1, 2. ?Ol man blong Jehova oli stap faet agensem wanem?

YUMI evriwan i kasem ol hadtaem, stat long taem blong gudfala man ya Ebel i kam kasem ol gudfala man blong God tede. Aposol Pol i talem long ol fas Kristin we oli stap traehad blong mekem Jehova i glad mo kasem blesing, i se: “I gat plante samting we i stap mekem yufala i harem nogud, be ol samting ya oli no winim yufala.” (Hibrus 10:32-34) Pol i tokbaot se ol hadtaem we ol Kristin oli kasem, i olsem ol man we oli stap resis, resling, mo boksing blong winim wan praes. (Hibrus 12:1, 4) Tede, yumi stap long wan resis blong kasem laef. Yumi gat ol enemi we oli wantem blokem yumi, mo mekem yumi lusum glad mo laef we i no save finis.

² Faet we i strong moa blong winim, hemia faet blong yumi agensem Setan mo wol blong hem. (Efesas 6:12) I impoten tumas we yumi blokem waes blong wol ya, mo ol rabis fasin olsem smok, dring bitim mak mo tekem drag. Mo tu, yumi mas gohed blong faet agensem tingting we i foldaon mo ol slak fasin blong yumi.​—2 Korin 10:3-6; Kolosi 3:5-9.

3. ?Olsem wanem Jehova i trenem yumi blong faet agensem ol enemi blong yumi?

 ³ ?Olsem wanem? ?Yumi save winim ol samting we oli olsem ol strong enemi blong yumi? !Yes, yumi save win! Be bambae i no isi. Pol i tokbaot se hem i olsem wan man blong boksing. Hem i se: “Sipos . . . mi boksing, be mi no save sakem han blong mi i go olbaot, we i no kasem man.” (1 Korin 9:26) Wan man we i boksing i mas faet agensem wan narafala man blong boksing. Long sem fasin, yumi mas faet agensem ol enemi blong yumi. Jehova i yusum Baebol blong givhan long yumi mo i trenem yumi blong faet. Mo tu, hem i yusum ol buk blong yumi, ol miting, mo ol asembli. ?Yu yu yusum olgeta save we yu stap kasem? Sipos yu no mekem olsem, yu yu olsem wan man blong boksing we i stap sakem han olbaot. Hemia i min se yu no stap faet fulwan blong agensem enemi blong yu.

4. ?Yumi save winim Setan olsem wanem?

⁴ Oltaem yumi mas wekap gud. ?From wanem? From we ol enemi blong yumi oli save kasem yumi long taem we yumi no tingbaot, mo long taem we yumi no gat paoa. Baebol i givim woning mo i leftemap tingting blong yumi, taem hem i talem se: “Bambae yufala i no letem ol rabis fasin i winim yufala. Yufala i mas holemstrong ol stret fasin blong yufala, blong winim ol rabis fasin.” (Rom 12:21) !Sipos yumi gohed blong faet, yumi save win! Be, sipos yumi no lukaot gud mo yumi no moa faet, Setan, wol blong hem, mo ol slak fasin blong yumi oli save winim yumi. Taswe yumi mas gohed. Yumi no mas letem tingting blong yumi i foldaon mo letem han blong yumi i kam slak.​—1 Pita 5:9.

5. (1) ?Yumi mas tingbaot wanem blong winim faet blong yumi? (2) ?Bambae yumi tokbaot stori blong hu?

⁵ Sipos yumi wantem winim faet blong yumi, oltaem yumi mas tingbaot blong mekem God i glad mo kasem blesing. Hemia nao risen from wanem yumi stap kasem ol hadtaem. Hibrus 11:6 i talem se: “Sipos wan man i wantem kam long God, hem i mas bilif we God i stap, mo we i stap mekem i gud long olgeta we oli stap traem faenem hem.” Tok ya traem faenem hem, i min se yumi mas wok had, sipos yumi wantem se God i glad long yumi. (Ol Wok 15:17) Baebol i tokbaot stori blong ol man mo woman we oli wok had. Sam long olgeta hemia, Jekob, Rejel, Josef, mo Pol we oli kasem sam hadtaem mo oli harem nogud long tingting mo bodi blong olgeta. Be oli naf blong winim ol hadtaem ya. Eksampol blong olgeta ya i soemaot se sipos yumi wok had, Jehova i save blesem yumi. I gud yumi luk samting ya.

6. ?From wanem Jekob i traehad mo i stanap strong? ?Mo hem i kasem wanem blesing? (Yu luk pija long stat blong stadi.)

