Rum long doa, hem i wan haf blong rod blong kam insaed long tempol long Rum We i Tabu. Baebol Long Niu Wol Translesen we oli printim bifo 2023, i talem se “rum ya long doa, longfala blong hem i 20 kiubit sem mak olsem bigfala blong hem, mo hae blong hem i 120.” (2 Kron. 3:4) Sam narafala translesen tu oli talem se rum ya long doa, hae blong hem i “120 kiubit,” hemia i min se hae blong hem i 53 meta.

Be Baebol Long Niu Wol Translesen we oli printim long 2023, i tokbaot rum long doa blong tempol blong Solomon se: “Hae blong hem i 20 kiubit,” o samwe 9 meta. a Traem luk sam risen from wanem Baebol ya i talem olsem.

Fas King 6:3 i no talem se rum ya long doa i hae olsem wanem. Jeremaea nao i raetem vas ya, mo hem i tokbaot nomo se rum ya i longfala olsem wanem mo se i dip olsem wanem, be hem i no tokbaot hae blong hem. Be long nekis japta, hem i tokbaot plante moa samting long saed blong tempol ya, wetem Si long aean, ol ten kat, mo tu bigfala pos long kopa, we oli stanap aotsaed long rum ya long doa. (1 King 7:​15-37) Sipos rum ya long doa i hae bitim 50 meta mo i hae moa bitim tempol, ?from wanem Jeremaea i no tokbaot hae blong hem? Mo long ol handred yia biaen, ol man Jiu we oli stap raetem histri, olgeta tu oli talem se rum ya long doa hem i no hae moa long tempol blong Solomon.

Ol skola oli no sua se ol wol blong tempol oli save sapotem rum ya long doa we hae blong hem i 120 kiubit o nogat. Ol ston mo brikis we oli yusum blong wokem ol longfala wol long taem bifo, olsem hemia long get blong tempol long Ijip, oli wokem stamba blong hem daon i bigwan mo i go smol long top blong hem. Be hemia long tempol blong Solomon i defren. Ol skola oli talem se ol wol blong hem oli no tik bitim 6 kiubit, o 2.7 meta. Theodor Busink we i wan man blong histri mo i stadi gud long ol bilding, i talem se: “I no posibol we hae blong rum ya long doa i 120 kiubit, from we ol wol blong [tempol ya long fored], oli no tik.”

Maet oli mestem taem oli stap kopi ol tok blong 2 Kronikel 3:4. Nating se long sam olfala hanraet, vas ya i talem “120,” be long sam narafala hanraet we yumi save trastem, olsem Codex Alexandrinus we i wan hanraet blong ol yia fo handred mo Codex Ambrosianus blong ol yia faef handred, i talem “20 kiubit.” ?From wanem man we i mekem kopi blong vas ya i mestem nao i raetem “120”? Hemia from we long lanwis Hibru, tok ya “handred” mo “kiubit” tufala i sem mak nomo. Taswe, maet man ya i wantem raetem tok ya “kiubit,” be i girap i raetem tok ya “handred.”

I tru, nating se yumi traem blong kasemsave gud long ol smosmol save ya mo blong soemaot se tempol blong Solomon i stret, be i gud yumi tingbaot moa samting we tempol ya i pijarem, hemia bigfala tempol long saed blong spirit. !Yumi glad tumas se Jehova i invaetem evri man blong hem, blong oli wosipim hem long tempol ya!—Hib. 9:​11-14; Rev. 3:12; 7:​9-17.