1. ?Wanem filing blong Jehova long ol man blong hem?

 ?JEHOVA i luk wanem, taem hem i luk ol man blong hem long wol? Hem i save gud taem yumi glad mo taem yumi harem nogud. (Sam 37:18) Hem i glad taem hem i luk se yumi mekem bes blong yumi blong wosipim hem, nating se yumi harem nogud long filing blong yumi. Antap long hemia, hem i wantem tumas blong sapotem yumi mo leftemap tingting blong yumi.

2. ?Jehova i stap mekem wanem long ol man we hat blong olgeta i brok? ?Yumi save mekem wanem blong Jehova i kea gud long yumi?

² Ol Sam 147:3 i talem se Jehova i stap ‘fasem ol soa blong man’ we hat blong hem i brok. Vas ya i tokbaot Jehova se hem i kea gud long ol man we oli harem nogud long filing blong olgeta. ?Yumi mas mekem wanem blong Jehova i kea gud long yumi? Tingbaot eksampol ya. Wan gudfala dokta i save givhan long wan man we i kasem kil, blong i kam gud bakegen. Be blong man ya i kam gud, hem i mas folem gud ol advaes we dokta i talem long hem. Taswe long stadi ya, bambae yumi luk samting we Jehova i talem long tok blong hem Baebol, blong i givhan long ol man we oli harem nogud long filing blong olgeta, mo samting we yumi mas mekem blong folem ol advaes ya.

JEHOVA I RIMAENEM YUMI SE YUMI SAS

3. ?From wanem sam man oli harem se oli gud blong nating nomo?

³ Tede, yumi laef long wan wol we i no gat lav, mo plante man oli harem se oli gud blong nating nomo. Wan sista we nem blong hem Helen, a i talem se: “Mi gruap long wan famle we i no soemaot lav. Papa blong mi i raf, mo evri dei hem i stap talem long mi se mi gud blong nating nomo.” Olsem Helen, maet yu tu ol man oli tritim nogud yu, oli jikim yu, o oli no soemaot  lav long yu. Sipos i olsem, maet i had blong yu bilivim se wan man i kea long yu.

4. Folem Ol Sam 34:​18, ?Jehova i mekem yumi sua long wanem?

⁴ Nating sipos ol narafala oli tritim nogud yu, yu save sua se Jehova i lavem yu mo i tinghae long yu. Hem “i stap klosap long olgeta we hat blong olgeta i brok.” (Ridim Ol Sam 34:18.) Sipos ‘tingting blong yu i foldaon,’ tingbaot se Jehova i luk sam gudfala samting long hat blong yu mo i pulum yu yu kam long hem. (Jon 6:44) Oltaem Jehova i rere blong halpem yu, from we yu yu sas long ae blong hem.

5. ?Yumi lanem wanem long fasin blong Jisas blong kaen gud long ol man we narafala i luklukdaon long olgeta?

⁵ Yumi naf blong kasemsave long filing blong Jehova, taem yumi tingbaot eksampol blong Jisas. Taem hem i stap long wol, hem i kaen long ol man we ol narafala oli luklukdaon long olgeta. (Mat. 9:​9-12) Taem wan woman i tajem klos blong Jisas from i wantem kam gud, Jisas i leftemap tingting blong hem mo i talem gudfala tok long hem from bilif blong hem. (Mak 5:​25-34) Jisas i soemaot gud ol fasin blong Papa blong hem. (Jon 14:9) Taswe, yu save sua gud se Jehova i tinghae long yu mo i luk ol gudfala fasin blong yu, we hemia i minim tu bilif mo lav we yu gat long hem.

6. ?Yu save mekem wanem sipos yu gat filing ya se yu gud blong nating nomo?