⁶ Jekob i traehad mo i stanap strong, from we hem i lavem Jehova mo i tinghae long fasin blong hem blong fren gud wetem Jehova. Jekob i bilif strong long promes blong Jehova se bambae hem i blesem olgeta we oli kamaot biaen long hem. (Jenesis 28:3, 4) Taem Jekob i gat klosap 100 yia, hem i resling wetem wan enjel, blong hem i save kasem wan blesing. (Ridim Jenesis 32:24-28.) ?Olsem wanem? ?Jekob i naf blong resling wetem strongfala enjel ya? !Nogat! Be hem i gat  strong tingting, mo hem i soemaot se hem i wok had blong kasem wan blesing. Ale Jehova i blesem hem mo givim nem ya Isrel long hem, we i minim “Man blong faet agens long God.” Jekob i kasem blesing mo i mekem Jehova i glad. Hemia nao samting we yumi tu yumi wantem.

7. (1) ?Wanem i mekem Rejel i harem nogud tumas? (2) ?Rejel i mekem wanem mo hem i kasem wanem blesing?

⁷ Rejel we Jekob i lavem hem tumas, i wantem blong luk olsem wanem Jehova i holemtaet promes we hem i mekem wetem Jekob. Be i gat wan problem, Rejel i no save gat pikinini. Hemia wan samting we i mekem plante woman long taem bifo oli harem nogud tumas. ?Rejel i mekem wanem blong winim hadtaem ya? Hem i no letem tingting blong hem i foldaon. Be hem i gohed nomo blong prea oltaem long Jehova from. Jehova i harem prea blong hem, nao i blesem hem, taem hem i gat pikinini. Taswe, Rejel i talem se: “Mi mi stap faet strong . . . be mi stap win.”​—Jenesis 30:8, 20-24.

8. ?Wanem ol hadtaem we Josef i kasem? ?Eksampol blong hem i givhan long yumi olsem wanem?

⁸ Maet eksampol blong Jekob mo Rejel i givhan bigwan long boe blong tufala Josef, taem hem i kasem trabol. Taem Josef i gat 17 yia, laef blong hem i jenis bigwan. Ol brata blong hem oli jalus long hem, nao oli salem hem blong i kam wan slef. Biaen hem i stap long kalabus blong plante yia, nating se hem i no mekem wan samting we i rong. (Jenesis 37:23-28; 39:7-9, 20, 21) Be tingting blong hem i no foldaon, mo hem i no kam kros, nao i wantem givimbak long ol brata blong hem. ?From wanem? From we Josef i tinghae moa blong fren gud wetem Jehova, mo i trastem Hem fulwan. (Levitikas 19:18; Rom 12:17-21) Eksampol blong Josef i save givhan long yumi. Taem yumi smol maet laef blong yumi i  had, no maet laef blong yumi naoia i had, nating se i olsem yumi mas gohed blong faet mo stanap strong. Sipos yumi mekem olsem, i sua se Jehova bambae i blesem yumi.​—Ridim Jenesis 39:21-23.

9. ?Olsem wanem yumi save folem fasin blong Jekob, Rejel, mo Josef?

⁹ Tede tu, yumi stap kasem ol hadtaem. Maet yu harem nogud from we, wan man i mekem i no stret long yu, i no laekem yu, no maet narafala i jalus long yu. I nogud yu letem tingting blong yu i foldaon, be yu mas tingbaot samting we i givhan long Jekob, Rejel, mo Josef blong oli glad nomo blong wosipim Jehova. God i givim paoa long olgeta mo i blesem olgeta, from we oli tinghae long fasin blong olgeta blong fren gud wetem Hem. Mo tu, oli gohed blong faet mo oli wok folem prea blong olgeta. From we yumi laef long ol lasdei, i impoten we yumi tingbaot oltaem ol nambawan blesing we bambae yumi kasem long fiuja. ?Yu yu rere blong faet, no traehad blong mekem Jehova i glad long yu?

10, 11. (1) ?From wanem yumi mas faet, blong kasem blesing blong God? (2) ?Wanem i save givhan long yu blong mekem ol desisen we i stret?

¹⁰ ?From wanem yumi mas faet blong kasem blesing blong God? From we yumi sinman, maet yumi mas traehad blong winim ol nogud tingting we yumi gat. Samfala oli traehad blong gat stret tingting taem oli stap prij, mo sam narafala oli harem nogud from we oli sik no oli stap olgeta nomo. Be i gat samfala we oli harem se i had blong fogivim narafala we i spolem olgeta. Nating se yumi mekem wok blong Jehova longtaem finis no nogat, be yumi evriwan i mas faet agensem ol samting we oli save blokem yumi blong wosipim God, we hem nao i stap blesem yumi.

¹¹ Blong talem stret, i no isi blong mekem ol desisen we oli stret mo folem ol Kristin fasin. Speseli, taem yumi mas blokem ol nogud tingting we yumi gat. (Jeremaea 17:9) Sipos yu harem olsem, i gud yu prea blong Jehova i givim tabu spirit long yu. Prea mo tabu spirit i save givhan long yu blong mekem ol desisen we i stret, nao biaen Jehova bambae i blesem yu. Yu mas gat strong tingting blong wok folem prea blong yu. I gud yu ridim Baebol evri dei mo mekem prapa stadi blong yu mo famle wosip.​—Ridim Ol Sam 119:32.

