?Yu yu faenem i had blong tingbaot ol samting we yu jes stadi long hem? Hemia i hapen long yumi evriwan samtaem. ?Long taem olsem, wanem i save givhan? Tingbaot bakegen ol impoten poen.

Taem yu stap stadi, i gud yu stop smoltaem blong tekem not long ol impoten poen. Makem olsem wanem aposol Pol i halpem ol man we bambae oli ridim leta blong hem blong oli mekem olsem, taem hem i talem se: ‘Nao bigfala poen blong ol tok ya i olsem.’ (Hib. 8:1) Hem i talem ol tok ya blong halpem ol man we oli lesin blong oli kasemsave long tok blong hem, mo luk olsem wanem evri tok blong hem oli joen gud.

Maet long en blong stadi blong yu, yu save tekem ten minit olsem blong tingtingbak long ol impoten poen we yu lanem long stadi blong yu. Sipos yu no tingbaot gud ol impoten poen ya, i gud yu ridim ol smol stamba tok o ol faswan sentens long wanwan paragraf, from hemia i save givhan long yu blong tingbaot ol samting ya bakegen. Sipos yu lanem wan niufala samting, i gud yu traem eksplenem long prapa toktok blong yu. Sipos yu lukluk bakegen ol impoten poen, bambae i isi blong yu tingbaot mo yu kasemsave gud olsem wanem blong folem ol save ya long laef blong yu.