumi mekem ol samting we Jehova i laekem, mo yumi sakemaot ol samting we hem i no laekem nating.—Sam 37:27; 97:10; Rom 12:9.

10. Folem Rom 12:2, ?yumi mas mekem wanem?

¹⁰ Ridim Rom 12:2. Maet wan man i save se Jehova i gat raet blong talem samting we i stret mo samting we i no stret, be hem i mas wantem blong folem ol rul ya tu. Olsem wan man we i save se gavman i gat raet blong makem spid we yumi no mas bitim long trak, be maet hem i no wantem folem long laef blong hem, taswe hem i spid tumas. Yumi soemaot long ol aksen blong yumi se yumi bilif long ol rul blong Jehova, mo se i moagud blong folem olgeta long laef blong yumi. (Prov. 12:28) Deved i gat sem tingting taem hem i talem long Jehova, se: “Yu yu mekem mi mi save rod blong laef. Long fored blong yu, i gat bigfala glad, glad i stap oltaem long raethan blong yu.”—Sam 16:11.

11-12. (1) Taem yumi wari o tingting i foldaon, ?yumi mas lukaot gud long wanem samting? (2) ?Olsem wanem Filipae 4:8 i save halpem yumi blong jusum gud ol pleplei?

¹¹ Taem yumi wari o tingting i foldaon, maet  yumi harem se yumi wantem spel smol o pleplei. Hemia i oraet nomo, be yumi mas lukaot gud blong no jusum wan pleplei we Jehova i no laekem.—Efes. 5:10-12, 15-17.

¹² Long leta we aposol Pol i raetem long ol Kristin long Filipae, hem i talem se oli mas tingbaot ol samting “we oli stret, . . . oli klin, . . . i mekem man i gat lav, [mo] i stret blong yumi leftemap.” (Ridim Filipae 4:8.) I tru Pol i no stap tokbaot ol pleplei, be samting we hem i raetem i save givhan long yumi blong jusum ol gudfala pleplei. Traem hemia: Ridim ful vas ya mo taem yu kasem tok ya “olgeta samting,” jenisim i kam “ol singsing,” “ol muvi,” “ol buk,” o “ol video gem.” Sipos yu mekem olsem, hemia bambae i givhan long yu blong luksave samting we God i glad long hem mo i no glad long hem. Yumi wantem traehad blong kasem ol hae mak blong Jehova long saed blong ol gudfala fasin. (Sam 119:1-3) Olsem nao, bambae yumi gat wan tingting we i no stikim yumi, nao yumi naf blong mekem nekis samting blong faenem trufala glad.—Wok 23:1.

13. ?Wanem nambatri samting we i save halpem yumi blong faenem trufala glad? (Jon 4:23, 24)

¹³ 3: Meksua se wosip blong Jehova i stap long fasples long laef blong yu. Jehova i Krieta blong yumi, taswe i stret nomo we yumi wosipim hem. (Rev. 4:11; 14:6, 7) Samting we i moa impoten long laef blong yumi, hemia blong wosipim Jehova long fasin we hem i wantem, “long spirit mo long trutok.” (Ridim Jon 4:23, 24.) Yumi wantem se tabu spirit i lidim yumi blong wosipim God folem trutok we yumi faenem long Baebol. Nating se yumi stap long wan kantri we oli putum tabu long wok blong yumi, be wosip i mas stap yet long fasples long laef blong yumi. Naoia, i gat bitim 100 brata mo sista we oli stap long prisen from we oli Witnes blong Jehova. * Be oli glad from we oli traehad blong faenem rod oltaem blong prea, stadi, mo tokbaot God mo Kingdom long narafala. Taem ol man oli agensem yumi o oli ronem mo kilim yumi, yumi glad from we yumi save se Jehova i stap wetem yumi, mo hem i givhan long yumi blong stanap strong.—Jem. 1:12; 1 Pita 4:14.

14. ?Wanem i hapen long wan yangfala brata long Tajikistan, mo from wanem?