⁶ ?Yu save mekem wanem sipos yu gat filing ya se yu gud blong nating nomo? I gud yu ridim ol vas blong Baebol we oli mekem yu sua se Jehova i tinghae long yu, mo yu tingting dip long olgeta. b (Sam 94:19) Sipos yu no kasem wan mak we yu putum o tingting blong yu i foldaon from yu no naf blong mekem plante samting olsem ol narafala, yu no mas jajem yu wan se yu nogud. Jehova i no save askem  yu blong mekem moa long wanem we yu naf blong mekem. (Sam 103:​13, 14) Sipos yu harem nogud from wan man i bin spolem yu, i nogud yu blemem yu wan o ting se i fol blong yu. Tingbaot se Jehova bambae i jajem man we i spolem yu, mo bambae hem i halpem yu. (1 Pita 3:12) Sandra, we wan man i bin spolem hem taem hem i pikinini, i talem se: “Oltaem mi askem long Jehova blong i halpem mi blong mi gat stret tingting long mi wan, mo blong mi luk mi wan olsem we Jehova i luk mi.”

7. ?Olsem wanem yumi save yusum ol ekspiriens we yumi go tru long hem long wok blong Jehova?

⁷ Yu no mas ting nating long yu wan, from we Jehova i save yusum yu blong halpem ol narafala. Hem i givim nambawan blesing ya long yu blong wok wetem hem long wok blong prij. (1 Kor. 3:9) Ekspiriens we yu gotru long hem i save givhan long yu blong kasemsave long filing blong ol narafala we oli harem nogud. Taswe, yu save mekem plante samting blong givhan long olgeta. Helen, we yumi tokbaot hem finis i bin kasem help, mo naoia hem i naf blong halpem ol narafala. Hem i talem se: “Bifo, mi harem se mi nating nomo, be Jehova i mekem mi harem save se ol narafala oli lavem mi, mo i yusum mi blong halpem ol narafala.” Yes, naoia Helen i glad tumas blong mekem wok blong fultaem paenia.

JEHOVA I WANTEM SE YUMI AKSEPTEM FASIN BLONG HEM BLONG FOGIVIM MAN

8. ?Jehova i talem wanem long yumi long Aesea 1:18?

⁸ Tingting blong sam man blong Jehova i trabol taem oli tingbaot ol nogud samting we oli mekem, maet bifo o afta we oli baptaes. Be i gud yumi tingbaot se Jehova i givim ransom from we hem i lavem yumi tumas, mo hem i wantem se yumi akseptem presen blong hem. Jehova i talem klia long yumi se afta we yumi “stretem ol samting” c ya wetem hem, bambae hem i fogivim yumi fulwan. (Ridim Aesea 1:18.) !I naes tumas blong save se Jehova i no stap tingbaot ol sin blong yumi bifo! Mo long semtaem, bambae hem i neva fogetem ol gudfala wok we yumi mekem.—Sam 103:​9, 12; Hib. 6:10.

9. ?From wanem yumi no mas gohed blong tingbaot ol samting we yumi mekem bifo?

⁹ Sipos tingting blong yu i trabol from ol samting we yu bin mekem bifo, i gud yu mekem bes blong yu blong tingbaot ol samting we yu stap mekem naoia mo ol samting we bambae yu mekem long fiuja, i bitim we yu tingbaot ol samting we oli pas finis. Tingbaot eksampol blong aposol Pol. Hem tu i bin harem nogud, from we bifo hem i stap spolem ol Kristin, be hem i save se Jehova i fogivim hem. (1 Tim. 1:​12-15) ?Olsem wanem? ?Hem i gohed blong tingbaot ol nogud samting ya blong bifo? Nogat, hem i no tingbaot ol samting ya, sem mak olsem we hem i no tingbaot ol samting we hem i mekem blong kam wan Farisi. (Fil. 3:​4-8, 13-15) Defren olgeta, Pol i wok strong long wok blong prij mo i lukluk i go nomo long fiuja. Yes olsem Pol, yu no save jenisim samting we i pas. Be yu save presem Jehova mo mekem hem i glad naoia, mo tingbaot nambawan promes blong hem we bambae i kamtru long fiuja.

10. ?Yumi save mekem wanem sipos samting we yumi mekem bifo i spolem ol narafala?

¹⁰ Maet tingting blong yu i trabol from we yu bin mekem wan samting we i spolem ol narafala. ?Long taem olsem, wanem i save givhan? I gud yu mekem bes blong yu blong stretem problem ya, mo hemia i minim tu se  yu mas soemaot se yu rili sore. (2 Kor. 7:11) Askem Jehova blong i givhan long olgeta we oli harem nogud from samting we yu mekem. Nao Jehova i save halpem yufala blong stanap strong mo gat pis bakegen.

