1. ?Wanem sam long ol presen we Jisas i givim long yumi?

 I NO gat wan man long wol ya we i glad nomo blong givim samting long ol narafala olsem Jisas. Taem hem i stap long wol, hem i yusum bigfala paoa blong hem blong halpem ol narafala. (Luk 9:​12-17) Hem i givim wan bigfala presen long yumi, hemia taem hem i rere nomo blong givim laef blong hem from yumi. (Jon 15:13) Mo taem hem i laef bakegen, hem i gohed blong halpem yumi. Olsem we hem i promes, hem i askem Jehova blong i kafsaedem tabu spirit blong tijim yumi mo leftemap tingting blong yumi. (Jon 14:​16, 17, fut.; 16:13) Mo tru long ol miting blong kongregesen, Jisas i gohed blong givim ol samting we yumi nidim blong yumi naf blong pulum plante moa man raon long wol blong oli kam ol disaepol.—Mat. 28:​18-20.

2. Folem Efesas 4:​7, 8, ?hu ya ‘ol man ya we oli olsem presen’?

² Traem tingbaot wan narafala presen we Jisas i givim long yumi. Aposol Pol i tokbaot se afta we Jisas i go long heven, hem i “givim ol man i go olsem presen.” (Ridim Efesas 4:​7, 8.) Pol i eksplenem se Jisas i givim ol man ya blong oli sapotem kongregesen long ol defdefren rod. (Efes. 1:​22, 23; 4:​11-13) Tede, ol ‘man ya we oli olsem presen’ hemia ol man blong givhan, ol elda, mo ol eria elda. a I tru ol man ya oli sinman, taswe oli save mekem mastik. (Jem. 3:2) Be masta blong yumi Jisas Kraes i givim ol man ya olsem presen blong halpem yumi.

3. Tokbaot olsem wanem yumi save sapotem wok blong ‘ol man ya we oli olsem presen.’

³ Jisas i givim wan impoten wok long ‘ol man ya we oli olsem presen,’ hemia blong mekem kongregesen i kam strong. (Efes. 4:12) Be yumi ol narafala tu yumi save givhan long olgeta blong  oli mekem impoten wok ya. Traem tingbaot: Sam long yumi i joen long wok blong bildim ol Haos Kingdom. Mo ol narafala oli sapotem wok ya tu taem oli givim kakae, transpot, mo oli mekem sam moa narafala samting blong givhan. Long sem fasin, yumi evriwan i save sapotem ol man blong givhan, ol elda mo ol eria elda, tru long wanem we yumi talem mo mekem. Naoia bambae yumi luk gudfala samting we yumi kasem from ol hadwok blong olgeta, mo olsem wanem yumi save soemaot long olgeta mo Jisas we i givim ‘ol man ya we oli olsem presen,’ se yumi glad long olgeta.

OL MAN BLONG GIVHAN “OLI WOK BLONG GIVHAN LONG OL NARAFALA”

4. Long taem blong ol fas Kristin, ?olsem wanem ol man blong givhan “oli wok blong givhan long ol narafala”?

⁴ Long taem blong ol fas Kristin, sam brata oli mekem wok olsem ol man blong givhan. (1 Tim. 3:8) I luk olsem se olgeta nao oli stap mekem ol “wok blong givhan long ol narafala” we Pol i tokbaot. (1 Kor. 12:28) Ol man blong givhan oli mekem plante impoten wok, taswe ol elda oli save mekem gud wok blong olgeta blong tij mo lukaot gud long ol sipsip blong Kraes. Eksampol, maet ol man blong givhan oli halpem ol narafala blong mekem ol kopi blong Baebol o pem ol samting we oli nidim blong mekem ol kopi ya.

5. ?Wanem sam gudfala wok we ol man blong givhan oli stap mekem tede?

⁵ Traem tingbaot sam long ol wok we ol man blong givhan oli mekem long kongregesen blong yu. (1 Pita 4:10) Maet oli kasem wok ya blong lukaot long ol mane blong kongregesen o ol teritori, mekem oda blong ol buk blong kongregesen, lukaot long ol samting blong odio mo video, mekem wok blong welkam, o givhan blong lukaot gud long Haos Kingdom. Olgeta wok ya oli impoten, from i givhan blong mekem se kongregesen i wok folem plan. (1 Kor. 14:40) Antap long hemia, sam man blong givhan oli lidim sam haf long miting blong Kristin Wok Mo Laef, mo oli givim ol pablik tok tu. Mo tu, maet oli askem wan man blong givhan blong halpem wan elda blong lukaot long wan grup blong prij. Mo samtaem, ol elda oli save askem ol man blong givhan we oli naf gud, blong joenem olgeta blong visitim ol brata mo sista blong leftemap tingting blong olgeta.