¹⁴ Sam brata mo sista oli fesem hadtaem, be oli holemtaet trufala glad from oli mekem ol trifala samting we yumi tokbaot. Traem tingbaot samting we i hapen long Jovidon Bobojonov blong Tajikistan taem hem i gat 19 yia. Long 4 Oktoba 2019, oli arestem hem from we hem i no wantem joen long ami, mo oli putum hem long prisen blong plante manis. Oli mekem i nogud long hem, olsem se hem i wan rabis man blong brekem loa. Oli tokbaot samting ya long nius long plante kantri. Oli kilim hem nogud, mo oli traem fosem hem blong mekem wan promes blong joen long ami mo werem yunifom. Afta, kot i talem se hem i gilti, mo oli sanem hem i go long wan kamp we oli fosem olgeta blong wok had. Biaen, presiden blong kantri ya i talem se Jovidon i no gat fol, mo i givim oda blong oli letem hem i gofri. Long hadtaem ya, Jovidon i holemstrong long Jehova, mo i no lusum glad. ?Olsem wanem hem i mekem olsem? Oltaem hem i haremsave se i nidim God long laef blong hem.

15. ?Olsem wanem Jovidon i gohed blong kasem save long Jehova taem hem i stap long prisen?

 ¹⁵ Taem Jovidon i stap long prisen, hem i gohed blong kasem save long Jehova, nating se hem i no gat wan Baebol o wan buk blong yumi. ?Olsem wanem hem i save Jehova moa? Ol brata mo sista oli karem kakae i kam long hem mo oli raetem vas blong dei long ol paket we oli putum kakae long hem. Long rod ya, hem i save ridim Baebol mo tingting dip long hem evri dei. Afta we hem i kamaot long prisen, hem i givim advaes long olgeta we oli no fesem hadtaem ya yet, se: “I impoten tumas we yu yusum gud taem ya we yu fri yet, blong ridim Baebol mo ol buk blong yumi blong kasem save moa long Jehova.”

16. ?Jovidon i tingbaot wanem samting?

¹⁶ Jovidon i folem ol loa blong Jehova long laef blong hem. Hem i no tingbaot ol nogud samting we ol sinman oli wantem, be hem i putum tingting blong hem i stap strong long Jehova mo ol samting we Hem i laekem. Hem i haremgud blong luk ol naes samting raonabaot we God i krietem. Mo evri moning taem hem i wekap, hem i harem ol pijin oli singsing. Long naet, hem i stap lukluk mun mo ol sta. Hem i talem se: “Ol presen ya we Jehova i givim oli mekem mi mi glad tumas, mo oli  leftemap tingting blong mi.” Taem yumi gat tangkiu from ol save blong Baebol mo ol narafala samting we Jehova i givim, yumi glad tumas, mo glad ya i givhan long yumi blong stanap strong.

17. ?Olsem wanem 1 Pita 1:6, 7 i stret long olgeta we oli kasem hadtaem olsem Jovidon?

¹⁷ Mo tu, Jovidon i putum wosip blong Jehova long fasples long laef blong hem. Hem i save se i impoten tumas blong holemstrong long trufala God. Jisas i talem se: “Yu mas mekem wosip long Jehova nomo we i God blong yu, mo yu mas mekem tabu wok blong hem nomo.” (Luk 4:8) Ol komanda blong ami mo ol soldia oli traem fosem Jovidon blong i lego bilif blong hem. Be Jovidon i prea strong evri dei mo evri naet, i askem Jehova blong halpem hem blong i no givap, mo i no mekem wan samting agensem Jehova. Nating se oli mekem i nogud tumas long hem, be hem i neva lego Jehova. From samting ya, hem i glad tumas. Mo naoia hem i gat wan samting we hem i no gat bifo we oli arestem, kilim, mo putum hem long prisen, hemia wan bilif we i strong moa from we hem i winim ol samting we oli traem hem.—Ridim 1 Pita 1:6, 7.

18. ?Olsem wanem blong holemtaet trufala glad?

¹⁸ Jehova i save samting we yumi nidim blong yumi glad. Sipos yu mekem ol trifala samting ya we i givim trufala glad, bambae yu no lusum glad taem yu kasem ol hadtaem. Bambae yu tu yu save talem se: “!Ol man we Jehova i God blong olgeta, oli glad!”—Sam 144:15.