11. ?Yumi save lanem wanem long eksampol blong profet Jona? (Mo tu, yu luk pija.)

¹¹ Lanem samting from ol mastik blong yu bifo, mo rere blong letem Jehova i yusum yu long eni wok we hem i wantem. Makem eksampol blong profet Jona. Hem i no obei taem Jehova i sanem hem i go long Nineve, be i ronwe mo i folem wan narafala rod. Jehova i stretem Jona mo hem i lanem samting from mastik blong hem. (Jona 1:​1-4, 15-17; 2:​7-10) Jehova i no lego Jona. God i givim wan moa janis long hem blong go long Nineve, mo long taem ya Jona i gat strong tingting blong obei long Jehova. Hem i no letem mastik blong hem bifo i blokem hem blong akseptem wok ya we Jehova i givim long hem.—Jona 3:​1-3.

JEHOVA I GIVIM TABU SPIRIT BLONG MEKEM YUMI HAREM GUD

12. ?Olsem wanem Jehova i givim pis long yumi taem wan nogud samting i hapen long yumi? (Filipae 4:​6, 7)

¹² Jehova i save yusum tabu spirit blong hem blong mekem yumi harem gud, taem wan nogud samting i hapen long yumi. Tingbaot ekspiriens blong Ron mo Carol, we boe blong tufala i kilim hem wan i ded. Tufala i talem se: “Mitufala i bin fesem sam trabol bifo, be hemia i mowas. Mitufala i prea plante taem long naet taem mitufala i no save slip, mo mitufala i haremsave we Jehova i givim pis ya we Filipae 4:​6, 7 (Ridim.) i tokbaot.” Sipos yu stap fesem wan trabol we i mekem hat blong yu i brok, i gud yu prea plante taem long Jehova olsem we yu wantem, mo yu talemaot hat blong yu long hem. (Sam 86:3; 88:1) Gohed blong askem Jehova blong i givim tabu spirit long yu. Mo i sua se oltaem bambae hem i halpem yu.—Luk 11:​9-13.

13. ?Olsem wanem tabu spirit i save givhan long yumi blong gohed blong wosipim Jehova? (Efesas 3:16)

¹³ ?Yu yu fesem wan trabol we i mekem yu harem se yu no moa gat paoa? Long taem olsem, tabu spirit i save givim paoa long yu blong yu gohed blong wosipim Jehova. (Ridim Efesas 3:16.) Tingbaot ekspiriens blong wan sista we nem blong hem Flora. Taem hem mo hasban blong hem i mekem wok blong misinari, hasban blong hem i no stap tru long hem mo tufala i divos. Flora i talem se: “Mi harem nogud tumas se hem i no stap tru long mi, mo mi harem se mi no moa save tingbaot eni narafala samting. Mi prea long Jehova blong i givim tabu spirit blong mi save stanap strong. Jehova i givim samting we mi nidim mo i givhan long mi blong stanap strong, nating se fastaem i luk olsem se mi no save mekem olsem.” Flora i harem save se Jehova i halpem hem blong i trastem hem moa, mo bambae i givhan long hem long olgeta trabol blong hem. Hem i gohed se: “Ol tok blong Ol Sam 119:32 i stret gud long mi, we i talem se: ‘Bambae mi folem gud rod blong ol komanmen blong yu. From we yu yu mekem se i gat spes blong hem long hat blong mi.’”

14. ?Yumi save mekem wanem blong tabu spirit blong Jehova i halpem yumi?

¹⁴ ?Yu save mekem wanem afta we yu prea from tabu spirit? I gud yu mekem ol samting blong kasem moa tabu spirit. Olsem go long ol miting mo talemaot gud nius long ol narafala. Ridim Baebol evri dei blong yu save fulumap tingting blong yu wetem ol tingting blong Jehova. (Fil. 4:​8, 9) Taem yu stap rid, i gud yu makem sam man long Baebol we oli bin fesem sam trabol, mo luk olsem wanem Jehova i halpem olgeta blong stanap strong. Sandra, we yumi tokbaot hem finis, i bin fesem plante  defren trabol. Hem i talem se: “Stori blong Josef i rili tajem hat blong mi. Josef i no letem ol trabol we hem i fesem mo nogud fasin blong ol narafala i spolem frensip blong hem wetem Jehova.”—Jen. 39:​21-23.