6. ?Wanem sam risen we i mekem se yumi glad long ol wok we ol man blong givhan oli mekem?

⁶ ?Olsem wanem wok we ol man blong givhan oli mekem i halpem kongregesen? Wan sista long Bolivia nem blong hem Beberly b i talem se: “Mi talem tangkiu long ol man blong givhan from ol wok we oli stap mekem, from hemia i givhan blong mi save harem gud fulwan long ol miting. Hemia i mekem se mi save singsing, givim ol ansa, lesin gud long ol tok, mo lanem samting long ol video mo ol pija. Oli meksua se olgeta we oli stap long Haos Kingdom oli sef, mo oli givhan long olgeta we oli stap long haos blong oli save joen long miting tru long video konfrens. Mo afta long miting, oli givhan blong klinim Haos Kingdom, kaontem ol presen mane, mo meksua se yumi gat ol buk we yumi nidim. !Mi mi glad tumas long olgeta!” Leslie we i laef long Kolombia mo we hasban blong hem i wan elda, i talem se: “Hasban blong mi i nidim help blong ol man blong givhan blong lukaot long ol defdefren wok long kongregesen. Sipos i no gat ol man blong givhan, bambae hem i bisi tumas. Taswe, mi talem tangkiu long ol man blong givhan from we oli gat strong tingting mo oli rere blong givhan.” I sua se yu tu yu glad long ol wok we ol man blong givhan oli mekem.—1 Tim. 3:13.

7. ?Olsem wanem yumi save soemaot se yumi glad long ol man blong givhan? (Mo tu, yu luk pija.)

⁷ Nating se maet yumi glad long ol wok we ol  man blong givhan oli mekem, be yet Baebol i talem se: “Yufala i mas gat fasin ya blong talem tangkiu.” (Kol. 3:15) Christophe, we i wan elda long Finlan, i tokbaot samting we hem i mekem blong soemaot tangkiu blong hem, i se: “Mi sanem wan kad o wan teks mesej mo mi raetem wan vas mo tokbaot stret samting we man blong givhan ya i mekem blong leftemap tingting blong mi, o from wanem mi glad long wok blong hem.” Pascal mo Jael, we tufala i laef long Niukaledonia, oltaem tufala i prea from ol man blong givhan. Pascal i se: “I no longtaem i pas, mitufala i prea plante from ol man blong givhan. Mitufala i talem tangkiu long Jehova from olgeta mo askem hem blong i stap wetem olgeta mo halpem olgeta.” Jehova i lesin long ol kaen prea olsem, mo hemia i givhan long ful kongregesen.—2 Kor. 1:11.

OL ELDA “OLI STAP WOK HAD LONG MEDEL BLONG YUFALA”

8. ?From wanem Pol i talem se ol elda long taem blong ol fas Kristin oli “wok had”? (1 Tesalonaeka 5:​12, 13)

⁸ Ol elda long taem blong ol fas Kristin oli wok had blong givhan long kongregesen. (Ridim 1 Tesalonaeka 5:​12, 13; 1 Tim. 5:17) Olgeta oli stap “lidim” kongregesen taem oli lidim ol miting mo mekem ol desisen olsem bodi blong ol elda. Mo tu oli “stap givim advaes” long ol brata mo sista long fasin we i soemaot lav blong protektem kongregesen. (1 Tes. 2:​11, 12; 2 Tim. 4:2) I tru, ol man ya oli wok had tu blong lukaot long ol famle blong olgeta, mo blong oli gohed blong fren gud wetem Jehova.—1 Tim. 3:​2, 4; Taetas 1:​6-9.

9. ?Wanem sam wok we ol elda oli stap mekem tede?

⁹ Tede, ol elda oli bisi. Oli ol ivanjelis. (2 Tim. 4:5) Oli gat strong tingting blong prij, oganaesem wok blong prij long teritori, mo trenem yumi blong prij mo tij gud. Mo tu oli mekem wok olsem ol jaj we oli gat sore mo we oli mekem i sem mak nomo long evri man. Taem wan Kristin i mekem wan bigfala sin, ol elda oli traehad blong halpem hem blong i fren gud bakegen wetem Jehova. Mo long sem taem oli lukaot gud blong mekem kongregesen i stap klin. (1 Kor. 5:​12, 13; Gal. 6:1) Antap long ol samting ya, ol elda oli olsem ol man blong lukaot long sipsip. (1 Pita 5:​1-3) Oli givim ol gudfala tok we i stanap long Baebol, oli traehad blong save evriwan long kongregesen, mo oli visitim ol brata mo sista blong leftemap tingting blong olgeta. Nating se ol elda oli bisi long ol wok ya, be sam long olgeta oli givhan tu blong wokem ol Haos Kingdom mo lukaot gud long olgeta, oganaesem ol bigfala asembli, mo wok long Komiti Blong Toktok Wetem Ol Dokta mo Grup We i Visitim Ol Sik Man. !Ol elda oli wok had blong givhan long yumi!