12, 13. ?Wanem i givhan long tu Kristin blong winim ol nogud tingting we tufala i gat?

¹² I gat plante stori blong ol brata mo sista we oli soemaot se Baebol, tabu spirit, mo ol buk blong yumi, oli givhan long olgeta blong winim ol nogud tingting. Wan yangfala brata i ridim wan haf long Wekap! blong Eprel-Jun 2004 we i se, “?Olsem Wanem Blong No Moa Wantem Ol Nogud Samting?” Hem i talem se: “Taem mi ridim haf ya, ‘samfala oli faenem i strong we i strong blong winim ol tingting we oli no stret,’ mi harem se mi no stap mi wan, i gat ol narafala tu we oli stap traehad olsem mi, blong blokem ol nogud tingting.” Mo tu, long sem Wekap!, haf ya “Ol Fasin Blong Laef We Oli Narakaen​—?God i Agri Long Olgeta?” i givhan long yangfala ya blong luksave se samfala oli mas gohed blong faet agensem ol  nogud tingting, we i olsem “nil blong aranis” we i stap stikim olgeta. (2 Korin 12:7) Nating se oli stap faet, be oli gat wan klia tingting long saed blong fiuja. Hem i gohed i se: “From samting ya, mi ting se evri dei, mi save holemstrong. Mi talem tangkiu long Jehova from ogenaesesen blong hem we i givhan long yumi blong stanap strong.”

¹³ Yu traem tingbaot wan sista long Yunaeted Stet. Hem i raetem se: “Mi wantem talem tangkiu from we oltaem yufala i stap givim samting we mifala i nidim long stret taem. Plante taem, mi harem se ol haf we oli raetem, i kam stret long mi. Plante yia finis, mi stap faet strong agensem wan samting we Jehova i no laekem. Samtaem, mi harem se mi wantem lego evri samting mo mi stop blong faet. Mi save se Jehova i gat sore mo i save fogivim mi, be from we mi gat nogud tingting ya mo mi no agensem, mi harem se i no stret blong God i givhan long mi. Nogud tingting ya i spolem gud mi. . . . Afta we mi ridim haf ya ‘?Long Hat Blong Yu, Yu Wantem Tumas Blong Save Jehova?’ we i stap long Wajtaoa blong 15 Maj 2013, mi harem save se Jehova i wantem givhan long mi.”

14. (1) ?Pol i save wanem long saed blong ol trabol blong hem? (2) ?Yumi save winim ol slak fasin blong yumi olsem wanem?

¹⁴ Ridim Rom 7:21-25. Pol i save se i had blong faet agensem ol nogud tingting mo ol slak fasin. Be hem i save se blong winim faet ya, hem i mas prea long Jehova, i dipen long hem, mo i soemaot se hem i bilif long sakrefaes blong Jisas. ?Olsem wanem long yumi? ?Yumi save winim ol slak fasin blong yumi? Yes, sipos yumi folem fasin blong Pol. Mo yumi dipen fulwan long Jehova, mo yumi bilif long sakrefaes blong Jisas.

15. ?Jehova i save givhan long yumi blong stanap strong olsem wanem?

¹⁵ Samtaem God i save letem yumi blong soemaot tingting we yumi gat long wan trabol. Yu traem tingbaot, sipos yumi, no wan famle blong yumi i kasem wan bigfala sik, no narafala i mekem i no stret long yumi, ?bambae yumi mekem wanem? Sipos yumi trastem Jehova fulwan, bambae yumi askem strong long hem blong i givim paoa long yumi blong obei long hem, blong yumi gohed blong glad, mo fren gud wetem hem. (Filipae 4:13) Ol stori blong ol Kristin bifo mo tede, oli soemaot se prea i save givim paoa long yumi mo i mekem yumi no fraet blong yumi gohed blong stanap strong.

16, 17. ?Yu mas gat strong tingting blong mekem wanem?

¹⁶ Setan i wantem se tingting blong yu i foldaon, yu no moa gohed mo yu letem han blong yu i slak. Taswe yu mas gat strong tingting blong “holemstrong ol samting we oli gud.” (1 Tesalonaeka 5:21) !Yu save winim Setan, rabis wol blong hem, mo ol nogud tingting! Yu save win sipos yu trastem Jehova fulwan se bambae hem i givim paoa mo i givhan long yu.​—2 Korin 4:7-9; Galesia 6:9.

¹⁷ Taswe, yu mas gohed blong faet, mo yu mas gohed blong traehad mo stanap strong. Sipos yu mekem olsem, Jehova bambae i ‘letem olgeta gudgudfala samting i kam long yu we i plante we i plante.’​—Malakae 3:10.