JEHOVA I YUSUM OL BRATA MO SISTA BLONG LEFTEMAP TINGTING BLONG YUMI

15. ?Hu i save leftemap tingting blong yumi, mo olsem wanem oli save halpem yumi? (Mo tu, yu luk pija.)

¹⁵ Taem yumi harem nogud, ol brata mo sista oli save “givhan bigwan” long yumi. (Kol. 4:11) Jehova i save yusum olgeta blong soemaot se hem i lavem yumi. Ol brata mo sista oli save leftemap tingting blong yumi taem oli lesin gud long yumi, o maet sapotem yumi taem oli stap wetem yumi. Maet oli save ridim wan vas blong leftemap tingting blong yumi o prea wetem yumi. d (Rom 15:4) Samtaem wan brata o wan sista i save mekem yumi tingbaot tingting we Jehova i gat long yumi, mo halpem yumi blong gat stret tingting long yumi wan. Mo tu, ol brata mo sista oli save sapotem yumi, taem oli givim kakae long yumi taem yumi harem nogud.

16. ?Yumi save mekem wanem blong ol narafala oli sapotem yumi?

¹⁶ Blong ol narafala oli save sapotem yumi, maet yumi mas askem long olgeta. Ol brata mo sista oli lavem yumi mo oli wantem givhan. (Prov. 17:17) Be maet oli no save se yumi harem olsem wanem o oli no save samting we yumi nidim. (Prov. 14:10) Sipos yu harem nogud,  i gud yu talemaot filing blong yu long wan fren we i bigman long spirit. I gud yu letem olgeta oli save samting we bambae i givhan long yu. Mo tu, maet yu jusum blong talem filing blong yu long wan o tu elda we yu faenem i isi blong toktok long hem. Sam sista oli faenem se i isi blong oli storian wetem wan narafala sista we i bigman long tingting.

17. ?Wanem i save blokem yumi blong no kasem ol tok blong leftemap tingting, mo olsem wanem blong winim?

¹⁷ Blokem fasin ya blong wantem stap yu wan oltaem. Taem yu harem nogud long filing blong yu, maet yu no wantem joen wetem ol narafala. Samtaem maet ol brata mo sista oli no kasemsave long yu, o oli talem wan samting we i mekem yu harem nogud. (Jem. 3:2) Long taem olsem, yu no mas letem ol samting ya oli blokem yu blong kasem ol tok blong leftemap tingting blong yu. Wan elda we nem blong hem Gavin, we i kasem sik ya dipresen, i talem se: “Plante taem mi no wantem toktok o spenem taem wetem ol fren blong mi.” Nating se i olsem, Gavin i no letem filing ya i blokem hem, mo hem i harem gud taem hem i joen wetem ol narafala. Wan sista we nem blong hem Amy, i talem se: “Ol nogud ekspiriens blong mi bifo, oli mekem se i had blong mi trastem narafala. Be mi lanem blong lavem mo trastem ol brata mo sista, olsem we Jehova i trastem olgeta. Mi save se hemia i mekem Jehova i hapi mo i save mekem mi tu mi hapi.”

OL PROMES BLONG JEHOVA OLI SAVE MEKEM YUMI HAREM GUD

18. ?Yumi stap wet long wanem, mo yumi mas mekem wanem naoia?

¹⁸ Yumi save trastem fulwan se i no longtaem Jehova bambae i tekemaot evri samting we oli mekem yumi harem nogud long bodi mo filing blong yumi. (Rev. 21:​3, 4) Long taem ya, olgeta nogud samting we i bin hapen long yumi, bambae oli “no kam nating long hat” blong yumi. (Aes. 65:17) Olsem we yumi bin luk, tede tu Jehova i stap “fasem ol soa” blong ol man. Jehova i givim plante samting blong leftemap tingting blong yumi mo halpem yumi. Taswe, i gud yu akseptem help blong hem mo trastem fulwan se ‘hem i kea long yu.’—1 Pita 5:7.