10. ?Wanem sam risen we i mekem se yumi glad long ol wok we ol elda oli mekem?

¹⁰ Jehova i talemaot finis se ol man blong lukaot long sipsip bambae oli lukaot gud long yumi mo bambae yumi ‘no moa fraet, yumi no moa seksek.’ (Jer. 23:4) Johanna, wan sista long Finlan, i luksave se ol tok ya i tru taem mama blong hem i kasem wan strong sik. Hem i se: “Nating se mi faenem i had blong tokbaot ol filing blong mi long ol narafala, be wan elda we mi no save gud hem i gat longfala tingting long mi, i prea wetem mi mo i mekem mi haremsave se Jehova i lavem mi. Mi no tingbaot stret samting we hem i talem, be mi tingbaot se long taem ya mi no moa wari. Mi bilif se Jehova i sanem hem blong i halpem mi long taem ya.” ?Olsem wanem ol elda long kongregesen blong yu oli halpem yu?

11. ?Olsem wanem yumi save soemaot se yumi glad long ol elda? (Mo tu, yu luk pija.)

¹¹ Jehova i wantem se yumi soemaot long ol elda se yumi glad “from wok we oli mekem.” (1 Tes. 5:​12, 13) Henrietta, we hem tu i laef long Finlan, i talem se: “Ol elda oli glad nomo blong halpem ol narafala. Be hemia i no min se oli gat  moa taem mo paoa blong halpem ol narafala o oli no gat ol problem long laef blong olgeta. Samtaem mi talem long olgeta se: ‘?Yu save wanem? Yu yu wan gudfala elda. Mi hop se yu save samting ya.’” Wan sista long Teki we nem blong hem Sera, i talem se: “Ol elda oli nidim ‘fuel’ blong oli save gohed. So yumi save raetem wan kad long olgeta, invaetem olgeta blong kakae o joenem olgeta long wok blong prij.” ?I gat wan elda long kongregesen blong yu, we yu glad long ol wok we hem i stap mekem? I gud yu lukaot rod blong soemaot se yu glad long ol wok blong hem.—1 Kor. 16:18.

OL ERIA ELDA OLI GIVHAN BLONG MEKEM BILIF BLONG YUMI I STRONG

12. Long faswan handred yia, ?wanem narafala rod we Jisas i yusum blong mekem bilif blong ol kongregesen i strong? (1 Tesalonaeka 2:​7, 8)

¹² Jisas i putumap ‘ol man ya we oli olsem presen’ blong givhan long kongregesen long ol narafala rod tu. Jisas i yusum ol elda long Jerusalem blong sanem Pol, Banabas, mo ol narafala olsem ol eria elda. (Wok 11:22) ?From wanem? Hemia blong oli mekem semfala wok olsem ol man blong givhan mo ol elda oli mekem, hemia blong mekem bilif blong ol kongregesen i kam strong. (Wok 15:​40, 41) Ol man ya oli lego plante samting blong oli save mekem wok ya. Mo oli putum laef blong olgeta long denja tu blong tijim mo leftemap tingting blong ol narafala.—Ridim 1 Tesalonaeka 2:​7, 8.

13. ?Wanem sam wok we ol eria elda oli mekem?

¹³ Ol eria elda oli travel plante. Samfala oli travel plante aoa blong kasem ol kongregesen. Evri wik, wan eria elda i mekem ol tok, i visitim ol brata sista blong leftemap tingting blong olgeta, i mekem miting wetem ol paenia, ol elda, mo i lidim wok blong prij. Mo tu hem i rerem ol tok, i oganaesem ol wan dei asembli mo ol bigfala asembli. Hem i tij long ol skul blong paenia, hem i oganaesem wan spesel miting wetem ol paenia long eria we hem i wok long hem, mo  hem i mekem sam narafala impoten wok tu we branj i givim long hem.

14. ?Wanem sam risen we i mekem se yumi glad long ol wok we ol eria elda oli mekem?

¹⁴ ?Olsem wanem ol eria elda oli givhan long ol kongregesen? Wan brata long Teki i tokbaot ol visit we ol eria elda oli stap mekem, i se: “Evri visit we ol eria elda oli mekem, i pulum mi blong yusum moa taem blong mi blong halpem ol brata mo sista. Mi mitim plante eria elda, be i no gat wan long olgeta we i givim tingting ya se hem i no gat taem blong storian wetem mi o i bisi tumas.” Johanna we yumi tokbaot hem finis, i wok wetem wan eria elda long wok blong prij, be tufala i no faenem wan man long haos. Be yet hem i talem se: “Oltaem bambae mi tingbaot dei ya. Tufala sista blong mi i jes muvaot i no longtaem, mo mi rili misim tufala. Eria elda ya i leftemap tingting blong mi mo i halpem mi blong luksave se, nating se mi mekem wok blong Jehova mo mi stap longwe long ol fren mo famle blong mi, be hemia i blong smoltaem nomo. Long niufala wol, bambae yumi gat moa taem blong spenem wetem olgeta.” Plante long yumi i glad long ol eria elda mo long ol samting we oli mekem blong halpem yumi.—Wok 20:37–21:1.

15. (1) Folem 3 Jon 5-8, ?olsem wanem yumi save soemaot se yumi glad long ol eria elda? (Mo tu, yu luk pija.) (2) ?From wanem yumi mas soemaot se yumi glad long ol waef blong ol man ya we oli stap wok had long kongregesen? ?Mo olsem wanem blong mekem? (Yu luk bokis ya “ Tingbaot Ol Waef Blong Olgeta.”)

¹⁵ Aposol Jon i leftemap tingting blong Gaeas blong i tekem ol brata we oli kam visit blong oli stap long haos blong hem, mo blong i “givhan long olgeta long rod blong olgeta, long fasin we God i glad long hem.” (Ridim 3 Jon 5-8.) Yumi save mekem sem mak, taem yumi invaetem eria elda blong i kakae long haos blong yumi. Wan narafala rod hemia taem yumi sapotem arenjmen blong wok blong prij taem hem i kam visit. Leslie, we yumi bin tokbaot  hem finis, i soemaot tangkiu blong hem long wan narafala rod tu, hem i se: “Mi prea se Jehova bambae i givim samting we oli nidim. Mo tu mi mo hasban blong mi i raetem leta long olgeta blong talem se ol visit blong olgeta i rili givhan long mitufala.” Tingbaot se ol eria elda, oli no gat spesel paoa. Samtaem, oli sik, oli wari, mo tingting i foldaon. !Taswe, ol gudfala tok we yu talem o smol presen we yu givim long olgeta, maet hemia nao ansa blong prea we oli mekem i go long Jehova blong askem help!—Prov. 12:25.

YUMI NIDIM ‘OL MAN YA WE OLI OLSEM PRESEN’

16. Folem Ol Proveb 3:​27, ?wanem ol kwestin we ol brata oli save askem olgeta wan?

¹⁶ Raon long wol, yumi nidim plante moa brata blong Jehova i save yusum olsem ‘presen’ blong mekem ol wok. Sipos yu wan brata we i baptaes finis, ?yu yu naf blong givhan? (Ridim Ol Proveb 3:27.) ?Yu stap wok had blong kam wan man blong givhan? Sipos yu yu wan man blong givhan, ?yu stap wok had blong kam wan elda? c ?Yu rere blong mekem sam jenis long laef blong yu blong yu save joen long Skul Blong Kingdom Ivanjelis? Skul ya bambae i halpem mo trenem gud yu, olsem nao Jisas i save yusum yu blong mekem plante moa wok. Sipos yu harem se yu no save mekem ol samting ya, i gud yu prea long Jehova. Askem hem blong i givim tabu spirit long yu blong yu naf blong mekem eni wok we yu kasem.—Luk 11:13; Wok 20:28.

17. ?‘Ol man ya we oli olsem presen,’ oli pruvum wanem long saed blong King blong yumi Jisas?

¹⁷ Ol brata we Jisas i putumap olgeta olsem ol “presen,” oli olsem ol pruf we i soemaot se hem i stap lidim yumi long ol las dei ya. (Mat. 28:20) Yumi glad tumas blong gat wan King we i lavem yumi, i kaen, i save samting we yumi nidim mo i givim ol brata blong halpem yumi. Taswe i gud yumi lukaot rod blong soemaot se yumi glad long ol wok we ol man ya oli stap mekem. Mo yu neva mas foget blong talem tangkiu long Jehova, we hem i stamba blong “olgeta gudfala presen mo ol presen we oli nambawan.”—Jem. 1:17.